Wednesday 23 July 2008

و لما كان



و لما كان .....

و بس كده

--------------

طبعاً مستغربين من العنوان و البداية الغريبة المقطوعة دي .. بس أنا ليا مزاج أبدأ البوست و أعنونه بكلمة " و لما كان " .. لما كان إيه بقى؟ .. ما أعرفش

أهو كده و خلاص

معلش معلش .. استحملوا هبلي

------------------------------------

من فترة زمنية ليست بالبعيدة و لا بالقريبة .. يعني في النص

شد لي أخويا الكبير و أستاذي أحمد الباحث عن الحقيقة مكتوب من أسيوط و قالي :

تعالي يا ولد ( بكسر الواو ) ليك واجب ( بتعطيش الجيم ) حدانا تعالى و استلمه

قوم أنا بسذاجة طالب هندسة أتجرجر على ملا وشي و أروح أشوف الواجب لاحق الذكر

ألاقيه بيقولي يلا يا نيجرو يا حبيبي زي الشطور كده

افضح نفسك يا أمور في ست أسرار ما يعرفهمش اللي يقابلك في أول مرة

أنا بقى قولت أخفي على الخبر ماجور و أعمل نفسي مش واخد بالي

و أنا أصلاً كده كده كنت عايش في بوتقة واجبات هندسية إلزامية

فقلت أؤجل واجب اليوم إلى بعد بعد بعد بعد .....الغد

فإذ ربتا من يومين ( أيوه ربتا ) أنا لا بيا ولا عليا و فأجتن

ألاقي مكتوبين ورا بعض مشدودين

من قنا من عند أخويا الريس محمود

و من قاهرة ابن عز من عند اختي فاتيما

يتضمنان نفس مضمون المكتوب السابق

و اتنين محاميين صعايدة على مهندس محلاوي واحد أكيد يكسبوا

هو آه المحلاوي معروف بقوته و بجبروته بس دول صعايدة يابا

ده بالإضافة إن فاتيما تقول إحنا ننفذ علطول .... بدون تفاهم

هو على ما أتذكر كده إن الواجب ده أول ما طلع كان له شوية قوانين مرفقة و ملحقة

بس بما إني من ألد أعداء النمطية في الأداء

هأتصرف

1- يُهيء للي يقابلني لأول مرة و تُصوّر له نفسه إني شخص جاد جداً على الدوام .. م الآخر يعني رخم

و لكنه مع استمرار معاملته ليا و مع الألفة سيتضح له عكس تصوره

إني شخص أعشق ما أعشقه هو خفة الدم و الهزار

و يبقى يقابلني لو خد مني كلمة جد بعد كده

بس أنا مش مهرج


2- بيبان عليا إني شخص دبلوماسي بأعرف أذوّق الكلام كويس .. بس أنا للأسف حائز على جائزة الدولة التقديرية في التضبيش في الكلام .. بأحدف زلط زي ما بيقولوا .. يا زلط يا دبش .. حاجة من دي يعني


3- إني شخص انطوائي و ماليش في الصحوبية ده أغلب الظن اللي بييجي للحد اللي بيعاملني لأول مرة

بس أنا ... يا لهوييييييييي عِشَري بشكل يخنق

بس مشكلتي في حاجة واحدة بس هي إني ما أعرفش أجنّب العاطفة في التعامل

يعني ما أعرفش أتعامل مع حد ببرود و بمبدأ ( مش فارق )

لأ .. كل حد عندي في حياتي فارق معايا و له قيمة و معنى و تأثير

علشان كده أخاف أدخل في صحوبية مع حد و أتصدم فيه بعدين

بأزعل قوي ..... قوي

4- أنا مش طيب زي ما ممكن يبان عليا .. لكن بتوفيق ربنا أفكاري الشريرة لا تتعدي حدود الجمجمة و لا تعرف طريق التنفيذ لأن ربنا بيوفقني لتقييدها و طردها

