Tuesday 8 April 2008

آخر كلام



مكتب الخدمة العامة اللي اتحول لفحم


مدخل بنك القاهرة و شبابيكه اللي اتكسروا


أحد المحلات اللي اتدمرت تماما


السور اللي كسره المتظاهرين و دخان الحرايق لسه مستمر من أول امبارح



بعض المرافق العامة اللي اصابها تلفيات

طبعا كان فيه مشاهد كتير تستحق التصوير بس الوجود الأمني المكثف منعنا من التصوير

اشتباكات امبارح كان سببها إن قوات الأمن حاولت تفريق مظاهرات الأهالي المقبوض على ولادهم بأسلوب مستفز و مطاردة المتظاهرين .. مع العلم إن الأمن كان بيقبض على أي حد يمسكه سواء كان من المتظاهرين أو من اللي كان قدرهم إنهم يكونوا في الشارع في الوقت ده .. و غالبية المقبوض عليهم من المصابين .. و أخبار عن قيام الشرطة بتعذيب ناس من اللي مقبوض عليهم حتى من الأطفال

الأخبار المؤكدة إن اللي بيقوم بأعمال التخريب والحرق و التكسير دول بلطجية .. و عمال شركة الغزل بعيدين تماما عن كل اللي حصل من بداية الأحداث حتى انهم ماقاموش بالإعتصام و لا قاموا بأي مظاهرات .. والكلام ده من مصدر من داخل الشركة

امبارح تم تكسير أحد مكاتب البريد و حرق أحد مكاتب الخدمة العامة للمواطنين حرق تام

النهارده الصبح .. أكتر من 20 عربية أمن مركزي اضافية و صلت المحلة و على طول الطريق من طنطا كل حوالي 100 متر فيه عسكري أمن .. لحد مدخل المحلة بيوصلوا لعسكري أمن كل 10 متر

المحلة متقفلة بالكامل .. ومليانه مخبرين و مباحث أمن دولة في كل مكان .. والكماين بدأت تظهر على الطريق .. طول اليومين اللي فاتوا دول ماكنش فيه كماين

حوالي الساعة 2 كده عدى من جنبي موكب من حوالي 4 عربيات سودة ..رئيس الوزراء و وزيرةالقوى العاملة عائشة عبد الهادي .. و امبارح كان عندنا النائب العام

عند قسم شرطة أول .. الأمن مقفل المنطقة تقفيل تام علشان اشتباكات امبارح ما تحصلش تاني .. حتى المحامين اللي كانوا جايين للمقبوض عليهم منعوهم من الدخول

اللي شوفته بعنيه عند قسم الشرطة واحد من البلطجية مرافق لظابط المباحث و ماشي معاه زي ضلّه .. سمعته عمال يكلمه كلام من نوعية

( شوف يا باشا اللي بيصور هناك .. واحد واقف بعيد أهوه بيتكلم مع الناس )

اللي بيقوموا باعمال الشغب دي بيبدأوها وقت خروج عمال الشركة علشان يلبسوها فيهم .. و أخبار عن تلبية بعض مطالب عمال الشركة من ناحية زيادة بدل التغذية للضعف قبل يوم الإعتصام .. ورا عدم قيامهم بالاعتصام في يومه

( في رأيي: صح كده.. ناس كانت عايزة تعمل إضراب علشان مطالب.. لما نفذوا لهم منها حاجة.. وقفوا الإضراب )

بالنسبة للضحايا.. في جانب الأمن: اللي متأكد منه هو مقتل أحد عساكر الأمن نتيجة اصابته بزجاج في رقبته مزّق الأوردة و مالحقوش يسعفوه.. وجود أحد ضباط الأمن في المستشفى في حالة سيئة.. المتظاهرين اتجمعوا عليه و ضربوه ضرب موت علشان ضرب سيدة من اللي كانوا في بداية المظاهرة وقت لما كانت سلمية.. بالنسبة للأهالي : واحد من جيراننا في المستشفي بين الحياة والموت نتيجة اصابته بعيار مطاطي في الجمجمة

بالنسبة للخساير اللي حصلت في صفوف الناس .. المشكلة اللي هتستمر بجد هما الشباب المقبوض عليهم .. بالمئات .. و المصابين .. هي دي بجد كل خسايرنا

فيه مشكلة لسه ما ظهرتش على الأحداث .. المدرستين اللي اتحرقوا دول كانوا فيهم ورق الطلبة

( من شهادات ميلاد و شهادة ابتدائية )

يا ترى دول كان مصيرهم إيه بعد حرق المدرستين ؟!!

