كلام ماكنش ليها

كل الكلام الجيّ ده و غيره
ماكنش ليها
لكنها الوحيدة - للأسف -
اللي بتعرف تلفت أنظار العالم كله
من غير ما تعرف

صوتها الفيولين
و صوابع روحها الدفيانة بكونشرتو بيانو
مش أول داعي للدهشة
ولا آخر معبر للعشق
انت بكل وجاهة هتخلق ألف مبرر
لسكون الروح
اول ما بتبدأ وصلة عزف جديدة
بمجرد حضورها

مش حقيقة : ان الصمت موت
و ان الكلام اشارة بداية للمعركة البشرية
اللي الطرفين فيها فايزين بوجودهم
مش حقيقة : انها لما بتتكلم بتكون أحلى
هي الوحيدة اللي الصمت بيخلق فيها
فتنة مش حرام

اللي زايد فيها ولا حاجة
ولا حاجة ناقصة
الغريب .. إنك تشوفها تحسها زيهم
و إن كل خصلة منهم فيها
و إن كل عادة فيها منهم
و إنك لما تحسها تشوفها .. أجمل غريبة عنهم

أمي .. كانت أجمل بنت بتزور حضانتنا و تمسك ايدي
و لما كبرت
فهمت إنها من غير ما تقصد
كانت عاوزاني اشوفها كده
علشان هتطلع شبهها

و زي ما هي بعيد دلوقت
و زي ما كل مرة أكلم فيها روحي
و هي مش سامعة
زي ما هاسكت
و ابطل اشوفها من تحت باب السما
و امسح كل الشخابيط المرسومة على روحي
و اسمّع كلامي لأي بنت تانية غيرها
طول مانا مش عاوزها تشوفني

أنا (الفلوت) اللي جعل هم الصدور مزيكا
أنا التراب اللي احتوى كل البلاوي
أنا مستودع حكاوي
أنا البير اللي ياما استأمنوه ع البوح ؛ و صان
أنا الندل الجبان
أنا مصنع الكبريت
أنا قلب لما سكن .. هدم عليه البيت

أنا بانتهي في منابع النار و النعيم
و بابتدي ف الطين
الصبر بعده قبول
و أنا مهما هاصبر
عمري بكره ما انول
سايل نزيف الروح بنغمة متعادة
و أنا مش هاخوض في سكة الشاردين
ولا هاقبل إن اشتياقي يتقلب عادة
قلبي شِبع م الليل
مابقاش يشوف من اليفط النيون
غير سحرها الزايل
داير يفتش في حواري الحي
عن بنت بجدايل
في قصة تايهة من حواديت النهار
أنا نبض حي
إزاي يعيش في النار ؟!

في روض الفرج
لحظة غروب الشمس ع الكورنيش
قبل آخر نداء في صالة المطار
قد إيه الكون ساعتها ..
ماكنش راضي يصدقك لما وعدت
و ماكنش قادر يوعدك بالانتظار
شنطة سفر
و تذكرة لبكره اللي كان سنتين
فات ألف بكره و هي هي شنطتك لسه
و لسه هما الكلمتين
و بدل التذكرة .. خمسة
من تلات سنين
يمكن يزيدوا شوية أو ينقصوا
سنتين بكل برود
رافضين يخلصوا

بين نَص كامل و جزء من قصيدة
داير كلامي يوزّع البهجة على الحاضرين
و يداري جرح الوحدة و ندبة الحيرة
أنا الكوفية و الرصيف و المقص
أنا ضل عابر مادقش طعم الشمس
و الوقت روح الطريق .. و سكتي مؤمنة
إن النوايا سند و ان الخلود مش هنا
و الحب مش موهبة
م اللحظة دي
باعلن بإني قابلت نيّتي الطيبة

في الكون ملايكة بيزعلوا زيّنا
و بيبردوا ..
و تهز روحهم سيرة المطارات
و زيّنا .. بيعشقوا أيس كريم الشتا
من تحت جواكيتهم الدافية
ما تزعلوش يا صحابي مني
قلبي الأسير عندكم
شيّبته الجغرافيا

انزعي عنك حجابك
و اوهبي للريح جدايلك الناعمين
أنا المُريد اللي اشتهى المشي ف شوارعك
أنا اللي روحي ناشعة م الأسفلت
وسعت حدود المسألة ؛ فسألت
خدعتني كل الطرق
و غرّبتني البيبان
أنا عند بابِك .. ما تردّنيش خيبان

أنا آخر واحد بيبان فـ فينالة المشهد
أنا أبعد واحد فـ الصورة
و ملامحي فـ وسط الشبورة
تايهة و بهتانة
و تملّي ده المعتاد
أنا كل حياتي الفايتة بالكربون ..
لسه بتتعاد

كل النجوم الفايرة في عينيكي
ماتكفينيش
أنا ،،
ضل الأمان من قلبك الباير
على عمرك البور
أنا ،،
أول حقيقة في سكتك
أم الخطاوي الزور

عاشق سواد الليل لغاية ف النهار
و في النهار ..
بتحل لعنة غنوتي على كل بيت سكنه القمر
على كل صفحة ميتة
ضحكتها من عرق النجوم
الأنانية يا أعزائي البشر الطيبين
مش شر
الأنانية .. أسلم وسيلة لانتهاج الخير
من غير ضرر