لكني بأعتنق مبدأ إن مجرد التفكير في الشر هو شر في حد ذاته


5- من أسهل الناس اللي ممكن تتصالح .. ما عرفش أخاصم حد أكتر من 24 ساعة و لو هو تقيل بأروح أقوله في وشه أنا زعلت منك علشان كذا كذا يا ريت ما تعملوش تاني و سلم بقى

بأستتقل جداً إني حد يقولي ( أنا آسف ) حتى لو غلطان فيا .. مش بأحب أسمعها تتقال ليا من حد

بس أنا ما أقدرش ما أقولهاش


6- السر السادس هو إن اللي فاتت دي هي كل أسراري

-------------------------

المفروض من قوانين الواجب ده إني أبعته لحد تاني و أحط لينك مدونته

بس أنا مش هأبعته لحد

------------------------------------------------

أنا آسف جداً إني ما رديتش على تعليقاتكم في آخر موضوعين

و بصراحة مش هأقدر أوعدكم إني هأقدر أرد عليهم

و أسف جداً على تقصيري في زيارة مدوانتكم

أصل الحكاية إن أنا اشتغلت في مكتب دكتور من اللي كانوا مشرفين عليا في مشروع التخرج

تالت يوم بعد المناقشة علطول

و بسم الله ما شاء الله .. رايح في وقت عجب

شغل متلتل .. من 10 الصبح لــ 8 و 10 بالليل

بأرجع مش شايف قدامي أساساً

يا ريت تعذروني

سلام بقى علشان ورايا شغل الصبح بدري و مش عارف هأصحى إزاي

دعواتكم

---------------------------------------------------------------------------------------

نداء عاجل

من حكمدار المدونة إلى أصحاب القلوب الرحيمة

لو فيكم حد يعرف في لغة HTML أو فيكم حد يعرف حد يعرف في لغة HTML

ياريت يساعدني في المشكلة دي


مع العلم إن أنا مش بأستخدم لغة HTML و بأنشّط وضع التأليف
أفيدونا أفادكم الله

76 comments:

semsem said...

اول تعليق
بحجز

semsem said...

اولا الله يعينك والف مبروك ع الشغل
وربنا يوفقك فيه يارب يا نيجرو يارب يارب
____________________
نيجى بقى للواجب
اولا 10 على 10
سلمت الشيت تمام يعنى
انت حد حساس ورقيق وشخصيه بجد طيبه الله يحميك
ويوفقك
_____________________
بالنسبه للبوست اللى فات مش هنزعل ولا حاجه
انت اكيد كنت فى خنقه ونقول الحمد لله على كل حال
وانك بدات ترجع زى الاول
ومفيش احسن من انك تكون مشغول علطول لان التفكير ساعات بيخنق
______________________________
واحنا يا سيدي مستحملين
لما كان
معرفش ايه؟
ههههههههههههه

Mostafa Abdelmoneam Badr said...

عاجبنى تعبيرك عن توفيق ربنا ليك فى تقييد وطرد هواجس الشر والنوايا الخبيثة
وفكرتنى بدعاء سيدى أحمد الرفاعى "اللهم قيدنا بقيود السلامة عن الوقوع فى معصيتك"
واحترمت فيك معرفتك لذاتك لقدر بعيد وإنك عارف ان رحمة ربنا بيك هى الحماية والأمان

فعلا فرصة جميلة علشان اتعرف عليك فعلا

وأول مرة أعرف إن الباحث من أسيوط
متشكرين ع المعلومة المحلاوية
مع خالص تحياتى
السلام عليكم ورحمة الله وبكاته

الـسـيـدة نـون said...

هيييييييييييييه
نيجرو اتفضح
هيييييييه
نيجرو اتفضح
هيييه


هههههههههههههههه
واخيرا عرفنا شوية اسرار عن نيجرو

بس والله يا نيجرو
اسرارك دى بتدل على انك طيب جدا


بس انا كنت عايزة اعرف شوية افكار شريرة من اللتى لا تتعدى حدود الجمجمة
عايزة اعرف الجمجمة دى فيها ايه؟


ربنا يعينك فى الشغل
ويوفقك يارب

تحياتى
اختك خيخة

رندا said...

