Friday 13 June 2008

تاج المجانين

التاج ده وصلني من المدوِّنة (بكسر الواو المشددة) الضربشمساوية المخضرمة دعاء عمرو

صاحبة مدوَّنة (بفتح الواو المشددة) دعاء مواجهات

توضيح:

في تعريف مصطلح "ضربشمساوي " يقول اللوزعي في تحفته " بلاغة الصمت في شرح معاني الكُفت " : إن أصل كلمة ضربشمساوي لا يعود إلى الإصابة بضربة الشمس و لا يعود أيضاً إلى فيلم ضربة شمس بتاع نور الشريف و نورا و لكنه نابع و منبثق من الصفحتين الأشهر في العدد الأسبوع من جريدة الدستور "ضربة شمس" , و الضربشمساوي كائن بشري حر يعيش و يتعايش؛ يعرف جيداً حقيقة الأشياء و يعرف أقصر الطرق إلى البهجة و يعرف جيداً من هو و ماذا يريد و كيف يحقق ذلك؛ أي أنه هارش الحوار و فاهم التيتة؛ و يتميّز الضربشمساوي بأنه شخص طاقق حبة؛ لأ حبتين؛ لأ طاقق تسعميت حبة؛ و في داخله تكمن كمية مهولة مجهولة المصدر من الطاقة الإيجابية؛ و الضربشمساوي كائن يلد و لا يبيض.. هه.. ولا يبيييض... هذا و كان الله بالسر عليم

لحد هنا انتهى كلام اللوزعي و نبدأ الإجابة على تاج المجانين و مع احترامي للنص الأصلي فأنا هألخبط الأسئلة و هأرتبهم من أول وجديد علشان أوضح وجهة نظري

1- ما هي الأفعال المجنونة من وجهة نظرك؟

الجنون هو الشطط و زوال العقل و الهرتلة ع الآخر.. يعني المجنون هو شخص فاقد الأهلية ما بيعرفش يميّز بين الصح و الغلط لأنه معاق ذهنياً و ما عندوش عقل أساساَ يقدر يميّز بيه و بالتبعية فكل فعل يصدر من الشخص ده هو فعل جنوني شاذ عن الطبيعة لا يًلتفت ليه ولا لصاحبه

ده بالنسبة للتعريف الأصلي الصحيح نسبياً... إنما في مجتمعنا ده اللي الصح و الغلط فيه بقوا وجهة نظر شخصية ملهاش أسس ولا قواعد غير نفس البني آدم وقدرته... يعني إنك تلاقي حد بيعمل حاجة و بيقول عليها إنها صح .. طيب ليه يا عم؟ .. هو كده و خلاص و كمان أنا نفسي شدّاني ليها... وممكن تلاقي نفسه دي مودّياه في ستين داهية. وإنك برده تلاقي حد بيقول على حاجة إنها غلط و ماتنفعش .. فلو جيت سألته في لحظة صفا كده :ليه؟ .. يقولك اصل بصراحة أنا ما أقدرش أعملها و ماينفعش أقول ما أقدرش فنقول عليها إنها غلط.. أشيَك

في الحالة دي تبقى الأفعال المجنونة هي أي حاجة الواحد يعملها و ما تعجبش الناس التانيين ( أو بتبقى عاجباهم بس كاتمين في سرّهم ) .

2- هل سبق أن فكرت في أفعال مجنونة؟

أنا العاقل المجنون و بالتالي فكل حاجة بعملها - و ده بعد ما أكون فكّرت فيها - هي أفعال مجنونة إلا اللي بيرضي منها الناس ما بيبقاش ساعتها فعل مجنون

3- هل نفذت أحد هذه الأفعال؟

دائماً و أبداً مع العلم إن كلها بتبقى قرارات شخصية ملهاش مردود على حد

4- إذكر أمثلة لتلك الأفعال المجنونة وسبب تسميتك لها بالمجنونة وهل هى مجنونة فعلاً ولا إنت موسعها حبتيين؟؟؟

مش أنا اللي موسعها لأني لما بآجي أعمل حاجة مش بأقعد أفكر دي مجنونة ولا لأ..أنا بأعمل بس الحاجة اللي (بتريّحني).. و وصفها بإنها طبيعية أو مجنونة مش بيبقى من نصيبي أنا بيبقى من نصيب اللي بيشوفها

يعني لما كل شتا أحلق شعري ع الزيرو ... بأبقى في الحالة دي مجنون؟؟؟

لما في عز الشتا و الطين مغرق الشوارع أقضي مشاويري بالشبشب ... بأبقى في الحالة دي مجنون؟؟؟

لما في عز المطرة و الناس عمّالة تستخبى تحت البلاكونات تلاقيني ماشي في نص الشارع و مستمتع بالدُش الطبيعي ده و عمّال أتكلم مع أي حد يقابلني و ماعرفوش ... بحس إن الناس بتقول عليا مجنون!!!

