Tuesday, 4 March 2008

أنا

أنا الضاحك الباكي

الساكت الحاكي

الحامد الشاكي

الشايف في عيون الناس يا عيني الحزن جواكي

أنا العيل الكبير

الحر الأسير

الطيب الشرير

اللي مُناه يلقى في يوم الحب بس بضمير

أنا الهادي الشعنون

العاقل المجنون

الواضح أبو ميت لون

اللي اتقتل بفعل سوء الظن القاتل الملعون

أنا الحقيقي الشبح

الصريح البجح

المؤدب الوقح

اللي في حياته.. الغلط كسر حاجات كتير عملها صح

أنا العابس الباسم

المتفائل المتشائم

الواقعي الحالم

اللي الكلمة الحلوة تتقالّه يحس بيها إنه احتوى العالم

أنا الخجول الجريء

المتهم البريء

اللي بحق وحقيق

نفسه في ايدين يبدأ معاها و بيها أول الطريق

15 comments:

قبلة الحياة said...

الانسان بطبيعته يضم مجموعه كبيرة من المتناقضات

ويا سيدي لو كل ده عشان الايد اللي بدور عليها
انا عندي اتنين مشي امورك بيهم ورجعهم لي تاني

بجد رائع وممتع جدااااا

رائع بشكل يخوف
وجميل بشكل فزيع

تمنياتي لك بالتوفيق ودوام الرقي والابداع

قلمك نبضة صادق ورائع وواقعي

فله ولك كل التقدير

فرنسا هانم said...

ايه ياعم كل ده
ضاحك وباكى
وصريح وبجح
ومؤدب ووقح
لالالالالالالالالالالا
ده انت شغلانه
كلماتك جميله وكلها معانى
مع تحياتى

انين الحزن said...

نيجرو
انت كل دول دا انت ياما اوي كدا ليه

بس عارف قشطه يعني ....

عارف انا بقه ايه ؟؟؟

اللي مُناه يلقى في يوم الحب بس بضمير

سادساً انت ملكش حل عسل كدا من الاخر يعني ....
سلامووووووووز

وزه

بت خيخة وأى كلام said...

ايه ده ايه ده
ماشاء الله يا نيجرو
ايه يا واد الحلاوة دى
والله بتثبتلى كل يوم ان عندك موهبة رائعة فى التعبير عن اللى جواك بشكل جميل
بجد حلوة اوى الكلمات
وانا بحب اوى النوع ده من الشعر اللى تلاقى الكلمة وعكسها
بيقولك وبالتضاد تتميز الاشياء
بجد عجبتنى اوى الكلمات
وفعلا كلنا كدة
كلنا جوانا الخير والشر والعقل والجنون
بس طبعا كل واحد بنسبة مختلفة عن غيره
وده اللى بيميزنا عن بعض
بجد تحياتى ليك
سلام
اختك خيخة

آخر العنقود said...

ياااااااااااااااااااا
بجد جميل اوى اوى
ومعبر اوى اوى
زى ما اللى قبلى قال كلنا جوانا المتناقضات دى بس بجد انت عبرت عنها باسلوب رائع
اكيد كل واحد فينا نفسه يلاقى الحب اللى بضمير اللى من غير مصالح
اللى يكون فى الشخص بيحبك كده مهما عملت
ومهما حصل منك بيحبك ومستعد يعمل اى حاجة عشانك
بس للاسف مش كتير بيفهم ده
بحييك بجد على الجمع بين الصفات دى

تقبل مرورى
وان شاء الله مش اخر زيارة خالص
دمت بكل الخير والسعادة

simple girl.. ..simple dream said...

احلى حاة فى الانسان هى التناقضات اللى جواه
هى اللى بتدى الدنيا طعم ومعنى
كلنا زيك
ودى احلى حاجة فينا

ميّويه said...

الله
جمييييييييييييلل أوي
ماشاء الله
أحلي حاجة فيك كلامك
بجد الشعر والزجل عندك تحفة
وعجباني التناقضات دي

زى الهوا said...

ايه كل كمية التناقض دى , بس رائع واسلوب جامد اوى

Heba said...

ايه كل المتناقضات دي

بس مين قال إن النفس البشرية اتجاه واحد

وسهلة الوصف محددة الملامح

كلامك عجبني أوي وأسلوبك متميز فعلا

تحياتي وتقبل مروري الأول

The Queen said...

