Saturday, 30 August 2008

صوماً مقبولاً و افطاراً خفيفاً


كل سنة و انتم كلكم طيبين
كل عام و انتم إلى الله أقرب و على طاعته أدوم و على محبته مجتمعين
المدوّن -اللي هو أنا يعني- بيهنيكم بالشهر الكريم
و يتمنى لكم صوماً مقبولاً و افطاراً خفيفاً

و أهو جه يا ولاد .... أهو جه يا ولاد
هيّصوا يا ولاد .... هيّصوا يا ولاد
ستووووووووووب
لأ ... هيّصوا إيه؟!!!
ماحنا طول السنة مهيّصين
هنهيّص كمان في رمضان
أُذكّر نفسي و إياكم
عاوزين صيام بجد
عاوزين همة عالية
عاوزين صيام الخواص
اللي هو الصيام عن كل ما نهى الله عنه
الصيام عن كل ما يُغضب الله
مش صيام عن أكل و شرب و بس
لااااااااااااااااا يا شاطر
مش هو ده الصيام
زي ما بطنك صايمة عن الأكل و الشرب
إيديك كمان تبقى صايمة
رجليك كمان تبقى صايمة
عينيك كمان تبقى صايمة
أذنك كمان تبقى صايمة
لسانك كمان يبقى صايم
جوارحك كلها صايمة

عن ابي هريرة أن رسول الله صلى الله عليه و سلم قال :
قال الله : كل عمل ابن له ؛ إلا الصيام ؛ فإنه لي ؛ و أنا أجزي به ؛ و الصيام جُنة ؛ و إن كان يوم صوم أحدكم فلا يرفث و لا يصخب فإن سابه أحد أو شاتمه فليقل : إني امرؤ صائم ؛ و الذي نفس محمد بيده لخلوف فم الصائم أطيب عند الله من ريح المسك.
للصائم فرحتان يفرحهما : إذا أفطر فرح , و إذا لقى ربه فرح بصومه
صدق رسول الله صلى الله عليه وسلم
رواه البخاري

يعني خد بالك
صيامك ده مُقدّم مباشرة منك لربنا عز و جل
و ثوابه عظيم لا يعلمه إلا الله
هو -سبحانه- يجزي به : و هو -سبحانه- يكافيء به
و هو الله العزيز الجبار المتكبر له الكبرياء في السماوات و الأرض
خالق الخلق .. خالق الكون .. رب العزة .. رب السماوات العُلى و الأرض و ما بينهما
مالك الملك .. ذو الجلال و الإكرام
الرحمن .. الرحيم
يعني الصيام لازم يبقى على أكمل و أتم وجه
شوف انت بتقدمه لمين

و إلا -و العياذ بالله- هنلاقيه مرمي في وشنا آخر الشهر و لا كأننا صمنا ولا تعبنا
فلنحذر
الناس اللي بتقضّيها صيام الصبح و بالليل مراجيح
لأ يا حبايبي
صيام 24 ساعة في الـ 24 ساعة
رمضان مش قبل الفطار و بس
رمضان شهر بحاله من أول لحظة لآخر لحظة
و اوعوا اوعوا اوعوا حسكم عينيكم -و أحذر نفسي قبلكم- تنسوا أو تتكاسلوا عن صلاة التراويح
مش نفطر و اللي يقضّيها أنتخة و فرجة على المفسديون (التليفزيون) و اللي يروح يندعك في شغله و اللي يقضيها كافيتيريات
كل الناس دي بتخسر كتييييييييييييييييييييييييييييييييييير و الله العظيم
يغور الشغل على التليفزيون على الكافيتيريات ولا ركعة واحدة من صلاة القيام تتفوّت
اللهم ثبّتنا


يلا كفاية عليكم كده
كل سنة و انتم طيبين
و من ربنا قريبين
و على طاعته مداومين
و رمضان صائمين قائمين
و للقرآن الكريم قارئين متدبرين خاتمين
و من الفطار مخففين
و صلاة القيام مش مفوّتين
و للسحور مش ناسيين
و فضل قيام ليلة القدر مدركين
و على الخير دايماً متجمعين
و عن الحال اللي تحت ده تماماً مبتعدين

صيام بصيام
صائم لمدة شهر عن التدوين
و اشوفكم -إن شاء الله- بعد العيد
تقبّل الله منكم و مني

قبل ما أمشي هأسيبلكم رابط مدونة ( هدية ) أنا بأعتبرها هي و فكرتها تحفة
مفيش اي علاقة تربطني بصاحبها اطلاقاً لا من بعيد و لا من قريب غير إنه أخ في الإسلام
و لقيت إنه بيقدّم عمل جيد في صورة جذابة بس لأنه مش منتشر تدوينياً فعمله ده تقريباً مختفي
أسأل الله أن يجعل عمله هذا في ميزان حسناته و ينفعنا به
المدونة اسمها
تظبيط

أستودعكم الله الذي لا تضيع ودائعه
السلام عليكم و رحمة الله و بركاته




32 comments:

رئيس جمهوريه نفسى said...

