Tuesday 9 December 2008

أن تكون مغترباً


زمان - و زمان ده يعني من خمس ست سنين كده - كان في تخيُّلي إن مرحلة الخروج من الثانوية العامة و دخول الجامعة هي أول خطوة في طريق السفر و الإغتراب و شبه الإستقلال اللي أنا كنت بأتمنى إني أمشي فيه .. للدرجة اللي خلتني و أنا بأكتب رغبات الكليات كانت الأولوية عندي في بُعد الجامعة !! .. يعني كل لما كانت الكلية بعيدة كل لما كانت مغرية أكتر و مفضلة أكتر
كنت عاوز أعيش الحالة دي .. كنت متخيل إن الموضوع شيق و ممتع و سهل و مليان خبرات كتير و مزايا و بس
و لما طلعت نتيجة التنسيق بكلية داخل الإقليم كانت صدمة هأفضل فاكرها طول عمري .. لسذاجتها
و عدّت سنين الكلية بمُرها و مُرها
و فضلت الفكرة معششة جوا الجمجمة
لغاية ما جاتلي فرصة الشغل اللي أنا فيها حالياً
ما ترددتش في قبولها رغم إن كفة عيوبها أرجح من كفة مميزاتها .. بس بحاجة طفيفة
سفر , و حياة تانية , و شبه غربة , و استقلال , و مسؤلية كاملة عن نفسي , و دروس جاية و بشر بعقليات مختلفة و مستويات متفاوتة هأتعامل معاهم وحدي تماماً .. وده اللي أنا كنت محتاجه و عاوزه .. مش عارف ليه!!
زمان - و زمان ده برده يعني من خمس ست سنين كده - و لحد فترة قريبة كنت أكتر واحد بيسفّه و يقلل من صعوبة الإحساس بالإغتراب
علشان ماكنتش لسه جرّبته

دلوقت و أنا بأعتبر نفسي مجازاً ضمن من يندرج عليهم لفظة مغترب
اختلفت المفاهيم تماماً
مفاهيم و أفكار العيال - الإنطلاق , و الإستقلال , و الحرية , و الهروب من القيود و التحكّمات الأسرية - هتفضل مفاهيم و أفكار عيال
طفولية , ساذجة , قاصرة , هشّة , معدومة الأساس
ضعيفة جداً في مواجهة الواقع الحياتي الحجري
الأصل في الحياة الإنسانية إنها اجتماعية .. و الأصل في الحياة الإنسانية الإجتماعية أن تتخللها العاطفة بشكل أو بآخر .. أن تكون ليّنة و مرنة
أما الحياة المهنية فهي دائماً مجردة من العاطفة لذاتها .. صفتها الجمود و المادية البحتة

يتعب كتير قوي الواحد لو عاش بنمط حياة واحد منهم بس .. حتى لو اتهيأله إنه مرتاح

اللي بيحصل معايا دلوقت .. إني بقيت عايش بنسبة 90 % بنمط الحياة المهنية ( وده الطابع المميز و السمة الغالبة على حياة الإغتراب ) .. إنك تعيش متقمّص دور الآلة
اللهم إلا بعض أوقات بسيطة - و اللي بتمثل النسبة الباقية - اللي بأحس فيها إني كائن بشري حي عنده حياة اجتماعية
فترات بسيطة بأحس كأنها مكافئات إلهية ترويحية
و اللي في حالتي الشخصية بقى مرتبط بيها - بشكل كبير - أحد أهم الشخصيات اللي بتمر في حياتي حالياً .. ( محمد ..... ) المعروف تدوينياً بـ ابن حجر العسقلاني

بالإضافة للسويعات القليلة اللي بأقضيها - مجازاً - مع اهلي اسبوعياً

طيب لو ظروف شغلي اقتضت اغترابي و إني أفضل بالشهور بعيد عن أهلي
طيب لو ظروف شغلي اقتضت اغترابي و إن مايبقاش قريب مني حد زي العسقلاني
طيب لو ظروف شغلي اقتضت اغترابي و إني افضل لفترات طويلة متقمّص دور الآلة
هيحصل إيه؟
مش عارف

أحياناً .. لأ غالباً .. لأ دائماً التجربة هي اللي بتشكّل مفاهيم البشر الحياتية

اللي بيقول مابيعملش .. و اللي بيعمل ما بيقولش
صح؟
----------------------------------------------
على فكرة
أنا زي الفل مفيش حاجة وحشة
ده بس الجانب الكئيب الضعيف اللي جوايا بيتكلمله شوية
و خلاص اديتله على بوزه و اتخمد تاني
كل سنة و انتم طيبين



يلا سلام


26 comments:

رندا said...

