Friday 10 October 2008

إزاي أقول لأ !!؟؟


من الطبيعي جداً إن لو حد طلب منك حاجة و انت مش هتقدر تعملها أو مش عاوز تعملها أو لو عملتها هتبقى متغاظ من جواك و قرفان و طهقان من اللي قدامك و لو طلب منك حاجة تانية زيادة هتولّع فيه
من الطبيعي إنك هترد تقول : آسف .. لأ مش هقدر
سليم ولا مش سليم
سليم
نخش في الموضوع
إيه نخش دي ؟!
اسمها ندخل
أوكيه .. نخش في الموضوع

أنا عندي خصلة مهببة و منيلة بنيلة اسمها مابحبش حد يقرا الجرنال قبلي
يعني لما اروح اشتري الجرنال مابحبش حد يطلبه مني و يفتحه و يقراه قبلي ( حركة عيالي أنا عارف )
هتقولولي : و فيها إيه ؟!! .. يعني هو الجرنال هَيخس ولا هينقص خبر .. ده غير إن النسخة دي ممكن يكون الشعب كله فتحها قبلك و قراها .. هأقولكم : كل الكلام ده انا عارفه .. بس اعمل إيه ؟ .. أنا كده .. انسان معقد نفسياً
كنت مرة شاري الجرنال و كان في ايدي لسه منشّي كده مافتحتوش .. واحد صاحبي طلبه مني
رديت عليه بابتسامة واحد عبيط كده و قلتله : لأ .. آسف مش هاقدر .. ضحك و قاللي : يابني هات الجرنال أنا مش بأهزر
قلتله : ولا أنا كمان بأهزر .. معلش مش هاقدر أديهولك أصل انا كذا كذا كذا
طبعاً الواد اندهش و وشه قَلَب و جزّ على سنانه و كتم في نفسويته و سكت
واحد صاحبنا كان واقف معانا .. قام بالواجب و استلمني : إيه يابني ما تدّيله الجرنال .. انت بتعمل كده ليه ؟! .. انت لازم تغيّر أسلوبك في التعامل .. انت كده مش هتعرف تعيش حياتك و الناس مش هتحبك طول مانت كده بتضبّش في الكلام
طبعاً بما إني كنت حاسس إني ماعملتش حاجة غلط و إن دي حرية شخصية .. كان كل كلمة بيقولها يلاقي ليها عندي بهدوء رد منطقي و موضوعي عليها
زهق مني و قاللي : انا عارفك دماغك ناشفة و متركبة شمال و لو قعدت أكلم فيك من هنا ليوم القيامة مش هتعمل غير اللي في دماغك .. ده انت راجل تعبان

مرة تانية كنا بنعمل عَمرة لشقتنا .. بنغيّر كهربا و بياض و حبة حركات .. واحد صاحبي اتصل بيا و قاللي إنه عاوز يجيلي .. انا عارف صاحبي ده .. لو جه و لقي الشقة كده هيقعد يتريق بكلام من عينة : يابني مش كفاية إن شقتكم الواحد يدخل من باب الشقة يلاقي نفسه في البلكونة و لو اتمطّع شوية هيهد الجدران لأ و كمان جايبني في المعمة دي
أنا قلت آخدها من قصيرها و أريح دماغي : قلتله .. لأ مش هينفع تيجي .. ( مع العلم إني لو كنت قلتله إننا بنغيّر كهربا و بنبيّض .. كان اتريق برده : يعني كام سنتيمتر سلك و كام جرام بوية )
أمي سمعتني و أنا بأكلمه و قالتلي : انت ازاي تقول لصاحبك ماتجيش عندنا ؟!!
قلتلها : يا ماما أنا أدرى بصحابي و عارفهم .. هو مش هيزعل .. ده غير إن ربنا بيقول : بسم الله الرحمن الرحيم ( و إن قيل لكم ارجعوا فارجعوا هو أزكى لكم و الله بما تعملون عليم ) صدق الله العظيم .. و بعدين أجيبه فين في اللي احنا فيه ده ؟!
قالتلي : يا خبر !!! .. انت بتستعر مننا يا محمد ؟!! و مش عاوز تجيب صحابك عندنا .. إهيء إهيء إهيء ( دي ماما بتعيّط )
قلتلها : أستعر إيه يا ماما بس ؟!! ... انت بتجيبي الكلام الكبير ده منين ؟! .. آدي آخرة التليفزيون و الفرجة على المسلسلات
قالتلي : لأ .. اتصل بصاحبك و قوله ييجي .. يابني ده إن ماشالتوش الأرض نشيله فوق راسنا
أنا : يا ماما
ماما : إهيء إهيء إهيء ( دي ماما لسه بتعيّط )
طبعاً نزولاً على رغبة الست الوالدة و منعاً للمزيد من الـ إهيء إهيء إهيء .. اتصلت بصاحبي .. بس الحمد لله لقيته خرج

