Wednesday 18 June 2008

قلوب من نور

يا كل دمعة حزن جرحت في يوم الخد

يا كل لحظة يأس عدّى – بإيدينا - الحد

يا كل غيمة هم اتشطّرت على قلب

يا كل احساس ألم مرسوم بلون الوهم

يا كل رعشة برد سببها خوف م الوحدة

لو يوم فيه ايد اتمدت

من غير ما تعرفنا

و طبطبت على قلبنا

و مسحت خطوط خوفنا

نتمنّى إيه تاني؟!!

و نغتم ليه تاني؟!!

و نخاف من إيه تاني؟!!

يا كل دمعة حزن

يا كل لحظة يأس

يا كل غيمة هم

يا كل احساس ألم

يا كل رعشة خوف

من قلب داق الراحة و الفرحة المتأصلة

بأقولكم كلكم

اختشوا على دمكم

----------------------------------------------------

نوران ...... كاميليا ...... رندا

قلوب من نور كشفوا عتمة الهم

أقولكم إيه؟

أقولكم شكراً

اللهم كما فرّجوا عني كربة من كربات الدنيا

ففرّج عنهم كربة من كربات يوم القيامة

30 comments:

الـسـيـدة نـون said...

ايه بقى يا واد يا نيجرو
ده انا كنت جاية ارمى التماسى
الاقيك كاتب كلام يخلينى اترعش من جوايا

يا واد خلتنى اعيط وانا معرفش بعيط ليه؟


ربنا يخليك ويفرح قلبك ويسعدك ويديلك كل خير


لو صاحى دلوقتى روح صلى الفجر

يلا سلام
اختك خيخة

Mafrousa said...

كلام يهز بجد....ويخلي الواحد يعيط بجد
و الاحلى من ده كله
وجود اصدقاء بجد...و قلبهم ابيض بجد....و روحهم حلوه بجد....

.:.-=- ELGaZaLy-=-.:. said...

لو يوم فيه ايد اتمدت

من غير ما تعرفنا

و طبطبت على قلبنا

و مسحت خطوط خوفنا

نتمنّى إيه تاني؟!!

و نغتم ليه تاني؟!!

و نخاف من إيه تاني؟!!

----------------------

بجد حلوة اوى يا نيجرو فعاهم يعنى احساسك بجد ملموس..ومحسوس اوى...اخى دمت مبدعا..وربنا يحبب فيك خلقة

همس الاحباب said...

ايه يا باشا
ايه المود ده
ما تعودناش منك على كده
ربنا يريح قلبك ويزيل همك
بس كلمات معبرة وطالعة من معاميق القلب
وربنا يديم المعروف ما بينكم دائما
تحياتى وتقديرى

آخر العنقود said...

ازيك يانيجرو
عامل ايه؟؟
حاسة بكل كلمة مكتوبة
وعلى فكرة يانيجرو انا قريت البوست اللى فات بس من كتر احساسي بيه مش بقيت عارفة ارد اقول ايه عليه
وعارفة انك هتعذرني في حاجة زى دى؟؟

وبجد بجد ربنا يكرمك على سؤالك
فعلا مفيش اجمل من الالفة والود بين الاخوات والدعاء بظهر الغيب
سبحان مؤلف القلوب

انا بخير الحمد لله
دعواتكم ..والله انا تمام الحمد لله
لكن بس تقلبات الفكر والمزاجات

ربنا يكرمنا جميعا ويعينا
جزاكم الله خيرا يامحمد

فاتيما said...

نيجروووو
يا واد قلبك كله خير
و طيبة
و ود
ربنا يجمعنا بيك على خير
إنت لازم تيجى التجمع بتاع التبرع بالدم عشان نشوفك
شوقتنا نقابلك على الحقيقة
تحياتى يا أخويا الصغير الجميل

بطوط حبوب said...

والله يا مان انت تتحب من القلب
ربنا يكرمك
الحق قول امين

Unknown said...

ايه يا نيجور الاكتئاب ده يا عم عاوزين تتفائل كده لأن ملناش غيره وربنا يفرج همك
تحياتى

دعاء مواجهات said...

