كل النوايا الطيبة

والرؤى الصادقة

والتضحية بروحي برضا وتسليمها للسكّين

ماشفعتليش

لما اترميت في البير

واتبعت في سوق النخاسة بالرخيص

تمن الخيانة ماشتراش حريتي

حريتي ماتت هناك في المدبح

روحي اللي فاضت ساعتها بالشعاع والنور

فضحت خطيئتي وكشفت الصورة

روحي اللي لسه سارية فيها الروح

بتبصلي، وأنا عيني مكسورة

بلا ‏ولا ‏شي

"إزاي أعيش مع واحدة ما بتحبش فيلم كازبلانكا"

حازم

السلم والتعبان - ٢٠٠١

كان العالم يبدو لطيفاً حتى ماتت جدتي؛ حينها جفت منابع الألوان, و هدأت الحركة, و خشعت الأصوات, و بات الناس أكثر توحّشاً؛ أو ربماً كانوا كذلك في الأصل؛ و كانت جدتي تروّضهم.

أنا كلب شوارع
نبذوه الكبار
و ربطوه العيال الصغيرة من رقبته
و حدّفوه بالطوب
أنا صورة حلوة للحياة
ممسوكة بالمقلوب
أنا . . خفاش
هجر النهار من زحمته
و من وشوش الناس
برواز فاضي
كشكول مليان
أنا كتفي و سندي و عكازي
و دراعي اليمين
أنا العجل اللي وقع
فكترت السكاكين

اسكندرية
في غفلة مني
سحبت روحي و بلعتها
و من ساعتها
لون الحياة مخطوف
اسكندرية
لو كانت وصلت للمينا
قبل سفن الاحتلال
ماكانتش هتستنى تسهّيني
و تدهن اليفط دوكو
و تمسح أسامي الشوارع
و تأمّن الطريق للظروف
الجرح نافذ و دمي متصفي
و أنا لسه باعدل في ياقة القميص
و رافض أكشفلها ضعفي
تايهة الحقيقة في جريمتي
فين الحروف من كلامي؟
اسكندرية
سحبت روحي و بلعتها
و من ساعتها
و أنا مش شايف قدامي

حداشر علقة موت أكلتهم بشويش
و سيبت للذكرى حدوتة
لزوم القعدة و السيرة
عمر الحقيقة ما خيّبت ظن الشوارع فيا
و الناصية تشهد
على جتتي المتعلقة حتت على العواميد
على الدم اللي سال
فوسّخ الأسفلت
و اتكفّل المطر ساعتها
بتوزيعه على كلاب الشوارع و القطط بالعدل
فكانوا أحن عليا من صحابي
هتفضل البلكونات تفتكرني
و تنسى مشهد السوّاق
و هو بيختم القصة من غير فلاش
في النهاية
ديسمبر كان هو كف السما
و المتعة الوحيدة اللي ببلاش

"كيف تنظر في عينيّ امرأةٍ

أنت تعرف أنك لا تستطيع حمايتها" 

#أمل 

علاقتي باسكندرية متوترة جدا! .. و بالبحر!



- يوليو|2002 .. أسفلت الكورنيش كان أنضف من بيوت كتير دخلتها ؛ و في الكون مكان تاني أحلى من مدينة نصر|1996



- مارس|2007 .. ماكنتش عارف اني رايحلها ؛ كل اللي كنت عاوزه إني أكون معاها في الطريق و الرحلة - روحت أنا ؛ و ماجتش!



-يوليو/أغسطس|2007 .. أول و آخر مرة أمارس الطقس السخيف ده - الساعة 3 الفجر بعد ما سمع البحر كل الحكاية | في التليفون "-ماما! فيه موقف بايخ حصل بالغلط مع إيمان --ما تخافش يا حبيبي ؛ هتعدي على خير"



- البنت الوحيدة اللي حبيتها ؛ واللي لما قلتلها "بحبك" قالتلي: "وبعدين" ؛ و في آخر كلامنا قالت: "خلي عندك أمل" ؛ و اتخطفت بعد شهرين مع أول خبطة ع الباب و قالتلي: "معلش .. ماتزعلش مني". | "البحر ما بينصفش حد . . ."



اسكندرية|إيمان .. وش القمر اللي داس عليا ؛ فعملت نفسي جامد - العينين اللي بصولي في مرة بصة هتموت في خيالي بموتي.



-أكتوبر|2010 . . . . . . "البنت اللي كحل عينيها الرباني كان دايماً في تحدي مع الليل ؛ مين فيهم أجمل م التاني ؛ مين فيهم أكتر في الحزن. . ."



-مايو|2011 / سبتمبر|2012 .. دكتور العيون اللي بيتكلم من طرف مناخيره .. العمارة القديمة في محطة الرمل - اللي لو كنت حاجة تانية غيري أكيد كنت هابقى الأسانسير بتاعها .. القديم الهادي المتهالك اللي شايل كل اصناف البشر في قلبه.



يونيو|2011 .. "هي: طمني! .. عملت إيه؟ - أنا: الحمد لله تمام" | "يا أيها البحر الذي واسع قوي و مغرور بلا داعي . . ."



أكتوبر|2013 . . . .

لحظة تجلّي
البحر هاج!
الغريبة إني ما خفتش
بصيت ؛ ركزت أكتر
و لأول مرة باشوف البحر
و احس بابتهاج!

شرقيتي المريضة
منعتني أفهم
هي إزاي
في وسط كل العتمة دي
و برغم ريحة الدم
قدرت تضحك بصوت
في نفس اللحظة
اللي قررت فيها
من غير مقاوحة
إني اموت

زيف!
كل اللي عشقوا السفن
متأكدين من انها لغيرهم
متأكدين من جهلهم بنهاية الرحلة
و بخط سير الزمن
و بلحظة التوقيف
ما تصدقيش كل اللي يحكيلك عن الأمل الطويل
أو منطق الرغبة الأفلاطوني السخيف
ما تصدقيش البشر
البشر .. شُطار في تمثيل التحدي
و لعب دور الأمل
و تحويل البطل كومبارس
و الكومبارس .. بطل!
ما تزوّقيش البشر بمنحة التصديق
ما تصدقيش إنك وحشتيني
ما تصدقيش ..
غير لما تتأكدي من موتي بالتحقيق