Saturday 23 August 2008

شرف الجُندية


فقدت الجُندية المصرية رجلاً من أغغغلى الرجال
رجلاً من أكككفأ الرجال
رجلاً من أشششجع الرجال
رجلاً من أعععيل العيال
إنه أنا
نيجرو

في صفعة غير متوقعة و غير محسوبة و غير مرجوّة و غير و غير و غير .. إلخ إلخ إلخ
رفضت مصر إنها تضمني وسط جنودها البواسل
جنودها الجنانيد
جنودها الجناجيد
و كان رفضاً نهائياً و حاسماً و صارماً و مؤلماً من من من

اليومين اللي فاتوا كنت بأخلّص أوراق موقفي من التجنيد
التجنيد يعني العسكرية يعني الإنضباط يعني الإلتزام يعني الرجولة يعني اللي أهله ماعرفوش يربوه يربيه ولاد الـ....
يعني ربنا ينتقم من الظالم
و للأفس الشديد الشديد يعني طلعت من ضمن الحالات المرضية
اللي بتخلي صاحبها غير لائق صحياً لأداء الخدمة العسكرية
يعني إيه نظري ضعيف؟
هه؟
يعني إيه ضعيف ضعيف يعني؟
و يعني إيه الجيش بيرفض اللي نظره أقل من (- 4) و أنا بألعب في (- 7) ولا حاجة
هو الجندي جندي بعينيه؟
و اللي هيرد عليا و يقوللي طبعاً
هأقوله لأ يا أفندم
الجندي جندي بصلابته و بنشفانه و بإصراره و بعزيمته
و نيجرو صلب صلابة الصخور
ناشف نشفان عود الحطب المسوّس
مُصر إصرار المُصرّين
عزيم عزيمة العزماء
عارفين لو كانت مصر قالتلي معلش يا محمد استنّاني تلت أربع خمس ست سبع تمن تسع عشر سنين كده ولا حاجة
كان يبقى أهون
إنما ترفضني رفضاً بائناً علنياً و تقولي بكل قسوة و جفاء : اطلع براااااااااااا
لأ
ماكنتش مستني منك كده يا مصر
بقى بتبخلي عليا بشرف الجُندية ؟!!
قد كده هونت عليكي
خرجت من مكتب التجنيد و في ايديا شهادة الإعفاء
و كل لما أبصّلها أحس بتوهة و ضيعان ... مش مدرك الموقف
واحد من صحابي شافني بالحالة دي فحاول يصبّرني و قاللي إني ممكن أتطوّع و إنه عنده واسطة ممكن يدخلني بيها
قلتله : لأ
مش انا
مش أنا اللي أدخّل وسطاء بيني و بين مصر
مصر رفضتني
استحالة أرمي نفسي عليها

أنا برده عندي كرامة و كلي كبرياء و إباء و تاء و ثاء

للأسف الشديد لم أنل شرف الجُندية
--------------------------------
بالمناسبة

إيه ظباط الجيش دول؟
يا لهوي عليهم
لسانهم بينقّط إيه؟
تقولش ميه وسخة
ماحدش فيهم بيعرف يحافظ على نظافة لسانه دقيقتين على بعض
الأباحة لو سمعت كلامهم تموت في جلدها من الكسوف
هما دول رجالتك يا مصر
هما دول الرجالة
إلهي يحرقهم هما و ظباط الشرطة و سوّاقين الميكروباصات و تابعيهم و تابعي تابعيهم
ببنزين 80 من اللي بيخلّي العربية تكركر

35 comments:

رندا said...

مش تزعل يانيجروا

جت سليمة اهو ياعم لو كنت روحت كنت لقيت قامووووس من الكلمات الغريبة

كويس خليك كدة احسن
برة قاموس الكلمات ههههههه

ياخواتى حد يرفض نيجروا بحالة

اهو هما الخسرانين يامعلم

والى دخل الجيش قولة بالشفا ههههه

كل عام وانت بخير

رمضان كريم عليك وعلى الاسرة الكريمة

كل الود

رندا

رندا said...

