روح عدائية

حاسس بروح عدائية في اللي أنا وسطيهم
رغم إني دايماً مسالم و بأراعي ربنا فيهم
يكونشي جدلي الكتير سبب العداء و البعد ؟
أسـجـــن دمــاغي يعني لأجــل أرضيـهـم ؟

جبان

عايش في دور الجدع الطيب الإنسان

و جريء ولا يهمني و أنا في الحقيقة جبان

مستني لطمة قوية تهزني تشدني

أنا في انتظار صدفة معدومة الإمكان

العجرفة

الأصل - طين - مشترك .. إيه لزمة العجرفة ؟!
يا أجهل المخلوقات .. ليه تدّعي المعرفة ؟!
تحجر على رأي أخوك !! و دي سلطة مين ادّهالك ؟!
يا خسارة على عقل نَمنم .. لدرجة إنه اختفى

بداية جديدة

من 3 أيام كان المفروض إني انزل ببوست ليس لسبب إلا لمرور سنة بالكامل على دخولي عالم التدوين و على بداية الكتابة في المدونة اللي قدامكم دي
مناسبة هي تأريخ لحدث و بداية مرحلة هي بالتأكيد مهمة جداً في حياتي .. إن لم تكن الأهم على الإطلاق
كان في بالي كلام كتير
بس نظراً للظروف اللي حصلت خلال الأيام القليلة اللي فاتت .. فقدت الرغبة في الكتابة أو حتى الكلام .. و مازلت
أسأل الله ان يُتمها على خير
مش هأقول حاجة
بس لقيت إني ممكن أبدأ السنة التدوينية الجديدة اللي بدأت كما لم أحب أو أتخيل .. و لله الأمر من قبل و من بعد .. أسأله - تعالى - الرضا
لقيت إني ممكن ابدا ببعض أيات غاية في الروعة مما وردت في كتاب الله " الزبور " الذي أنزله - سبحانه و تعالى على عبده و نبيه داود عليه السلام .. كما ورد في بعض كتب السلف

____________________________________________________________

يقول المولى عز و جل

يا داود أنا لا أنسى من ينساني فكيف أنسى من يذكرني

يا داود من دعاني أجبته , و من استغاث بي أغثته , و من استعاذ بي أعذته , و من توكل عليّ كفيته ؛ فأنا كافِ المتوكلين و ناصر المستنصرين و مجيب الداعين ؛ و أنا رب العالمين

يا داود قل للمتلذذين بذكري هل وجدتم رباً أبرَّ منِّي

يا داود طوبى للمنفردين عن الناس ؛ الصامتين عن عيوبهم

يا داود من عرفني طلبني , و من طلبني وجدني ؛ و من وجدني وجد كل شيء ؛ و من فقدني فقد كل شيء

يا داود كذب من ادعى محبتي و نام عن طاعتي

يا داود من عصاني أدخلته ناري و حجبت عنه وجهي

يا داود من أطاعني و هو يحبني ؛ أدخلته جنتي و أريته وجهي

يا داود اذكروني بمخافتي أذكركم بطمأنينتي ؛ اذكروني بتوحيدي أذكركم بتوفيقي

يا داود اذكروني بطاعتي أذكركم بمحبتي

يا داود قل لبني اسرائيل لا يجاهروني بالمعاصي , و لا يجعلوني أهون الناظرين إليهم ؛ فإني أعذبهم بالنار

يا داود قل للذين أغلقوا ابوابهم و أرسوا ستورهم عند المعاصي ؛ لو شئت لخسفت بهم الأرض

يا داود لو يعلم المدبرون عني كيف اشتياقي إلى ترك معاصيهم و رفقي بهم ؛ لماتوا شوقاً إليّ و لتقطّعت أوصالهم من محبتي

يا داود هذه ارادتي في المدبرين عني ؛ فكيف ارادتي في المقبلين عليّ

يا داود علامة من أحببته أن يقل كلامه و يكثر استغفاره

يا داود طوبى لمن ترك فراشه بالليل و قام يناجيني في شدة البرد و الناس تحت لحوفهم

يا داود أهون ما أنا صانع بالزناة ؛ أُذهب النضارة من وجوههم و أمحق البركة من عمرهم

