حادثتين حصلوا عندنا في المحلة خلال الأسبوع اللي فات في منطقة واحدة من المناطق الراقية عندنا
الأولى
شاب.. من أسرة متيسرة.. متفوق في دراسته.. السنة النهائية في كلية الطب.. اتلمّ على شوية صحاب.. دخل معاهم في سكة الإدمان.. أهله لما عرفوا.. طبعاً إزاي يحصل في العيلة حاجة زي كده.. يا دي الفضيحة و يا دي العار.. حبسوه في أوضته شهر علشان ما يخرجش و يرجع لصحابه.. في يوم دخلوا عليه لقوه شانق نفسه بملاية السرير...... مات
الثانية
شاب.. من أسرة متيسرة.. عنده 23 سنة.. متجوز.. في يوم عيد الأم اشترى لأمه هدية و ماجابش لحماته.. مراته نكّدت عليه و فضلت تزنّ على دماغه.. انت ماجبتش لماما هدية ليه؟.. انت أصلاً مابتحبّهاش.. هي مامتك أحسن من مامتي؟.. زهق منها و قالها يعني أرميلك نفسي من البلكونة علشان تسكتي و تستريّحي؟.. قالتله ارمي.. رمى نفسه من الدور الخامس...... مات
هي الحياة رخيصة للدرجة دي و ببلاش علشان الواحد يتخلّص منها بكل سهولة في لحظة يأس أو زهق؟
هي النار مريحة للدرجة دي علشان الواحد يجري عليها بالسرعة دي ؟
هو فيه إيه؟
الشابين دول ماكنش عندهم مشكلة فقر ولا عيال مش عارفين يربّوهم ولا دنيا دايسة عليهم
الناس اللي بتموّت نفسها دي بتبقى حاسّة بإيه؟
فاكرين إنهم لما يموّتوا نفسهم إنهم بكده بيرتاحوا من المشاكل و الهموم ؟
بيبقوا عارفين ربنا ؟
الأولاني ده أهله اتعاملوا معاه بطريقة غلط و بدل ما يحاولوا يعالجوه سجنوه.. بس ده مش مبرر للانتحار
و التاني.. التاني ده بقى انا بصراحة اتغظت منه.. إيه يا أخي؟.. مشكلة بينك و بين مراتك تخلّيك تموّت نفسك؟
أستغفر الله العظيم
مش عارف أدعيلهم بالرحمة ولا أعمل إيه؟
ماتوا كافرين.. انتم متخيّلين؟!!.. كافرين!!
اللهم ارحمنا فإنك بنا راحم.. ولا تعذبنا فأنت علينا قادر.. واهدنا و يسّر الهدى إلينا
مش عارف العقول راحت فين؟
صلاح جاهين بيقول:
الدنيا أوضة كـــــــــــبيرة للانتظار
فيها ابن آدم زيه زي الحـــــــمار
الهم واحد.. و الملل مشــــــترك
و مفيش حمار بيحاول الانتـــــحار
و عجبي