Wednesday, 17 November 2010

مـلّ

ماهوش مستني يضحكله النهار مخصوص
ولا عمره في يوم اتمنى ست الحسن تتمناه
ولا عاوز يضم الدنيا بين دراعاته و يغمض
ولا بيحلم تنادي عليه بنات النور و تستناه
ماهوش عاوز يقول الكلمة تتوزع على الأكتاف
ولا في وقت ما يبكي أو يضحك يكون متشاف
و لما يندهه بكره .. ماهوش عاوز يبان خوّاف

بقاله سنين مصمم يلتزم بالسطر
و راضي يسلسله الـ "لازم"
و لما بتتولد فكرة بيدفنها في أيامه
قراره فـ نكسته .. حازم
و أعمى فـ خطوته كالقطر

بيتملّى طرق سيره و نبرة صوته بالميللي
و في محراب بناه غيره بيتعبّد و بيصلّي
كبت الروح و كتم البوح اتكتبوا عليه .. فرض
و مُرغم يبتهل بيهم و ممنوع عنه حق الرفض
في جوفه بتتزرع ببرود بيوت الشيب
عيونه مُلهَمة تغمّض بوحي الغصب
و مسجون الكلام جواه بحُكم من الحرام و العيب

مـلّ الصمت و سكونه و استسلامه للإكراه
عشرين طريق خطا فيهم
بخطاوي كانت ناكراه
مـلّ الفكرة تطرح فيه يموّتها
مـلّ دماغه تصرخ فيه يسكّتها
و استهوانه بحياته اللي ماعاشهاش
هايتمرّد و هايعاند عشان رافض
يبص لنفسه فـ مرايته و مايشوفهاش

9 comments:

z!zOoOo said...

السلام عليكم

ازيك يا باشا يارب تكون بخير

النص حلو بجد

يلمس القلب

وخصوصا لو كان عندك شويه شجن

علي كام رغبه في البكا

:(

يعني من النهايه انت جيت علي الجرح

:((

ديه اول زياره ليا وبإذن الله ماتكونش الاخيره

كل سنه وانت طيب

كــركــبــة دمـــاغ ㋡ said...

حلو








مبروك النيو اسم

تحياتي

norahaty said...

كبت الروح و كتم البوح اتكتبوا عليه .. فرض
و مُرغم يبتهل بيهم و ممنوع عنه حق الرفض
--------
كان الله بعونه

norahaty said...

مليانة شجن
زى زيزووو
مـا قـال

ايثار said...

مش لاقية تعليق
بس كل اللي اقدر اقوله.. تدوينة رائعة:)

كل سنة وأنت طيب

Anonymous said...

يبص لنفسه فـ مرايته و مايشوفهاش

!!1!
حيرتنى
بس شكلوا جاب أخره ومل أوى
همممممممممممم
مش لاقيه كلام تانى

كيكى

nigro said...

z!zOoOo
زيزو
تسلم يا جميل على كلامك
مبسوط بجد إنها عجبتك
كل سنة و انت طيب يا زعيم
:)

كركبة دماغ
تسلمي يا كركبة
الله يبارك فيكِ
كل سنة و انت طيبة
و تحياتي أنا كمان :)

norahaty
كان الله في عوننا جميعا يا دًك
نوّرتيني :)
و كل سنة و انتِ طيبة يا دًك

إيثار
من غير ما تقولي حاجة يا إيثار
كفاية كلمتينك دول
شكراً بجد
و كل سنة و انت طيبة

كيكي
العووووو مكسل يدخل بالأكاونت بتاعه
حيرتك ليه بس يا كِـكِ
و هو فعلا كده شكله جاب آخره
هاسالهولك و أديكِ خبر
كل سنة و انت طيبة يا كيكي

واحد من الناس said...

رائعة بحق

وربما قلما نصل إلى هذه الدرجه من الملل

هايتمرّد و هايعاند عشان رافض

يبص لنفسه فـ مرايته و مايشوفهاش

أبدعت حقا

سلمت يداك

bastokka طهقانة said...

الله الله