Monday, 1 June 2009

البنات الصغيرين

البنات الصغيرين شكلهم حلو قوي و هما بيجروا و يلعبوا
أنا بأحب البنات الصغيرين
و بأحلم إني لما اتجوز هأخلف 3 بنات و ولد
و حاسس إن ربنا - إن شاء - هيحققلي الحلم ده
أنا نظري ضعيف
و بألبس نظارة من زمان قوي
من ييجي 18 سنة
كان ساعتها عمري خمس سنين
لأني النهارده تميت 23 سنة
كنت في السن اللي الطفل بيبدأ يلعب فيه مع حد صغير زيه
مش مع أمه بس
بس أنا ساعتها ماكنتش بألعب مع الولاد الصغيرين
لأني كنت بأخاف النظارة تتكسر
أنا خايف إن لما ربنا يرزقني ببنات
يطلعوا نظرهم ضعيف زيي
و ساعتها مش هيعرفوا يلعبوا مع البنات الصغيرين اللي في سنهم
اللي بيبقى شكلهم حلو قوي و هما بيجروا و يلعبوا

9 comments:

Appy said...

كل سنه وانت طيب يا نيجرو
وبعدين لو طلعوا كده فيه عمليات ليزر انوى انت بس واخواتك هيشيلوا الليله

انا حره said...

كل سنه وانت طييييييييييب

ياعم انت بس هتقدر البلا قبل وقوعو ليه هاتهم انت بس وزى مارحاب قالت الليزك _مش الليزر_ بيصحح كل حاجه

ومتخافش ياسيدى مش هيقعدو فى ارابيزك ههههههههه وهيلعبو ويتنططو زى ماهما عاوزين

دعاء مواجهات said...

كل سنة اونت طيب وعقباال مليون سنة وانت جميل اوى كدة

البوست دة مش عارفة اوصف عاملى حاجة كدة

احساس خفى ترقب .. مش عارفه احدد بالظبط

تعرف يانيجرو لما تاكل حاجة حلوة اوى بس متعرفش هى اية اهو انا كدة الوقتى ..

سلام يااحلى نيجرو

همس الاحباب said...

كل سنة وانت طيب
وعقبال 100 سنة
ههههههه
متخافش باعم شد حيلك انت بس واحنا نيجى نلاعبهم
تحياتى وليك وحشة كبيرة قوى
سلام

الفراغ said...

كل سنه وانت طيب
انا اول مره اجى
فيه احساس جالى اول ماقرات البوست
ياترى الاحساس ده صح
وهو انك انسان طيب جدا جدا جدا
ربنا يديلك اللى فى نفسك
واتجوز واحده نظرها 6 على 6وان شاء الله عيالك هايطلعوا تمام التمام
مش علشان اجوزت انسانه نظرها تمام
لا
دا علشان نيتك حلوه لولادك
ربنا يحققلك كل املك وامنياتك

سبهللة said...

اولا
كل سنة وانت طيب يا نيجرو
ثانيا
البوست بتاعك لو كان طول سطرين كما كنت هايعيط لانى تخيلت ك وانت طفللابس النظارة ونفسك تلعب وخايف
مع انا كمان اخويا نظره ضعيف وبيلبس نظارة من صغره ومع ذلك ولا همه كان بيلعب ويكسر النظارة وهو حاليا33 سنة ما شاءالله عليه رجل اعمال محترم وبالنظارة برضه ومازالت بتتكسر منه
الظاهر ان انت كنت حساس اوى وما زلت
اما بالنسبة لخلفة البنات
فمافيش قدامك غير حل واحد بس
انك تدعى ربنا
لان انا زيك كان نفسى اخلف بنتين توأم
عينيهم خضرا وشعرهم اصفر
وفضلت ادعى ربنا كتير جدا
ولما جوزى سافر يحج فى السنة اللى انا حامل فيها طلبت منه يدعيلى الدعوة
لكن هو كان وحش ودعا ربنا ببنت واحدة عينيها خضرا وشعرها اصفر
خاف يدعى ببنتين يقوم يدبس فى مساعدتى اكتر ما هو متدبس دلوقتى
والحمد لله ربنا استجاب له
ورزقنا ببنت أحلى مما نتصور بكتيييييييييير
اللهم لك الحمد حمدا كثيرا دائما ابدا كما ينبغى لجلال وجهك وعظيم سلطانك
عقبالك ان شاءالله

Soul.o0o.Whisper said...

السلام عليكم و رحمة الله و بركاته

كل سنة و انت طيب
و عقباااااااااااااال
مليووووووووووووووووون سنة

و بعدين بلاش تفكير كتير
انت هتكئب نفسك من الوقتى؟؟؟
تفاؤل
نفاؤل شوية ربنا يكرمكم

دا ايه دا
:)


دمت بود

enjy said...

كل سنة وانت طيب

ابقى اعمل لبناتك ليزك

ايوشة said...

ربنا يحقق لك كل احلامك باذن الله وان شاء الله هيطلوا بنات زى القمر كمان ونظرهم 6 على 6 وزى ما ابى قالت حتى لو عمليات الليزر دلوقتى حلت كل المشاكل