Monday 7 April 2008

أبريل المحلة..الغضب الغاشم...مجرد راي









الصور دي متصورة النهاردة الصبح و ظاهر فيها المدرستين اللي اتحرقوا و عربيات الأمن المركزي اللي مالية البلد و صورة العربية اللي اتحرقت اللي ظهرت في فيديوهات كتير على مواقع كتير و للعلم دي عربية مفتشين التموين على المخابز


بلطجة وغباء من قوات الأمن .. همجية و عدم وعي من الناس .. استبداد من الحكومة

اللي حصل في المحلة امبارح مهزلة بكل المقاييس

فلاش باك

عمال المحلة هيقوموا باعتصام و إضراب عن العمل يوم 6 أبريل علشان غلاء الأسعار و نقص المرتبات .. و دي مش أول مرة ولا حتى المرة العاشرة اللي عمال المحلة يعملوا فيها كده .. عمال المحلة على وعي كامل بثقافة الإعتصامات و الإضرابات .. أحزاب المعارضة و الإخوان نشروا فكرة إن اعتصام عمال المحلة لازم مايكونش عمل فردي .. البلد في خراب و فساد.. إحنا كمان محتاجين نعمل حاجة .. يبقى نخليه اعتصام جماعي على مستوى مصر كلها .. يعني نعمل إيه؟ .. محدش يروح شغله .. محدش ينزل يشتري حاجة .. محدش يبيع حاجة .. طلبة الكليات و المدارس مايروحوش جامعاتهم ولا مدارسهم .. يعني اصابة البلد بالشلل التام .. نوع من انواع الإعتراض على الأوضاع

يعني مفيش مظاهرات .. مفيش تخريب .. مفيش عنف

التعليقات

الناس أصلا جبانة .. و مش هيعملوا حاجة .. هو انت يعني يا طالب هتضر البلد لو ما نزلتش كليتك ولا مدرستك؟ .. يعني اقتصاد البلد هيقف في يوم .. اللي هتخسره الحكومة في يوم هتعوضه اليوم اللي بعده .. يا عم مفيش أمل

الرد

ماقولناش الناس تنزل مظاهرات .. كل اللي هيعملوه انهم يقعدوا في بيوتهم .. لو أنا قلت أنا لو ما روحتش كليتي او مدرستي ده مش هيضر ولا هينفع و كل واحد في شغله قال كده يبقى مش هنعمل حاجة .. و مين قال ان الهدف من الاعتصام هو ضرب اقتصاد البلد .. ده نوع من الأعتراض بس بالفعل مش بالكلام و بس

----------------------------------

6 أبريل

المحلة : صباحاً

حضور مكثف جدا و غير طبيعي لقوات الأمن المركزي

الأمور ماشية طبيعية جدا .. الموظفين كلهم نزلوا راحوا أشغالهم .. بل بالعكس الإقبال كان تاريخي يا أفندم

أمي و أبويا : يا عم بلا اعتصام بلا بتاع .. نزلت تعليمات عندنا إن اللي هيغيب في اليوم ده يعتبر مشارك في الإعتصام و هاياخد خمس أيام جزا و هيتحول شئون قانونية .. يعني هيبقى موت و خراب ديار؟

المحلة : الساعة 2 بعد الظهر

خروج مظاهرات تنادي بسقوط النظام و نازلة شتيمة في حسني مبارك شتايم من النوعيات المتنقيّة

قوات الأمن كالعادة حاولت تفريق المظاهرة بخراطيم الميه .. ولا أثّر مع الناس

بدات المعمعة .. قوات الأمن حاولت تفريق الناس بالقنابل المسيلة للدموع .. الناس هاجت وبدأت تكسير و تخريب في أي حاجة تقابلهم .. أي حاجة .. كانوا بيكسروا في أي محل فاتح يقابلهم و ولّعوا في مدرستين و سرقوا أجهزة الكمبيوتر اللي فيها و كسروا جذوع الشجر و كسروا كباين التليفونات اللي في الشوارع و ولّعوا في اليُفط القماش و كسروا اليُفط الحديد و في فرد الكاوتش و ولّعوا في عربية مفتشين التموين و خلعوا فلنكات السكة الحديد وكسروا زجاج سنترال المحلة و كسروا سور حوالين أرض(!!) و قعدوا يحدفوا قوات الأمن بالطوب بتاعه .. قوات الأمن ردت بالرصاص المطاطي في المليان (!!!!!!)