قلت اعلق تانى تعليق

فين فانوس رمضان

مش جبتلى واحد لية

رندا said...

تالت تعليق

ازيك بجا

برضة لسة مش جبت الفانوس هههه

فاتيما said...

و الله كان قلبى حاسس إنك هتاخد تأجيل على الأقل
يا بنى إنت ملكشى فى البهدلة و وقف الحال بتاعهم دا
و بعدين اخويا مر بالتجربة اللطيشة دى و قالى إنهم عندهم عقدة من الباشمهندسن و الدكاترة قوى و بيعاملهم احسسسسسسسسسسن معاملة
يعنى إنت نفدت الصراحة
و بعدين حكاية اللسان الحلو دى عادى يعنى
الغريب إنى بشوفها برضو فى الأفلام الاجنبى يعنى عندهم نفس المعاملة المهينة دى فى دول العالم المتكدم
يعنى إحنا بقينا متكدمين برضو جيشياً
حمدلله ع السلامة
و تامر حسنى لو قرا البوست دا
ممكن يعيط من القهرة
دمت بألف خير يا صديقى

Empress appy said...

مبرررررررروك يا ابنى والله النبى انت زعلان عيب عليك دا انا هعمل لك فرح ههههههههههههه

وبعدين انت عارف ان ظباط الجيش مؤدبين عن الشرطه اه والله هههههههههه

Unknown said...

يا سيدي أنا نفسي آخد اعفا من العسكرية ولا الجندية ولا اسمها ايه دي.. ياريت تبدل معايا خش مكاني ولا ايه
كل ودي يا سيدي ورمضان كريم..
كل عام وأنت بألف خير

شفـقــة و إحســــان said...

واللهى الف مبروك دى شىء بيتمناه كل الشباب وهيحسدوك عليه

الـسـيـدة نـون said...

هههههههههههههههههههههههههه
هههههههههههههههههههههههههههههه
هههههههههههههههههههههههههههههههههه

انا جاية اضحك بصراحة

انا لو منك اطوع برضه
بدل ما تتقهر كدة يا نيجرو
والقهرة للى فى سنك وحشة يا حبيبى

روح اتطوع ووريهم اصرارك وعزيمتك

روح اتطوع وربيهم ولاد ال.....


هههههههههههههههههههههههههههه
هههههههههههههههههههههههههههههههه

يلا الف مبروك

سلام
اختك خيخة

كاميليا بهاء الدين said...

ههههههههههههه


ههههههههههههه


كده برضو يا نجرو؟؟

تتخلى عن مصر؟

هههههههه

مين اللى هايقف زى الأسد يقول

مصر هى مامتى خضرا لون بيجامتى

هههههههههه

مبروك الإعفاء
فعلا مبروك
وانت عارف ليه

تحياتى واحترامى

Unknown said...

يعنى انت زعلان على نظرك يا نجروا
ولا على التجنيد ؟
انا عارفة اعرف وبكل صدق
جاوبنى يالله ؟؟
ههههههه
ربنا يوفقك بس على فكرة الاغلب بيبقوا فرحانين جداا نهم خرجوا من الجيش

آخر العنقود said...

هوه زعلان بجد
لا بجد زعلان ولا ايه؟؟
الف مبروك يانيجرو
وزى ماقالولك عما الخسرانين
:)
كل سنة وانت بخير وطاعة

ماء تشرين said...

الحمد لله والف مبروك وياسيدى الف من يتمناك سيبك من مصر دى حته مبقتش بنت اصول ومريشه كده بقت فقيري وشها يقطع الخميره من البيت بجد عجبنى البوست اوى واحمد ربنا بجد انك مدخلتش احنا زميلنا بيحكولنا مهازل اعتقد انت شوفت نقطه في بحر وفي كلام بيقوللنا الرقابه حازفه نص الحمد لله مره تانيه مبسوطه اوى انى جيت هنا
تحياتى

راحــله said...