لما أقرر إني أقضي مع صحابي 10 أيام في المدينة الجامعية بتاعتهم في السويس و أقضي الدخول و الخروج قفزاً من على الأسوار علشان حرس البوابة مايقفشنيش و يقولّي فين كارنيهك ... يبقى أنا و صحابي مجانين؟؟؟

لما في عز البرد تلاقيني سايق العجلة و فاتح ع التاسع تاشر و الهوا المتلّج عمّال يطس فيا لدرجة إني ما ببقاش حاسس بأي حاجة من جسمي مكشوفة ... بأبقى كده مجنون؟؟؟

5- ما هو إحساسك بعد أنا قمت بهذه الأفعال المجنونة؟

طبيعي جداً.. مفيش إحساس مختلف أو إحساس مميز.. لأني مش بأقصد إني أعمل حاجة مميزة أو مختلفة .. أنا بأعمل اللي يريّحني و بس .. آه يبقى ممكن كده إحساس الراحة .. بس على فكرة ده هو الإحساس المرافق ليا علطول

6- هل علم بها أحد؟ و ما رد فعله عليها؟

أهلي و أصحابي ... ... مفيش.. أصلهم اتعودوا عليا خلاص

7- هل ندمت على فعل جنوني كاد يودي بحياتك؟

ندمت؟ ندمت؟ ندمت؟ .. مش ندمت دي حاجة بيضا كده وبشراشيب خضرا؟ ... لأ بصراحة مش بحب الندمت ده .. أصله طعمه وحش

و بعدين تودي بحياتك إيه بس؟ ... أستغفر الله العظيم ربي ... هو أنا مجنون؟؟!!

8- هل سبق و وقفت أمام المرآة لتقول لنفسك أنك مجنون؟

لأ

9- يا ترى هتبعت التاج ده لمين؟

بصراحة أنا بقيت حاسس إن الناس بتتأزّم من موضوع إن يتبعتلها تاج .. فأنا مش هبعته لحد علشان مش يتضايق مني

مع إني كان نفسي أبعته لــ


آه و الله كان نفسي .. بس يلا ملحوقة و غيرها في خيرها

14 comments:

رندا said...

برضة الحق اول رد وبعدين نعلق

ياعم التعليق فى البوست الى فات انا حطيتة ومش عارفة لية مش ظهر فى المدونة عندك انا لسة واخدة بالى دلوقتى

تحياتى لااجمل صديق

رندا

دعاء مواجهات said...

هههههههههههههههههههه

تصفيق حاااااااااد لنيجروو باشا

اية الجمدان الفظيع المريع دا بس

لا بجد أوجزت فأنجزت...

دا انت جاوبت احسن منى يارااجل

كنت ممكن بدل ما تقوول كل دة تقول اصلى ضربشمساوى........

تحيااتى يامعلم

رندا said...

اكتر شئ حسيت انك مش ممكن تكون مجنون
انك مش بعت التاج دة لحد هههههه
اة والله براوى عليك

ردك فية جمال قوى وبالزات وانت ماشى تحت المطرة
امال بقى لو اكلت ايس كريم كمان هتكون اية

حضرتك انا بعمل كدة ههههههههههه

لما تاخد بقى الريموت كنترول من ايد مراتك فى المستقبل هو دة الجنون
لما ابنك يعيط على لعبة ومش تجيبهالة هو دة الجنون لان البيت
يبقى نكد وزن

اتصدق الكل عايش فى جنون هههه
لا وكلة كوم وضربة شمس دة كوم تانى والمقدمة الى عاملة للبوست
هى ضربة الشمس تجيب جنون صحيح ؟

ردك حلو كما اتعوت منك
انت اجمل صديق علشان بتنط السور بتاع المدينة الجامعية
طيب ماكانوا يطلعوا ليك برة طيب هههه

ربنا يسعد قلبك يارب

رندا

قوس قزح said...

تاج غريب اوى

اصلك لما تسأل على الجنون و ايه هو و ازاى محدش هيعرف يجاوب لان المجنون شايف نفسه عاقل

كل جنانك نيجرو حاجات شخصية فعلا و دى حرية مش جنون

احسن حاجة عاقلة عملتها انك وقفت التاج لحد كده لانه مجنون بجد :)

همس الاحباب said...

هههههههه
ايه الفلسفة دى يا باشا
انت سبت هندسة وناوى تكمل فلسفة هندسية
ولا تاثير الزلبطة وركوب العجل
وبتنط السور يا جدع عيب عليك وانا بقول بيحطوا اسوار شائكة ليه كله بسببك يا نيجرو
بس بجد اجابات جميلة ودمها خفيف
ربنا يسعدك ويوفقك دائما
تحياتى وتقديرى

آخر العنقود said...

