Saturday 12 April 2008

سلام مؤقت

كنت نزّلت بوست من حوالي أسبوع بستأذنكم فيه إني هتوقف لفترة عن التدوين في مدونتي و يمكن كمان عن التعليق في مدوناتكم علشان ظروفي الدراسية

بس اللي حصل عندنا في المحلة و تصوير ناس كتير له إنه بطولة و جدعنة و رجولة استفزني إني أنقل و لو بعض من الحقيقة اللي كانت غايبة عن كتير

و من هنا اتجرّت رجلي تاني للتدوين و التعليق في مدوناتكم رغم ضيق الوقت الشديد و الضغط النفسي اللي بعاني منه نتيجة تعسّف الدكاترة المشرفين على مشروع التخرج بتاعي

بس أنا يا جماعة حاسس بجد إني بقى عندي عيلة تانية حقيقية و أصحاب تانيين حقيقين في عالم افتراضي حقيقي

زوّد الضغط النفسي اللي عندي مسبقاً ده شخص أقل حاجة يتوصف بيها إنه سافل

ساب تعليق أسفل منه في مدونة أختي الروحية بجد اللي لا شفتها ولا عمرها شافتني

نوران الشاملي

بت خيخة و أي كلام

تعليق بجد هزّني و تعب أعصابي و أشفقت على نوران من قرايته .. أي جمود قلب و أي سفالة موجودين في الشخص ده علشان يجرح قلب أم كل ذنبها إنها فرحانة بإبنها و بتحب تتكلم عنه و بل و توصل سفالته إنه يهينها هي شخصياً

لله الأمر من قبل و من بعد

زوّد الضغط النفسي أكتر مدونة كنت بأزورها على استحياء قبل كده .. دخلتها بالصدفة النهاردة لقيت صاحبتها بتقول إنها كانت هتحذفها بس رجعت في كلامها و قررت إنها تكتفي بإنها تقفلها لأنها مقدرتش تحذفها

رغم احترامي الشديد للحرية الشخصية و مبدأ أنت حر ما لم تضر

إلا إن اللي هزّني بجد هو الكلام اللي قالته في بوست الوداع كلام أقل ما يقال عليه إنه كلام قاتل .. كلام صعب

ياريت اللي فيكم يعرفها يحاول يكلمها أو يتصل بيها و يقف جنبها لأني بجد أشفقت عليها من كلامها

المدونة اسمها بقت سلطة لصاحبتها مروة الزارع

بعد شوية الأحداث اللي حصلت دي و اللي أثّرت فيا بجد .. المرة دي بجد هستأذنكم في الإنقطاع التام عن التدوين و التعليق حتى إشعار آخر

بس كل بجد لما هتوحشوني هطل عليكم بس من بعيد لبعيد بدون كلام

قبل ما أمشي عايز أقول لنوران إن أي إهانة ممكن تكون اتوجهتلي من تعليق اتكتب عندها هي بجد شرف ليا لأنها كانت نتيجة انفعال مني على شخص أهان انسان عزيز عليا .. كل اللي بيربطني بيه هو الحب في الله.. و الأخوة الإنسانية

ما حدش فيكم يمشي يا جماعة مش عايز عيلتي الجديدة الجميلة تصغر

عايز أرجع ألاقيها أكبر و أكبر

سلام مؤقت

محمد النجار

18 comments:

فرنسا هانم said...

هو فعلا كان انسان حقير
بس كويس ان خيخه مسحت البوست كله
ثانيا
حكايه مروه ايه انا مش عارفه ؟
ثالثا
لو فى الاجازه خير لك توكل على الله
بس من وقت لاخر
طمنا عليك

Anonymous said...

واللهى معرفش اللى حصل ده
لا حول ولا قوة الا بالله
معرفش هيستفاد ايه لما يؤذي مشاعر حد
ربنا بجد يهديه
بس اكيد ربنا هياخد لها حقها
ربك يمهل ولا يهمل ابدا يا محمد
ربنا يوفقك ف مذاكرتك
شد حيلك
اوكى يا بشمندس؟
يلا اشوفك ع خير
سلام

بطوط حبوب said...

انا مشفتش البوست
عرفت بس ان فى حد قله ادبه فى مدونه نوران ومعرفتش ايه الى حصل
اى كان اول مره لما قلت هتنقطع عن التدوين لاسباب انشغالك قلنا عادى وكلنا بنمر بالظروف دى
انما تنقطع نهائى
والله بجد صعب علينا
انا ارتبط بناس هنا - رغم انى جديد - من غير ما اشوفهم بس حاسس انى اعرفهم اوى اوى اوى
لو هتتوقف عشان ظروف ماشى وربنا ييسر لك الاحوال ويصبرنا
انما لو هتتوقف عشان زعلان فلو كنت انت زعلان لما تمشى هتسيب تلاتين او اربعين واحد زعلان وكلهم اصدقائك وبيحبوك
يااااااارب تحس بالكلام زى ما انا حاسه
وربنا يوفقك للصالح

آخر العنقود said...

