Sunday 15 June 2008

مع نفسي

كتير قوي لما بنزعل أو بنحس بهم أو ضيق .. كتير قوي بندوّر على أقرب حد لينا نفضفض معاه .. أب ؛ أم ؛ أخ ؛ أخت ؛ صديق

الإنسان بطبيعته كائن اجتماعي ؛ كاره للعزلة ؛ مايقدرش يعيش لوحده ... يموت .. لسانه و قلبه و عقله

علشان كده لما بنفرح او نحزن بنحتاج وش يضحك لضحكنا و ايد تطبطب علينا و حضن نترمي فيه

بس أحيان كتير بيبقى حزننا ده أو فرحنا جايين –غصب عننا- في وقت غلط

نزعل و قت لما يكون غيرنا فرحان

نفرح وقت لما يكون غيرنا حزين

وقتها بيبقى صعب قوي إنك تحكي أو تفضفض باللي جواك .. احتراماً لمشاعر الآخرين

و الأصعب إن لو كان غيرنا ده هو أقرب حد لينا .. أو حد عزيز جداً علينا

بيبقى وقتها يا إما نسكت تماماً و نبعد يا إما نداري اللي جوانا و نشاركه احساسه لأنه أكيد حصل منه شيء مشابه مرة أو مرات قبل كده

و من الأنانية إنك تطلب من غيرك إنه يكون تحت أمر احساسك

المشكلة إن لو حصل و لسانك زل و وقعت بالكلام

إنك تكون شايفه فرحان و مبسوط و تطلع منك كلمة –غصب عنك- تسرق منه فرحته دي لمجرد إنه بيحبك و ماينفعش يشوفك زعلان و يستمر في فرحته

صعب قوي إنك تقتل فرحة حد أو تسرقها منه

احساس رهيب بتأنيب الضمير للدرجة اللي معاها بنتمنى لو إننا ماكناش موجودين في حياة الشخص ده علشان ما يزعلش لحظة بسببنا

و من ناحية تانية

لو حسيت من اللي قدامك -و انت بتفضفض معاه بهمومك- إنه مش حاسس بيك و مش متواصل معاك

احساس رهيب بالعزلة الداخلية

احساس رهيب بفقدان الأهمية

مش محتاجين يكون التواصل ده حزن منه أو زعل

كلمة .. مجرد كلمة منه تطبطب عليك .. ممكن تشيل كتيييييييير قوي من همّك

غريبة هي الحياة .. و غريب أمر البشر

يبقى كده من الأفضل ليا و لغيري .. إن في وقت الفرح أو في وقت الحزن .. أقفل على روحي .. و أمارس طقوس احساسي لوحدي

مع نفسي

15 comments:

همس الاحباب said...

هو فعلا احساس ينتابنا احيانا كثيرة
بنخاف نجرج بفرحتنا شخص حزين
ونخاف ننجرح من شخص سعيد واحنا جوانا حزن دفين
بس الحياة بتستمر بحلوها ومرها
ولازم نقدر مشاعر الاخرين
بس بجد احييك على الاسلوب والحديث الشيق وده بيدل على انك انسان رقيق المشاعر وحساس
تحياتى وتقديرى

همس الاحباب said...

ممكن تعليق كمان
انا ش متفق معاك اننا نقفل غلى همومنا واحزانا جوانا لازم نفضفض لاشخاص نثق فيهم بنحبهم ويحبونا
غريب أمر البشر يبقى كده من الأفضل ليا و لغيري .. إن في وقت الفرح أو في وقت الحزن .. أقفل على روحي .. و أمارس طقوس احساسي لوحدي مع نفسي
ما ينفعش يا صديقى يبقى بلاها صداقة بلاها اخوة لو كل واحد فينا كتم مشاعره جواه
تحياتى

أخـت فـى الله said...

بس ساعات لما نكتم احساسنا جوانا ومفضفضناش لصاحبنا ولو فى يوم عرفوا اننا فى مرة كنا زعلانين حيحسوا بانك خنتهم ساعات من حق صحابنا علينا اننا نفضفضلهم
ممممممم كلامى مش مفهوم بس دة اللى حاسة بيه

الـسـيـدة نـون said...

هو ساعات الواحد بتطلب معاه انه يقفل على احزانه وافراحه
مراعاة للاخرين

بس برضه لو الواحد فضل قافل على نفسه طول الوقت
طب امتى يجى دور اصدقائه
يعنى زى ما انت عامل حساب لاصحابك انك متشركهومش معاك حزنك مثلا علشان هما فرحانين
طب وهما ليه مش هيعملوا حسابك انت كمان ويشاركوك حزنك قبل ما انت تطلب منهم المشاركة دى
المفروض ان الاصدقاء بتحس ببعضها

وبعدين بالنسبالك انت يا نيجرو
فى اى وقت عايز تفضفض لمجرد الفضفضة
ابعت ايمل للبت خيخة اللى هو انا يعنى
وقعد ادلق كل اللى جواك
واعمل سيند للايميل
صدقنى ايميلك باللى فيه هيكونوا فى بير غويط

يلا سلام
اختك خيخة

semsem said...