ما شاء الله طريقتك جميله جدا فى التعبير عن موقفك والفرحه الى خلاص هتفط من البوست ,,, الف مبروك

تحياتى

Mahmoud البطراوى said...

هههههههههههههههههههههههه

مصر رفضك
انا كنت حاسس انك مش ابنها
وحسن يوسف هو الى ابنها

يا سيدى مبرووووووووووووك عقبال الجواز
واوعى تاخد منه اعفى هو راخر

اصل برضه بقى ليه كشف طبى

عاشــــــ النقاب ـقــــة"نونو" said...

هههههههههههههههههه
يا اخي الف نهار مبروووووووك
خد الشر وراح
دة انت اتولدت من جديد
مبروك عليك يا اشجع الرجال في اي حتة تانية
هتروح يعني تقف على الحدود تسد على اخواتك الطريق ولا تخليهم يدخلوا بشربوا ولا توديلهم مية
بلا وجع راس
حمد الله على سلامتك
كل عام وانت الى الله اقرب

سمر الشافعى said...

شفت الزمن الاسود حتى الامهات بقت بترفض ولادها بس ولاتزعل نفسك مصر خسرتك يانيجرو خسرتك شهمنتك ورجلنتك وصلابتك

انت بقى تطلع تهيم على وجهك فالشوراع وتقول جئت لا اعلم من اييييييين ولكنى اتيت ههههههههه

الف مبروك يانيجرو ويالا بقى عيش حياتك ياعم

ويارب عقبال لما تاخد شهاده الجواز على رأى بطوط ابو تعليقات جامده

دكتورة سنان said...

لالالالالالا قول كلام غير ده
انت زعلان انك مدخلتش الجيش ياراجل؟؟
ده كان ممكن تتاخد 3سنين يبنى ظابط احتياط وتخرج منتهيه صلاحيتك .. احمد ربنا :)
عن نفسويتى يوم ماخطيبى اخد تأجيل زغرطت وقعدت اقول هيييييييييييييييه وخليته يفسحنى :)

Ehab said...

هأو هأواواو
يا واد يا فقري ده انا ابويا كان عايز يدبح خروف علشان الأعفاء بتاعي
وانا كنت ناقص ارقص
بعد اللي سمعته طول عمري عن جيشنا الهمام
انك تبقى جندي في خدمة ظابط بعيد تماما عن خدمة الوطن انت مجرد خادم او عبد عند الظباط حياه مفيهاش اي شرف جنديه ولا حاجه
وحسبي الله ونعم الوكيل
والف الف مبروك يا جميل على المعافاه
ربنا يوفقك بقى في الحياه العمليه

سلااااااااااااااااااااااااام
اخوك اللي بيحبك قوي ايهاب

أخـت فـى الله said...

هو فى حد بيزعل فى الزمن دة عشان اخد اعفا؟؟
ياااااااه دة انت وطنى قوى
الحمد لله
وعسى ان تكرهوا شيئا وهو خير لكم
اكيد خير يا نجرو
محدش عارف الخير فين
ولا ايه؟

الـسـيـدة نـون said...

عامل ايه يا نيجرو
والحياة عاملة معاك ايه؟

كل سنة وانت طيب يا جميل

اختك خيخة

Asmaa mahaba said...

لالالالالالالالالالالا عندك انت ناسى ان بطيخ ظبوط وسواق مركبات فضايئه اد الدنيا
لا ازعل منك وتبقى قطيعه الا ظباط الجيش عك فى العسكر براحتك لكن ديش لا
اه انا بنبهك والا تبقى قتيعه العمر يا نيجرو يا اخويا
وعموما انا مش عارفه اقولك مبروك ولا معلش خيرها فى غيرها ههههههههههه
بس عموما مصر محتاجاك فى حاجات اعظم واحسن
واعتذار بقى نونو عشان بطيختى وخد بالك كويس متشتمش تانى البطيخيين
يا خساره يعنى انت مش حتكون فى الجيش معايا كنا نبقى كتيبه واحده
سلام يا سى نيجرو
سومه_87

Gihad N. Sohsah said...

