Friday 20 June 2008

أنا كده دلوقت

الكلمات اللي جاية دي كنت كتبتها قبل كده منفردة على الجنب هنا

تحت عنوان " أنا كده دلوقت "

يمكن ماكنش فيه حد كان بياخد باله منها .. يمكن كان فيه

المهم أنا قلت أجمعها و أنشرها لوحدها في بوست منفرد ليها

منها اللي كنت نشرته قبل كده و منها اللي ماكنتش نشرته

منها اللي له علاقة ببعضه على أساس إنها كانت حالات عشتها و كانت ورا بعضها

و زي ما بيقولوا: التاجر اللي مش عارف إيه كده بيدوّر في دفاتره القديمة

فبما إني دلوقت مش عارف إيه كده فقلت أدوّر أنا كمان في دفاتري القديمة

و ده اللي طلعت بيه

يلا اتفضلوا وبالهنا و الشفا

*************

(1)

الحب معنــاه إيــه ؟ إحساس بجد غريـب !

بدون سبب تلاقيــه خطفك بشكل عجيـب !

الحـب لـو بـالعين .. طيب منين و إزاي

حبيت من قلبي ناس بوشوش في علم الغيب ؟

------------------

(2)

وقفت قدام المراية ضحكت بكيت

عمّال أدوّر عليّا .. ببص لقيت

مجرد خيال واقف و بيبحلق

كسرت بإيديا المراية..قمت اختفيت

------------------

(3)

إحساس جميل بيشدّني من تاني

مرتاح و هادي و فرحة ماليه كياني

و أكدب لو أنكر إني خايف جداً

تحصل معايا حاجة مش عاجباني

------------------

(4)

خـــــــايف لفرحتي دي تقلـــب بــغمّ

مانا أصلي دايماً يـا ف قلق يـا ف همّ

أفرح شوية صحيح ..أزعل شويـــّــــات

لكن الصراحة: القليل من الفرح بلسم

------------------

(5)

فارد دراعك للحياة و فاتح الشبابيك

و فاكرها قال بتبتسم و مزهزهة لمعاليك

ركّز شوية يا حلو .. بسهولة راح تكتشف

الحزن هو نصيبك..بطّل بلاش تماحيك

------------------

(6)

إحساسي ليه تايه ما بين ده و ده ؟

رغم إن نفسي تملّي متأكدة

إن الفشل هو المصير الأخير

بحلم و أعيش..أنا مالي هايف كده ؟!

------------------

(7)

كتبت مرة كـــــلام تـــافه ملـوش أي معنى

و عجيبة كل اللي سمعه قاللي: ده له ألف معنى

و كتبت مرة كـــــلام حقيقي مـن جـوا قلبي

قام قاللي كل اللي سمعه: تافه ملوش أي معنى

------------------

(8)

هـمـــوم مشــــــــاكل أفكـــــار قلق أوهـــــام

حصل إيـه النهــاردة ؟ و إيـه مخبية الأيــــــام ؟

أقولكم على حاجة .. عارفين أنا نفسي في إيه؟

نفسي لما أحط دماغي على المخدة .. أنــــام

------------------

(9)

الدنيا دي مسرحية و الكل موجود لحكمة

أدوار بسيطة وعادية و فوقيها أدوار مهمة

و لكل واحد حواره..لكني مرعوب لفجاة

ينزل ستار النهاية و أنا لسه ما نطقت كلمة

39 comments:

الـسـيـدة نـون said...

انا كنت باخد بالى منها
وكويس اوى انك حطتها كلها فى بوست واحد

علشان الواحد يستمتع بيها كلها على بعضها

عجبنى اوى البيت ده
الحـب لـو بـالعين .. طيب منين و إزاي

حبيت من قلبي ناس بوشوش في علم الغيب



كله حلو طبعا
بس البيت ده مأثر فيا اكتر


ربنا يوفقك وينجحك

تحياتى
اختك خيخة

Abo 7anf said...

