Sunday 15 May 2011

أي حاجة

بقالي كتير قوي ماكتبتش هنا
ماكتبتش عني و عن اللي عنوان المكان ده بيوصفه
أنا بقالي كتير ماباتكلمش كتير أصلا
تقريبا ما بقتش باعرف اتكلم
الكلام عندي بقى حالة مادية مملة جدا و عقيمة جدا جدا
مابقتش باعرف اوصل اللي عايزه يوصل بالكلام
أنا تقريبا مابقتش باحب اصوات الناس
فكرة ان سماع صوت اللي قدامي بس تطمني بقت ملغية من حياتي
مش عارف
حاسس ان سنتين من العزلة الشبه تامة حتى و ان شاف حد انها فترة قصيرة طبّعتني بطباع غريبة
حاسس ان من كتر التواصل بالكلام المكتوب و اعتيادي عليه و نطقه و تنغيمه بالشكل اللي أنا عاوزه بقيت ماباحبش اسمع الصوت اللي بينطق الكلام ده
مش ماباحبش بمعنى ماباحبش .. لأ .. بمعنى ما بافضّلش
حتى المزيكا و الأغاني
ما بقتش باحب أصوات المغنيين مهما كانوا
المزيكا و بس هي اللي بقت تفرق معايا و بقيت باحبها
بقيت مودي قوي بشكل بشع
صديق عزيز عليا قالي مرة يا نجرو انت مودي قوي و الخصلة دي بناتي أكتر منها في الولاد
أنا باكبر
آه لسه في نص العشرينات و عيل عند ناس كتير
بس أنا فعلا باكبر .. و دي حاجة وحشة قوي على فكرة
المشكلة اني مش حاسس اني كبرت
أنا من جوايا لسه حاسس اني صغير
او يمكن مش عاوز اصدق اني باكبر
بس ده بيني و بين نفسي بس
لما باقعد مع نفسي بس
اشتغلت و سافرت و طلع دين اللي خلفوني في الشغل و السفر و لسه هيطلع أكتر و أنا مش ممانع يعني و راضي بده و باللي اكتر منه كمان
و اللي حواليا في الشغل عارفين اني راجل و اني قد كلمتي و ان الكلمة عندي ليها وزنها
يمكن في اللحظات دي بس باحس شكليا اني كبرت و مابقتش العيل اللي في دماغي
بس انا كل تصرفاتي اصلا جاية من كوني حاسس اني لسه صغير
ماتعلمتش اللوع ولا اللف و الدوران ولا الكدب ولا تلوين الكلام ولا مسح الجوخ وباعافر قوي اني ما تعلمهمش عشان افضل لسه برضه العيل اللي الدنيا مالوثتهوش .. و ربنا يقويني بقى
أنا محمد النجار العيل اللي عنده خمسة و عشرين سنة اللي عاش طول حياته في قلب شرنقة جوا قمقم و كتب عليه ربنا انه يشتغل شغلانة حياته فيها متربطة بأسوأ طوائف مهنية في الدنيا
حاجة نفسي أنا باستغربها و باحمد ربنا عليها :)
أنا محمد النجار اللي ما بيحبش البحر اللي بيجيبله اكتئاب و صدره بينقبض بمجرد ما يشوفه أو يقعد قدامه
اللي بيعشق حاجة في الدنيا اسمها القاهرة و بيسحره و يطبطب على قلبه منظر نيلها
اللي عاوز يتجوز بنت بتحبه و يحب البنت اللي عاوز يتجوزها
و كل ما يفكر في انه عاوز يتجوز يحس انه فعلا كبر
و كل ما يشوف حد من صحابه خطب او اتجوز او خلف يحس انه فعلا كبر
اللي بيموت في حاجة اسمها البنات الصغيرين
اللي صعب قوي حاجة تسعده و سهل قوي انه يحزن و يكتئب من غير ما اللي حواليه يحسوا بكده
اللي الرمز عنده قدسيته مبالغ فيها
اللي بتفرق معاه قوي الحاجات التافهة الصغيرة اللي كل الناس فعلا بيشوفوها كده و هو لأ
اللي كيس مناديل بلاستيك أدتهوله في يوم صديقة عشان شافته غرقان في عرقه ما بيفارقش محفظته مهما اتغيرت و اتقطعت و جاب مكانها واحدة جديدة
 اللي لما سمع معزوفة بسكاليا مزيكا فيلم الكيت كات أخد قرار حاسم انه راجع مصر لولا ان اصحابه قعدوا معاه و هدّوه
اللي محفظته فيها كارت اتصالات بقاله تمن سنين ما بيفارقهاش عشان فيه صور تلات بنات صغيرين بيضحكوا
اللي في محفظته صورة القرد المكشر و المبوز و اللي بحركة بسيطة للصورة تتقلب تكشيرته دي لابتسامة بعرض وشه من اليمين للشمال بقالها سنين مسبباله احراج بس عمره ما فكر يشيلها أو يخبيها
يمكن عشان حاسس انه زي القرد ده اللي بحركة بسيطة تتقلب تكشيرته لضحكة كبيرة قوي و بنفس الحركة في نفس اللحظة تتقلب ضحكته الكبيرة لحزن و تكشيرة
أنا محمد النجار اللي جواه كلام كتير عايزه يوصل من غير ما يقوله
اللي مش عارف هو كتب دلوقت ايه أو كتبه ليه .. بس ارتاح لما كتبه

3 comments:

Doba said...

Life is suffer

كلمة اعتدت قولها كثيراً هذه الأيام ومع بزوغ كل يوم جديد أصطبح بعده كلمات تخفف من وطئه الحياة على قلبى

1- بسم الله الذى لا يضر مع اسمه شىء ولا ف الارض وهو السميع العليم

2- اللهم انى أسألك خير هذا اليوم وخير ما فيه وأعوذ بك من شره ومن شر ما فيه

3- اللهم ما أصبح بى من نعمة فمنك وحدك لا شريك لك فلك الحمد ولك الشكر

وحينما يطرأ على عقلى هؤلاء باعثى الضيق والخنقة والحقد والباحثى عن الشرور أتذكر أحسن مقولة وهى اللهم أكفنى إياهم بما شئت واجعل مكرهم فى جحورهم
============
أخى الغالى

أحببت فقط أن أشاركك بعض من كلماتى اليومية التى أعتنقها منذ الكثير والتى بمثابة عماد يومى فى مواجهة كل الأشياء السيئة لانها وقتها أعلم بأنها مرسلة من ربى لاحمده كثيرا وأصطبر على ما بلانى به وأستمتع بما تبقى من فتات
=========
إعلم أن الطفولة نعمة كبيرة لانها دائما تجعلك لا تخطو بقدميك نحو الخط الأحمر الملىء بالشبهات وتجعلك تتمسك بعفوية نادرة هى من أحسن الشيم

دمت راقى الحس
دمت عالى الفهم
دمت راقى المشاعر
دمت طاهر القلب
دمت صامت الحنين
دمت بخير
مادمت فى حفظ الله

هبة

Anonymous said...

ربنا معانا كلنا .و أغلبنا زيك عايش الأحاسيس و الأفكار دى..و زى ما كتابتك دى ريحتك..أنت ريحت كتير غيرك و حسستهم ان مش هما بس كده

Mahmood البطراوى said...

تعرف يا واد يا نجرو انا بحس انك بتكتبنى
وكل مره بحس فعلا اكتر ان انا وانت عايشين على نفس الزايه فى الدنيا زى ما انت دايما بتقول :)