يا داود من لقيني و هو يخافني لم أعذبه بناري ؛ و من لقيني و هو يحبني أخذته بجواري

يا داود من لقيني و هو مستحٍ منّي ؛ لم أخجله يوم لقائي

يا داود و عزتي و جلالي لا يجاورني إلا من طلب جواري

يا داود بلّغ أهل رضائي أني حبيب لمن أحبني و جليس من جالسني و أنيس لمن أنس بذكري

يا داود من طلبني وجدني و من طلب غيري لم يجدني

يا داود إن رضيت عني رضيت عنك

يا داود من غض طرفه و حفظ فرجه و صان لسانه فهو عندي من المقربين

يا داود أنت تريد و أنا أريد ؛ ولا يكون إلا ما أريد ؛ و إن لم ترضَ بما أريد لا أعطيك ما تريد و نزل بك سخطي ولا يكون إلا ما أريد

تراب

أنا من تراب
و الإرادة هي سرّك فيه
تنوّره بحكمتك
و برحمتك تهديه
تراب
و سرّك إذا مس التراب يحييه
الهمني حب الخير
حب الجمال و الحق
خلّيني أقول للشيطان
مهما غواني لأ
علّمني أثبت
و لو زال الجبل و انشق
الهمني يا رب
علمني يا رب
يا رب سبحانك

نقطة تفتيش

قف !!
نقطة تفتيش
أين بطاقتك الشخصية ؟
ما هذا ؟!
انسان ؟!! ... يُحب ؟!!
أخرج قلبك
أرني ما فيه
ماهذا ؟!!
أسلحة من حب ؟!
و دروعٌ واقية من طيبة قلب ؟!
و قنابل من أملٍ و تسامح ؟!
هل كنت تتجهّز للحرب ؟؟!!
أين الرغبات العدوانية ؟
أين الحقد ؟
أين الخبث و سوء النية ؟
أين فساد القلب ؟
أين الهمجية ؟
إنك لست من سكان هذا البلد الأصليين
أنت مشعوذ
جئت لتُفرّق بين الناس
جئت كي تٌفسد جو البلد بدخان الحب و أبخرة الإحساس
و تُشيع الطيبة و تُنمّي الخير و تُزكّي الشرف
لا تُنكر .. اعترف .. اعترف
أعترف
أعترف بأن الحب هو مهد الإحساس
و أن الخير هو أصل الإنسان
و أن الشر بغير أساس
هل يُعقل أن يُرمى العُصفور بتهمة كُنه ذا جناحين ؟!
هل يوماً سُجن شعاع النور لأنه شقّ ظلامَ الليل ؟!
هل يُعقل أن يُرمى الانسان بتهمة كُنه انسان ؟
صُمُّوا الآذان ... لا تسمعوا له
هذا الساحر قد جاء ليقتل فينا الكره
بل أنا انسان........
إن لم تصمت لوضعت في فمك نعليّ
أقيموا محكمةً فورية
...................
حكمت محكمة الدنيا
على هذا الواقف كالثعبان
خلف القضبان
أن يُعدم حرقاً بالنيران
و التهمة :
يحتفظ ببقايا انسان
...................
ارتاحوا اليوم
زُفُّوا البشرى لجميع القوم
أعلنوا في كل البلدان
يا سادة
قد مات الانسان

أن تكون مغترباً

زمان - و زمان ده يعني من خمس ست سنين كده - كان في تخيُّلي إن مرحلة الخروج من الثانوية العامة و دخول الجامعة هي أول خطوة في طريق السفر و الإغتراب و شبه الإستقلال اللي أنا كنت بأتمنى إني أمشي فيه .. للدرجة اللي خلتني و أنا بأكتب رغبات الكليات كانت الأولوية عندي في بُعد الجامعة !! .. يعني كل لما كانت الكلية بعيدة كل لما كانت مغرية أكتر و مفضلة أكتر
كنت عاوز أعيش الحالة دي .. كنت متخيل إن الموضوع شيق و ممتع و سهل و مليان خبرات كتير و مزايا و بس
و لما طلعت نتيجة التنسيق بكلية داخل الإقليم كانت صدمة هأفضل فاكرها طول عمري .. لسذاجتها
و عدّت سنين الكلية بمُرها و مُرها
و فضلت الفكرة معششة جوا الجمجمة
لغاية ما جاتلي فرصة الشغل اللي أنا فيها حالياً
ما ترددتش في قبولها رغم إن كفة عيوبها أرجح من كفة مميزاتها .. بس بحاجة طفيفة
سفر , و حياة تانية , و شبه غربة , و استقلال , و مسؤلية كاملة عن نفسي , و دروس جاية و بشر بعقليات مختلفة و مستويات متفاوتة هأتعامل معاهم وحدي تماماً .. وده اللي أنا كنت محتاجه و عاوزه .. مش عارف ليه!!
زمان - و زمان ده برده يعني من خمس ست سنين كده - و لحد فترة قريبة كنت أكتر واحد بيسفّه و يقلل من صعوبة الإحساس بالإغتراب
علشان ماكنتش لسه جرّبته