الباحث عن الاستقلالية ,, والباحث عن المتاعب :)

فى الاغتراب فوائد كثيرة اوى ,,واكيد اكبر فايدة انك معتمد على نفسك بجد ربنا يوفقك

حبيت اقولك كل سنة وانت طيب

عيد سعيد عليك وعلى اسرتك الكريمة

تحياتى واحترماتى وتقديرى

قوس قزح said...

و الله ما عارفة
هى الغربة محتاجة انك تبعد علشان تعيشها ؟
هى الحرية و الاستقلال محتاجين اناك تكون وحيد علشان يتحققوا ؟
هى الصداقة محتاجة انك تغترب علشان تلاقيها ؟؟


انا اللى اعرفه حاجة واحدة
مهما الحال اتغير من حالة لحالة
مبيكونش عندنا رضا تام
يمكن لو وصلنا لحالة الرضا دى ميكونش عندنا هدف للحياة


كل حالة لها حلوها و مرها
و انت اللى بتحدد تقدر تستحمل مر انهى حالة اكتر

كل سنة و انت طيب و سعيد و راضى :)

كاميليا بهاء الدين said...

من حق الجانب الضعيف أن ياخد فرصته ويتحدث ولو قليلاً ..

وجميل اننا نعطيه الفرصة .. حتى لا تزيد قوته ويضعفنا

أما عن الإغتراب .. فهو قصة طويلة
يختلف طعمها من شخص لآخر ..

منا .. من يشحذ كل قوته حتى يثبت لنفسه أنه اخذ قراراً صائباً
فيجد ويعمل ويتعلم فى حركات مكوكية تماما كما ذكرت .. آلة
ولا يستمر هذا كثيراً .. لأنه حتماً سيعود إلى حالته البشرية
عندما يدق قلبه ..

لا تغيب يا نيجرو
نشتاق حروفك ..


عيدك سعيد

تحياتى

شخـا بيــط مـحـجـوب said...

كل سنة وانت طيب عيد سعيد عليكى

تحياتى ليك
تقبل مرورى

شخابيط mahgoub

Empress appy said...

ايه بس ليه كده يا نيجرو يا ضنايا يالا كله بيروح فى الكلوركس حاول تفرح وتسيب الجانب ده كل سنه وانت طيب

انا حره said...

حكايه الغربه والاله والاحساس اللى مسيطر دا بيختفى بعد شويه وبتتعود عليه ويمكن كمان تحبه صدقنى

انا صحيح مجربتش انى ابعد عن اهلى بس بشوف صحابى وناس من قرايبى لما بيتغربو بيتعبو شويه وبعد كدا بيتعودو

اتمنى انك تتعود على كدا بسرعه وتقدر تلاقى ناس جديده فمكان غربتك تعمل معاهم علاقات وحياه تانيه تحبها

كل سنه وانت طيب

سبهللة said...

على فكرة يا نيجرو انا عشت عشر شهور فى السعودية مع زوجى وماكنش عندى نت ولا تليفون وطبعا السعودية خروجتها منحصرة فى انك مرة واحدة فى الاسبوع لازم تخرج تشترى حاجات البيت وفى العيد تخرج تروح الجنينة وقبل ماتنزل اجازة فى مصر تنزل المولات اللى هناك عشان تشترى هدايا للاهل والاحباب
ومع ذلك كله الا انى استمتعت جدا بالعيشة فى الغربة دى
حالة من الاستقلالية كنت مستمتعةبيها جدا
ومن يوم نزلت نهائى للقاهرة من سنة ونص وانا بزن على زوجى اننا نرجع تانى السعودية مع ما فى ذلك من بعد عن الاهل والاصدقاء وكل اللى بنعرفهم
وبرضه نفسى ارجع تانى

فاتيما said...

نيجرووووو
كل سنة و إن بألف خير يا صديقى
بص بقى
أولاً
عسقول من اجمل الشخصيات اللى قابلتها ف التدوين و هنيئاً لك به صديقاً وأخ ثانيا
اللى بتحكيه دا للأسف جزء مهم من ادبيات الغربة و اللى هيا مكتوب عليك يا ولدى
ثالثاً
أنا دلوقتى مطمنة عليك عشان إنت عند الأهل و الاحباب فى البلد و دا طبعاً ينفى كل الاحاسيس المؤلمة دى و لو مؤقتاً
رابعاً كان نفسى أشوفك يم البؤجة و إفتقدناك جداً بس المرة الجاية مفيش فلفصة
خامساً
لأ خلاص كفاية كدا عشان مصدعكش
تحياتى يا غالى

ahmed_k said...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

maha zein said...