انا جيت اقولك الف مبروك على الشغل ربنا معاك يارب وبالتوفيق ان شاء الله
وان شاء الله تكون اصغر وزير القادم استنى بس مدة عشر سنوات انا بقولك اهو وبكرة تشوف
والبوست طبعا عرفنى بانك اجمل نيجروا ودة مش جديد عليك طبعا

ومش هعلق كتير اكيد مش عندك وقت تقرا كل التعليقات هههههههههههه
ربنا يعينك بجد

كل الود وكل الحب

رندا

Mahmoud البطراوى said...

شرير جداااااااا

ال طيب ال الى بتقولها خيخه

الواد ده طلع وحش خالص من جوه ولازم يتغير
هههههههههههههههههههه

يامان انت بجد جميل اوى وعايز اقولك انى كل يوم بحبك اكتر

شوفلى عروسه بقى :D

Doba said...

أولا اللى انت كاتبه مش جديد علينا
يعنى مهياش اسرار أصلا أصلا

ثانيا انا مبسوطة وسعيدة جدا ان عملك الجيد فى المشروع خلاك تشتغل فى مكتب الدكتور المشرف

ثالثا دعواتنا ليك بأنك تشرفنا فى عملك
رابعا خلى بالك اتعلم من الدكتور وبعدها إستقل مش تخليه يستنفذ كل اللى جواك - اتعلم من عنده وبعدها أبدا فى بناء نفسك واستقل بأفكارك

خامسا ربنا يثيبك على مقدار نيتك وعملك الطيب

فى حفظ الله
سلام
هبة

دعاء مواجهات said...

أيوااااااااا

ياعم

الناااس اللى تناقش النهاردة وتشتغل بكرة ياعااام...

مبرووك ياابنى الف مبرووك

________________________

انا مش زعلانة انا بس قلقت عليك معرفش ان الحكاية فيها شغل وكلام عاالى
طب كويس انك افتكرتنا بس...

دى كفاية عليا بجد...

مهو أنا لو أقدر أزعل من نيجرو كنت عملتها ومترددتش ...

ربنا يوفقك ويعينك..

إشطاااااااطك يابرنس.

دعاء مواجهات said...

أما بالنسبة للبوست بقى

إسمحلى أقولك إن أسرارك كلها حلوة وجميلة

علشان نقدر نكتشفك من خلالها

وكويس ان الافكار لاشريرة لاتتعدى حاجز الجمجمة الهندسية العالية..

نورتنى

وحسك عينك الشغل ينسيك حبايبك..

بيس

Unknown said...

عجبتني بدايت البوست قوي مكنتش متخيل ان ده تاج أو واجب من المتداول بين المدونين
شدتني قوي
كل ودي

انين الحزن said...

طب زهلان مني انا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


الف مبروك علي الشغل لعبت معاك زي سواقين التاكس

انت تستاهل كل خير يامحمد

سلامووووووز ياقمر

عاشــــــ النقاب ـقــــة"نونو" said...

السلام عليكماظن لم تعد اسرارك اسرارلان كل شيجن انكشفن وبان شخصية جديرة بالاحترام
تحياتي

Asmaa mahaba said...

ههههههههههه الواحد يخاف منك بعد كدا يا نيجرو بما انك شرير
تحياتى ليك سومه_(87

أخـت فـى الله said...

انا اخاف جدا اقول اسرارى مش عشان عملت حاجة وحشة لا سمح الله لا عشان
بحب الخصوصية جدا
واحب الغموض
محدش يقدر يحددنى او يحطنى فى خانة معينة
سلااااااااااااامز

همس الاحباب said...