طول عمري وانا مقتنعه ان الانسان طبيب نفسه
بوست واحساس هايل يا نيجرو
والف مبروك ع الاجازة ليك وليا
وربنا معاك يارب يا بشمهندس
يلا سلام
سمسم

Empress appy said...

مفيش احن من ربنا ونفسك عليك انا بعمل كده اما السعاده فصدقنى دايما بحاول اعمل حسابي وبقيت اخبيها حوايا علشاني وعلشان اللى قدامي

كاميليا بهاء الدين said...

يبقى كده من الأفضل ليا و لغيري .. إن في وقت الفرح أو في وقت الحزن .. أقفل على روحي .. و أمارس طقوس احساسي لوحدي مع نفسي
......

D:

مش ينفع حضرتك

مين ده اللى هايسيبك تفرح لوحدك
لازم يدوق الفرحة معاك، ويستطعمها بقلبه كمان

ومين هايشوفك مهموم او حزين
ومش يرسم على العيون ضحكتين
واحدة عشانك ، وواحد عشانه لما يشوف نفسه فى عيونك

محمد
الحياه .. مش سهلة
بس .. جميلة

لما نبص قدامنا ونلاقى سحابة حزن
ندور وشنا للناحية التانية، هنلاقي ناس فرحانين
ندوب حزننا فى فرحهم شوية
ونفضفض شوية
يمكن كلمة واحدة نسمعها
تكون هى الدواء ، او تكون هى المفتاح

ربنا يسعد قلبك يارب
ويحقق املك يارب

كل الود

الـسـيـدة نـون said...

ايه اللى مصحيك لحد دلوقتى
روح يلا صلى الفجر
وادخل نام
علشان فيه بكرة واحدة خيخة هاتتصل بيك الصبح

تصبح على خير
اختك خيخة

kochia said...

بما ان الانسان كائن اجتماعي .. ازاي نقفل علي روحنا ونحزن لوحدنا .. مهو لازم هيجي يوم وتفتح انت قلبك لغيرك يفضفض ويبكي في حضنك وهو عارف انه في مكان امين
انا مش معاك
انا رايي ان الانسان العزيز ده لو عرف انك محتاجه رغم انه هيبقي زعلان عشانك هيبقي مبسوط انك اختارته تحكيله وتفضفضله
هكذا الحياة

تحياتي

كاميليا بهاء الدين said...

آنا جيت أسلم

واقول يارب تكون بألف خير

تحياتى واحترامى

بطوط حبوب said...

يعنى لما بتقفل على نفسنا بنحس بتحسن؟؟
بالعكس برضه بنحس بعزله كبيره
وقت الفرح مش بنحس اننا فرحنا
ووقت الحزن قلبنا بينفطر اوى اوى

العزله بتقتل الفرح وبتكبر الحزن
انما لو لقينا ناس محسوش بينا حتى لو ده سبب لنا الم فده اقل من العزله

احسن حاجه فى الدنيا انك تلاقى حد يحس بيك
بس متنساش اننا مش هنلاقى ده طول الوقت احنا لسه فى الدنيا مش فى الجنه

رندا said...

يبقى كده من الأفضل ليا و لغيري .. إن في وقت الفرح أو في وقت الحزن .. أقفل على روحي .. و أمارس طقوس احساسي لوحدي

مع نفسي

....................

كلمة فى منتهى الياس وانا واخدة عليك فى منتهى القوى
لا والف لا مش كدة الحل
الحل ان اخوانك واخواتك كلهم حواليك
كلهم معاك
كلهم بيحبوك
الحياة لازم تمر لازم تمشى فى طريقها
لازم تخرج وتضحك
ولو زعلت حد منك اعتذر لية لو بيحبك هيسامحك
اكيد هيسامح صح

علشان خاطرى ارجع نيجروا بتاع زمان
انا كنت مستنياك ايام الامتحان
ومستنية ضحكتك الى بترسمها على كل القلوب

ربنا يفك كربك ويسعد قلبك وترجع لينا كلنا

انا مستنياك ها مش تتاخر بقى

رندا

رندا said...
This comment has been removed by the author.
أم أحمد المصرية said...

صديقي نيجرو
اولا كيف الاحوال لم نتواصل من زمن
ثانيا عندك حق في كلامك لكن جملتك الاخيرة آلمتني "من الأفضل ليا و لغيري .. إن في وقت الفرح أو في وقت الحزن .. أقفل على روحي .. و أمارس طقوس احساسي لوحدي مع نفسي"
لا يا نيجرو دي اصعب انواع الوحدة ربنا لا يكتبها علي احد

Soooo said...

الناس فيها اللي مكفيها

يبقى الاحسن لينا اننا لما نتخنق ونزعل .. اننا نعيش مع نفسنا
من غير مانقول لحد وننكد عليه

عارف .. انا ساعات باتمنى اني لما اموت .. اموت مع نفسي
ولا في ابن او ابنه تعيط وتحزن علي
ولا زوجه تلطم علي

الحمدلله امي اللي كانت هتحزن علي ماتت .. يبقى الاحسن اني اعيش مع نفسي
واموت مع نفسي


موضوعك مش لمس الوتر الحساس .. ده مسك الاوتار الحساسه كلها

ربنا يكرمك ويوفقك ويسعدك دنيا وآخره



سلامووووووووووز