Thursday 17 July 2008

الحمد لله


قبل أي كلام هاقوله عاوز أقول لـ نوران : أنا مش عارف أعمل معاكي إيه؟ .. اللي عملتيه معايا .. وقوفك جنبي لحظة بلحظة .. كلامك اللي بجد كان بيدّيني دفعة و شحنات طاقة إيجابية رهيبة و اللي كان أوقات كتير بييجي في وقت بأكون محتاج فيه حد –له مكانه خاصة في قلبي- يسندني و لو حتى بأي كلام عادي .. و كنت انت بتيجي في الوقت الصح و كأنك كنت عارفة و حاسه بيا

إذا كان فيه حاجة واحدة بس مرت عليا في حياتي الصغيرة دي و حسستني إن الدنيا لسه فيها خير .. يبقى انت يا نوران

مش عارف أقول إيه في حقك .. مش عارف أجيب كلام يوفيكي حقك

انت إيه يا نوران ؟

انت آية

انت بجد بجد بجد أجدع و أطيب و أحن و أعظم أخت

ربنا يبارك فيكي و يسعد قلبك و يباركلك في زوجك و يجعل شريف قرة عين لكما .. و تشوفوه أحسن حد في الدنيا بحالها

أستاذ خالد ( أبو همس ) الراجل اللي زي السكر المعجون بميه الذوق و الإحترام و طيبة القلب .. مش عارف أقولك إيه؟ .. كفاية عليا إني ألاقي حد ذوق و أخلاق قوي زيك كده بيفتكرني و يتصل بيا و يطمن عليا و يقولي إزيك و أخبارك إيه؟

أماني .. فاتيما .. رندا .. هبة .. محمود .. آبي .. دعاء .. كاميليا .. سومة .. سبهللة

شكراً شكراً شكراً على سؤالكم عليا .. بجد أنا عاجز عن وصف فرحتي بيكم .. سؤالكم , دعواتكم , كلامكم .... ربنا يبارك فيكم

بس إيه ده؟ ... ده أنا طلعت حد مهم بقى و أنا مش واخد بالي

طيب ابقوا فكروني أعمل حركة غياب زي دي كمان شهرين كده ولا حاجة علشان أجس النبض تاني

--------------------------------

طبعاً كنتم عارفين إن غيابي ده كان بسبب انشغالي بمشروع التخرج .. ولا ماكنتوش عارفين؟!! .. دي نوران ما شاء الله كانت مسيحالي جامد يعني

أنا بقى يا حضرات حكايتي حدوتة .. يعني المتتبع لمنحنى مجهودي في الكلية من ساعة مادخلتها هيتلخبط و مش هيعرف يقيمني صح .. باختصار شديد شديد يعني .. أنا واحد من الناس اللي دخلوا كلية بناءاً على رغبة مكتب التنسيق .. هي آه كلية هندسة .. بس دي ماكنتش رغبتي .. كانت رغبتي هندسة بترول .. و ماكنش علشان أنا راجل بأحب الجاز و البنزين و الحاجات دي .. لأ علشان أنا كنت متفق أنا و أقرب أربع صحاب ليا على الكلية دي باعتبار إن اسمها شيك و بس ..و جاءت نتيجة التنسيق .. 97.07% يدخل .. 97% يطلع بره .. طبعاً نص درجة أبعدتني خارجاً و جعلتني غير كفء لمثل هذا المكان اللي صحابي الأربعة كلهم دخلوه و بقيت أنا وحيد مرمي بين غياهب الإختيار الإضطراري .. و قولت يالا هندسة عادية هندسة عادية .. أهي حاجة حلوة برده .. طبعاً واضح جداً إن ماكنش في دماغي هدف معين .. وهكذا كنت أنا