لا لا لا لا
متزعلش
كلنا عارفين انه كان نفسك فيها

بس يللا

انما الاعمال بالنيات

Unknown said...

مبروك يا باشا
يابني حقك تحتفل
مصر هي الخسرانه

Soooo said...

تعالي جنبي يانيجرو ياخويا
انا برضه ماقدرونيش وماخدونيش اخدم الوطن في الجيش
قال ايه ياخويا .. عندي ليونة في مفاصل ركبي
مالها ركبي
ده انا ركبي حديد
طب بذمتك .. مش رجلي وبنياني الجسماني يؤهلني اني اخد لقب شهيد طيار
!!!
بس عارف .. هم الخسرانين يانيجرو
اه والله هم الخسرانين
بالك لو انا وانت كنا في الجيش
يااااه
كنا هنعليّ اسم مصر فوق قوي
كنا هنحارب ونحرر ميدان التحرير من الباعة الجائلين
ومش بعيد كانو يبعتونا في عملية انتحاريه لتطهير ميدان العتبه تطهيرا عرقيا من بتوع الاندرات الحريمي

كل سنه وانت طيب يابو النجاجير
ورمضان كريم




سلاموووووووووووز

(احمد سكر ) said...

ههههههههه

بتفكرنى باخويا

لما بردو مقبلهوش طبيا

كان عاوز يرمى نفسه ف البحر

وهو راجع لولا اصحاابه

ياخويا شوف الوطنيه بقت عاملا ازاااى


هههههههههه

لاء متحسبهاش كدا الولد مش وطنى اوى كدا

دا كان شغال معايا فى المصنع

وماصدق سنتين هيريح دماغه منى

ولما اخد المعافاه زعل انه مش هيبعد عن الشغل وهيرجعله تااانى

معلشى ياهندسه


وكل سنه وحضرتك طيب

احمد

ست البنات said...

جيت على الجرح
حكاية الشتايم دي فظيعة
بره أبويا وجدي كانوا رايحين المطار وجم يدخلوا من حاجز مغلق فالشرطي قالهم ممنوع يا عم ارجع، قام أبي بأعلى صوته وصرخ: بقولك افتح يا حيـ....(شتيمة) انت مش عارف بتكلم مين؟
ففتح على الفور :)

بيشتغلوا العساكر بالشتيمة تقريبا

دعاء مواجهات said...

هههههههههههههههههه

الف مليون بعيد الشر عليك ياخويا م الرفض والفقد والطرد والبهدله والشرودة...

مين دا الى يقدر يرفضك ولا يطردك ومواجهات موجودة على قيدا لحياة هاة قوللى

قوول..

قوول...

اية بتقول مين....

مصر............ هااااااااا

انهين دى؟؟؟

بتاعتنا ؟؟؟

معقوول؟؟

لاااااااااا

انت بتهزر طبعا

دا انا مربياها ع ايدى ولا يمكن تعمل معاك كدة ابدا

اية دة متاكد..؟؟؟؟

طب خلاااص مصدقاك ياعم

خلاااص انا هعمل اتصالاتى واشوفلك الموضوع دة

متقلقش

=============================

بجد هفتقدك اوى طوال الشهر الكريم

ترجعلنا بالف سلامة ياارب

وربنا يغسل ذنوبنا جميعا يااارب

ويتقبل صيامك وقيامك وصلاتك

متنسانيش من صالح دعائك يانيجرو بجد والله

متنسااااش

جااااااااااامد جااااامد

مش هوصيك بقى

لو دخلت ف اى وقت ابقى ارمى السلام

ومتقلقش ع مدونتك ف عنيا الاتنين

سلااام يااحلى نيجرو ف الوجود..