اللي انا أقصده بعد الرغي ده كله و اللي انا عاوز اعرفه
أنا كده صح ولا غلط و الغلط راكبني من ساسي لراسي ؟
يعني أبقى على حريتي و أعمل و أقول اللي يريّحيني و يرضيني واللي انا شايفه صح .. ولا اللي يريّح و يرضي الناس ؟!

لو أنا صح قولولي : انت صح
لو انا غلط قولولي : انت صح
----------------------------------------
على فكرة
لو حد من ساكني القاهرة الكبرى و ضواحيها حس خلال الأسبوع اللي فات إن البلد نوّرت زيادة .. أحب أقوله إن السبب في كده إني نزحت إلى القاهرة عملاً و مؤقتاً سكناً
و برده لو نفس الحد حس إن النور ده خف شوية يوم الجمعة أحب أطمنه و أقوله : ما تقلقش ده أنا كنت عند أهلي في المحلة و راجع تاني

18 comments:

Empress appy said...

ههههههه هو انت قريب خالتى ولا ايه
اطمن انت مش لوحدك فى موضوع الجرايد وكنا لما نحب نضايقها نفتحه قبلها من غير قرايه ونقفله بس كانت بتعرف وتخلينا نجيب لها واحد تاني
ههههههههه
مرض وكان فكرها زيك مع انا اقولها هو الكلام هينقص
بس هو تعود انك تفتح الحاجه وبترتيب معين وبتطبيقه معينه
صحبك انت مش غلطان لما حد يقولى انا جاي والوقت مش مناسب خلاص عادي
انت عادي ووحالتك فيه منها كتير
وقول لا زي ما انت عاوز
غير كده اشرب زيت زعبوط العفريت هتبقى فله هههههههههههه

صبرني يارب said...

حلوه شجع المشروع الى انت كاتبها دي
ههههههههههههههه

وحكاية الجرنال دي بقى انا باعملها فى بابا ويفضل يدينى بقى : مش الى يقرا الجرنال يرجعه زي ما كان ؟!!

وشوف يا سيدى انا يمكن لو كنت قابلتنى من خمس ست سنين كنت قلتلك اه برضه حاول ترضى الناس الى حواليك عشان تعرف تعيش

لكن حاليا انا بقى عندي اسلوب جديد فى الحياه خصوووصا فى الاونه الاخيره

باحاول اولا ارضى ربنا وبعدين احافظ على حريتى وارائي الشخصيه واريح نفسي ولو انى ما باعرفش اريح نفسي
وبعدين ابقى افكر ارضي الناس عشان هما مش هايرضوا عنك اصلا ابدااااا

لكن برضه فى لباقه ممكن الواحد يهرب بها من المواقف من غير ما يزعل حد

تحياتي لك

اه وانت صح ياعم

Mafrousa said...

هههه
هههههههههه
بما انك قولت لو انت صح نقولك انك صح
و لو انت غلط نقول انك صح برضه
فأنا بقولك انت صحين
ههههههههههه
صح للاولانيه و صح للتانيه تبقى صحين
حكاية الجرنال ديه لازمن و لابد تروح لدكتور لانها عقدة نفساوية
و غالبا من الصغر...يعنى اكيد باباك ضربك مرة لما مسكت الجرنال قبل ما يقراة و رحت مقطعه مثلا
كلنا كنا بنعمل الحركة ديه و احنا صغيرين...فتزلدت عندك عقدة
اما بالنسبة لصاحبك اللى انت عارف انه حيتريق و عارف رد فعله و انت اخدتها من آصيرها و اعتذرت عن استقباله
فديه انت صح فيها و انا معاك فيها
اما بقا حكاية النور و الاضائة
فأنا فى محافظة غير محافظة القاهرة الكبرى

رندا said...