السلام عليكم
أولا قلت محلاوى زى يبقى لاوم اتعرف عليه
ثانيا لما قريت كلامه
بصراحه اعجبت بيه
بجد كلامتك رهيبه

بطوط حبوب said...

مش عارف اختار اكتر حاجه عجبتنى

بجد كلها روعه
ومكنتش باخد بالى منها انا بدخل ع المهم ع طول ( البوستات) بس بعد كده هدعبس جامد
دمت مبدعا

الباحث عن الحقيقة said...

سبحان الله
تصدق اني انا كمان سيفت الصفحة دي
بجد والله العظيم رباعيات جميلة جدا جدا
وعندي فعلا مفيش فرق بينها من حيث العمق والفلسفة والاحساس بينها وبين احساسى وانا بقرا رباعيات جاهين
رباعيات الحكمة كده بتنط منها تنطيط
من هنا ورايح هاخد بالي من اللى بتكتبه على جنب
لك واجب في الاستراحة تعالى خده

۩۝۩ Dr. Flavio ۩۝۩ said...

ازيك يا باشمهندس

اخبار مشاريعكو ايه .. سلملي علي حبيبك وقول له عاوز اشوفكو انتو الاتنين

على فكره أنا كنت باخد بالي منها وخصوصا أول واحده دي.. الحب معنــاه إيــه ؟ إحساس بجد غريـب ! بدون سبب تلاقيــه خطفك بشكل عجيـب ! الحـب لـو بـالعين .. طيب منين و إزاي حبيت من قلبي ناس بوشوش في علم الغيب ؟

بجد كانت عاجباني لكن لأني معديتش عندك من فتره لأني كنت مطحون في الأطفال فمش قريت الباقي
المهم بقه يا عم نيجرو بما انك بتكتب حاجات حلوه كده مش كنت راضي تقولها لي ليه؟

هـمـــوم مشــــــــاكل أفكـــــار قلق أوهـــــام
حصل إيـه النهــاردة ؟ و إيـه مخبية الأيــــــام ؟
أقولكم على حاجة .. عارفين أنا نفسي في إيه؟
نفسي لما أحط دماغي على المخدة .. أنــــام

بجد بجد الرباعيه دي رهييييييييبه
والله العظيم جامده

المهم أتمنى تكون مشاريعكو يا باشمهندسين خلصت زي الواد أخويا ما خلص

سلامي يا نيجرو باشا

سبهللة said...

حلوة دفاترك القديمة جدا
عجبتنى اوى كلمة
القليل من الفرح بلسم
الواحد دلوقتى بيدور على الفرح زى ما يكون بيدور على ابرة فى كوم قش
تحياى ليكى واعجابى كمان
وبالتوفيق ان شاء الله

Soooo said...

إحساسي ليه تايه ما بين ده و ده ؟
رغم إن نفسي تملّي متأكدة
إن الفشل هو المصير الأخير
بحلم و أعيش..أنا مالي هايف كده ؟!
----
ياسيدي لما دي الهيافه .. خليك هايف على طول وخلينا ننبسط من الكلام التحفه ده
----
كتبت مرة كـــــلام تـــافه ملـوش أي معنى
و عجيبة كل اللي سمعه قاللي: ده له ألف معنى
و كتبت مرة كـــــلام حقيقي مـن جـوا قلبي
قام قاللي كل اللي سمعه: تافه ملوش أي معنى
----
عارف يانيجرو
انت بجد عبقري
مش بارد على انك قلتلي اني عبقري وانا قلتلك ولا عبقري ولا حاجه
لا بجد انت عبقري

انت قفلت اول بيت وتاني بيت ورابع بيت بنفس الكلمه
ومع ذلك ماحسستنيش بالتكرار
عملت زي البتاع اللي كتبها عمنا نجم
في كل مره ليها احساس زي ماتكون بتسمعها لاول مره ومابتحسش فيها بالتكرار
ودي انا شايفها قمة في العبقريه بجد

بس ايه ده؟؟
هم خلصو بسرعه ليه؟؟
لا ماليش دعوة عايزين رباعيات لا تنتهي
اتصرف بقى


وربنا يسعدك ويكرمك ويبسطك ويرضيك ويوفقك دنيا وآخره



سلامووووووووز

همس الاحباب said...

