Friday 6 June 2008

الحصة انتهت

الحصة انتهت

حصة بقالها 16 سنة

ياااااه.. 16 سنة! ده أنا عمري كله على بعضه يدوب مكمّل 22 سنة من 6 أيام

يعني حوالي تلت تربع عمري لحد دلوقت

بس أهي خلصت خلاص

16 سنة هي حصة واحدة و هو رتم واحد ما اتغيرش

عرفنا حاجات كتير .... و نسيناها تاني

قابلنا ناس كتير .... و افترقنا وما اتقابلناش تاني

زعلنا و بكينا و فرحنا و ضحكنا..حسينا بشوية مسئولية ساعات و رضينا عن نفسنا ساعات و زعلنا منها ساعات

مشاعر و أفكار و مواقف وأزمات و معلومات و اشخاص

بس الأكيد إن أفضل و أهم حاجة و اللي لسه باقية لينا لحد دلوقت هما الصحاب اللي بجد اللي قابلناهم و طلعنا بيهم خلال الفترة دي

الحصة انتهت و ظهرت المشكلة

إن إحنا رغم الحاجات اللي عرفناها إلا إن خلال الفترة الطويييلة دي ما دخلناش المعمل ولا عرفنا شكله و ما اشتغلناش ولا تجربة بإيدينا

علشان كده الخوف و القلق مسيطرين لأن المطلوب مننا دلوقت إننا نشتغل بإيدينا أكبر و أهم تجربة

تجربة الحياة

31 comments:

Lobna Ahmed Nour said...

ان شاء الله تؤتي الحص ثمارها وتنجح التجربة

تمنياتي بالتوفيق

المتحرش بها said...

انشاء الله تجاربك تنجح كلها

قوس قزح said...

مبروك انها انتهت

و ان شاء الله تكون من الناجحين فى الحياة

كاميليا بهاء الدين said...

اقولك تانى كل سنة وانت طيب
وعيد ميلاد سعيد

خلاص؟

الدراسة انتهت؟ وهاتدخل الحياه؟

ربنا يوفقك يارب ويسعدك

ويحقق كل طموحاتك واحلامك

أهم حاجة التخطيط، حدد اهدافك واشتغل عليها واحدة واحدة

خلى قرارتك دايما فيها قرار بديل

ربنا يسعد قلبك يارب

تحياتى وتقديرى

kochia said...

عاجبني اوي اسم المدونة " بهذا حدثتني نفسي "
والحمد لله ان الحصة دي انتهت علي خير
واستعدي بقي للحصص الجاية
كل حصة بمدرسين وبادارة وبنظام مختلف
ربنا يوفقك

دعاء مواجهات said...

نورتنا واله يابرنس

وانا بجد ليا الشرف

انك تتابعى هرتلاتى ف الميل وآخرة

ميرسى ع رايك فيا

ليك تاج عندى

تعالى خدة

بييس

دعاء مواجهات said...

نسيت اقولك فية مشروع مدونة هنسميها ضربة شمس

لوتحب
تكون

معااانا

بيييس

Ahmed Mubarak said...

ايه يا ولد ..
ثق في ربنا شويه .. وان شاء الله الدنيا مش هتقف ..

ربنا يكتبلك النجاح في حياتك

تحياتي

همس الاحباب said...

الف مبروك يا مان
وكل سنة وانت طيب
وربنا يوفقك فى الحياة العملية
لا تقلق اخى فى الدراسة شىء والحياة العملية شىء اخر
1+1 = 2
فى الحياة العملية اتلاقيهم يساوى 3 ما تقلقش يا باشا
تحياتى وتقديرى
خالد

rtrcbh said...

السلام عليكم ورحمه الله وبركاته

اولا نقول الف مبروك
ثانيا نقول تحولنا الى رمحله العمل والعطاء بعد ما اكتمل البناء

أسال الله لك التوفيق وتفألى فالقادم اجمل أن شاء الله
بالامل بالتفائل باالاصرار بالعمل نرى النور ان شاء الله

والسلام عليكم ورحمه الله وبركاته

Eldebug said...

ههههههههههههههههه
ياراجل معمل ايه بس ... دول هما كام شكارة اسمنت على كام شوال رمل وازازة مية معدنية واعجن ياعم ... وبعدين متخافش كل اما تلاقيك ناسى حاجة ادينى رنة بسة وانا اخش ادورلك عليها على حبيبنا جوجل

انا اول ماشفت حكاية ان احنا اتعلمنا 16 سنة من 22 اتخضيت ياراجل ... بس وانا قاعد باتغدى افتكرت ان فى كمان سنتين حضانة ههههههههههههههههه

دعاء مواجهات said...

