Thursday 16 December 2010

انتزاع

مسموح لكل البشر بالضحكة العادية
بكل لحظة فرح مهدورة دِيّتها
بحزن تنقشه عالخدود حبة دموع
مشكوك فـ جديّتها
بمتعة تبدأ وقت ما تنتهي
و تنتهي فـ بدايتها
مسموحلهم كل الكلام المُتاح
لكن الكلام الحيّ
وحده مُستباح للمُغرمين بلذّة التأويل
المُلهمين السُكْر من غير خمرة
سحرت عيونهم لعنة التفاصيل

مسجون في نوبة موت مستوطنة بُوحي
و كل يوم بيفوت بتُنتزع روحي
لايم عليك يا ضيّ عزمك على الترحال
من غير ما تغسل بقَدَمك عتمة شراييني
شمسك بتفرش نهارها على جميع الخلق
إلا على جبيني
مستهونين غنوتي ؟ .. مستغنيين عني ؟
فاكرينّي مستغني ؟!
إزاي و أنا فـ غربتي ناسي البشر كلهم
و لاجلكو باغنّي
سُخرية الموّال
إن ابتهاج غنوتي مستقوي بجروحي
في غمضتك يا ضيّ سكن طريقي الفزع
و نبشني برد الخوف
لا حضن نزيفي صبر ولا انتصرلي جزع

نبتة كلامي الحيّ مستغربة البستان
مَرويّة بالبَهَتان
اللعب بالألوان مش غيّتي
أنا غيّتي .. إني أخلق الألوان
بيضيق في صدري البراح و بيرتعش جوفي
و بينتهكني الرعب
و اتهد من جوّه
لحظة ماشوف البحر تحت السما نعسان
أنا قلبي ما بينعشوش غير ضمة النوّة

مش بالسكوت
ولا بانتهاج الفلسفة
تضمن خطاوي سكتك أمن الوصول
أنا مش سفيه
ولا ضل قلبي انعكاسات السفه
أنا مانتزعنيش مـ العدم
غير لما رقصت روحي مسحورة بنغم
عزفه ازدحام الأرصفة

كل الخلايق ميتين .. متفرقين كلهم
فمفيش ضرورة للزواق
و الكحل يزرع في العيون السم على طول المدى
بالاتفاق
و مفيش ضرورة للرحيل
رغم الظروف المؤسفة
و إذا كان لابد من الفراق
يبقى استحق النشوة و الخوف و الدموع
و الضُم حياتك بانتزاعهم م الزمن
ده إن رحلت .. مفيش رجوع