يا روعتك يا نيجرو
ايه الجمال ده يا عمنا
الواضح مشروع التخرج عامل عمايله معاك بس بجد كلمات عبقرية
الحـب لـو بـالعين .. طيب منين و إزاي حبيت من قلبي ناس بوشوش في علم الغيب
جامدة قوى وكلنا بنحس بيها فى عالم التدوين
خـــــــايف لفرحتي دي تقلـــب بــغمّ مانا أصلي دايماً يـا ف قلق يـا ف همّ أفرح شوية صحيح ..أزعل شويـــّــــات لكن الصراحة: القليل من الفرح بلسم
ايه يا بنى العبقرية والجمال ده
انا كنا بدات اقلق عليك
تحياتى وتقديرى

Unknown said...

حلوة جدا كل واحدة فيهم حالة بتعبر عن اللى عايز تقوله بجد يعنى مش كلام وخلاص

Bongo said...

السلام عليكم

اول مرة ادخل مدونتك للأسف , بس بجد البوست عجبني جدااا

ما شاء الله كلهم احلي من بعض ..
معاني جميلة و كلمات موزونة ..

بجد مبدع

ربنا يوفقك دايما

اكيد من آخر زيارة ان شاء الله

تحياتي :)

Eldebug said...

فارد دراعك للحياة و فاتح الشبابيك

و فاكرها قال بتبتسم و مزهزهة لمعاليك

ركّز شوية يا حلو .. بسهولة راح تكتشف

الحزن هو نصيبك..بطّل بلاش تماحيك

----------------------------------

جت فى وقتها يا معلم ... ركزت ياعمنا لحد ماهيست وخلاص بطلنا تماحيك ... كنت سيبنى يومين كده لحد الشهادة ماتطلع وهنعرف لوحدنا ... يلا حصل خير
ادعيلى بقى علشان خلاااااص اتخنقت من الهباب اللى انا فيه ده

زلاموز

حنين.. said...

حبيت من قلبي ناس بوشوش في علم الغيب
...... دى عجبتنى اوى. وكلها جميله. بحييك على البوست... تقبل مرورى

أم أحمد المصرية said...

صديقي العزيز نيجرو
سعدت جدا بزيارتك لمدونتي و انا مش زعلانة من التأخير انا مقدرة جدا انشغالك مع خالص تمنياتي لك بالنجاح و التفوق و تخلص مشروعك علي خير ربنا يرزقك خير مما تتمني
اما بقي بالنسبة للتعليق علي تدوينتك الجميلة دي انا مندهشة كيف لم يلفت نظري هذا الكلام الجميل انت فكرتني بصلاح جاهين في رباعيته حلوة قوي بجد
تحياتي لك و ان شاء الله تواصل دائم

Empress appy said...

هو انت فلست امال انا ايه
ممممم طيب انت عندك رصيد حولى انا يا ابنى والله بقولك عليك بتكتب حلو قوى بجد

Ana said...

أكثر شيء أعجبنى فى مدونتك الجميلة هو هذه الرباعيات التى تقول كل شيء بإيجاز وتترك المرء يسرح بعيدا معها
تحياتى لشخصك الكريم وأرجو أن تشرفنى فى ( دخل الشتا )

أخـت فـى الله said...

الخواجة لما يفلس يدور فى دفاتره القديمة يا فندم
بس تعرف احلى حاجة عجبتنى هى البيت الاخير من كل رباعية بجد المفروض يتحطوا فى برواز
تسلم الايادى

Unknown said...