اية بس يابرنس

انت بتحط شروط علشان ترد ع التااج

مااشى وانا بقى مش هخليلك حجة

بييييس

رندا said...

كل سنة وانت طيب واسفة على التاخير مكنتش اعرف امتى بجد (وش مكسوف قوى )
وقريبا مبروك على النجاح
واكيد اكيد ان شاء الله
هنفخر فى يوم ان فى واحد بينا اسمة نيجرو

من تجارب الحياة

لا تخلط المشاكل الشخصية فى عملك
واذا كنت حازم وقوى الشخصية لا تكون قاسى فى تعاملاتك

ضع نقط لحياتك ومنظور لكل شئ
واذا وقع منك فى طريق الحياة نقطة
فاكيد يوجد النقطة الاخرى التى تعوضك عنها

ربنا يسعدك يارب

دمت بالنجاح دائما حليفك

رندا

Tamer Nabil Moussa said...

السلام عليكم


الحياة تجارب

والمهم ان الواحد يتعلم منها

ربنا يكرمك

تحياتى

Empress appy said...

كل سنه وانت طيب مش تقول وتعمل عيد ميلاد هنا على المدونة كنا جينا جبنا التورته والجاتوو على حسابك يا راجل ماشى
المهم الحصص مش بتنتهى حتى لو خلصت صدقنى
لانك هتلاقى حصص تانيه تدخل فيها

nigro said...

unique
-------
آمين يا رب العالمين
نورتينا

nigro said...

المتحرش بها
----------
يسمع من بقك ربنا
نورتينا

nigro said...

قوس قزح
-------
الله يبارك فيك
اللهم تقبّل
نوّرتينا

nigro said...

كاميليا
-------
أجمل زهرة في العالم
كل فيمتو ثانية و انت سعيدة
و مبروووووك إلى مالا نهاية
آمين يا كامي
ربنا يستجيب لدعواتك الحلوة دي

أهم حاجة التخطيط، حدد اهدافك واشتغل عليها واحدة واحدة
خلى قراراتك دايما فيها قرار بديل


أعتقد إن مفيش أجمل من النصيحتين دول أبدأ بيهم

ربنا يسعدك يا رب
نوّرتِ الدنيا بحالها

nigro said...

Kochia
-------
الله يخليكي
وربنا يستر على الجاي
آه على فكرة .. أنا ولد
هو اسم nigro ده يدّي على بناتيتي ولا إيه؟

nigro said...

دعاء مواجهات
-------------
الضربشمساوية المخضرمة
ده إحنا اللي زادنا شرف تشريف سيادتك لمطرحنا المفعوص ده
و يا دعاء انت دماغك متكلّفة صح
هو انت بتجيبي الصنف ده منين
و بالنسبة للتاج
خلص يا أفندم و في انتظار انك انت كمان تخلصيه
أما بالنسبة للمدونة التانية
تم الرد عندك يا أفندم

إشطاط إشطاط إشطاط

nigro said...

Ahmed Mubarak
--------------
يا أحمد يا حبيبي انا كلي ثقة في الله
بس الخوف ده ظاهرة صحية
أنا ماقلتش إني مرعوب ولا إني مش عارف أنام و لا أي حاجة من دي
أنا بقول إني قلقان و خايف بس
يعني مش جبلّة مثلاً و ضاربها صرمة و اللي ييجي يييجي
ده مستقبل يا أبو حميد
مش كده ولا إيييييييه؟

nigro said...

همس الأحباب
---------
خالد بيه
الله يبارك فيك يا أفندم
و الله يخليك على دعوتك دي
يعني إيه 1+1=3 ؟
أنا مليش في شغل اللوع
1+1=2
و إلا مش لاعب
نورت يا أفندم

nigro said...

د/ أبو يحيى و آدم
----------------
و عليكم السلام و رحمة الله و بركاته
اللهم آمين
و الحمد لله الواحد كله تفاؤل معجون بإصرار و مرشوش عليهم شوية إرادة
و على فكرة برده.. أنا ولد
نورتنا يا أفندم

nigro said...

Eldebug
---------
دول هما كام شكارة اسمنت على كام شوال رمل وازازة مية معدنية واعجن ياعم

طيب وفين الزلط و حديد التلسيح؟
و بعدين هنشغّل الخرسانة بمية معدنية؟
يلا ياض من هنا بدل ما أرشك بإزازة المية المعدنية اللي انت جايبها معاك دي
و بعدين سنتين حضانة إيه يا عم؟
ده الواحد كان بيروح يلعب و يسمع حواديت و ياكل الشندوشتات و يروح
يعني دول أوت .. مش معانا في الحسبة
أيوه يا زيزو كده .. إبقى تعالى
و كمان أنا أقول زيزو ...زي ما أنا عاوز
إبقى تعالى ياض

nigro said...