هههههههههه
يادى الفضايح والجرس بتاعت المحلاوية
ههههههههه
يا عمنا ربنا يوفقك ويسعدك
وتكون فاتحة خير عليك
المهم انك بخير
واسرارك جميلة وتنم على شخص طيب وابن حلال
تحياتى وتقديرى

رئيس جمهوريه نفسى said...

بص يا نيجرو تعليقا على اول سر مالكش حق فى الانطباع ده لانى بمنتهى البساطه يا غالي انت صوتك بيضحك اه والله يعنى لما اتكلمنا صوتك فى نبره مبتسمه تشعرك بالانطلاق وحب الحياة ربنا يوفقك فى الشغل ان شاء الله

ahmed_k said...

جميله جدا صفة عدم الأستمرار في الخصام
الم يخبرنا سيدنا رسول الله عن المتخاصمين
ان أفضلهم الذي يبدا بالسلام

ربنا يكرمك في عملك الجديد

تقيل مروري السريع
ودمت بكل خير

semsem said...

نيجرو
ليك تاجين عندي
لما تفضى اعملهم

اربعين سنة ستيوتند said...

حلو اوي الكلام ده
و فعلا اسوأ حاجة حكاية ان العاطفة تدخل في كل تعاملاتك يااااااااااااه لو لقيت بأ الناس متستحقش العاطفة
حاجة بعيد عنك نكد
:)

Asmaa mahaba said...

نسيت اسالك انا فهمت كل اللى انت كاتبه بس مفهمتش الانجليزى اللى مكتوب دا
تحياتى ليك سومه_87

فاتيما said...

نيجروووو
يا صديقى أولاً إيه نستحمل هبلك دا ؟؟
عادى يعنى ما الجملة متركبة صح
و لما كان لايبدو عليا شىء من هذا فكان لابد أن أبوح بستة أسرار و كلت منهم واحد عليكم ...
المهم
الحاجات دى باينة عليك من أول تعليقين تلاتة عندى ...
معرفش لما أشوفك هيبقى الموقف إيه ؟؟
بس متهيألى مش هتفرق قوى لأنى متوقعاك غير ما يبدو عليك للوهلة الأولى
أنا شايفاك بعين المحبة
و لذلك لن ألحظ أى شىء عكس كدا
ألف مبروك على الشغل
الميزة بقى إن الجمعة اجازة و دا يوم التبرع بالدم إن شاء الله و لازم تيجى عشان نطبق التاج دا عملياً
ماشى ؟؟
سلام مؤقت يا صديقى
و مشكرين إنك موقرنى قوى فى البوست و عاملى برستيج جامد متحرمشى منك يا وااااد

Ehab said...

ولما كان

جامد قوي المطلع ده يا واد يا ابو الأناجير
عامل زي الحكايات بتاعة الف ليله وليله بس القديمه الحلوه دي
المهم اجابات الاج جامده قوي تصدق انا بقالي كتير من كتر ما جالي تاجات نسيت هي كانت من مين ولا هي ايه اصلا
بس حلو الأسرار بتاعتك كده يا برنس هندلع عليك براحتنا

ربنا يسعد ايامك
بس ملحوظه صغيره مين قال ان اللي يقابلك هيحسبك انطوائي صحيح انا مشفتكش وجها لوجه بس من اولا كلامنا حسيتك شخصيه لذيذه وعشريه جدا ودي اكتر حاجه بحبها فيك قربك من الناس كده وروحك الحلوه دي كأنك معاشرنا سنين وانا بحب ده قوي

ربنا يحفظك يا جميل

سلااااااااااااااااااااااااااام
اخوك ايهاب

Mahmoud البطراوى said...

