Wednesday 26 March 2008

ببلاش

حادثتين حصلوا عندنا في المحلة خلال الأسبوع اللي فات في منطقة واحدة من المناطق الراقية عندنا

الأولى

شاب.. من أسرة متيسرة.. متفوق في دراسته.. السنة النهائية في كلية الطب.. اتلمّ على شوية صحاب.. دخل معاهم في سكة الإدمان.. أهله لما عرفوا.. طبعاً إزاي يحصل في العيلة حاجة زي كده.. يا دي الفضيحة و يا دي العار.. حبسوه في أوضته شهر علشان ما يخرجش و يرجع لصحابه.. في يوم دخلوا عليه لقوه شانق نفسه بملاية السرير...... مات

الثانية

شاب.. من أسرة متيسرة.. عنده 23 سنة.. متجوز.. في يوم عيد الأم اشترى لأمه هدية و ماجابش لحماته.. مراته نكّدت عليه و فضلت تزنّ على دماغه.. انت ماجبتش لماما هدية ليه؟.. انت أصلاً مابتحبّهاش.. هي مامتك أحسن من مامتي؟.. زهق منها و قالها يعني أرميلك نفسي من البلكونة علشان تسكتي و تستريّحي؟.. قالتله ارمي.. رمى نفسه من الدور الخامس...... مات

هي الحياة رخيصة للدرجة دي و ببلاش علشان الواحد يتخلّص منها بكل سهولة في لحظة يأس أو زهق؟

هي النار مريحة للدرجة دي علشان الواحد يجري عليها بالسرعة دي ؟

هو فيه إيه؟

الشابين دول ماكنش عندهم مشكلة فقر ولا عيال مش عارفين يربّوهم ولا دنيا دايسة عليهم

الناس اللي بتموّت نفسها دي بتبقى حاسّة بإيه؟

فاكرين إنهم لما يموّتوا نفسهم إنهم بكده بيرتاحوا من المشاكل و الهموم ؟

بيبقوا عارفين ربنا ؟

الأولاني ده أهله اتعاملوا معاه بطريقة غلط و بدل ما يحاولوا يعالجوه سجنوه.. بس ده مش مبرر للانتحار

و التاني.. التاني ده بقى انا بصراحة اتغظت منه.. إيه يا أخي؟.. مشكلة بينك و بين مراتك تخلّيك تموّت نفسك؟

أستغفر الله العظيم

مش عارف أدعيلهم بالرحمة ولا أعمل إيه؟

ماتوا كافرين.. انتم متخيّلين؟!!.. كافرين!!

اللهم ارحمنا فإنك بنا راحم.. ولا تعذبنا فأنت علينا قادر.. واهدنا و يسّر الهدى إلينا

مش عارف العقول راحت فين؟

صلاح جاهين بيقول:

الدنيا أوضة كـــــــــــبيرة للانتظار

فيها ابن آدم زيه زي الحـــــــمار

الهم واحد.. و الملل مشــــــترك

و مفيش حمار بيحاول الانتـــــحار

و عجبي

Sunday 23 March 2008

انت مش عارف انت بتكلم مين

المكان: أتوبيس

الزمان: مش مهم

الأشخاص: ركاب الأتوبيس و راجل عجوز و أنا

الحدوتة: حاجة مستفزة فعلاً لما تكون قاعد جوه الحاجات الكبيرة المتخربأة دي اللي بتمشي و بيضحكوا علينا

و يقولوا عليها أتوبيسات

قاعد مع نفسك كده و سارح في عالم تاني بعيد خالص عن المهرسة اللي انت فيها

و فجأة تلاقي حاجة اترمت عليك

لا و اللي يغيظ ان الحاجة تطلع بني آدم

راجل ضخم وعجوز كمان بس ما شاء الله كان فيه صحة 3 شبان في بعض من بتوع الأيام دي

الراجل بدون أي مراعاة للي قاعد جنبه رمى نفسه على الكرسي و قعد يظبّط نفسه و يسنّترها على الكرسي و شويتين كان هيربّع رجليه كمان

قوم أنا بقلة أدبي أقولّه يحاسب شوية و يراعي أن فيه ناس قاعدة جنبه و انه بالطريقة دي هيفرمهم