سلام عليكم
ازيك يانيجرو
اولا انت بجد بجد ابهرتني بردك عليا البوست اللى فات
انت تقريبا عرفت وقولت نفس اللى انا بقوله لنفسي
ماشاء الله عليك
فعلا يانيجرو حاسة انى كبرت قوى بس في التفكير بس..:)
ممكن يكون بسبب الظروف اللى الانسان بيمر بيها
اكيد بتسيب فيه آثر وبتعلمه كمان

انا مش بقيت مش بضحك يامحمد
انا جوايا امل وتفاؤل وثقة بالله كبيرة قوى...بس فعلا غصب عنك بتلاقي نفس مشغول بتفكيرك ..يمكن مش مشغول بنفسك
انا بس مشغولة بحد تانى وفعلا شاغلني موضوعه وحاسة انى مش قادرة اضحك مشاركة ليه ظروفه

ربنا يكرمك يامحمد على سؤالك وكلامك الجميل ده
رغم انى بجد انبهرت جدا لما قريته ومن ملاحظتك القوية ماشاء الله عليك
ان شاء الله اماني زى ماهيا
دعواتك بس دايما
بجد الحمد لله كفاية وجودكم معايا وتشجيعكم

البوست بقى
طبعا اوقات كتير بتحس ان مفيش احلى من انك تكون مجنون
وتعمل كل اللى نفسك فيه
ياريت الواحد يقدر يتجنن كده ويعمل اللى بيحلم بيه
تعرف انا كمان بحب قوووووووووووووووووى المشي فى المطر
ومش بيحلى الا وقتها :)))
وسيبك انت المهم تكون راضي ومبسوط مادام كله برضا ربنا سبحانه وتعالى
لان مهما عملنا مش هنعرف نرضي الناس

كل التقدير والاحترام لك يانيجرو
وربنا يخليك على دعاؤك ويارب يستمر

دعاء مواجهات said...

ازيك يابرنس

ادخل المدونة يللا وشووف


http://3la7orytna.blogspot.com/

رايك مهم

ودى مدونتك انت كمان اوكى

اعمل شوية دعاية بقى

بيييييييس.

رئيس جمهوريه نفسى said...

لو كان السير تحت مياة الامطار والاستمتاع بلفحات برد الشتاء هو احد ضروب الجنون فا انا وانت عنبر واحد يا زميل عباسيه واحد

Empress appy said...

ههههههههههه اهلا بك فى مود المجانين مع انك يا ابنى مش يبان عليك ابدا ههههههههه
بجد انت فزيععععععع وشنيع ومريع
ربنا يكملك بعقلياتك
وايه التحليل اللوزعى اللى فى الاول ده لاااااااا دى لغه عربيه متفسحه خالص

Unknown said...

الجنان ده بقى سمة عصرنا ده سواء ضربشمساوى او لا بجد اجاباتك جميلة ومجنونة
تحياتى

كاميليا بهاء الدين said...

انا هاعلق الاول علي تعليقك فى مدونتك بستان الكاميليا

كده برضو يامحمد؟

ازاى مش لك مكان؟

وانت كل المكان

بس

هاروح اقرا التاجات وارجع تانى

البستان فى انتظارك
لانك من أجمل زهوره

تحياتى

Ehab said...

كنت عايز اعلق على البوست الجديد بس لقيتك لاغي التعليق فيه مش عارف ليه
جميل قوي كلامه
ومين قال بس عبيط
علشان مكنتش حويط
وليه متقولش انك نسيت
ويمكن كمان اتمنيت
متحتاجش تكون حويط
مكن حبيت
ولا انت اكيد حبيت
علشان كده قدمت بدون تبسيط
قدمت ووفيت
لو هو خان او قلبك هان
مش مهم
المهم انك حسيت
وحبيت
وهو ده اللي هيفضل في ذكرياتك
اما هو لما يبسط في زكرياته
ويراجع حياته
هيشوف غدر والم
هيشوف جرح وندم
يعني انتي يا ابني احسن كتير


ربنا يسعد ايامك
سعيد بمعرفتك
سلاااااااااااااااااااااام

كاميليا بهاء الدين said...

اجابات مش بعيدة عنك

جوزائى حتى الثمالة

D:

البوست الجديد جميل
صراحة مع النفس
ونتيجة مفيدة لدرس

دمت جميل كما انت

تحياتى واحترامى

همس الاحباب said...

ايه يا عمنا
قافل التعليقات ليه على البوست الجديد
طمنا عليك
تحياتى