إنما المحلات اللي اتكسرت فأصحابها رجال أعمال أغنياء ..مشكلة تصليح اللي اتكسر مش هتبقى معضلة عليهم .. و المنشآت الحكومية اللي حصل فيها تلفيات فبعض رجال الأعمال اتكفلوا بيها زي المدرستين اللي اتحرقوا مثلا

المشكلة بجد هم المصابين و المقبوض عليهم

بالنسبة لإنتخابات المحليات عندنا .. الأخبار اللي طلعت انها اتلغت .. بس اللي حصل ان فيه لجان صورية اتعملت .. ونجحوا مرشحين الحزب الوطني كلهم بالتزكية

دي كانت آخر الأخبار المؤكدة اللي عرفتها وشوفتها النهاردة .. وربنا يستر

------------------------------

تحديث : الساعة 10 مساءاً

الهدوء يخيّم على البلد

تجمهر أمام قسم شرطة أول من أهالي المقبوض عليهم.. و الإفراج عن بعض من المقبوض عليهم و الإبقاء على البعض الآخر رهن التحقيقات

20 comments:

فرنسا هانم said...

لما تتحول مصر كلها للمحله وتبقى مصر كلها رافضه الحراميه
وتبقى مصر كلها مولعه
يورونا هيجيبوا منين امن مركزى يهزم الشعب كله

الـسـيـدة نـون said...

ربنا يستر
لو فيه جديد يا نيجرو بلغنا
وخد بالك من نفسك يا نيجرو
تحياتى ليك
اختك خيخة

Empress appy said...

والله ميرضيش حد سواء بلطجيه اهالى امن اى حاجه بجد تبقى زفت يعنى وحرام

ربنا على الظالم

Selfmeaning said...

مش عارفة الواحد يخاف على الناس اللى مسيطر عليها الغضب لدرجة انها بقت بتاذى مصالحها و لا تخاف على بتوع الامن اللى بينفذوا الاوامر و مفيش عندهم غير كده
كان السبب اللى متفق عليه هو ان الاضراب دا عشان الاسعار و المرتبات و حاجات تانية كتير لكن ليه معرفش الاضراب دا اتحول لخراب فظيع

ربنا معاكوا و تنتهى المسالة ديه على خير

Anonymous said...

خد بالك بس من نفسك اهم حاجه يا محمد
وانا خوفت من الخراب اللى حصل ده
بجد حرام ...
اوكى اضارب بس منخربش بلدنا

خمسة فضفضة said...

السلام عليكم ورحمة الله وبركاته


الله يكون في عون اهل المحله ربنا معاكو

وربنا يستر علي مصر كلها

Soooo said...

ربنا يكرمك يانيجرو على التغطيه الحلوة اللي بتغطي بيها الحوارات بتاعة المحله .. بلد الرجوله والمجدعه
بس خد بالك ياعم لا يحبوسك وياخدو الكاميرا .. دي لسه عليها اقسطا ياعمنا

-----

يااهبل ياغير معرف .. انا مش قلتلك تعالالي ياد في مدونتي ووريني نفسك
تصدق اني اتأكدت انك مش راجل بجد
خايف من ايه يابهيم
مش عامللي فيها راجل وبتاع
تعالى وريني نفسك

الـسـيـدة نـون said...

اخويا الصغنن نيجرو
الف شكر ليك على ردك لغيبتى
وعايزة اعتذرلك عن اى كلمة جارحة يكون اتوجهتلك بسببى من الشخص المجهول
اشكرك جدا واقبل اعتذارى


معلش يا نيجرو اطلب منك طلب
ممكن تمسح تعليق المجهول
شكرا ليك

اختك خيخة

همس الاحباب said...

الحمد لله على كل حال
طبعا ما كنتش اتمنى الاحداث توصل لكده
دمار وخراب وتكسير واصابات وقبض على اشخاص ابرياء
بس رب ضارة نافعة
تحياتى ليك يا نيجرو وخلينا نشوفك
خالد

Rain man said...

وجدتك تقول لو عايز تعلق دوس هنا و لا يهمك فدوست
فأنت تعرف تماما اننا في بلد لا تفعل فيه كل ما تعوزه .. D:
يبدو من كلامك انك صحفي
و بالمناسبة ستعتاد على ذكائي الشديد هذا و استنتجاتي المذهلة عندما نصير اصدقاء بإذن الله
اتمنى انك تضع رابط مكتوب عليه لو عايز تبقى صاحبي دوس و لا يهمك

رجل المطر

nigro said...