هههه على فكرة بكرة ان شاء الله لما تتجوز مش هتتهنى على الجرنال اصلا علشان مراتك هى الى هتقراة الاول ومش هتقدر تقولها طبعا مش تفتحية ولا تلت التلاتة كام ههههههههه
و لما تلاقى الجرنال متقصقص منة كمان هتقولها هو باقى الجرنال فين هتقولك اصلى اخت منة وصفات الاكل ههههه
ولا هتقدر تتكلم ياعمنا
شوف بقى هتعمل اية فى الموضوع دة

القاهرة كلها طبعا هتنور باجمل باشمهندس فيكى مصر

كل التقدير

رندا

كاميليا بهاء الدين said...

ازيك يا نجرو

انا كمان عندى عقدة الجرنال دى
بحب اكون اول حد يفتحه
ولو اتفتح قبلى .. اقرأه لكن كأنه جريدة قديمة مش بحس بطعم انه جريدة اليوم

كل الكلام اللى قولته عن تعبيرك عن ما تريد هو حق شخصى لك
كل العالم يأخذه على انه حرية شخصية ويحترمون رغبات الغير بشدة وبصدر رحب .. عدا فى مصر .. يطلقون على الحرية الشخصية مسميات كثيرة .. بالتأكيد انت تعرفها لاننا شعب يعيش بمشاعره ويهتم كثيرا بمشاعر الاخرين.

briefley
انت صح

تحياتى

mohamed ghalia said...

انت صح
وبرده انت صح
إحنا لازم نحاول منزعلش الناس مننا ونعاملهم بود
لو واحد طلب منى الجرنال وقولتله لا
هيزعل
فمش كل الأوقات يتقال فيها لا
تحياتى

Asmaa mahaba said...

ههههههههههه انت هنا فى القاهره والواحد عنده اكتئاب اتاريك هنا فى القاهره
بص هو فعلا من حقك تعمل كدا انا كمان كنت حاده كدا بس الانسان بيغير نفسه ممكن تتعلم ترد رد دبلوماسى ميجرحش اللى قدامك وفى نفس الوقت يرضيك
وطبعا فى اوقات مش حتعرف ترد دبلوماسيا فيعنى مشيها ساعات كدا وساعات كدا متدقش قوى
عشان متتعبش لان الناس ماشيه غلط
ولا اقولك احنا اللى غلط

ابن حـجـر الـعـسـقـلانـى said...

هاهاهاااااىىىى .. جامدة يا نيجرو .. الختمة بتاعة الموضوع حلو حلو و ضحكتنى جدا

بص يابنى ... اعمل اللى انت عايزة و سيبك من أى حد مش عاجبه .. لأن اللى مش عاجبه يشرب منيييين ؟؟؟ .. صح كدة .. من الحنفية

و نشوفك بقى آخر الأسبوع ان شاء الله

Unknown said...

ازيك يانيجرو
حمد الله على السلامة من الاجازة التدوينية
نخش فى الرد بقى ههههه
-شوف هتلاقى معظم اللى بيقروا جرايد الصبح (أو بيشتروها الصبح وبرضه يقروها بعد الشغل) فيهم العادة دى بس بصراحة مش معنى ان الواحد بيتضايق من حركة زى دى انه يقول للى يطلبه منه لأ .. لأنه عارف انه سبب مش منطقى
- موقف الشقة بقى غلط تماما ،شقتك المفروض انها منورة بيك ، غير كده يبقى المفروض انك ماتصاحبوش أصلا مش تصاحبه وتقولله ماتجيش ..طب مصاحبه ليه بقى
-وبعدين مبروك العمرة بتاعت الشقة وعقبال الحج .... تحياتى وحمد الله على السلامة تانى ومنور المدونة والقاهرة

الـسـيـدة نـون said...