شوفت البجاحة اللي أنا فيها

بجح بجح يعني

الراجل سمع مني الكلمتين من هنا و قام استحضر أيام شبابه و قعد يشخط و ينطر

إيه يا كابتن اللي انت بتقوله ده؟.. انت مش عارف انت بتكلم مييييين؟.. أفرم مين؟.. ياخي هرسك بلدوزر؟

الغريبة ان اللي كان بيتكلم ده لا شكله و لا منظره يدلّوا على انه حد مهم ولا حاجة.. وكمان من لهجته بسهولة تقدر تعرف انه ريفي...مع احترامي للريفين اللي بعتبر نفسي منهم

أُمّال فيه ايه؟

أنا فقدت القدرة على الرد لعدة أسباب

أولهم و أهمهم ان الراجل ده قد جدي يعني ماينفعش عيل قد أحفاده يرد عليه بكلمة مش ولابد يعني

و تاني حاجة ماتقلّش أهمية عن السبب الأول و هي اللي استفزتني بصراحة

الراجل بيقوللي انت مش عارف انت بتكلم مين؟

وأصلاً أنا في البداية بكل احترام كنت بقولّه انه يراعي اللي جنبه يقوم يهبّ فيا بالشكل ده و يكلمني بالأسلوب ده

أد كده تهميش الآخر و عدم احترامه بقوا حق مشروع و مجرد المطالبة بحق الإحترام بقى جريمة وقلة أدب تستحق التوبيخ

أد كده مفيش حد طايق حد ولا فيه حد حاسس بالتاني.. و العنجهية و التقليل من قيمة الآخر بقوا طبيعة في الأشخاص

ايه يا جماعة دا احنا كلنا من واحد.. مفيش حد فوق التاني و لا حد أحسن من التاني.. اذا كنا احنا بنعمل كده مع بعض يبقى من حق الحكومة الحكيمة بتاعتنا تعمل فينا اللي ما يتعملش على أساس ان احنا نماردة و ما نستهالش نعيش غير لما ناخد فوق دماغنا

اذا كان الموقف اللي حصلّي ممكن يبان انه حاجة بسيطة ومش مستاهله كل ده.. وحاجة تقريباً بتحصل يومياً

فده علشان احنا عوّدنا نفسنا على كده.. و اتعودنا على كده.. و يمكن كمان اتربّينا على كده

عدم احترام الآخر و الإستبداد بالرأي و الفعل من غير مراعاة لشعور اللي قدامنا

دي أبسط أصول التعايش هي مراعاة الغير و احترام الآخر

مش عارف امتى هنتغير!!

-------------------------------------------------

تحديث صغنن كده

آسف يا جماعة إني حذفت البوست اللي فات

أصل أنا قلت إن دي حالة أنا عايشها دلوقت و مينفعش يعني إني أخليها مجرد بوست و عدى

فعلشان كده حطّيتها هنا في الجنب على إيديكم الشمال

( قال يعني فيه جنب غيره )

اللي عنوانها أنا كده دلوقت

و بس

Wednesday 19 March 2008

حمااااااارن

عمرك حسيت إن انت حمار ؟

( بلاش انت دي لحسن حد يزعل )

طيب عمرك حسيت ان أنا حمار ؟

( في دي بقى أنا مش هزعل لاني اكتشفت ان أنا طِلعت أكبر حمار في العالم )

انك تتعامل مع حد و تراعيه و تحبه وتقدره و تحترمه و تحافظ عليه و تنفذ طلباته منك و تحترم رغباته و تحافظ على أسراره و لو غلط تتقبل أعذاره

و في الآخر تكتشف انه طول الفترة اللي انت عمّال تعمل فيها كل اللي فات ده.. انه كان بيعمل معاك العكس تماماً

تماماً

يبقى أنا إيه؟

أيوه .. شُطّار

حمااااااارن

Saturday 15 March 2008

افهم بقى يا غبي

الأربعاء

مكنتش قادر أروح الكلية.. كنت مريض بجد.. مقدرش أقول كان عندي دور برد.. لأني- و الحمد لله -لا كان زوري مُحتقن ولا كنت سخن.. جسمي كان همدان جدا و كنت حاسس زي ما يكون في عصاية محطوطة في صدري بالعرض.. مكنتش قادر أتنفس.. مكنتش عارف أنام.. قلت خلاص.. ده خروج الروح.. و مسكت أطرافي ايدي و رجلي اشوف حاسس بيهم ولا لأ.. أصل الروح أول ما بتخرج من الجسد بتخرج من الأطراف