دلوقت و أنا بأعتبر نفسي مجازاً ضمن من يندرج عليهم لفظة مغترب
اختلفت المفاهيم تماماً
مفاهيم و أفكار العيال - الإنطلاق , و الإستقلال , و الحرية , و الهروب من القيود و التحكّمات الأسرية - هتفضل مفاهيم و أفكار عيال
طفولية , ساذجة , قاصرة , هشّة , معدومة الأساس
ضعيفة جداً في مواجهة الواقع الحياتي الحجري
الأصل في الحياة الإنسانية إنها اجتماعية .. و الأصل في الحياة الإنسانية الإجتماعية أن تتخللها العاطفة بشكل أو بآخر .. أن تكون ليّنة و مرنة
أما الحياة المهنية فهي دائماً مجردة من العاطفة لذاتها .. صفتها الجمود و المادية البحتة

يتعب كتير قوي الواحد لو عاش بنمط حياة واحد منهم بس .. حتى لو اتهيأله إنه مرتاح

اللي بيحصل معايا دلوقت .. إني بقيت عايش بنسبة 90 % بنمط الحياة المهنية ( وده الطابع المميز و السمة الغالبة على حياة الإغتراب ) .. إنك تعيش متقمّص دور الآلة
اللهم إلا بعض أوقات بسيطة - و اللي بتمثل النسبة الباقية - اللي بأحس فيها إني كائن بشري حي عنده حياة اجتماعية
فترات بسيطة بأحس كأنها مكافئات إلهية ترويحية
و اللي في حالتي الشخصية بقى مرتبط بيها - بشكل كبير - أحد أهم الشخصيات اللي بتمر في حياتي حالياً .. ( محمد ..... ) المعروف تدوينياً بـ ابن حجر العسقلاني
بالإضافة للسويعات القليلة اللي بأقضيها - مجازاً - مع اهلي اسبوعياً

طيب لو ظروف شغلي اقتضت اغترابي و إني أفضل بالشهور بعيد عن أهلي
طيب لو ظروف شغلي اقتضت اغترابي و إن مايبقاش قريب مني حد زي العسقلاني
طيب لو ظروف شغلي اقتضت اغترابي و إني افضل لفترات طويلة متقمّص دور الآلة
هيحصل إيه؟
مش عارف

أحياناً .. لأ غالباً .. لأ دائماً التجربة هي اللي بتشكّل مفاهيم البشر الحياتية

اللي بيقول مابيعملش .. و اللي بيعمل ما بيقولش
صح؟

----------------------------------------------
على فكرة
أنا زي الفل مفيش حاجة وحشة
ده بس الجانب الكئيب الضعيف اللي جوايا بيتكلمله شوية
و خلاص اديتله على بوزه و اتخمد تاني
كل سنة و انتم طيبين



يلا سلام

حضنك يا أمي

أنا اللي قـلـت أبـتـعـد و أنا اللي بـتــألـم
طـعـنـة ورا طـعـنـة لـكـن ولا تـعـلّـم
أنا مـرمـي وسـط النـار لـكـنّـي مـطّـمّن
ماهو أصل حضنك يا أمي أطيب من البلسم

مش مستعد

رغم إن شكل الحياة كئيب و اسود هباب
مش مستعـد أسـلّـم نفسـي ليـك يا اكتئاب
الشكـر سـاعة العُسـر معونــة من ربنا
سبحانــه رب الكــون المُنـعــم الوهّـــاب

أنا المسئول

غريب و حقّي في السؤال مكفـول

حزيـن و كــاتم جوا عيني سيـول

أسير لـــغُمة ما أعرفلها نهايــة

قتيـل و موتي عنـه أنا المسئـول