يعني من الاخر اعلم فيك ايه
هه
قول
سيادتك ناوي معايا علي ايه
عاوز مني ايه
انهار واعترف احسنلك
جيلي مدونتي ونازل تريقة
وعمال تتصيدلي المصطلحات
ينفع كده
لا بذمتك ينفع كده واحنا في الايام المفترجة دي انك تعذبني كده

بس ليه بتقول كده علي الغربة


دي الغربة لذيذة
خاصة لما تكون جوة مصر عادي
بس بردو اكيد لما تطول وتيجي مع قلة الناس الحلوة والاصدقاء
فعلا تبقه صعبة
وعلي راى الشاعر احمد مخيمر اللى معرفش هو مين

الغربة صعبة يا مراري

بس بجد حاول تستمتع باحساس الغربة
يعني اوجد لنفسك اصحاب
نعنش حياتك
مش عرفة اقولك ايه
بس اكيد اللي بيتكلم عكس اللى بيجرب

قولي بس انت مغترب فين وانا ابعتلك عالم تسليك
قول متتكسفش

انت يا عم بيتهيقلي انك عارف اني السفاح دلوقت
حرص بقه و مرشقالك عندي في كل ركن كمين
انت مخصوص

حاجــ عيال ــات said...

السلام عليكم

اولا كل سنة وانت طيب وخير وسعادة يارب
والسنة الجاية نشوفك في حتة انش الله على جبك عتاقة
المهم ياسيدى تفاءلوا بالخير تجدوه وانا دا مبدأ مقتنعه بيه
ووحلمي بيشدني ناحيته دايما
وبجد أتمنى لك السعادة والاستقرار وكمان طموحاتك كلها تتحقق

على فكرة كمان احنا جيران المحلة وسمنود مش بعيد عن بعض اوي

سلام مؤقت

د. إيمان مكاوي said...

كلنا جوانا طفل صغير عايز يهرب من القيود وتحكمات الأهل ...وبنحاول نحصل على الحريه دي بشتى الطرق ..زبجواز ,بشغل بعيد , بسفر أو حتى هجره
لكن لما بنجرب الغربه بنقول ولا يوم من قيود الأهل
ربنا معاك
كلنا في الغربه سوا

جنّي said...

السلام عليكم

اسبوع ومستكتره وبتسميها غربة ؟
امال لو قضيت سنة كاملة او ست شهور او حتى اربعة كما يحدث لي الان فماذا كنت ستقول غربة ولا سجن ؟

الغربة قاتلى حينما تمتزج بالوحدة .. ولكن ما العمل احيانا نستعذبها في سبيل ضروريات لابد منها ..

لو كانت الغربة رجلا لقتلته

شكرا وتحيتي

kochia said...

صحيح الانسان في الغربة بيتقمص دور الاله

لكن في رايي الدنيا " شوية حاجات مع بعض"

تجارب نخوضها نتعلم منها
قرارت ساعات تبقي صح وساعات تبقي غلط
انسان كئيب عايش جوانا كتير بيؤنبنا او ينكد علينا

وفي النهاية
مشيناها خطا كتبت علينا

تحياتي

Soul.o0o.Whisper said...

ňįĝŗő

السلام عليكم و رحمة الله و بركاته

كل سنة و انت طيب يا بشمهندس
و كدا فعلا يبئى متأخرة خمس شويات حيث أنه خامس يوم العيد
:)

اه .. لازم الدقة




مبدئيا .. سعدت بتشريفك ليا
و يارب مش تكون الاخيرة


و مدونتك جميلة ما شاء الله
و متفقة معاك إن النفس هى فعلا الشخص الوحيد اللى بنتكلم معه بكل صراحة و عفوية
و اللذيذ فى الموضوع إننا مش بنكون خايفين منها


زى ما نكون نعرفها من زمان ، و متأكدين منها
:)




بالنسبة بئا للغربة
فمش عارفة ليه كان عندى بردوا نفس الرغبة ...
هو تقريبا رغبات نفسية دفينة فى الشباب من الجنسين ... ياللا الحمد لله
ربنا ستر و ماعطناش فى دى بالذات اللى احنا عاوزينه