كانوا بيضربوا في المليان .. بالإضافة للذخيرة الحية بس دي بقى كانوا بيضربوها في الهوا

آخر الأخبار ان فيه اتنين ماتوا النهارده الصبح ( طفل عنده 9 سنين و شاب عنده 20 سنة )

اصابات و اعتقالات بالمئات حتى الناس اللي ماكانتش مشتركة .. الناس اللي كانت طالعة تتفرج بمبدأ يلا نروح المولد

قوات الأمن كانت بتهاجم أي عيادة فاتحة و تقبض على المصابين اللي فيها و حتى في المستشفيات

كل اللي اتقبض عليهم هايتعرضوا على النيابة العامة للتحقيق

------------------------------------

عمال المحلة ماكانوش مشتركين في عمليات التخريب دي

إيه اللي حصل حوّل الإعتصام إلى حرب ؟

المظاهرات طلعت ليه أصلاً ؟

الإتفاق ماكنش على مظاهرات

الإعتصام في المحلة فشل

بس اتحول لحرب بمعنى الكلمة

أنا ضد الظلم ضد الفساد ضد كبت الحريات ضد الإفتراء على الناس ضد الإستبداد

أنا برده ضد الغباء ضد الهمجية ضد المجهود الموجهة في غير الطريق الصح

الأراء كلها دلوقت منقسمة ما بين مؤيدين و معارضين

المؤدين للي حصل .. وجهة نظرهم إن دي قرصة ودن للحكومة للي ممكن يحصل بعد كده

طيب وبعدين .. بس كده

المعارضين للي حصل ( و أنا منهم ) .. و جهة نظرهم إن اللي حصل ده ما كنش ينفع .. التكسير و التخريب والحرق .. الناس كانت بتخرب في حاجة بعضها .. جوانا غضب آه .. بس يوم ما نعترض يبقى نصب غضبنا ده على اللي يستحقه .. ما يبقاش تخريب مننا فينا

بجد اللي حصل عندنا ده مهزلة مش هتتنسي

للمرة التانية العمال براءة من اللي حصل .. ده شغل بلطجة

قوات الأمن بتضرب فيك و انت ناوي ماتسكتش .. خلاص الضرب يبقى فيهم و عليهم

مش في أكل عيش أهل بلدك

------------------------------

خسائر الحكومة

بعض الإصابات .. تكسير زجاج سنترال المحلة .. حريق مدرستين .. سرقة أجهزة الكمبيوتر اللي فيها ( على فكرة دول ما يزيدوش عن ستة أو سبعة أجهزة )

و طبعا تكلفة الذخيرة اللي انضربت

( مئات من الطلقات المطاطية و عشرات القنابل المسيلة للدموع و القنابل التي تصيب بالشلل المؤقت للاطراف)

الخسائر اللي فينا

قتيلين .. عشرات الجرحى .. مئات المعتقلين .. تخريب بعض المحلات تخريب كامل

جو المحلة بقى معقم ببقايا القنابل المسيلة للدموع

النهاردة الصبح واقف على محطة مستني ميكرباص كل الناس اللي واقفة معايا بلا استثناء اللي نازل عطس واللي نازل نف و اللي عمال يدعك في عنيه

مفيش أي خسارة تضاهي الأتنين اللي ماتوا

ماتوا ليه علشان مفيش تفكير سليم

المحلة يا جماعة للي ميعرفهاش مدينة صغيرة جدا ممكن تلفّها بعربيتك في اقل من ساعة

و للصراحة برده .. إن رغم إنها صغيرة إلا إن نسبة البلطجة و الإجرام فيها كبيرة شوية

أنا مش بستبعد إن اللي حصل ده يكون عملية بلطجة .. و أهي كانت ميغة بقى .. كسر يا عم محلات و اسرق براحتك

لأن ولا أي عامل ولا أي موظف هيقوم بحاجة زي دي .. الموظف أو العامل هيخاف على أهله و على نفسه .. مش هيعمل كده

عمال شركة غزل المحلة ناس واعية مش أول مرة يعملوا اضرابات ولا اعتصامات .. عارفين ازاي يعملوا إيه علشان إيه