الخميس.. الساعة 2 بعد الظهر

كنت هِديت شوية..راجع من الكلية.. بالصدفة سمعت و أنا في الأتوبيس ان جد واحد صاحبنا مات و هيصلّوا عليه صلاة الجنازة بعد صلاة العصر.. رحت مع اصحابي وصليت العصر و الجنازة.. و أنا في الطريق كنت بقول أصلّي الجنازة وأمشي ولا أروح معاهم المقابر؟.. افتكرت حديث سيدنا محمد صلى الله عليه وسلم اللي فيما معناه أن هناك خمس تجب للمسلم على المسلم و منها اتباع الجنائز.. استحضرت النية ورحت معاهم المقابر و كانت أول مرة أحضر دفن في المقابر رغم ان جدتي أم ماما و خالي و جدتي أم بابا ماتوا و أنا حضرتهم ..بس في أول مرتين كنت صغير و مارُحتش المقابر و في المرة التالتة بابا طلب مني أني آخد الحاجة اللي كانوا لفّين بيها تيته و أروّحها على البيت.. يعني ماحضرتش الدفن

الجمعة.. الساعة 1:30 بعد صلاة الجمعة

في الجامع كانت فيه جنازة.. صليت الجنازة ولقيت محمد صديقي بيقولي تعالى معايا المقابر نحضر الدفن لأن اللي مات أبو واحد يعرفه.. رُحت معاه.. نفس المقابر.. و كنت واقف في نفس المكان اللي كنت واقف فيه امبارح.. و تاني مرة أحضر دفن في المقابر وفي يومين على التوالي واتنين ماعرفهمش.. و أنا جوه المقابر قعدت أقرا اللي مكتوب على الرخام.. تُوفّي- إلى رحمة الله- فقيد الشباب.. فقيدة الشباب.. فقيد الشباب.. فقيدة الشباب.. و أنا طالع حصلتي شهقة تخيّلت معاها شهقة الموت واللي كان بيحصل معايا أول امبارح .. محمد صديقي قعد يكلمني عن شباب ولاد وبنات في سن صغير ماتوا اليومين اللي فاتوا و إن دي من علامات الساعة.. الموت فجأة و موت الشباب

السبت.. الساعة 3 صباحاً

بعد ما خلّصت شوية شغل في المشروع ( مشروع تخرّجي).. قمت علشان أنام.. مش جايلي نوم.. و زهقت من المشروع.. قمت فتحت الكمبيوتر و دخلت على مدونة نوران (بت خيخة و أي كلام).. وقعدت أدوّر في المواضيع القديمة.. بالصدفة وقعت عيني علي بوست عنوانه أنا لسه مش جاهزة.. دخلت قريته.

فيه حاجة بتحصل.. فيه اشارات.. و جاية متسارعة ورا بعض.. فيه علامات بتقولّي اصحى.. فوق.. هتفضل كده لحد امتى؟.. هتفضل عايش زي الحيوانات كده لحد امتى؟.. افهم بقى يا غبي.. من لم يكن الموت له واعظ؛ فما له من واعظ

كفاكَ عبثٌ إن القلبَ يحتضرُ --- و دعِ الذنوبَ فإن الذنبَ مُغتفرُ

صار الظلامُ طريقاً أنت تسلكهُ --- و ذلك نورُ اللهِ في الأرضِ مُنتشرُ

و كم مددتُ يدي إليك كي أُخلّصك --- فوجدت أنك في دنياك مُندثرُ

و تقول: ذرني؛ إن لي ملذةٌ--- في الدنيا؛ إني في شهواتي منغمرُ

أو لم تؤامن أن الدنيا زائلةٌ ؟--- أو لم تؤامن أن الدينَ مُفتخرُ ؟

ضيقٌ بصدركِ ؟ أم بالصدرِ إخفاقُ--- في كسبِ نورٍ له القلب يفتقرُ ؟!

و كم تقول: إني سوف ألتزمُ--- و العوج خُلفكَ؛ فاعدل أيها البشرُ !