المهم دخلت كلية غصب ماعرفش فيها حد ..أول سنة جبت 55% و سقطت في مادة .. تاني سنة مش عارف جبت كام و برده سقطت في مادة .. تالت سنة . قلت لنفسي : لاااا استنى بقى .. انت فاكر نفسك في المراجيح ولا إيه؟ ..انت داخل تعمل إيه يا عم؟ .. ده هيبقى شغلك بعد كده .. انت هتهزر ولا إيه؟ .. جبت 70% .. رابع سنة 77% .. خامس سنة اللي هي السنة دي يعني .. لأ دي فرح لوحدها .. ده فيه حاجة اسمها مشروع تخرج .. طبعاً لأني كنت بألبخ في أول سنتين قولت لازم أختار أصعب مشروع تخرج علشان يسندني شوية .. شايف سؤال في عيونكم بيقول :طيب تيجي إزاي دي يعني؟ يعني إيه أصعب مشروع و يسنده شوية؟ .. مشاريع التخرج من الحاجات اللي بتفرق مع الواحد في شغله بعدين .. إن ماكنش في مجال الشغل نفسه يبقى في القبول في الشغل من الأساس .. و بالفعل اخترت أصعب مشروع تخرج عندنا في القسم .. قسم مدني .. مشروع تصميم منشآت خرسانية مسلحة .. صعوبة المشروع ده تكمن في الكم و الكيف .. كم كبير من الشغل و حاجات أغلبها اول مرة تمر على الواحد بالإضافة إنه مشروع فردي .. يعني مفيش تقسيم شغل.. و برغم كده الدكاترة المشرفين على المشروع ده أقل دكاترة ممكن تاخد معلومة منهم .. يعني أغلب الشغل كان "مع نفسك يا بشمهندس" .. لو فيه معلومة مش عارفينها نتشقلب احنا لحد مانجيبها

طيب و إيه اللي جبرني على الذل ده؟!! .. أنا اللي قصدت كده علشان اثبت لنفسي قبل غيري إني تعثري في أول سنتين كان لظروف خارجة عن إرادتي .. اللي مع كده أعترف إنها ضعيفة جداً

رغم صعوبة الشغل في المشروع إلا إن بفضل الله و توفيقه خلصت الشغل بدري عن باقي مجموعتي للدرجة اللي خلت الدكاترة المشرفين عليا يدّوني شغل جديد إضافي و برغم إن كمية المجهود المطلوب فيه كانت كتير إلا إني كان مطلوب مني إني أخلصه في وقت قليل جداً .. ماكنش فيه نوم .. ساعتين نوم في اليوم كانوا يعتبروا إسراف في ساعات النوم .. و الحمد لله خلصت قبل الوقت المطلوب و قبل باقي مجموعتي كمان رغم إني أخدت شغل إضافي عنهم

و جاءت اللحظة الحاسمة .. يوم المناقشة 15/7/2008 ... كل أعراض الخوف و القلق من اضطراب في عدد ضربات القلب و كركبة في البطن و غيرها كانت متملكاني ساعتها مع الإحساس الوهمي إني نسيت كل حاجة عن أي حاجة في أي حاجة

و بدات مناقشتي .. أول مرة أحس إني خلعت عباءة التلمذة و لبست عباءة الهندسة .. إحساس رهيب إنك تكون مسلم شغل و يناقشك فيه دكتور أكبر منك في الخبرة ألف مرة و تقدر تقنعه و تتناقش معاه في صحته .. و يقتنع و يوافق على كلامك بكل سهولة بدون تعسف آمر على مأمور

خرجت من المناقشة و أنا في حالة مناقضة تماماً لما كنت عليه قبل ما أدخل .. توفيق ربنا ثم دعواتكم كانوا مصاحبين ليا .. و صوت نوران كان معايا قبل و بعد

و ظهرت النتيجة آخر اليوم

امتياز

الحمد لله

32 comments:

كاميليا بهاء الدين said...

مرحبا يا زميل
D:
فى عالم الخرسانة المسلحة
بأسلحة الدمار الشامل
أهم حاجة الخوذة عندك ولا ابعت لك واحدة ألمانى صناعة هتلر نفسه
D:

ألف مليوووووووووووووووون مبروك
أحلى خبر سمعته من فترة

بس مش تشيل بقى من عند التعليقات شجع المشروع .. علشان نفضل نشجع أجمل نجروو أجمل مهندس فى هندسة الحياه

انا فرحااااانه اوى اوى

ألف مبروك

يارب دايما إمتياز فى الحياه وفى كل مشاريع الحياه

تحياتى لأجمل أخ

فاتيما said...