رندا
-----
يا رنودة " لو تسمحي يعني" انت تيجي متأخرة زي ما انت عايزة
المهم عندي إني أشوفك و بس
تيجي في الأول تيجي في الأخر
انت في الصفوف الأولى دايماً في قلبي
و الله يخليكي بلاش الكلام الحلو ده ... لحسن أنا بدوخ

لا تخلط المشاكل الشخصية فى عملك
و اذا كنت حازم وقوى الشخصية لا تكون قاسى فى تعاملاتك
ضع نقط لحياتك ومنظور لكل شئ
و اذا وقع منك فى طريق الحياة نقطة
فاكيد يوجد النقطة الاخرى التى تعوضك عنه



الكلام ده يتبروز في الدماغ مع كلام كاميليا و على أساسه نبدأ بإذن الله
بس أكتر حاجة مخوّفاني هي موضوع الحزم ده
لأن أنا بجد مشكلة في الجزيئة دي
و ناس كتير قوي قالولي إني لازم أخفف شوية من حدتي
لأني بجد معنديش ياما ارحميني
اللي بيغلط قدامي بقطع رقبته
يلا ربنا يستر

ربنا يسعد قلبك يا رب
و دمت دايماً غالية
نوّرتِ الدنيا بحالها

nigro said...

Tamer nabil
-----------
و عليكم السلام
ربنا يكرمك و يكرمني و يرزقنا الفهم و سعة الصدر
تحياتي

nigro said...

appy
----
و الله يا آبي موضوع أعياد الميلاد ده إحنا مش اتعودنا عليه
و ماتعوّدناش على الإحتفال بيه
فعلشان كده أنا مش اديتله أي أهمية
ده أنا كمان ممكن أفتكره بالصدفة
أما بالنسبة لموضوع الحصص
أعتقد يا آبي إن الحياة بتختلف عن الدراسة و رخامتها
أكيد طبعاً إن الحصص لسه مانتهتش و مش هتنتهي
بس الحصص اللي جاية ليها طعم مختلف
نوّرتِ المطرح

الـسـيـدة نـون said...

اخويا الصغنن نيجرو
اولا كل سنة وانت طيب
ومتقلقش هتلاقى نفسك دخلت المعمل من غير ما تحس
وهتلاقى نفسك بتطبق عملى اللى انت خدته فى الحصة الطويييييييييلة اوى دى
وهيمر عليك حصص كتير جوة المعمل
اه حاجة من وقت للتانى كدة
ابقى خد بعضك وخدلك جنب وانت فى المعمل
وشوف اللى انت عملته من تجارب
كانت صح ولا كانت غلط
ياترى فيه تجارب حلوة تقدر تكررها تانى
ولو فيه تجارب وحشة ياترى تقدر تعيد التجربة وتتجنب الاخطاء اللو وقعت فيها
متخليش الحياة جوة المعمل تفرمك
حاول انت اللى تكون مسيطر
وربنا يوفقك يارب

المهم يا نيجرو
الايميل بتاعك وصلنى
انا هاطلب منك طلب رخم اوى
انا سايبة رقم تليفون عندى على المدونة
عايزاك بكرة الصبح
يعنى يوم الاتنين الموافق 9/ 6
تبعتلى ماسيدج من موبايلك تقولى فيها انا نيجرو
بس كدة
وانا هاتصل بيك اجاوبك على كل اسئلتك اللى وردت بالايميل

ماشى يا جميل

كل سنة وانت طيب مرة تانية
وعقبال ماجى اقولك كل سنة وولادك طيبين

تحياتى ليك
اختك خيخة

دعاء مواجهات said...

ازيك يابرنس

اية اخباراتك

ع فكرة انا لما كنت باخد رايك ف حكاية المدونة مكونتش بخيرك
لانك كدة كدة

معانا يعنى

ولا عندك اعتراض؟؟

عموما ياباشمهندس

الموضوع هيمشى كالتالى

انا وعبدالله غنيم هنشرف ع المدونة

والمواضيع تتبعت على ميلى دة

mwaghat_d@yahoo.com


المواضيع الجاندة هتتنشر طبعا

الافتتاحية هتكون منى انا وعبدالله بردو

اى جديد هبلغك

وانت بلغ كل ضربشمساوى يحب يكون معانا

بييس

arsenalwy said...

ربنا يكرمك ان شاء الله

انسى اللى انت شفته او سمعته

وان شاء الله لم تلاقى شغل هتلاقى حياة تانية خالص

على فكرة احنا زمل بس انا فى هندسة بترول