انت صح

ههههههههههههههههههه
اولا على فكرة اللى انت كاتبها فى ااخر دى ضحكتنى جدا


نيجى بقى للبوست
انا معاك فى تانى موقف اللى هو بتاع الشقة
وعلى فكرة صاحبك ده لو فعلا بيهرج بالطريقة دى ده يبقى دمه تقيل اوى
ماتصاحبهوش تانى لان باين عليه واد رخم
وانا مش طايقاه


الموقف الاولانى بتاع الجرنان
انت غلط
كان ممكن جدا تديله الجرنان وتشترى لنفسك جرنان تانى

بس انا بعمل زيك كدة
خصوصا جرايد يوم الجمعة
بكون بايتة عند ماما
اول ما الجرايد ما تيجى
اخبيها فى اوضتى علشان محدش يقراها قبلى

اى نعم ماما بتزعقلى
يا بنتى هاتى الجرايد
واقعد ارخم عليها برضه واقولها لا استنى لما اخلصها
تقولى طب هاتى جرنال لحد ما تقرى الجرنال التانى
اقولها لا
استنينى لحد ما اخلص القراية وابقى اقريهم مع بعض

بس الموضوع عندى مش عويص زى حالاتك
يعنى لو حصل وحد قرا الجرنال قبلى
خلاص بسلم امرى لله وبقرا الجرايد عادى


عموما
انت صح

سلام يا نيجرو يا منور قاهرتنا

اختك خيخة

ojg said...

ممممممم
شوف يا نيجرو ياخويا
انت في الموقفين صح
بس للأسف انت في الموقفين غلط
استنى استنى
ماتضربش اسمعني بس
الموقفين انت عملت فيهم الصح
بس في مصر انت عملت اكبر غلط
المصريين شعب عاطفي جدااا ومش بيتصورا ان في حريات للناس
وانا للأسف بعمل عكسك تماما
يعني ببقى همووووووت وأقول لأ
بس احتراما للي قدامي
بتنازل عن رغباتي
وزي ما خيخه قالت كده
رغم عشقي لقرايه الجرنال اول قطفة
الا اني بسيبه لأخويا مادام عايزه واستعوض ربنا في الاخبار الطازة
انت بقى حاول توازن المعادله الصعبه دي
ازاي تعمل اللي تحبه وفي نفس الوقت ماتكسفش طبيعه الناس اللي حواليك
:))
-----------
ملحوظة
انا مش فاهمه اخر تعليق منك عندي
انت زعلت مني؟؟؟؟
ارجو التوضيح الهي تتستر
:)

nona said...

دة انت مشكلة يا ابنى عندى فكرة ابقا خد شنطة بلاستيك غامقة و انت رايح تشترى الجرنال و حطة فيها عشان بس ما تضايقش نفسك و انت بتناقش اى حد فى شى مقتنع بية
اما بالنسبة لصاحبك التانى انا شايفة انك مش غلطان 100 فى 100 لاننا معظمنا بيعمل كدة لو فاضية اهلا و سهلا و لو مش فاضية معلش خليها مرة تانية حتى فى التليفون لو حد اتصل بيا معلش هضطر اقفل و اتصل بيكى تانى و مافيش حد يزعل من الكلام دة
سيبك باة من صاحبك دة الاى عمال يتريق على كل حاجة انت مستحملة ازاى يا ابنى
و انا عمالة اقول القاهرة منورة لية و الحرايق شغالة ليل نهار اتارى نيجرو عندنا يا مرحبا يا مرحبا نورك غطا على الكهرباء

dreem said...

انت صح
ولكن .. خد بالك
جرى العرف على التعامل بدبلوماسية بين الناس يعنى تزوق كلامك ما تضبش زى ما صاحبك قالك ... بس مش كل الناس بيعرفوا يعملوا كده يبقى الحل فايدك انت .. شوف انت مرتاح ازاى وبأى طريقة فى التعامل واستمر .. اه ممكن تخسر شوية اصحاب بس لو كسبت صاحب واحد هيبقى احسن لك
تحياتى

دعاء مواجهات said...