إمتياز يا بنى و بتعرف إمثالنا
و كنت جايب 97 % ؟؟
دنت لو شفتنى
متسلمش عليا
يا واد رفعت راسنا و شرفتنا
عقبال ما اشوف يوسف زيك
يا رب
أكيد البيت كله فخور بيك
و مش بس البيت
النت كله بمدوناته فرحان بيك
و فخور يا نيجرو
ألف مبروك يا صديقى
و حمدلله ع السلامة
و ملكش حجة بقى تغيب بيها
مشروع و خلصنا
و إمتياز و إمتززنا
و نوران ؟؟
دى من أجمل الشخصيات اللى قابلتها فى حياتى
ربنا يديم المحبة و الود
دمت بالف خير يا صديقى الصغير

حنين القلب said...

مليون مبروووك
والله انا مش كنت اعرف
كنت سالت عليك
معلش يا سيدى خيرها فى غيرها
المهم انك جبت امتياز
لوووووووووووولىىىىىىىىىىىىى
بجد والله فرحت ليك
ربنا يوفقك يا باشمهندس
سلام

رئيس جمهوريه نفسى said...

الف مبروك يا غالى وعقبال يارب ما نشوفك مهندس كبير قد الدنيا على مستوى ممدوح حمزه كده لانى بجد بحترم الراجل ده قوى قوى قوى

الـسـيـدة نـون said...

اخص عليك
لأ بجد اخص عليك
هو انت بتعتبر انى لما اطمن عليك يبقى كدة انا عملت حاجة؟
انت مش اخويا ولا ايه

ده واجب عليا يا واد

اه لو تعرف مدى فرحتى بنجاحك يا نيجرو
ده انا طايرة من الفرحة من ساعة ما سمعت الخبر

ربنا يسعدك يارب وينجحك دايما ويكتبلك فى كل خطوة توفيق من عنده
ورزق حلال مباركا فيه


ومش ناوى تيجى بقى علشان افرجك على الزرافة والاسد


انا فرحانة بيك اوى

لولولولولولولولولوى
اخويا نجح يارجاااااااااالة


سلام
اختك خيخة

Mahmoud البطراوى said...

ما شاء الله ولا قوه الا بالله

والله وعملوها الرجاله ورفعوا راسنا

بجد انا والله انا قلبى دق من الفرحه لما شفت اخر جمله



ربنا يكرمك يا هندسه ويعلى مراتبك كده وتبقى حاجه مفيده تخدم بيها نفسك ودينك واهلك قول امين

رندا said...

مشاء الله مشاء الله مشاء الله
الله واكبر الله واكبر الله واكبر

نيجروو لو اقولك الدموع فى عنية مش هتصدق لو اقولك الفرحة فى كلماتى مش هتتصور
لو اقولك فرحتى اد اية هتقول هو فى حد كدة ايوة لية مش كدة وفى نيجروو اخ جمممممممميل اوى اوى واد جدع بجد راجل بجد

اسمك بقى امتياز باشا المهندس
دة اسمك الجديد
لولولولولولولولولولى

مليون لا الف مليون ممم برضة مش كفايا
دشليون مبروك
الهندسة تشرفت بواحد زيك يااجمل نيجروو

بجد كنت محتاجة اوى فى الفترة دى بالذات افرح اسمع خبر حلو بجد ربنا يسعد قلبك دايما

مبروووووك

قلب كبيييير من الورد مكتوب جواة اسم نيجروو هدية منى ليك

ياريت كنت اقدر اكلمك بنفسى ابارك واهنى بجد

كل الحب والود


رندا

سارة علي said...

الف مبروك انا اول مرة ادخل المدونة دى بس عارف انا مريت بنفس ظروفك فى الدراسة تمام وموضوع الكلية دة كان معايا كدة بس الحمد للة اتحررت من المشكلة مؤخرا زيك ربنا يكرمك
تقبل مرورى

Asmaa mahaba said...