ما شاء الله عليك

بجد كلمات قوية جدا وحدثت لي حالة من الانبهار عند قرائتي لها

" الواضح أبو ميت لون " الله الله

يمكن الجملة دي ترجمت حاجات جوايا كتير مش عارفه اعبر عنها بكلماتي بقالي كتير

بجد قلمك مميز وممتع .. دمت بكل خير

~ شيمى ~ said...

انا حسيت انى عايزة اعيط
اه والله
انا ببقى عايزة اضحك لكن ببكى
وواقعية لكن عايزة احلم
وبحس فى نفسى خجولة لكن جريئة
مفيش غير الله عليك
ارفع لك الهات

بت خيخة وأى كلام said...

ازيك يا نيجرو يا خويا
من الاخر كدة انت من سكان القاهرة ولا المحافظات

لازم تجاوب على السؤال ده علشان هيفدنى فى حاجة فى دماغى

سلام
اختك خيخة

nigro said...

desert cat
==========
أنا برده كنت خايف لحسن من كتر الكلمات المتناقضة محدش يفهم كلامي
شكراً ليكي على كلامك
-----------------------------------
قبلة الحياة
==========
عارفة أن دايماً بحس ان أنا شخصين
واحد فيه كل الصفات الحلوة
و التاني عكسه
بالنسبة للإيدين اللي عندك
هتعرفي تستغني عنهم علطول
ولا هما زيادة يعني
شكراً على كلامك الجميل
-----------------------------------
فرنسا هانم
========
دا أنا غلباااااااان
ده أنا أبسط من البساطة
و أعقد من العقد
تيجي ازاي دي
هو كده وخلاص
شكرأ على كلامك
-----------------------------------
أنين الحزن
========
وزة
دا أنا ياما و ياما و ياما
انت لسه ماتعرفنيش
دا أناااا
ولا بلاش.. خلينا متواضعين
(:
م الآخر
انت اللي عسل و مالكيش حل
سلامووووووووووزات يا عسولة
-----------------------------------
بت خيخة و أي كلام
===============
كلنا جوانا الخير والشر والعقل والجنون
بس طبعا كل واحد بنسبة مختلفة عن غيره
وده اللى بيميزنا عن بعض
*******************
عجبوني أوي البؤين دول يا نونا
عارفة يا نونا.. انت عندك موهبة رائعة في تلخيص معاني أااااااااد كده في كلمتين
يا سلام عليكي
منوارني و الله
-----------------------------------
آخرالعنقود
=========
عارفة دي من المرات القليلة اللي أكتب عن نفسي فيها بصراحة تااامة
يعني بجد أنا ده
أشكرك شكاير على كلامك الجميل ده
تقبلنا يا أفندم مرورك
و تشرفي في أي وقت
آه..لو لقيت باب المدونة مقفول
المفتاح تحت المشّاية
-----------------------------------
simple girl.. ..simple dream
==========================
كلام جميل كلام معقول مقدرش أقول حاجة عنه
-----------------------------------
ميّوية
=====
كلامي بس هو أحلى حاجة فيا?
دا أنا كل حاجة فيّا ح..
إيييييه قلنا عايزين تواضع
ماشي يا عم
شكراً يا مي على كلامك
-----------------------------------
زي الهوا
======
إيه كتير؟
أقللهم شوية؟
أسعدتني زيارتك و كلامك الجميل
-----------------------------------
heba
====
أنا برده قلت إن أنا زوّدت الجرعة شوية المرة دي
بس هو ده أنا
أشكرك جداً على كلامك
و تقلبنا كلاً من تحياتك و مرورك الأول
و ما تبقيش تقطعي الزيارات
-----------------------------------
the queen
=========
يا حلولي يا حلولي
مولاتي الملكة بنفسها أعجبت بكلامي
يا فرحة امك بيك يا واد يا نجرو
تحياتي مولاتي الملكة
-----------------------------------
شيمي
====
ياااااه.. أخيراً افتكرتيني
عندك غرامة تأخير
سيبي الهات زي ماهيه
الدنيا برد.. و مش عايزين مامتك تقول ان أنا جبتلك لطشة برد
ما تبقيش تتأخري تاني.. هه
-----------------------------------
بت خيخة و أي كلام
===============
الله يسلمك يا نونا يا أختي
أنا رديت عندك في المدونة
بس هو السؤال ده كان اجباري
أصلي مالحقتش أقرا ورقة الأسئلة كويش

norahaty said...

حلوة

MR.PRESIDENT said...

انت جامد جدا ً