بئساً لأمرك!.. ليس ينفعكَ--- عجباً لأمري!.. كُلُّه خيرُ

فإن قلبي بالإيمانِ قد صَلُحَ--- و إن غمّي لم يعد له أثرُ

و لقد نوديت بصوتٍ يا عذوبته!--- يقول أني في الجنة فيمن صبروا

سنا بالوجه من إيمان..خيرٌ ؟--- أم كدرةٌ من لهوٍ فيه تنتشرُ ؟

أما بالرأسِ من لُبٍّ لكي يدركَ--- سُبلَ الصلاحِ؟.. أم أنك حجرُ

بالله صِف لي كيف تكون هيئتكَ--- في القبرِ حين يضمُّكَ القبرُ

ستراه نوراً و الجنانَ قريبةُ ؟--- أم ظلمةً عاكفةً والجحيم تستعرُ ؟

عُد إلى رشدك فإن العمر غنيمةٌ--- و ارجع لعقلكِ.. إن القلب ينتظرُ

عودة الروح إليه مضيئةَ--- قد ضمّها الهدى وهجرها الفُجرُ

للأسف الكلام ده حُجَّة عليا مش ليا.. أنا كتبته من 6 سنين.. و للأسف لسه.. أنا زي ما أنا

اللهم إن عندك عباداً كثيرين غيري تعذبهم؛ وليس لي ربٌ سواك يرحمني؛ فيا رب لا تعذبني بمعصيتك فإنها أشد عذاب.. و ارحمني رحمةً تُغنيني بها عن رحمة من سواك

اللهم اهدني و يسّر الهدى إليّ

Thursday 13 March 2008

تاج العسقلاني

و أخيرًا و بعد طول انتظار أول تاج يوصل.. وصلني أخيراً تاج من ابن حُجيجير العسقلاني اللي كان محتاس و محتاج لخبرات زمايله المدونين في موضوع رفيع كده

قال إيه عايز يشكّل وزارة في دولته عسقلانيا العظمى!!!

شوفتوا.. موضوع رفيع قوي

قوي يعني

لالالالا بصراحة أول تاج يوصلني يبقى جامد كده

أنا مش قد التاج ده يا ابن حُجيجير

و علشان كده

لقد اتخذت قراراً أريدكم جميعاً أن تساعدوني عليه

لقد قررت أن أتنحّى تماماً و نهائياً عن أي منصبٍ رسمي و أي دورٍ سياسي

و أن أعود إلى صفوف الجماهير أؤدي معها واجبي كأي مواطنٍ عاديّ

و أتفرج على الحوسة اللي وقّعت فيها إخواني المدونين

(ضحكة شريرة)

الجماهير: تيييت تيييت لا تتنحّى

************************

التشكيلة الوزارية

----------

رئيس الوزراء

الباحث عن الحقيقة

-----
وزير الثقافة

صاحب المضيفة

-----
وزير الإعلام و الاتصالات ( هي وزارة واحدة )

أحمد الصباغ

-----
وزير التعليم

بت خيخة و أي كلام

-----
وزير البحث العلمي

مذكرات عيل مصري

-----
وزير الجامع الكبير ( زى شيخ الأزهر كده )

الطائر الحزين

-----

وزير الخارجية

قبلة الحياة

-----

وزير الداخلية

رئيس جمهورية نفسه

-----

وزير الهجوم ( و الدفاع إذا لزم الأمر )

Desert cat

-----

وزير الإسكان و التعمير

مهندس مصري

-----

وزير الشئون الاجتماعية

أنين الحزن

---------------------

اعذرني بقى يا ابن حُجيجير مش هقدر أزوّد وزارات أكتر من كده أصل علاقاتي التدوينية قليلة و مش هعرف أحط حد زيادة

Monday 10 March 2008

إليكِ

إليــــــــكِ يا مَن كنتِ..

أغلى عندي من أي شيء و من كل شيء

أقربُ إليَّ من أي شيء ومن كل شيء

أحبُّ إليَّ من أي شيء و من كل شيء

أحلى عندي من أي شيء و من كل شيء

...........................................................

أعترفُ بأنني قبلكِ يا سيدتي كنتُ كالتائِه

لم أعرفْ طعماً للأحلامِ و لا للحبِ و لا رقةِ أجوائِه

جالستُ الفشلَ و صاحبتُ الإحباطَ؛ فحرّكني بأهوائِه

لم احلمْ يوماً بالمستقبل أو أرغبْ بلقائِه

أعترفُ بأنني قبلكِ يا سيدتي عشتُ كالتائِه

....................