نيجرو المشكله الى حصلت لك دى معناه حاجه من اتنين
اما انك فضلت وقت متكتبش
يعنى كتبت كلمتين وقمت ورجعت كملت فالصفحه بتفقد الصله بالموقع الرئيسى فده يبقى تعمل كوبى للموضوع وبعدين تقوم قافل الصفحه وتعمل بس بعد كده

--------------------------------

او انت كتبت فى الورد الاول واخدته كوبى بست وده متعملهوش عشان لما بتعمله لازم تظبط كذا حاجه قبلها

( الكلام ده فى ضوء خبره مش علم واسأل مجرب ولا تسأل طبيب)
بقالى كتير اوى مشفتكش ليه فى صفحتى؟؟

دعاء مواجهات said...

انا جيت ارمى التمااسى

لاقيتك مزنزق فى (إتش إم إلاية)

ربنا يعينك

لو اعرف فيها مكونتش اتاخرت طبعا

ابقى طمننا عليك

بييس

Empress appy said...

نتحمل هبلك
يا ابنى من يوم ما عرفتك وانا متحملاه هههههههههههههه

ايه اللى لخبط المدونه دى كده اقولك اعمل زى سكر وادينى الباس وورد وانا اظبط لك الدنيا اشيلها وانفضها وارجعها تانى هههههههههههههههههههههههه

دعاء مواجهات said...

طالبة معايا اوى

اعرف رايك ف البوست الجديد

بيقولوا هيودينى المعتقل

ههههههههههههههههههههه

مستنيااك..

د/اجدع بنوته said...

ده كله علشان تجاوب عن التاج

اجابات لذيذه ورايقه

وربنا يقويك ف الشغل يارب

Diyaa' said...

ربنا معاك في شغلك وألف ألف ألف ألف مبروك في الدماغ
تعرف يا محمد..حتي تعليقك اللي فوق كلمة التعليقات فيه صراحة ساخرة عجبتني أوي..إنت هايل يا ابني لا تقلل من قيمة نفسك ..وأكيد مش هتبالغ فيها زي ما شفت النهاردة
مبسوط إني شفتك وربنا يعين وأقدر أقرالك كتير والمهم السلالة :)
سلام

مطلق said...

ربنا يوفقق يا نجرو دي اول مره ازور المدونه بتعتك وانشاء الله مش حتكون الاخيره
وبالمناسبه جبت كوبايه التحليل ولا لسه

قوس قزح said...

ان هرد على كلامك بجملتين

1- انت مش عارف قيمة نفسك

2- انا سعيدة انى اتعرف على شاب محترم و مؤدب وطيب زيك


المهم اخبار المحلاوية ايه ؛)

Mahmoud البطراوى said...

بعت لك ايميل ع mohammad.alnaggar@yahoo.com

Unknown said...

على فكره يا واد يا نيجرو
ضيف عندك دي
واد جدع وجميل

Ehab said...

نيجرو حبيب قلبي

بجد يا واد انت دخلت جوه القلب ولا القسطره الطبيه

سعيد بيك جدا
سلاااااااااااااااام

مجلة علّي صوتك said...

السلام عليكم
ربنا يوفقك ويزيدك من علم وأخلاق

سمر الشافعى said...

ايه دا
ايه داااااا

انت محلاوى ؟؟؟؟؟؟

بلدياتى يعنى

ياويلكم ياويلكم

Unknown said...

السلام عليكم ورجمة الله وبركاتة
ازيك يا نجرو
يارب تكون بخير
وشاكرة لك تعليقك وكلامك الحلو عندى
اجاباتك كمان جميلة
وان شاء الله احاول اشوف لك
حل للمشكلة
على فكرة لك سلام خاص من بتاعت الخميرة

Unknown said...

سلام خاص وجامد
جداا منى
انا مش نهر انااختهاا
بجد انا سعيدة بالتعرف عليك
واضطريت انى اسرق اسم نهر عشان اعرف اعلق عندك
ربنا يديم التجمع والود
وشكرا على التعليق ابو خميرة
عند نهر
سلام يا نجرو

المنسى said...