ربنا يقويك يامحمد
البوست بتاع نوران ده
انا شوفت الردود بس بصراحة
مش شفت التعليقات نفسها
بس هنقول ايه ربنا يهدى

وربنا معاك
ويقويكوا فى امتحاناتكوا

Unknown said...

هوه كل اما واحد يشجعنى على التدوين وأحاول أحطه فى قايمة المدونات اللى بزورها ألاقيه يطفش لحين إشعار آخر
هو انا بقيت نحس ولا ايه
وكمان بنت خيخة شايلة التعليقات عاوزين نعرف اخبارها، بغ النظر عن الكلام اللى اتقال ده مش المفرو يوقفنا المفرو يكون دافع للتدوين وده معناه إن فيه ناس كتير بدات تقرأ الكلام اللى مكتوب ده واللى اتقال عنه فى الأول إنه "كلام هواة" فعاوزك كده تفرفش وتروق وترجع تدون تانى
دى أول زيارة وأحطك فى اللينكات عندى وإياك ألاقيك اتأخرت عن التدوين لا بحجة امتحانات ولا دياوله
تحياتى

فاتيما said...

محمد ؟؟
إيه اللى بتقوله دا
بقى كدا برضو ؟
تسيب حد مريض نفسيا يهز ثقتك فى أهمية ما تكتبه و ما نصنعه جميعا من عمل جميل ...
اللى حصل دا شىء عارض و موش لازم يهزنا كدا
أحنا استفزيناه بكم الود و الحب الاخوى اللى متبادل بينا جميعا و خصوصا خيخة حبيبتى اللى مجمعانا كلنا على الخير و الحب
هيا فترة لغاية ما يفرغ كل حقده و بعد كدا المسألة هتهدى و نوران عشان كدا قافلة التعليقات مؤقتا ...
بس أرجوكو ...
محدش يزهق و يسيبها
اومال مين اللى هيقعد بقى
المجهول و اللى زيه ؟؟؟

simple girl.. ..simple dream said...

انا معرفش الموضوع
بس انا اعرف نوران الشاملى معرفة شخصية واللى يغلط فيها يبئا هو الغلطان عشان نوران دى بنت جدعة جدا
وشخصيتها جميلة
وربنا يهدى الجميع

الـسـيـدة نـون said...

ربنا مايحرمنيش منك يا تيجرو
هتوحشنى يا ولا
متتأخرش علينا
وربنا يوفقك يارب
طمنى عليك يا نيجرو من وقت للتانى

تحياتى ليك
اختك خيخة

موناليزا said...

ولو انى مش فاهمة ليه القرار ده بس هنستناك

Empress appy said...

خد اجازة براحتك يا قمر
بس مروة اتخطبت خلاص واعتقد قفلتها علشان كده

أحمد خفاجي said...

إنت راجل محترم
وإهتمامك بمثل هكذا أمور يدل علي كرم الأصل
تحياتي وبالتوفيق في دراستك

يشرفني زيارتكم لمدونتي
matpool..maktoobblog.com
والإستماع إلي شعري علي يو تيوب
youTube-khafagyah's channel

Soooo said...

روح يا محمد
وتعالى بسرعه
-----
ربنا يارب يجازي اللي قال الكلام الحقير ده بمثل كلامه

وربنا يكرمك يابو حميد وتخلص دراستك دي على خير وترجعلنا وانت فايق ورايق وتنورنا بمواضيعك وبتعليقاتك

والله انا حبيتك ياد انت




سلاموووووووووووووز

Anonymous said...

يعنى اول يوم ليا فى عالم التدوين
الاقيك ماشى

د/اجدع بنوته said...

ربنا معاك يارب ويوفقك وترجع ناجح وبشده

معرفش ف ايه دى لعنه حلت ع التدوين ولا ايه

مروه بتقول تذكرونى

وناس هتأجز علشان امتحانات

وناس هتأجز علشان حالتها النفسيه

ع العموم ربنا مع الجميع

الـسـيـدة نـون said...

انا بمسى التماسى
اجدع تماسى
احسن تماسى
احسن تقولوا ان انا نااااااااسى
وحشتينى يا واد يا نيجرو
طمنا عليك يا ولا ومتتأخرش علينا
سلام
اختك خيخة

همس الاحباب said...

ماشى يا عم نيجرو
براحتك خلص الامتحانات واحنا فى انتظارك
وسيبك من الكلام الصغير
ودايما خيخة وغيرها اكبر من الكلام بتاع الناس الهايفة
عامة اتوحشنا يا حماده
سلام يا عمنا

رئيس جمهوريه نفسى said...

مش تغيب يا محمد فى انتظارك ان شاء الله وفى انتظار جديدك وربنا يوفقك يارب خيخه رجعت تدون وعقبال مروه ان شاء الله

آخر العنقود said...

سلامات يانيجرو

ايه اخبارك واخبار امتحاناتك
ربنا يقويكم يارب

انا قولت اطل كده على المدونة فى غيابك
:)

بس حلو التجديد اللى فيها ده مبروك عليك

وابقى طمنا عليك ربنا معاكم
سلامات