يااامصر...

همس الاحباب said...

ههههههههه
هههههههه
يخرب بيت فقرك
بجد مصر خسرت كتير
والميز كمان خسر كتير قوى
اقولك على حاجة كده احسن
يا عم هما الخسرانين
هما يطولوا بس والله كان نفسى اشوفك زى عبود على الحدود كده يا جدع
يالا ما علينا
كل سنة وانتى طيب
ورمضان كريم
والله ليك وحشة يا جدع
تحياتى يا باشا

Sourah said...

الف الف مبروك يا عم نيجرو ،،

ده دانت اترحمت ، دا الجيش ده بهدلة وزفارة لسان زي مانت شوفت ، و على فكرة دي عينه يا جميل ،امال لو عشت بقه مده الخدمة في معسكر وسط الصحرة و الحر بقه هناك ما اقوللكش ، يتوب ، و على فكره سماره ما بيطلعش و لو استحميت بالكلور و الفانيش ..

على فكرة انا مادخلتش الجيش ، لانني ببساطة مالياش جيش ، و برضه ببساطة لان شهادة الميلاد بتاعتي مذكور فيها جنس المولود : انثى :)

طيب واحد يسألني طب انت عارفه ده منين ..
يا بني الموضوع يتلخص في كلمتين ، ابويا عميد في الجيش ، و اخدنا مرة نصيف معاه في المعسكر اللي كان على ضفاف خليج السويس و جبل عتاقه ، و الموضوع ده كان طول شهر 7 ، امي كانت حامل الحر سوا العيل اللي في بطنها نزلت على الولادة ، و انا اتفحمت وبعاني من الموضوع ده لغايه الوقتي , يتبقى بس اني اقوللك ان الموضوع ده بقاله عشرين سنة ، الحمد لله ..

يا بني عاوزاك ماتنساش حاجة كمان ، بص لنص الكباية المليان ، حد ادك ، دا انت واخد شهاده "اعفاء" ، المهم انك اتعفيت من حاجه في البلد دي ..


كل سنة و انت طيب ، و ياريت تزورني في مدونتي ..


و اخر الكلام سلااااام ..!!!

رندا said...

رمضان كريم عليك وعلى اسرتك الكريمة
تقبل الله صيامك وقيامك وغفر الله ذنبك

اراك ان شاء الله بعد رمضان

رمضان كريم

رندا

سبهللة said...

مبروك انك اتعافيت من مصيبة التجنيد ولو مش مصدق ايقى اسال اصحابك اللى دخلوا الجيش
واحمدربنا انك اترحمت من لسان ضباط الجيش اللى انت ما استحملتوش يوم واحد
كل سنة وانت وطيب
رمضاااااااااااااان كرييييييييييييم

إنجى said...

هههههههههههههههههههههه

ههههههههههههههههههه

زعلان عشان مدخلتش الجيش؟؟

دا انت كنت هاتتص تلات سنين

وتعمل ظابط بقى وبتاع

عموما وزير الدفاع هو الخسران

مش حيكون عنده نيجرو
هههههههه

ياعم الف مبروك الاعفاء
عقبال الاعفاء العزوبية
ههههههههههههههه


سلام

أخـت فـى الله said...

وانت طيب يا نجرو
وتقبل الله منا ومنك صالح الاعمال
وماتنساش الخشاف!
يلاّ سلامين

Alkomi said...

حبيب قلبي

مش عارف اقولك مبروك ولا اقول ايه سيفن ايه يا مصر

عموما رمضان كريم

maha zein said...

يلا يا جرع اهو الجيش اصلاح وتهذيب بردو
خليك كده فريش احسن
بس علي فكرة
مصر اللى هتندم
وخسرت كتير
يلا حسبن عليهم
كل سنة وانت طيب
ومتشغلش روحك يا برنز كتير بمواضيع مصر والحركات دي
مصر خلاص باعت القضية
وباعتك اول واحد في القضية