مبرووووووووووووووووووووووووووك تانى مره الله انا اسمى مكتوب اخضر ربنا يكرمك يا نيجرو اقصد يا بشمهندس نيجروا امال ايه دا امتياز عقبالى السنه الجايه يا رب اجيب امتياز من ابو 95 ولا 96 عشان انا طماعه شويه....الله يطمنك بقى انت اتبهدلت فى مشروع التخرج ...وانا اللى عماله اهونها على نفسى ...الله يطمنك
عموما حااليا حنقولك يا بشمهندس نيجرووو بالفم المليان
مستنياك تدينى رايك فى موضوع مدرسه البنات....
تحياتى ليك سومه_87

همس الاحباب said...

هههههههه
الف مبروك يا باشا
وربنا يوفقك دائما
بجد فرحنالك قوى قوى
وانا كنت مبسوط قوى وانا باكلمك
وعرفت انك نجحت وجبت امتياز كمان كنت طاير من الفرحة
وعلشان كده لما تنزل القاهرة ان شاء الله لازمن اعزمك على واحد كابتشينو
وواحد مانجه وواحد كباب وكفته وواحد حصيرة خرسانة ايه رايك موافق مش كده
اوك انا مش موافق ههههههه
لا بجد بجد الف مليون مبروك يا باش مهندس وربنا يسعدك دايما
تحياتى

semsem said...

الف الف الف الف الف الف لالالا
مليون مليون مليون مليون مليون
مبرووووووووووووووووك
وبجد فرحتلك اوى
الف مبروك بجد
ومبروك لمصر هههههههههه

د. إيمان مكاوي said...

الدنيا دي مسرحية و الكل موجود لحكمة

أدوار بسيطة وعادية و فوقيها أدوار مهمة

و لكل واحد حواره..لكني مرعوب لفجاة

ينزل ستار النهاية و أنا لسه ما نطقت كلمة


الللللله على جمال كلماتك
أنا أول مره أدخل مدونتك لكن مبسوطه جدا إني لقيت شاب حقيقي يفرح زيك ..واخد أموره جد ومش بيحب الفشل زيك..أناحاسه بكلامك لأني إتعرضت لنفس التجربه مع إختلاف الظروف والأسباب ..أنا كنت داخله كليتي بإرادتي الكامله لكن تعرضت لظروف خلتني أطلع بمواد أول سنتين وبعد كده ربنا فتحها في وشي ..
ألف مبروك على النجاح وربنا يكرمك ويوفقك كده على طول

غادة said...

مبروووووووووووك يا نيجرو
و مش اى اى دا امتياز
بجد فرحتلك اوى ربنا يوفقك دايما يا رب
و تكون مهندس جامد ولو انى متأكده من كده
الف مبروك تانى وحمد الله على السلامه
سلام مؤقت

Empress appy said...

مبرووووك الف مبرووووووووك
بس البت خيخه مش سيحت لك خالص مين قال كده دا انا هقطم رقبتها ازيك مش تضيفك لمجلس النميمه بتاعتنا المرة الجايه هحط على الايحه

موناليزا said...

الف مبروك والحمدلله ان مجهودك ربنا كلله بالنجاح
بالتوفيق دائما

nigro said...

أماني
أنا اللي كنت خايف لتكوني زعلتي من حاجة في تعليقي
هو فيه حد يقدر يزعل من آخر العنقود برده؟
و اعذريني بقى مش هأقدر أرد عليكي بكلام أكتر من كده
لحسن أخوكي مش شايف قدامه أساساً
النهاردة كان أول يوم شغل ليا و اشتغلت 14 ساعة متواصلة لغاية ما اتعميت
أنا ماعرفش أزعل منك يا أماني

دعاء مواجهات said...

لولولولولولولولولولولولى

لولولولولولولولولولولولى


لولولولولولولولولولولولى

دعاء مواجهات said...

بجد حاسة انى عاوزة املى الدنيا كلها

زغاااريد وفرحة واخلى كل الناس تعرف

بالنجااح المدوى دة

ع فكرة انا بعرف أزغرد حلو اوى يعنى لا تكون فاكرنا هواة مثلا

لااااااااااااااااااا

دعاء مواجهات said...

الف الف الف مليووووووون

مبرووووك يانيجرو بجد

فرحانة كأنى انا اللى جبت إمتياااز

يااارب يجعل أيامك كلها إمتيازاات ونجاحاااات باهرااااات

...................