كل سنة وانت طيب ياغالى ويتقبل اللة منا ومنكم صالح الاعمال وسائر المسلمين بعون اللة
حمس يو يا نيجرو
تك كير يا غالى

بت خيخة وأى كلام said...

كل سنة وانت طيب يا نيجرو
واجازة رمضانية مفيدة لك ان شاء الله
وربنا يتقبل منك صيامك

هتوحشنا جدا

سلام
اختك خيخة

كاميليا said...

هههههههههههه

طيب مش تزٌق .. هنصوم بذمة ان شاء الله

كل عام وانت بخير

تقبل الله منا ومنكم صيامنا وقيامنا وصالح اعمالنا

كل عام وانت الى الله اقرب
كل عام وانت الى الله اتقى
بقلب اصفى وانقى

نشوفك على خير
ان شاء الله

تحياتى

آخر العنقود said...

كل سنة وانت طيب يامحمد
وبجد ربنا يعينا على الصيام والقيام
ونقدر نوصل ونحقق الصيام اللى انت بتقول عليه
ويرزقنا واياك الهمة والنية الخالصة والاخلاص ا
اللهم آمين
نشوفك على خير
سلام يانيجرو

Ahmed Al-Sabbagh said...

همممممممممم

وافطارا لذيذا

كل سنة وانت طيب يا حبيبى

وربنا يتقبل منك

احمد

سومه...مجنونه فى بلد عاقل said...

كل عام وانت بخير يا نيجروا انت لحقت عشان تصوم عن التدوين عموما تروح وتيجى بالسلامه وحاول تبقى تدخل تطل علينا
سومه_87

appy said...

كل سنه وانت طيب يا نيجرو وبعدين فين الفانوس بتاعى تصدق ان انتم عيال اى كلام ماشى ماشى

أبو خالد said...

أبني الجميل محمد
كل عام و أنت و أهل المحلة الكبري عن بكرة أبيها بخير..
اللهم أرزقني و محمد النجار محبتك و حب من يحبك و أجمعني و أياه علي حوض خير البشر سيدنا محمدا صلي الله عليه و سلم
و أسقنا من يده الشريفة شربة ماء لا نظمأ بعدها أبدا
دمت أبن غالي

قوس قزح said...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

واحدة مفروسة said...

انا جايه اقول
كل سنة و انت طيب و بالف خير و سعاده
و الى اللقاء ليلة العيد

همس الاحباب said...

كل سنة وانت طيب
وبالف صحة وسلامة
ورمضان كريم يا باشا

محمد الكومي said...

كل عام و انتم بخير بمناسبة شهر رمضان الكريم

رمضان كريم اعاده الله عليكم بالخير و اليمن و البركات

ليك فانوس عندي تعالى خده بسرعة يالا

ـ-ـ- أحمد عبد العدل-ـ-ـ said...

كل عام وأنتم بكل خير ورمضان كريم
تقبل الله منكم الصيام والقيام والدعاء
أجازة رمضانية سعيدة ان شاء الله

ميّويه said...

آآآآلو...تست تست
السلام عليكم
رمضان كريييييييييييم
كل سنة وحضرتك طيب
وكل المسلمين طيبين
اعتذر عن عدم متابعتي انا بجد آسفة ..بس المسامح كريم واحنا في شهر الكرم ..صح ولا إيه؟؟!!
ونشوفك ونشوف بوستاتك علي خيييييير وإجازة سعيدة إن شاء الله في طاعة الله

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

نهر الحب said...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

~ شيمى ~ said...

رمضان كريم يا نجرو
شوف دة كدة

http://sometalk.blogspot.com/2008/09/blog-post_02.html

ابن حـجـر الـعـسـقـلانـى said...

كل رمضان و أنت إلى الله أقرب

ربنا يرفعك فى أعلى عليين فى الجنة يا نيجرو .. مع النبيين و الصديقين و الشهداء و الصالحين

اللهم تقبل منك و منا رمضان

Doba said...

ازيك يا واد يا اخويا يا صغنن
والله كنت مفتقده النت ومشاكسات المدونين وكل واحد وبصمته

فرحت كتير لما لقيتك سألت عليا وكنت موجود فربنا يباركلى فيك ويسدد خطاك وتقدر تحقق ونحقق كل اللى بنتمناه

كل سنة وانت طيب
ورمضان كريم
متحفش فى الأكل يا واد انت

السلام والتحية
هبة

Eldebug said...