بجد مقطوعات شعرية غاية فى الروعة يا محمد وفكرتنى بصلاح جاهين
عاجبانى قوى المقطوعة دى
فارد دراعك للحياة و فاتح الشبابيك

و فاكرها قال بتبتسم و مزهزهة لمعاليك

ركّز شوية يا حلو .. بسهولة راح تكتشف

الحزن هو نصيبك..بطّل بلاش تماحيك
دمت مبدعا

سنووايت said...

حظي حلو ان اول مرة ادخل الاقي الرباعيات دي

وقفت قدام المراية ضحكت بكيت
عمّال أدوّر عليّا .. ببص لقيت
مجرد خيال واقف و بيبحلق
كسرت بإيديا المراية..قمت اختفيت

عجبتني دي اكتر واحدة , فيها صورة مرسومة بالكلمات



هـمـــوم مشــــــــاكل أفكـــــار قلق أوهـــــام
حصل إيـه النهــاردة ؟ و إيـه مخبية الأيــــــام ؟
أقولكم على حاجة .. عارفين أنا نفسي في إيه؟
نفسي لما أحط دماغي على المخدة .. أنــــام

ودي كمان فيها نقل للي بيحصل في الحياة
عجبتني جدا

semsem said...

كلام جميل اوى
بجد مبدع يا نيجرو
جميل فعلا
يلا ربنا يوفقك يا بشمهندس
اختك سمسم:)

الـسـيـدة نـون said...

فاضل اسبوعين على مشروع التخرج

ربنا يوفقك

nigro said...

بت خيخة و أي كلام
===============
الوحيدة اللي رفعت من روحي المعدنية
تصدقي يا نوران أنا كنت حاسس إن مفيش حد خااااالص بياخد باله منها
بس الحمد لله إنك بلّيتي ريقي و قولتي إنك كنت بتقريها
عارفة يا نوران بجد الرباعية دي خارجة من القلب قوي
أكيد عارفة إن أول ما نشرتها كان عندك في تعليقي على بوست "هي و بطنها"

صحيح هو أنا ما قلتلكيش إن مناقشة المشروع اتأجلت لحد يوم 15-7
شوفتي بقى كلام الدكاترة
منوّراني دايماً يا نونا

nigro said...

abo 7anf
=======
ابن بلدي البار
الله يكرمك يا دكترة
ده بس من ذوقك
نورتني

nigro said...

بطوط حبوب
=========
محمود حبيب قلبي
يا رب يكرمك يا محمود على كلامك
بس خلاص مش تدعبس تاني
أصلي لما أحب أعملها تاني هأبقى أحوشهم و بعد كده أنشرهم مرة واحدة
نورت يا دكترة

nigro said...

الباحث عن الحقيقة
===============
أستاذي
يا أحمد سيفت إيه بس؟
بقى دي حاجة تتسيف برده
و بلاش تنفخ في تلميذك اوي كده لحسن يتغرر ولا حاجة
الواجب استلمناه يا أفندم و جاري حلًه
سعيد جداً بزيارتك يا أحمد

nigro said...

محمود فرج أحمد
============
ياااااااااااااه
محمود باشا .. إزيك يا راجل
انت لسه عايش؟ ههههههه
شغالين في المشاريع و طالع عين أبونا
أنا و صاحبي
بص بقى .. كلامك انت بالتحديد شهادة أعتز بيها
ده انت راجل شاعر كبير و كلامك ده على راسي من فوق
السلام هيوصل إن شاء الله أول ما أشوفه
نورت يا دكترة

nigro said...

سبهللة عالآخر
===========
أشكرك جداً يا أفندم
على كلامك الجميل و على دعوتك الأجمل
نوّرتي المدونة في أول زيارة

nigro said...

soooo
=====
بس كده يا احمد انت تؤمر
إذا كان على الهيافة مفيش أكتر منها
و أنا كنت بأتلكك على كده بصراحة
ويا سيدي عبقرية إيه بس؟
دي زي ما أنا قلت كده هياااااااافة
و بعدين أحمد فؤاد نجم مرة واحدة
طيب تصدق يا أحمد إن كنت خايف من الناس تستتقل تكرار الكلمة
بس و الله ما تعرفش كلمتك دي اسعدتني قد إيه؟
ربنا يسعدك و يكرمك و يبسطك و يرضيك و يوفقك دنيا و آخره
نورت المطرح يا أبو حميد

nigro said...