ياعم ياعم

الأشعار والكلاام الجامد الموزون دة

انا عارفة انك متقصدش تغمنا انا عارفة

بس هما مش عارفين

علشان كدة بقولك

كلنا معك يانيجرو)

لست وحدك)

بيس يامان)

الباحث عن الحقيقة said...

بوست جميل وقوي
واهم شئ انه يوضح ويبين روعة انك تلاقي ناس جنبك صادقة بجد في مساعدتك
بوست قوي وبيدفع للحماس بشكل قوي فعلا
تقبل تحياتي

šσяšαяαα said...

السلااااام عليكممممم

الكلام دا رائع وبدون مجاملة او اثبات حضور:)
لانه فعلا بيوضح اد ايه المدونين عيلة ومش مجرد ناس بتعدى وترمى السلام

بس انا برمى السلام وبزود عليه دعوة ان ربنا يوفقك وتخلص مشروعك وتمتحن وتنجح وتجيب امتياز مع مرتبة الشرف :)

Soooo said...

ربنا يحبب فيك خلقه ويفك عنك غمك وهمك وكربتك ويسعدك ويبسطك ويرضيك دنيا وآخره





سلاموووووووووووز

أخـت فـى الله said...

صدق الشافعى لما نظم البيتين دول

سَلامٌ عَلى الدُّنْيا إِذَا لَمْ يَكُنْ بِهَا

صَدِيقٌ صَدُوقٌ صَادِقُ الوَعْدِ مُنْصِفَا

المحروم فعلا اللى معندوش اصدقاء

كاميليا بهاء الدين said...

يا كل دمعة حزن جرحت في يوم الخد

مهما تزورينى أنا لسة عندى أمل فى الغد



يا كل لحظة يأس عدّى

زى سحابة صيف بتهدى


يا كل غيمة هم اتشطّرت على قلب

كله اللى محتاجه شوية أمل على حب

..............

البوست حلو
بس خليك انت بقى حلو
واخرج من الموود ده
وارجع اعمل شقاوات
فى المدونات
زى ما اتعودنا منك


دمت بكل الود
اخى العزيز


تحياتى

الـسـيـدة نـون said...

باقى من الزمن سبعتاشر يوم تقريبا
على مشروع التخرج

شد حيلك يا نيجرو
بس زى ما اتفقنا اوعى تشده اوى احست يتقطع

ربنا يوفقك

اختك خيخة

nigro said...

بت خيخة و أي كلام
================
إيه يا نونا موضوع العياط معاكي
انت كده هتخليني أعيط
يا نونا أنا بجد مش عارف أعمل إيه معاكي
يا نهار
هو فيه حد جدع زيك كده؟
انت ماتعرفيش كلامك و اهتمامك فرق معايا ازاي
ربنا يسعد قلبك و يباركلك في زوجك و يجعل شريف قرة عين لهاني و ليكي
انت بجد تستاهلي كل خير
يا أجمل اخت في الدنيا
صحيح هو أنا ماقولتلكيش
مش مناقشة المشروع اتأجلت ليوم 15-7
كلام دكاترة بقى

نورت قلبي يا نوران

nigro said...

واحدة مفروسة
===========
يااه يا مدام مفروسة ده الصحاب اللي بجد دول حاجة حلوة اوي و يا سلام لو انتقلوا لمرحلة الاخوات
يبقى الواحد مش يشيل هم أي حاجة في الدنيا طالما إن فيه حد بيحبه و مهتم لهمه
نورتي

nigro said...

elgazaly
=======
الله يكرمك يا عمنا على كلامك و دعوتك اللي زي الفل دي

nigro said...

همس الأحباب
=========
يا خالد بيه ده أنا في مود مفيش أجمل ولا أحلى منه
ازاي ألاقي حد حواليا مهتم لأمري و بيحاول إنه يخرجني بره حالة وحشة كنت بأمر بيها و ما أفرحش و مش أحس بالأمان
أنا تمام الحمد لله
شكراً على اهتمامك يا خالود و ده مش غريب عليك لأنك بجد حد جدع قوي
نورت يا أبو همس

nigro said...