عشان أنا جربته لما بئيت اروح أذاكر مع واحدة صاحبتى مغتربة و ساكنة فى سكن طالبات
و ساعات كنت بابيت معاها


ساعتها بس عرفت قيمة البيت
ربنا يخليكوا ليا يا مامتى و باباتى




و ربنا يهون عليك يا باشمهندس ..
بجد شعور صعب ،
ما بالك و أنا بأقضى كام ساعة فى اليوم بس فى الشغل
و تعامل مع ناس !!
بس فعلا بأحس إنى لازم أكون لابسه قناع طول الوقت دا

لأن الناس (( حتى المرضى ... بئوا مستفزين جدا ..و مستغلين جدا جدا



ياللا ربنا ييسرلك الأمور
و اوعى تزعل نفسك أبدا

يعنى لما تلاقى الجانب الضعيف بتاعها طلع
ماتعملش فيه كدا

قوله معلش ... ربنا يكون فى عونك
و راضيه بحاجة
و مشيه

انما كدا تزعله !!!..
لالالالالالالالالا
:)






طولت عليك معلش
(( بردوا راضينى بكلمتين و مشينى هههههه




خالص تحياتى

Doba said...

جميل ان تعيش فى غربة لتكتسب خبرات وتجارب جديدة والأفضل أنك لاتعيش تلك الغربة وانت بين أحضان أسرتك

كثيرون يعيشون بين أحضان عائلاتهم ولكن يشعرون بغربة تامة ووحدة طائغة

من الجميل ان يكون لك صديق وحينما يكون الصديق شخص يليق بتلك الصداقة فلقد كسبت الكثير والكثير

فلتقبل يد والدتك كثيرا فأنت ف نعمة خاصة جدا من خالص دعواتها إليك

بالتوفيق دائما
================
أنا مش قلقانة عليك لانى عارفة ان جواك شخص صلب بيدى للجانب ده على بوذه دايما لانك عاوز تكون أفضل وانك مش عاوز تنكسر لوجود أسباب تافهة وبسيطة

أعقلها وتوكل - وارمى حمولك دايما على ربنا - ولو الدنيا قفلت وشها عليك قولها هأأأأأأأو هعيش حلو قوى برده غصبن عنك يا بنت التيييييييييييييت

ههههههههههههههه

كل سنة وانت طيب
وبخير وبسعادة
وبهنا وبراحة بال

هبة

حنين القلب said...

كل سنه وانت طيب يا محمد

الغربه والوحده احساس فظيع
يا رب ما حد يجربه ابدا

تقبل مرورى

Unknown said...

بص فترات الاغتراب دى فترات بتكون غريبة
لها طابع غريب بين التحول لالة او التعرض لسلسلة من التجارب المختلفة والمستمرة وكأنك فى امتحان
وطبعا دا بيعمل نوع من التوتر
اما عن ابن حجر فماشاء الله عليه
ربنا يوفقك الكل بيشكر فى اخلاقة
وطيبة شخصيتة
وانا طبعا بما انى اعرفه
اعرف انه انسان خلوق ومحترم جدا
وفقك الله يا نيجرو

يوميات فنانه مفروسه جداا said...

سلام عليكم ورحمة الله

اول زياره لمدونتك .. اتكلمت عن موضوع بفكر فيه والله وعاملي قلق في دماغي !!!!!! الغربه ده
لاني فعلا كان نفسي جدا اعيش احساس المسؤليه الكامله عن نفسي وانعزل تماما واجرب الشعور بتاع الناس الجديده والطباع المختلفه بس بما اني بنت فطبعا ده مستحيل وكنت بحسد الولاد واقر عليهم لانهم يقدرو يعملو ده بمنتهي السهوله... يا بختك
وش بيضحك ضحكه شريره!!!!!!!!!!
اما بقي عن موضوع الاله
فانا حضرتك اعيش بلا غربه يعني مع اهلي وبشعر بيه
ياااااااه شعور فعلا وحش جدا يعني سواء حضرتك في غربه او غير دوامة الشغل هتعملك اله وخصوصا اما تعدي عليك ايام كتير بتفاصيل واحده يا نهار يبقي الواحد هيتجنن
بس بما اني جوزاء بعرف اكسر الملل كويس الحمد لله ومججنه المدير واصحابي لاني كل شويه اعملهم تغير
اكسر الملل وحاول تستفاد من غربتك ديه علي قد ما تقدر
وربنا يباركلك في عسقول وايام الاجازه بتاعتك
معلش طولت عليك
سلام

الـسـيـدة نـون said...

