مـلّ

ماهوش مستني يضحكله النهار مخصوص

ولا عمره في يوم اتمنى ست الحسن تتمناه

ولا عاوز يضم الدنيا بين دراعاته و يغمض

ولا بيحلم تنادي عليه بنات النور و تستناه

ماهوش عاوز يقول الكلمة تتوزع على الأكتاف

ولا في وقت ما يبكي أو يضحك يكون متشاف

و لما يندهه بكره .. ماهوش عاوز يبان خوّاف

بقاله سنين مصمم يلتزم بالسطر

و راضي يسلسله الـ "لازم"

و لما بتتولد فكرة بيدفنها في أيامه

قراره فـ نكسته .. حازم

و أعمى فـ خطوته كالقطر

بيتملّى طرق سيره و نبرة صوته بالميللي

و في محراب بناه غيره بيتعبّد و بيصلّي

كبت الروح و كتم البوح اتكتبوا عليه .. فرض

و مُرغم يبتهل بيهم و ممنوع عنه حق الرفض

في جوفه بتتزرع ببرود بيوت الشيب

عيونه مُلهَمة تغمّض بوحي الغصب

و مسجون الكلام جواه بحُكم من الحرام و العيب

مـلّ الصمت و سكونه و استسلامه للإكراه

عشرين طريق خطا فيهم

بخطاوي كانت ناكراه

مـلّ الفكرة تطرح فيه يموّتها

مـلّ دماغه تصرخ فيه يسكّتها
و استهوانه بحياته اللي ماعاشهاش

هايتمرّد و هايعاند عشان رافض

يبص لنفسه فـ مرايته و مايشوفهاش