فرنسا هانم
=======
تبقى آه رافضة الحرامية
بس ما تبقاش كلها المحلة لأني ماتمناش اللي حصل في المحلة يحصل لبلد تانية ابداً

nigro said...

appy
===
ما يرضيش الأهالي
ما يرضيش الأمن
ما يرضيش أي حد
بس يرضي الحرامية اللي لقوا وسط المعمعة دي الفرصة سهلة إنهم يسرقوا و ينهبوا و يكسّروا و يحرقوا زي ما حصل بالظبط
ربنا على الظالم

nigro said...

selfmeaning
==========
والله عساكر الأمن دول غلابة بجد عبد المأمور رغم حرمانية الكلمة بس للأسف بتُطبق عليهم
بجد أنا كان نفسي أسأل حد من الأطفال اللي كانوا مشتركين في اللي حصل
انت كنت بتعمل كده لييييييييييه؟!!!!!!!!

nigro said...

semsem
======
بجد يا سمسمة حرام اللي حصل
اللي حصل عندنا مش اضراب
دي بلطجة
اشمعنا احنا بالذات

nigro said...

خمسة فضفضة
========
و عليكم السلام و رحمة الله و بركاته
الله يكرمك يا دكتورة
ربنا معانا كلنا.. ربنا يهدينا كلنا

nigro said...

soooo
=====
و الله يا سوووو أنا ماكنتش هشترك في تغطية اللي حصل
بس لقيت من الأمانة إن أنشر للناس حقيقة اللي حصل بعد ما كتير صوّروه إنه ثورة و كتابة لتاريخ مصر
ما أفتكرش أن تاريخ مصر هيكتبه مجموعة من البلطجية و الحرامية و أرباب السوابق

nigro said...

همس الأحباب
========
ما حدش كان يتمنى ولا يتخيل إن الأمور توصل للدرجة دي يا خالد
بس انا مش حاسس إن هيبقى فيه منفعة من ورا اللي حصل
و اعذرني يا خلود أنا بفلفص بالعافية من شغل المشروع عندي و من تعسف الدكاترة معانا
ادعيلي يا خلود

nigro said...

rain man
=======
عاجباني لهجة الثقة في كلامك
أو تقدر تقول استفزتني إني أشوف مين صاحب التعليق الواثق من نفسه ده
و أحييك إنك نجحت باسلوبك ده إن تخليني أدور عليك
و أعتقد إنها كانت خطة أو ما شابه
:D
اعذرني يا صديقي (إن شاء الله) أنا مش صحفي و لا أمُتّ للصحافة بصلة بالإضافة إلى أن أسلوبي في الكتابة لا يرقى لأسلوب الكتابة الصحفية
أنا طالب في السنة النهائية بكلية الهندسة.. بس الأحداث اللي حصلت في مدينتي استفزتني إني أنقلها
اعذرني لم افهم كلمتك الأخيرة

nigro said...

بت خيخة و أي كلام
=============
انا قصدت إن أرد عليكي في آخر تعليق علشان نرحرح مع بعض في الكلام
اللي زعلني يا نونا بجد هو شكرك ليا
لما أشوف أختي و ابن أختي حد بيغلط فيهم و أحاول أدافع عنهم
أبقى أستاهل الشكر؟؟!!!!
لا يا نونا أبداً
انت ما تعرفيش انت غالية عندي قد إيه
يا نونا أنا بعتبرك بجد أختي التي لم تلدها أمي
و الله يا نونا أنا لما قريت التعليق أشفقت عليكي من قرايته ده انا نفسي أعصابي تعبت لما قريته و عيني دمعت فما بالك انت عملتِ إيه
اتمنيت لو أقدر أمسح التعليق السافل ده
بس للأسف ما كانش ينفع
أنا معرفتش الإهانة اللي اتوجهتلي من الحيوان ده في تعليقه عندك
بس أي إهانة ليا هي أهون عندي 100 مرة من الإهانة القذرة اللي وجهّالك الحيوان ده في تعليقه عندي
و الله يا نونا أنا كان جوايا كلام كتير و أباحة كنت عايز أرد عليه بيهم
بس أنا احترمت رغبتك و طلبك .. ما انت اختي الكبيرة و ما أقدرش أرفضلك طلب
----------------------------
يلا يلا .. ولا كأن حاجة حصلت
بوسيلي العفريت .. قصدي شيكو
ربنا يباركلك فيه و يجعله قرة عين ليكي و لهاني

عاشــــــ النقاب ـقــــة"نونو" said...

السلام عليكم
اول زيارة ومش الاخيرة باذن الله
معلش بئا اهي جت في البوست دة
ربنا يستر
فكرك اللي جي ايه
ارحمنا يارب برحمتك
طلتك على مدوونتي شرفتني واسعدتني اتمنى دوام التواصل
تحياتي