حبيب قلبى أنا أول مالمست فيك خفة دمك
يبقى إزااااااااااى بقى جاد جداااا
إحنا هنحمرق ولا إيه
وفعلا عشرى بشكل يخنق
ورغاى بشكل
يخلى الواحد مايسبكش ويمشى
إيه ياواد خفة الدم دى
موعت نفسى
هههههههههههههههههه
على فكرة أنا ضفت إيميلك
وهقرفك
مش هسيبك يعنى مش هسيبك
سلامم مؤقت

سبهللة said...

مبروك على الشغل
ومبروك على الفضيحة اللى كلنا جربناها قبلك
بس باين عليك طيوب
واحلى حاجة عملتها انك مش هاتعبته لاى حد
ربنا يسترنا دنيا واخرة

Diyaa' said...

فينك يا باشممهندز ؟

دعاء مواجهات said...

اولا بشكرك ع رايك ف كتابتى

وع تعليقك لاجميل عندى

ثانيا

طلب

عاوزيين جديد بقى

مااشى

مستنية

بيس

3ala asm masr said...

الناس عماله تقول نيجرو نيجرو قلت ادخل اشوف مين نيجرو ده
بس اول مادخلت المدونه حسيت انى اعرفك من زمان
واضح انك حد حلو اوى
مبروك على الشغل وربنا يوفقك

Asmaa mahaba said...

كل عام وانت الى الله اقرب يا نيجرو

nigro said...

semsem
=====
شيت؟
شيت إيه يا سمسم
بقى أنا ما صدقت إني خلصت تقوليلي انت شيت
أستغفر الله العظيم ربي
ربنا يا رب يكرمك على كلامك ده اللي اتمنى بجد أكون خمس ربعه
نورتيني يا سمسم

nigro said...

مع اصراري
=======
حارجني قوي كلامك و مش عارف أرد عليه
ربنا يكرمك يا رب
و يرزقني الهداية و إياكم إلى ما يحبه و يرضاه
أنا اسعد يا أفندم إني اشوفك عندي
ربنا يبارك فيك
نورتني

nigro said...

بت خيخة و اي كلام
==============
فرحانة فيا قوي ياختي
مااااااااشي
و يا نونا لما انا أبقى طيب تبقى انت إيه ؟
يا لهوي عليكي
و عاوزة تعرفي شوية أفكار شريرة من اللي جوا الدماغ؟
بعينك
أقولك .. يمكن في مرة تعرفيها
جوا قلبي يا نونا

nigro said...

رندا
====
الله يبارك فيك
و بعدين وزير إيه بس ؟
لا ياختي أنا مش عاوز أبقى حرامي
أنا مش قد المسئولية و السؤال عنها يوم القيامة
خليها مهندس كبير - إن شاء الله - و بس
و بعدين لو أنا معنديش وقت تعليقك انت لازمن و لابد إنه يتقرا
هو تعليق اي حد ؟
دي رندا يا جدعان
و انا كمان كل الود و الحب
نيجرو

nigro said...

بطوط حبوب
========
شرييييير جدااااااا
( عنين بتبرق جامد )
يا دكترة انت اللي تحب بجد من أول كومنت
و بعدين انت مالك متسربع على الجواز كده
اصبر كده جايز نعمل فرحنا في يوم واحد
أنا ناوي أعمل فرحي
يوم 20/20/2020
انت إيه نظامك؟
فاضي ولا نأجله شوية

nigro said...

doba
====
سادساً : أنا قعدت أفحّر عن اسرار فيا و مالقيتش غير دول
إيه ده طلعوا بايتين
طيب
سابعاً : انا مش عارف اقولك إيه بجد على كلامك ده
ثامناً : ربنا يكرمك يا رب
تاسعاً : انت حد جميل قوي
عاشراً : تشربي حاجة
حداشراً : لأ كفاية كده بقى
اتناشراً : تعليقك عندي بيفرحني

nigro said...

