كل النجوم الفايرة في عينيكي
ماتكفينيش
أنا ،،
ضل الأمان من قلبك الباير
على عمرك البور
أنا ،،
أول حقيقة في سكتك
أم الخطاوي الزور

عاشق سواد الليل لغاية ف النهار
و في النهار ..
بتحل لعنة غنوتي على كل بيت سكنه القمر
على كل صفحة ميتة
ضحكتها من عرق النجوم
الأنانية يا أعزائي البشر الطيبين
مش شر
الأنانية .. أسلم وسيلة لانتهاج الخير
من غير ضرر

ترابيزة 19

عين الحياة
و مطارح التنزيه ف قلبه للحقيقة و الألم
عن لاختيار في ساعة التنزيل
دابت قصادها ..
كل الخطاوي و السكك
ما بين بنات الناس و بين بنات الليل

ماكانتش بتضحك
لكن ..
شوقها المحبوس في عينيها
من ورا عواميد الدخان
كان فاضح كل حقيقة
حاولت تداريها بالماكياج
الكحل ساعتها ما صانش الوعد
ثبّتها في نص المشهد
عرّاها بدون مونتاج

هناك ..
حيث المشاهد و الشوارع و القصص و الناس
تاهت عن اللمة
و العتمة وهم بيرتجف تحت القميص
و الليل تراب ..
سكن الملامح , و النفوس
لهفتها قادت جوا منه الممكنات
قاس المشاعر بالفلوس

الموت هناك أقرب صديق لعشاقه
مسموح لكل الموجودين
يتلوّنوا بالنار كما شاءوا
و يسنّوا أنياب الوجع
و يهادوا بيها الخلق
أرواحهم ..
أضعف كتير من إزاز سهل تكسيره
لحظة تجلّي الممكنات كلها
النور ساعتها ماكنش له حظ الظهور
لكن ايديه المعجزة
رسمت خطوط سيره

كان م الضروري وقتها
ينفض غبار الرهبة عن روحه
و يسد شق الخوف
و يلملم المكسور
و يلصّم الصورة بأي وسيلة
عند البنات .. مش ضروري إزاي وصلت
المهم .. تعرف تسبُك الحيلة

و بين كلام و سكوت و همهمة فالصو
و سذاجة الاحساس
وقت افتراضه ان العدم ..
قادر يجمّع قلبها بالتلج جوا الكاس
بين ابتسامة ميتة و سؤال
قلبه انتفض , و اتهد دير الأمنية
و فسدت التعويذة
لحظة خضوعها المُستكين لقصيدة أغنى بالصور
سايب جمالها احتياجه وحده ع الترابيزة

كذبوا اللي قالوا إن النهار .. سجن الروح
و ان التزام الشمس بالمشهد الفاضح
علّمها .. هتك ستر البوح
كذبوا اللي قالوا إن النهار عيونه بور
الليل .. ماهوش مأوى لبنات النور
الليل شيطان مسعور
مستور بسحر ضي القمر
و بالنجوم الزور
الليل .. أكبر حقيقة مزيّفة
مسنودة ع السيرة
/
صوت المغني بأغنياته العيرة
دخان سيجارته و دوامات البيرة
ماكانوش صحيح أهون عليه
لكنهم ،،
أرحم كتير من حب بالتسعيرة

مات الكلام
يمكن ساعتها ماكنش فيه داعي
أو ربما كان السكوت ..
قادر ينجّي قلبها من دوامات الموت
مش رُب ضارة في الطريق ..
تُصلُب عامود البيت
و تشق ستر النور
و تنيّم الماضي ؟
الحلوة قامت تغزل الحواديت
من دمها المهدور
و بقلبها المليان على الفاضي

مرهون لأحضان السكات
بسرقة النظر
موهوم بحواديت البنات
عن البيوت الدفيانين في البرد
و عن المطر
الساحر اللي بدون ملامح
أبو العيون المُبهمة و الايدين الحرير

هو .. مش أمير

ولا كان في حلمه ..

يروّض الخيل اللي قادرة تشق عتمة جوفه

آخر مداه في الأمنيات إنها ..

ساعة ما يحضن عينيها / بس تشوفه

بعد انحسار الموج عن الأحلام
بعد افتراق الضي عن الخطوة
بعد التمنِّي و الوجع و الابتسام
بعد اشتياق الشوف في عكس الاتجاه
الموت سبيل العاشقين ، الوحيد ، للنجاة
سلّم لحضن الرحايا الباقي من قلبك
الموت ، ساعتها ، في حد ذاته حياة

أنا ...
دكان صغير وسط شارع غرقان مولات
الورقة الفاضية اللي ما بين شهور النتيجة
آخر تكّة في كالون الباب
سوستة جاكيت مقفولة في عز يناير الساعة اتنين بالليل
لبان نعناع بعد أكلة رنجة حلوة
ترانس في لمبة نيون
أنا ...
خانة فاضية في الشهادة .. و مسيرها هتتملى

أنا ..
حيث الحاجات ملهاش علاقة ببعضها
أرخص وسيلة لالتزام السكوت
أنا ..
أسوأ صديق
أفشل حبيب
أقصر طريق للموت

شطط

احتكار الحقايق عمى

أنا لسه فاكر