أعترفُ بأنني حينما أنطقُ اسمَكِ أشعرُ بأمان

إيمان.. أطيبُ أسماءِ الدنيا إلى قلبي و أحلى الألحان

قبلكِ.. كانت تأسِرُني أيادي اليأسِ و تملُكني الأحزان

حتى أشرقتِ و معكِ خيوط النور و باقات الألوان

.....................

أدمنتُ سماعَكِ في شغفٍ؛ و أُحبُ عتابَ الأحباب

و لكِ في قلبي منزلةٌ تجعلني دوماً أرتاب

هل أنت فعلاً إنسان؟!.. أم أنت ملاكٌ خلاب؟!

يا قمراً يسطع بسمائي يا نهراً داخلي ينساب

.....................

ساحرتي.. أميرة أحلامي.. من أجلكِ أكتبُ كلماتي

سيدة العالم في عيني.. حُبُّكِ هو أرقى حالاتي

قسوتُكِ-أحياناً-مُرَّة.. و حنانُكِ داوى جراحاتي

حزنُكِ هو حزنٌ في قلبي.. فرحتُك أسعد أوقاتي

.....................

حبيبتي.. أشكركِ جداً أنكِ سبَّبتِ إسعادي

و فتحتِ عيوني على الدنيا؛ و كتبتِ شهادةَ ميلادي

و جعلتِ مني إنساناً؛ و رسمتِ لوائحَ إرشادي

برضائِكِ بي و بإحساسي حقّقتِ لي كلَّ مُرادي

.....................

حبيبتي.. أخبرتُكِ يوماً أن حياتي هي أنتِ

و خيالك يسكُن في عيني؛ و كلامكِ يملأُ ذاكرتي

و مجرد رؤية عينيكِ تُعطيني في نفسي ثقتي

و ملكتُ العالمَ بهواكِ؛ و هواكِ أعلى أوسمتي

.....................

جمالُ الدنيا قد اجتمعَ تحت قدميكِ

فعطورُ الوردِ صادرةٌ من بينِ يديكِ

و ضياءُ الشمسِ و روعتُها منكِ و إليكِ

لا يوجد في الدنيا شيءٌ يُشبه عينيكِ

.....................

من يوم ظهورك بحياتي أصبحتِ أصلي و تكويني

و كلامُكِ أمسى أغنيتي؛ و هواكِ عقلي و جنوني

و استحوذتِ على و جداني و على تفكيري و عيوني

سيدتي و مولاتي و عُمري.. من أجلكِ سأعيش سنيني

.....................

أخافُ عليكِ أكثرَ من خوفي على نفسي

و أشتاقُ إليكِ شوقَ الأزهارِ إلى الشمسِ

يا زهرة عُمري.. عُمري لكِ.. أنتِ أضوائي و أُنسي

يا أحلى امرأةٍ في الدنيا.. أنا لا أنساكِ فلا تنسي

.....................

إيمان.. لا تتركيني.. فأنتِ بالنسبةِ لي روحي

أنتِ أحلامي و أيامي و أفراحي و كلُّ طُموحي

و بكِ يرتسمُ الأملُ بأعماقي و تزولُ جروحي

يا نهرَ الحبِّ المتدفق.. يا نجمَ الحُسنِ المتألق

يا جنَّة روحي

*************

Tuesday 4 March 2008

أنا

أنا الضاحك الباكي

الساكت الحاكي

الحامد الشاكي

الشايف في عيون الناس يا عيني الحزن جواكي

أنا العيل الكبير

الحر الأسير

الطيب الشرير

اللي مُناه يلقى في يوم الحب بس بضمير

أنا الهادي الشعنون

العاقل المجنون

الواضح أبو ميت لون

اللي اتقتل بفعل سوء الظن القاتل الملعون

أنا الحقيقي الشبح

الصريح البجح

المؤدب الوقح

اللي في حياته.. الغلط كسر حاجات كتير عملها صح

أنا العابس الباسم

المتفائل المتشائم

الواقعي الحالم

اللي الكلمة الحلوة تتقالّه يحس بيها إنه احتوى العالم

أنا الخجول الجريء

المتهم البريء

اللي بحق وحقيق

نفسه في ايدين يبدأ معاها و بيها أول الطريق

Monday 3 March 2008

يا رب