دعاء مواجهات
===========
أيوااااااا
الناس اللي داخلة تنبر دي
يا عم
الله يبارك فيكِ يا دؤدؤ
يا كبير بالراحة علينا أنا مش قد الكلام الحلو ده
دايماً كده منتشرة في الصفحة يا دؤدؤ
و الجديد يا ستي اتنشر أهو
بس خلي بالك انت اللي طلبتي
اشطاط بالعسل الأبيض ( اللي عندي حساسية منه )

nigro said...

كاتب مصري
=======
عجبتك بداية البوست
طيب ده شيء كويس
أصل أنا مش بأحب النمطية
بأحب التغير حتى لو كان تغيير أهبل
نورتني

nigro said...

أنين الحزن
=======
أيوه زعلان
أنا ماكنتش زعلان قبل كده
لكن دلوقت زعلان
و زعلان جامد كمان
و مش هأتصالح غير بطلب رسمي و عليه طابع دمغة و ختم النسر و ماضي عليه اتنين موظفين مرتباتهم ما تقلش عن تلاتين ألف جنيه في العمر
سلاموووووووز يا وزة

nigro said...

نونو
====
و عليكم السلام و رحمة الله
يعني خلاص انكشفنا على الملأ
ويا أفندم كلامك ده من ذوقك بس
نورتيني

nigro said...

سومة
====
هو أنا شرير بعقل يا سومة
ده أنا الشر لو قابلني في شارع
بأحوّد أنا من الشارع التاني علطول

و كل عام و أنت إلى الله أقرب و على طاعته أدوم و بلغني و إياكم شهر رمضان و تقبله منا

nigro said...

شيمي
=====
يا واد انت يا غامض ياللي محدش يحطك في خانة معينة
طيب و ليه كده يعني يا شيماء
ده الحياة سهلة خالص و مش محتاجة غموض
دايماً منوراني

nigro said...

همس الأحباب
=========
يا خالد باشا أهو انت اللي ستين طيب و ابن حلال كمان
و بالنسبة للمحلاوية فطبعاً مش محتاج أفكرك إنهم معروفين بقوتهم و جبروتهم و مابيخافوش من حد
أنا بقى بأخاف
من الحقن

منورني دايماً يا خالود

nigro said...

رئيس جمهورية نفسي
===============
حوده الغالي
يا محمود و هي الدنيا أساساً مش مستاهلة تكشير
يعني تبقى متنيلة بنيلة و كمان نكشر
ده احنا نموت أحسن بقى
وااااااحشني يا محمود

nigro said...

أحمد .. ك
=======
الواحد يخاصم و يشيل في قلبه ليه
ده كده ممكن نتعب
علشان كده أنا مش بأحب الخصام و الكلام ده
و مشكرين يا سيدي على دعوتك دي و ربنا يكرمك يا رب
تقبلت مرورك السريع
و تحياتي

nigro said...

semsem
======
انا آسف جداً يا سمسم
أنا مش أخدت بالي من تعليقك ده غير دلوقت بس
معلش بقى .. بالله عليكي اعذريني
ماكنش قصدي إني أتجاهلك و الله
ماتزعليش بقى .. لو قريتي التعليق ده

nigro said...

أربعين سنة ستيودنت
================
ياااااه و لسه صابره
بالنسبة لكلامك
البوست الجديد بيتكلم في الجزئية دي
نورتيني

nigro said...

فاتيما
======
ايوه كده يا طمطم
كويس انك لحقتيني
هو أنا طبعاً أنا كتبت الكلمة دي و ليس ورائها شيء دفين
بس انت الحمد لله أيّفتيها صح
بالنسبة بقى لباقي تعليقك
فاللي حصل حصل
و الغلاوة اللي زادت زادت
و الفرحة اللي حصلت حصلت
و اللي في القلب في القلب يا طمطوم

nigro said...

الشنكوتي الكبير
=============
شناكيتو
اللي محتل البطين الأيمن و الأيسر و واخد الرئتين مقاولة
حبيب قلبي
و الله يا هوبة الكلام الي انت قلته كأنك بتوصف بيه نفسك
و الله يا إيهاب ماتعرفش انا فرحتي كانت بيك قد إيه لما شوفتك
انت يا واد غلاوتك بتتحدف في القلب حدف
ربنا يحبب فيك خلقه
واحشني يا ابو الشناكيت

nigro said...