أهلاااااااااااااااان

ازيك يامعلم

كيفك وكيف اخبارك
انا بقولك اهلان بيك ف لاقاهرةيعنى

انا فعلا لاحظت اللى انت بتقولعليه دة

وانامستغربه ايه لانور لامفاجئ الزايد دة

بجد نورت بيك يامعلم

بقيناجيران

بس انت فين بقى

يادى الشغل وسنينه

ربنا يعينك يارب


متقطعش السؤال

====================

نسيت اعلق ع البوست

اه انامن رايى اعمل الى انت شايفهواللى يعبر عنك م الاخر

خليك حقيقى

ومتسمحش لحد يزيفك

بيس يابرنس

Zika said...

هو رغم اني بتخنق من الناس اللي بتعمل حوار الجرنال ده
الا اني بحس ان انا بعمله وبتخنق اوي لما حد بياخد مني الجرنال
هي زي مانت قلت حركه عيالي
وبعدين بقي انت مش غلطان في حوار صاحبك ده هييجي يعد فين صحيح والدنيا مقلوبه هييجي يعد علي جردل سايبس خليك علي مواقفك المستفزه دي
تحياتي يا ريس

Diyaa' said...

نورت كايرو يا ولد
لما تدخل ياهو ابقي خبط خبطتين ولا حاجة
عايز أعرف أوصلك لو كنت فاضي والشقة مش مدهونة يعني :) ..أنا مش في كايرو فمش خد بالي من النور بس علي قول دعاء هيا منورة :) بأهلها
ههههه
نيجي للموضوع
في الأولاني..شايفك قافش زيادة..وخيخة عندها حق..اديله الجريدة وجيب غيرها.. أكيد مش بتستخسرها في صاحبك..بس ساعتها بتبقي متضايق لأنهم بيحجروا علي حريتك الشخصية..فعادي خليك انت الكبير ولو يلزمك صاحبك جيبله نسخة تانية لو مش لازمك خليك زي ما إنت ولو مش عاجبه براحته بقي

موقف الشقة أنا معاك مليون في المية
وإنت صح عموماً لأنك حر في علاقاتك وفاهم شخصية اللي أدامك أكتر من أهلك مثلاً ...بس برضه أحياناً النصيحة الخارجية زي نصيحة خيخة بتكون مجدية أكتر..ربنا يوفقك
ما تجيب الجرنان اللي في إيدك ده هشوف حاجة وارجعهولك :))) أصل الطبعة خلصت في أكتوبر


وبعد الشر عليك من المشنقة يا باشمهندس..التدوينة الأخرانية دي قلقاني ..ابقي طمنني :)
ومتنساش الجرنان
سلام

فاتيما said...

نيجروووووووووووووو
أزيك يا ولد وحشتنى قوى
يا سيدى القاهرة و ضواحيها نورت بيك
أنا كنت مسافرة و رجعت لقيت النور ضارب فى عينى و عمالة أقول إيه اللى حصل إيه اللى حصل
أتريك جيت سكنت نواحينا
نورت يا نيجرو
أنا مبسوطة جداً لأن دا معناه إنك هتيجى يوم التبرع بالدم إن شاء الله و أى يوم نتجمع فيه كلنا على الخير
عشان نقعد ويا بعض اكتر بقى المرة دى
حكاية الجرنال و الكلام دا عادى
إنت صح لأنك ليك دماغ و تفكير خاص بيك
اللى يحبك هيخده عادى
اللى فايق و رايق او عنده مشاكل هوه اللى هيوقفلك على الواحدة
و بعدين الناس مبقتش زى زمان يعنى أنا متهيألى والدتك ( ربنا يخليها ) دى من نوعية الأمهات الطيبة اللى قربت تنقرض ...
دلوقتى الأمهات عموماً ميعرفوش أصحاب ولادهم و بيقولوا لولادهم اخرج مع صاحبك بره متعمليش دوشة فى البيت و كدا
ربنا يخليهالك
و إنت صح
دمت بكل الخير يا صديقى

Romancia said...

هههههههههههه جامد اوى البوست دة
وبعدين انت صح يا بنى مين قال انك غلط طبعا تقول الى يريحك
انت حر ما لم تضر
واستمتعت بالبوست بصراحة
مشكرين