همس الأحباب
=========
خالد باشا
حبيبي من أيام الجيزة
جيزة إيه؟ ....... يلا ماعلينا
يا خالد باشا الله يكرمك على كلامك العسل
بس يا عمنا و لا تقلق
الكلام ده أنا كتبته من فترة
يعني تقريباً كده أجدد حاجة فيه مكتوبة من ييجي شهر
نورت يا أبو همس

nigro said...

enjy
====
الله يكرمك على كلامك
و مبسوط بجد إنها عجبتك
و هي بجد كل حاجة فيها حالة لوحدها بتعبر عني بجد
نورتي يا سمو الأميرة انجي

nigro said...

bongo
=====
ربنا يسعدك على كلامك الجميل ده
الحمد لله إنها عجبتك
مستني زيارتك الجاية
نورت

nigro said...

eldebug
=======
واد يا زيزو
مالك يا واد؟
إيه يا عم شحنة الطاقة السلبية اللي بتشع من كلامك دي
يا عم روّق
أكتر من كده و ربّك بيزيح
فوّق كده يا عم الحاج
مش طالبة غم خالص دلوقت
خلاخوخ

nigro said...

حنين
===
الواضح كده إن فيه اجماع على الرباعية ده
و خلي فاكرة إن انتم اللي أجمعتم مش أنا
مبسوط بجد انها عجبتك
و شكراً على كلامك الجميل
تقبلنا المرور يا افندم و في انتظار المزيد
نورتي

nigro said...

أم أحمد المصرية
============
أم أحمد إزي حضرتك يا أفندم
ربنا يكرمك يا رب على كلامك و دعائك الجميل ده
و علطول كده جاهين مرة واحدة
أنا أعترف بصراحة إني متأثر بيه جداً
و بأستحضر حالة الكتابة لما بأقرأ رباعياته الروعة
نورتيني يا أم أحمد

nigro said...

appy
====
مين يحوّل رصيد لمين؟!!
هي الحاجات تعلى على المحتاجات برده يا آبي؟!
ربنا يكرمك على كلامك
منوراني يا آبي

nigro said...

إيهاب رضوان
==========
ربنا يخليك يا رب على كلامك
بس هي المدونة كلها وحشة قوي كده علشان مش يعجبك منها غير الرباعيات دي؟
على العموم كويس برده إنها فيها حاجة حلوة
نورت في أول زيارة

nigro said...

شيمي
====
خواجة؟!!
لأ ياختي أنا هأمشّيها التاجر أشيك
بس على فكرة برده يا شيمي فيه رباعيات منها البيت الأخير منها ما يتفهمش غير بباقي الرباعية
مش كده برده؟
دايما منوراني يا شيمي

nigro said...

ayman badr
==========
الله يكرمك يا أيمن
بس ليه يا راجل كده؟
دي كلها كآبه
أنا مش عارف أنا كتبتها إزاي دي
باين عليا كنت نايم
نورت يا أيمن

nigro said...

سنووايت
=======
أخيييييييراً لقيت حد يقول على الرباعية دي بالتحديد حاجة حلوة
بجد يا سنووايت الرباعية دي أقرب واحدة لقلبي بعد "الحب معناه إيه...." و بعدهم "هموم مشاكل...."
يعني انت كده كسبت اتنين من اصل تلاتة
مبسوووووووط بجد إن الإتنين دول عجبوكي
نورتي في أول زيارة و يا رب تكرر

nigro said...

semsem
======
سمسم
حمد لله على السلامة
كفارة يا سمسم
الحمد لله إن الكلام عجبك
و بجد شكراً يا سمسمة على كلامك
نوووووورتي يا سمسم