و الموظف ده أكتر واحد خايف على أكل عيشه .. لو اتقطع أو اتخصم منه حاجة هو اللي هيعاني

يبقى اللي عمل كده مين ؟ و إيه مصلحته ؟

البلد رجعت زي ما كانت .. الناس نزلت أشغالها و راحت مصالحها و الطلبة راحوا مدارسهم و جامعاتهم

كل اللي باقي من اللي حصل امبارح .. مظاهر التخريب و دخان الحرايق و جو مليان ببواقي دخان القنابل

و ألآف الأهالي و اقفين قدام قسم الشرطة مستنين يعرفوا مصير ولادهم إيه

و عشرات من عربات الأمن المركزي المصفحة ( أكتر 150 عربية )

دي مش متابعة للي حصل في المحلة

دي مجرد نقل للأحداث و مجرد رأي

7 comments:

Ahmed Mubarak said...

دة انت صحفي كمان .. موهبه كويسه ..

:)
تحياتي

رئيس جمهوريه نفسى said...

الغالى نيجرو ياريت لو شفت التعليق بتاعى ده طمنى عليك فى المدونه بتعتى انا متابع الموقف على النت وفى تجدد للاشتبكات النهارده تانى وسامع اخبار عن مجزره ربنا يستر

بطوط حبوب said...

يا نهار كل ده عندكم؟؟
طب مين السبب فى التحول الفظيع ده
فعلا الناس لو هاجت مفيش حد يقدر يلمهم
واسمحلى اقولك ان فكره الدعوه للاضراب هى الى هيجت الناس اهم كانوا صابرين وخلاص ربنا يستر

الـسـيـدة نـون said...

نيجرو
انت قلتها بنفسك ده شغل بلطجة
وان اهل المحلة مش جديد عليهم الاعتصامات وهما عارفين حدودهم ايه بالظبط
لكن زى ما انت قلت يا نيجرو ده شغل بلطجة
وانا لسة امبارح كنت على النت على موقع جريدة البديل
لاقيت خبر بيقول
ان الحكومة هتسرب بلطجيين من عندها جوة المظاهرات
علشان يخربوا منشأت فى البلد وبعد كدة يلبسوها فى المتظاهرين سلميا
يعنى الحكومة هى اللى مدبرة شغل البلطجة ده يا نيجرو علشان يلاقوا حجة يعتقلوا بيها الناس
العيب مش من اهل المحلة يا نيجرو
اهل المحلة عملوا اللى عليهم
والحكومة بنت الكلب عرفت تلعب لعبتها كويس
بس واضح ان المحلة كان فيها احداث اكتر من القاهرة بكتير
قلبى معاكم ومع اهل الناس اللى ماتوا
وربنا يرحم موتانا جميعا
لو فيه جديد قلنا يا نيجرو
تحياتى ليك على متابعتك الدقيقة
اختك خيخة

رئيس جمهوريه نفسى said...

barie2010@hotmail.com
نيجرو لو موجود اون لين ضيفنى ضرورى او ابعتلى رقم موبيلك اتصل بيك

الـسـيـدة نـون said...

ازيك يا نيجرو
ها طمنى المحلة اخبارها ايه دلوقتى
بقولك يا نيجرو
انا معنديش مانع ابدا من تقديم اى مساعدات لاهل المحلة
بس الفكرة ان انا طبعا معرفش هما هيكونوا محتاجين ايه
يعنى لو تقولنا ممكن نقف جنب اهل المحلة ازاى ونقدر نقدملهم ايه غير دعواتنا
انا ممكن اكتب بوست عندى وعلى ما اعتقد ان فيه مدونين كتير جدا عايزين يعملوا حاجة لاهل المحلة برضه
انت بس قولنا نعمل ايه
هل مثلا نلم تبرعات او نشترى حاجات معينة هما محتاجينها دلوقتى
قولى ازاى نقدر نقف جنبكم يا نيجرو
واحنا كلنا تحت امركم
تحياتى ليك
اختك خيخة

shirry said...

نيجرو
ازيك يا باشا يا رب تكون بخير
انا جيت اطمن عليك بس

والله مش عارفةاقول ايه
البلد فعلا بقت دمار


حسبي الله ونعم والوكيل