آخر العنقود
===========
أماني
أنا الحمد لله
انت اللي عاملة إيه؟
الحمد لله انك طمنتيني عليكي
و أنا دايماً عاذرك يا آخر العنقود
اللي يعز حد و يقدره لازم دايماً دايما يعذره
و مش أي حد دي آخر العنقود
احساس بديع قوي يا أماني انك تحسّي ان فيه حد بيحبك و عاوز دايما يشوفك مبسوطة
بأدعيلك يا أماني ربنا يهوّن عليكي
بأفرح قوي يا أماني لما اشوف تعليقك عندي
بأرتاح
ربنا يريّح قلبك يا آخر العنقود
دايماً منوراني يا آخر العنقود

nigro said...

فاتيما
======
يا طمطم انت اللي قلبك كله حب و حنيّة و طيبة
و الله يا طمطم أنا مستني الأيام تجري بسرعة علشان اشوف الناس اللي قلبي و عقلي ارتبط بيها دي
إن شاء الله جاي
نورت يا أم يوسف

nigro said...

بطوط حبوب
========
يا محمود انت اللي تتحب من القلب
من كلامك ... انت شخصية جميلة قوي يا محمود
و الله الواحد عاوز يشوفك
يا ريت تبقى تيجي يوم التبرع بالدم
نورت يا أبو حنف

nigro said...

ayman badr
==========
فين الإكتئاب ده يا أيمن؟
دي قمة التفاؤل في البوست ده
شكرا على دعوتك الجميلة دي يا أيمن
نورت يا أيمن

nigro said...

دعاء مواجهات
============
يا فاهماني انت يا دؤدؤ
يا مكتشفة المعاني و اللي بين السطور
مش بأقولك بأحترم ذكائك
دايما بتبهريني يا منوفياية
منورة دايما يا دؤدؤ

nigro said...

الباحث عن الحقيقة
===============
ده كلام بجد و لا تريقة ده يا أبو حميد؟
بجد إن شاء الله
سيبك انت المهم انك نوّرتني
استنى لما أعمل معاك واجب اشمعنى الإستراحة يعني
واحد زبادي خلاط هنا للمعلم الباحث يا أي حد
نورت يا أبو حميد

nigro said...

آنسة صورصارة
============
اللي مش عارف هي كاتبة اسمها كده ازاي
و علييييييييييكم السلااااااااام
كلامك فعلا في الجون
لانه فعلا بيوضح اد ايه المدونين عيلة و مش مجرد ناس بتعدى و ترمى السلام
بجد كلامك في جون
كده اتنين صفر
و شكراً يا أفندم على دعوتك
بس هو أنا بقى متسيحلي جامد قوي كده
نورت في أول زيارة يا آنسة سارة

nigro said...

soooo
=====
أرد عليك و أقولك إيه يا أحمد؟

ربنا يسعدك ويكرمك ويبسطك ويوفقك دنيا وآخره

نورت يا أبو حميد

nigro said...

شيمي
====
الصحاب .. الأصدقاء .. الأخوات
دول أجمل هدية في الوجود
فعلاً
المحروم هو اللي معندوش أصدقاء
نورت يا شيمي

nigro said...

كاميليا
=======
طيب أنا أرد بإيه طيب؟
عارفة أنا هآخد أول بيتين دول و أبروزهم عندي في المدونة
مالهمش حل
عارفة المثل اللي بيقول ( و من أولها كده مش عاوزين يععع و حركات .. ماشي )
المثل اللي بيقول يعمل من الفسيخ شربات
أهو انت عملتي كده
عملتي من الفسيخاية بتاعتي شربات
و بعدين ازاي أحس بكم الدفا ده و أفضل متضايق أو مهموم
ده أنا أبقى بصراحة كده عيل وحش قوي
و ده طبعاً عكس طبيعتي تماماً من كوني واد زي السكر و دمي خفيف و يلطش و مفــ...........

منوراني دايماً يا كامي

رندا said...

نيجروا
انا لسة شايفة البوست دة حالا

فى اية مالك انا مش متعودة عليك كدة
نيجروا قلب مليان بالامل مليان بكل الحلو

عايزة اسمع ضحكة حلوة منك

هى اخر نكتة اية صحيح

دمت صديقى واجمل نيجروا


رندا