بطوط حبوب
=========
انا كنت يا محمود تبع نظام كوبي و بست من الورد
و بطلته و العملية مشت لوز يعني و الحمد مفيش مشاكل
شكراً على اهتمامك يا دكترة

nigro said...

appy
====
لازم طبعاً يا آبي تتحملي هبلي
لو ماكنتيش هتتحملي هبلي كنت هتتحملي هبل مين يعني
و عاوزة الباسوورد
بعينك
نورتي البحيرة

nigro said...

د/ اجدع بنوتة
============
الدكتورة ياسمين
يا مراحب يا مراوح

الواجب عبارة عن 6 أسرار أنا خلتهم خمسة .. طيب كنت هأكمل البوست بإييييه؟
و لو اني مش عارف يعني إيه إجابات رايقة
لكن ما يضرش
بنجتي المطرح يا دكترة

nigro said...

diyaa
======
الله يبارك فيك يا ابو الضواضيء
يا ضياء أنا مش باقلل من نفسي
بس أنا عارف حجمها
و بأكره جدا اللي بيحط نفسه في برواز أكبر منها
و بس
منوّر يا ضياء

nigro said...

kareem
======
أهلا و سهلا بيك يا كريم
نورت المطرح
بالنسبة للكوباية
ضحكوا عليا و مارضيوش يدّوهالي
):
نورت يا كريم

nigro said...

قوس قزح
=======
ان هرد على كلامك بجملتين
1 - رحم الله امرءاً عرف قدر نفسه
2 - ده أنا اللي اسعد إني قابلت حد في جديتك و خفة دمك و عقلك

ماتخافيش على المحلاوية طول مانا فيهم

نورتي المطرح

nigro said...

على صوتك
========
و عليكم السلام
ربنا يزيدكم صيت و منفعة

nigro said...

سمر الشافعي
==========
ايوه محلاوي
هم بيقفشوا في المحلاوية اليومين دول ولا إيه؟
يا ستميت الف ويلكم و ويلكم

nigro said...

نهر الحب
======
و عليكم السلام و رحمة الله و بركاته
إزيك يا نهر
الحمد لله بخير
و يا ستي انت تستاهلي أكتر من الكلام ده بكتييييييييير
بجد مش مجاملة

nigro said...

مش نهر الحب
=========
إزيك يا نسمة
و الله يا نسمة أنا بجد سعيييييد جداً إني اتعرفت عليكي
و الله انت شخصية بجد حلوة جداً و راقية جداً
ربنا يكرمك يا رب
ربنا يديم التجمع على الخير و الود
سلام يا مش نهر

nigro said...

المنسي
=====
أبو الرشد
ما تبالغش قوي كده يا محمد
ده انا حد رخم قوي على فكرة
و يا سيدي تقرفني إيه بس
عييييييييب عليك
هو الناس السكر اللي زيك كده فيه حد يتقرف منهم برده؟!!!!!
منورني يا أبو حميد

nigro said...

سبهللة
======
الله يبارك فيكي
طيوب؟ .. ده بس من زوقك
ربنا يسترها يا رب

nigro said...

3ala asm masr
============
مين دول اللي بيقولي نيجرو نيجرو
و الله ما عملت لحد حاجة
أنا بيرييييييييييء
كلامك ده بجد دليل على ذوقك و جمال روحك
ربنا يكرمك يا رب
الله يبارك فيكي و ربنا يجازيكي خير على دعوتك دي
شرفتيني في أول زيارة

أع ـقل مـ ج ـنـونــة said...

ياسلام ياسلام

يعني انا كنت اخر من يعلم بئة :d

علي فكرة برده في حاجات كتيرة منك

بالذات نقطة التضبيش دي :d