هو ده اللى انا كنت خايفة منه عليك

عارفة انك راجل وسيد الرجالة كمان
بس خوفى عليك من احساسى ناحيتك بمسؤلية الاخت الكبيرة تجاه اخوها الصغنن

احساس بالمسؤلية اعجز قدام الظروف انى امارس مسؤليتى دى

لان مهما قلت للناس ده زيى اخويا
غير لما تكون اخويا بجد من امى وابويا
محدش بيفهم زيى اخويا دى


خوفى عليك
بيخلينى اتمنى اشكال اخرى لحياتى
علشان اعرف اخد بالى منك

بس ثقتى فى ربنا وثقتى فى عسقول
يخلونى اطمن عليك
انك مش وحدك
وانك لو حسيت انك محتاج تحس بالجانب الاجتماعى اللى فى الحياة الانسانية
هتلاقى جانبك عسقول


عموما الغربة بتخلى الانسان ينضج بسرعة
وهتتعلم دروس كتيييير من حياتك كمستقل

اهوه تتعلم وانت صغير احسن ماتتعلم وانت كبير


خد بالك من نفسك يا نيجرو

سلام
اختك خيخة

دعاء مواجهات said...

صباح القلب الجاامد يامعلم

انا عارفة انى مقصرة جامد معاك

بس بصراحة مش انت بس دا مع كل الناس
الظرووف متحدة عليا كلها فعلا


وبعدين يعنهى هى الحكاية ناقصة تقلب علينا المواجع

كلنا ف الهم واحد يابرنس

وبعدين تصدق انا مش شيفاه هم ولا حاجه

دى لحظات صفاء نفسى مهمة جدا مش هتلاقيها ولا تقدر تحصل عليها بعد كدة صدقنى بكرة تقوول فين ايامها

========================

وبعدين تعالى هنا اية الكلام الجميل الى انت معلق بيه عندى دة بجد انا باجى لحد تعليقاتك وبتثبت بجد مبعرفش احط منطق ...

تعييش لينا يامعلم قصدى ياباشمهندز..

مهندس مصري بيحب مصر said...

يا راجل ده اسبوع
امال انا في اعدادي هندسة التنسيق رماني اسيوط و كنت بأنزل يوم كل شهر
و دلوقتي في السعودية الغربة سنة و الأجازة شهر بعد كل سنة شغل
انت عبرت عن شعوري هنا بجد
هنا فعلاً مطحنة شغل و مفيش حياة اجتماعية خالص تقريباً
الله ينور عليك
وصفت احساسي بجد

.. نرمين زين الدين .. said...

السلام عليكم
ــــــــــــ

أنا شايفه ان لما حضرتك فكرت في انك تغترب
مفكرتش الا من حجانب واحد بس
اتجارب والحياه الجديده والاستقلال زي مانت ذكرت وده ساعتها الي كان مسيطر عليك لأن الجانب الي انت ما اخدتش بالك منه فقدان حنان الاهل والاشتياق ليهم والاستقرار .. وما الي ذلك لأنك كنت بالفعل عايشه وده الي محسسكش بيه فلما بعدت واغتربت حسيته وافتقدته وحسيت انه كيان كامل كنت عايش جواه وبعدين راح منك . ....... انا اتكلمت كتير معلش ....
المهم
جزيت الخير
ولا تنسي الدعاء لغزة بإذن الله

Zika said...

انا كده
انا دلوقت زيك
عندي حلم العيال ده
بس مهما كان هي تجربه لازم الواحد يعيشها
يعني انت دلوقت وانت بعيد عن اهلك واصحابك
مش حاسس انك بقيت اقوي؟
مش حاسس انك بتكتسب خبرات بارضه
حتي لو ماحستش دلوقت اكيد انا متاكد ( رغم اني ماجربتش) انك هتحسها
ربنا يقويك في غربتك
ويحقق حلمي بالغربه
تحياتي

الـسـيـدة نـون said...

انت مانع التعليقات ليه على البوست الجديد

هو هسسسسسسسسس ليه؟
انت عايز تنام ولا ايه
ولا تعبان
ولا مضايق
ولا ايه
مالك
طمنى علييييييك



اختك خيخة

ahmed_k said...

هسسسسسسسسسسسس

كل سنه وانت طيب يا نجرو
وسنه سعيده عليكي يا هندسه