كل سنة وانت طيب يا عم الحاج ... ولو انى زعلان اصلا ... مفيش رنة حتى كده اول الشهر تعبر بيها عن تهنئتك لشخص الكريم ببلوغ شهر رمضان

يارب تكون دايما بصحة وسلامة يا كنج

ayman badr said...

كل سنة وكل المسلمين بخير وبجد الصورة عجبتنى قوى والموضوع جذاب وجميل
ترجع بألف سلامة

فتوح أبو المفاتيح said...

كل ينة وانت طيب يا نجرو
وربنا يوفقك في رمضان دا
عارف
رمضان السنادي صعب
بس كل ما كان اصعب كل ماكا ن ثوابنا اكتر واكتر
ربنا يوفقنا جميعا
وجزاك الله خيرا
اخوك اللي انت واحشه
سيجا
سلاااااااااااااااااام عليكم

بت خيخة وأى كلام said...

انا جاية اقولك
ان الحياة التدوينية
عادية جدا فى رمضان
بس الملاحظ ان الناس فى رمضان بتكسل تكتب تعليقات
لكن عدد الزيارات مقلش اطلاقا

وان انا عمالة اكل كتير جدا
وان فيه تجمع فى الخير يوم السبت الجاى
وانا عارفة انك حتى لو كنت على علم بالموضوع ماكنتش هتقدر تيجى لان ده هيكون يوم سبت وانت عندك شغل السبت
بس انا قلت اقولك كل الاخبار

وكمان عايزة افتنلك على عسقولك
واحرق المفجأة بتاعته

اصل عسقول جابلك كتاب حياة محمد
كان جايبهولك يوم بؤجة الخير بس انت ماجتش

عموما ممكن بعد رمضان نبقى نشوفك وهو يديهولك بنفسك

اممممممممممممممم
ايه تانى يا بت يا خيخة
امممممممممممممم
ايه تانى يا بت يا خيخة

تقريبا هى دى اخر الاخبار لحد دلوقتى
وعموما سأوافيك بأى اخبار جديدة لاحقا


اه خبر كئيب شوية

واحد مدونته اسمها على اسم مصر اول مرة ادخل عنده النهاردة
كاتب بوست عن وفاة والدته


فيه خبرين حلوين

يوم سبعة سبتمبر كان عيد ميلاد ملك بنت شاهى
صاحبة مدونة مافيش حاجة

ويوم السبت الجاى تلاتاشر سبتمبر
عيد ميلاد يوسف ابن دوبا

دى اخر الاخبار اللى عندى

معنديش رصيد فى الموبايل علشان اكلمك
وكمان انا اساسا قافلة موبايلى فى شهر رمضان
بعد رمضان هابقى اتصل بيك

يلا
سلام يا نيجرو

اختك خيخة

نهر الحب said...

نيجرو
باشا جاى ولا لاء يوم السبت ؟؟
حاول تجى عشان نشوفك
والاهمال نحاول نسعد الاطفال فى مستشفى ابو الريش
كل سنة وانت طيب
يا نيجرو يا طيب

عاشــــــ النقاب ـقــــة"نونو" said...

السلام عليكم
رمضان كريم وكل عام وانتم الى الرحمن اقرب
مقبولة الهدية وحالا هتصفحها وازورها
تحياتي

shirry said...

كل سنة وانت طيب
وايام مباركة عليك وعلينا
وربنا يتقبل منا ومنكم

هتوحشنا

appy said...

يا رب تكون كويس ابقى طمني عليك

دعاء مواجهات said...

كل سنه وانت بخير وسلامه

ياراجل ياطيب انت

نفعنا الله واياك بالشهر الكريم


ترجعلنا بالف سلامه ياارب

دعاء مواجهات said...

متقلقش ع المدونه

ف عنيا

الاتنيين

سلام

بت خيخة وأى كلام said...

انا قلت اجى اوافيك باخر الانباء

انا مرحتش التجمع بتاع مستشفى ابو الريش كان نفسى اروح اوى
بس الظروف لم تسمح


شريف دخل المدرسة خلاص

وانت واحشنا جدا

ومازلت مستمرة فى الاكل الكتير

ورمضان قرب يخلص خلاص

دعواتك لينا
وربنا يكتبلك اللى فيه الخير دايما يا نيجرو

سلام
اختك خيخة

جنّي said...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

رئيس جمهوريه نفسى said...

كل سنة وانت طيب يا نيجرو عيد سعيد عليك وعلى الجميع وعسى ان يتقبل اللة صيامك وقيامك وصالح اعمالك ونحن اياك وسائر المسلمين