دعاء مواجهات said...

حاسة كدة ان الواحد دعواتة

الجااااامدة جت بفايدة

ايوا كدة فرحنا ياعمنا

وأنا اقوول الواد نيجرو ماجااشى يستقبلنى فى لامطار لية؟؟

أتاارى بقى........؟؟

مش كنت تقوول ياعم كنا نسااعد بردو

احنا اة مالنااش فى الهندسة بس بردو نساعد بأى حاجة...

دعاء مواجهات said...

( وفقك الله إلى ما يحب ويرضى

وسدد خطاك للخير دائماً

وحفظك ورعاك من كل عين آثمة

ونصرك على أعدائك

ويسرك إلى الهدى

ويسر الهدى إليك

وهيئ لك الخير حيث كان

وأبعد عنك الشيطان )

الكل يقووول
آميييييييييين..

Doba said...

الناجح يرفع أيده
هيييييييييييييييه
لولولولولولولى
========

كلنا يا واد انت يا واد بنعتبرك اخوننا الصغنن ولازم ندعيلك ونقلق عليك ونقول يارب يوفقك

مابالك بقى لما يجيب إمتياز ويكون تفكيره ناضح وعنده إرادة

ربنا يبارك فيك ويسعدك دايما يارب
فى حفظ الله دايما
هبة

رئيس جمهوريه نفسى said...

نيجرو الغالى
ليك عندى واجب تعال استلمه من المدونه عندى

maha zein said...

يااااه انا احب الناس المتفوقة دي
برافو بجد
وعاش عاش
الاصرار والتميز والقوة في الاداء
ايون
شرفتنا يا جدع
وعلي فكرة برغم ان ليا زمايل هندسة بترول كتير جدا بما اني عضو في منظمة مهندسي البترول
الا اني بحترم وبشدة اكتر احترام هندسة المعمار
يعني بشعر بجد ان الناس دي ناس رايقة ومسؤلة وعليهم بيترتب عليهم الدنيا كلها
الله عليك
بجد حسيتك وانت بتتكلم كانى انا الي بتكلم
شاطر بجد
بجد شاطر

فاتيما said...

واد يا نيجرو يا جميل قوى
ليك واجب عندى
لو ليك مزاج تجاوب تيجان
تعالى خده
تحياتى

عبده الرايق said...

الف مبروك يا نيجرو
مش باين من فتره جيت اسأل لقيت الخبر السعيده ده
الف الف مبروك

mohamed ghalia said...

ألف مبروك وعقبال الشغل ربنا يعينك متخفش مش هتشتغل إنتى هتعمل هههههههههه
بالتوفيق فى حياتك القادمة

الـسـيـدة نـون said...

عارفة انك مطحون فى الشغل وطلعان عينك وتعبان وبترجع مش شايف قدامك

بس انا فرحانة
عارف ليه؟
علشان ده معناه ان الناس اصحاب الشغل واثقين فيك
وعلشان كدة بيعتمدوا عليك اكتر

معلش يا نيجرو فى الاول بتبقى الحياة صعبة
بس ده كويس علشان تعمل اسم فى مجال شغلك وترتاح لما تكبر


ربنا يعينك يارب ويوفقك

تحياتى ليك
اختك خيخة

انين الحزن said...

نيجرو

اخبارك ايه انا عارفه اني مأثرة معاك بس والله غصبن عني انا اصلن مش عارفه قولك حاجه بس ببتعلك السلام علي طول مع خالد ياريت يكون بيوصلك

محمد انت تعرف انك انت غالي عندي
ومهما اتاخرت او انشغلت انت عارف انت ايه

ماشي يامحمد اوعي تكون زعلان من وزة

سلامووووووووووووز ياقمر
وزة

همس الاحباب said...

واد يا نيجرو ازيك وايه اخبار حضرتك
يارب تكون بخير
والبت وزة بتضحك عليك ولا بتبعت سلام ولا حاجة
ههههههههههه
انا جاى اهدى النفوس بس
يلا سلام واشوفك على خير

mostafa rayan said...

الف مبروك يا باشمهندس

أخـت فـى الله said...

الحمد لله اخيرا
الف مبروووووك يا نجرو