نقطة تفتيش

قِف

نقطة تفتيش

أين بطاقتك الشخصية ؟

ما هذا ؟!

إنسان ؟!!! .. يُحب ؟!!!

أخرج قلبك

أرني ما فيه

ما هذا ؟!

أسلحةٌ من حب !!

و دروعٌ واقيةٌ من طيبةِ قلب !!

و قنابلُ من أملٍ وتسامح !!

هل كنت تتجهّز للحرب ؟

أين الرغبات العدوانية ؟

أين الحقد ؟

أين الخُبث و سوء النية ؟

أين فساد القلب ؟

أين الهمجية ؟

إنك لست من سكان هذا البلد الأصلين

أنت مشعوذ

جئت لتُفرّق بين الناس

جئت كي تفسد جو البلد بدخان الحب و أبخرة الإحساس

و تُشيع الطيبة و تُنمي الخير و تُزكّي الشرف

لا تُنكر .. اعترف

أعترف

أعترف بأن الحب هو مهد الإحساس

و أن الخير هو أصل الإنسان

و أن الشر بغير أساس

هل يُعقل أن يُرمي العصفورُ بتهمة كُنه ذا جناحين؟!

هل يوماً سُجن شعاعُ النورِ لأنه شقّ ظلامَ الليل ؟!

هل يعقل أن يُرمي الإنسان بتهمة كنه إنسان ؟!!

صُمّوا الآذان.. لا تسمعوا له

هذا الساحر قد جاء ليقتل فينا الكُره

بل أنا انسان.......

إن لم تصمت لوضعت في فمك نعليّ

أقيموا محكمةً فورية

حكمت محكمة الدنيا

على هذا الواقف كالثعبان

خلف القضبان

أن يُعدمَ حرقاً بالنيران

و التهمة : يحتفظ ببقايا إنسان

ارتاحوا اليوم

زُفّوا البُشرى لجميع القوم

أعلنوا في كل البلدان

يا سادة

قد مات الإنسان

راجع بتاج

السلام عليكم

بعد حوالي أسبوعين من التوقف الإجباري الاختياري

أسبوعين من الشغل المتواصل ليل نهار

خمس امتحانات أعمال سنة بالإضافة إلى الزغلول الكبير ( مشروع التخرج )

قلت يا واد يا نجرو خدلك يوم أجازة كده من نفسك

ولا انت مالكش نفس يعني؟

قوم إييييييييه

كنت بأزور مدونة الأخت العزيزة جداً

أماني أبو زيد

آخر العنقود

لقيتها بعتالي تاج ..... بس بصراحة تاج رائع

مطلوب إني أتكلم عن 10 صفات فيا

نستعين على الشقا بالله و ندخل في الإجابات

ما خلاص بقى .... الواحد بقى متعوووووود دايييييييماً

*************************

انسان عاااادي جداً .. بسيط جداً .. حساس جداً (بس مش جداً جداً قوي يعني)

قليل الكلام لدرجة الخرس .. كثير الكلام لدرجة الرغي

اتنين في واحد

أكره الكذب و الكذابين لدرجة العداء

أوقات بكون منطوي لدرجة إنك ممكن تقول عليا مصاب بالتوحّد

أوقات بكون اجتماعي لدرجة إنك ممكن تقول عليا إني مرشح نفسي في انتخابات

بآخد على الناس بسرعة البرق

بأزعل من الناس بسرعة السلاحف

صريح لدرجة ان كل اللي حواليا بلا استثناء بيقولولي إني بالطريقة دي مش هاعرف أسلك في حياتي المستقبلية

مابعملش غير اللي أنا مرتاحله حتى و لو اللي حواليا قالوا عليه غلط

مع العلم إن الصح و الغلط أحيانا بيبقوا وجهة نظر شخصية

بحب الضحك زي عنيا و بحب الكآبة زي ايديا

بحب جداً الخير لكل الناس و بالتحديد اللي بحبهم

إنما بقى اللي مش بحبهم .. يا نهار مش فايت ببقى عايزهم يولعوا

طيب غالباً شرير أحياناً

أجيد فن التلاعب باحاسيس الناس اللي بيخنقوا عليا

بس في الآخر بعترفلهم بكده علشان أبقى خنقت عليهم بالمثل

صاحب صاحبي..عدو عدوّي

أعشق الفكر و التفكير و الأفكار و المفكرين و أكره بشده و أحتقر من يدّعي الغباء

لأن في اعتقادي أن الله-عز و جل- لم يخلق أحداً غبياً بل نحن من ندّعي الغباء

طبعاً أنا رغيت كتير عن نفسي بس اعذروني بقى بقالي سبوعين ساكت.. يا خبر

الناس اللي هبعت لهم التاج ده أظن كده ما جاوبوش عليه لسه

وزة صاحبة مدونة أنين الحزن ..اللي بقالها شهر غايبة و بدعي ربنا إن النت يرجع عندها بقى

محمود صاحب مدونة بطوط حبوب

محمود رئيس جمهورية نفسه

سوووو العجوز أبو 30 سنة

Appy

سلام مؤقت

كنت نزّلت بوست من حوالي أسبوع بستأذنكم فيه إني هتوقف لفترة عن التدوين في مدونتي و يمكن كمان عن التعليق في مدوناتكم علشان ظروفي الدراسية

بس اللي حصل عندنا في المحلة و تصوير ناس كتير له إنه بطولة و جدعنة و رجولة استفزني إني أنقل و لو بعض من الحقيقة اللي كانت غايبة عن كتير

و من هنا اتجرّت رجلي تاني للتدوين و التعليق في مدوناتكم رغم ضيق الوقت الشديد و الضغط النفسي اللي بعاني منه نتيجة تعسّف الدكاترة المشرفين على مشروع التخرج بتاعي

بس أنا يا جماعة حاسس بجد إني بقى عندي عيلة تانية حقيقية و أصحاب تانيين حقيقين في عالم افتراضي حقيقي

زوّد الضغط النفسي اللي عندي مسبقاً ده شخص أقل حاجة يتوصف بيها إنه سافل

ساب تعليق أسفل منه في مدونة أختي الروحية بجد اللي لا شفتها ولا عمرها شافتني

نوران الشاملي

بت خيخة و أي كلام

تعليق بجد هزّني و تعب أعصابي و أشفقت على نوران من قرايته .. أي جمود قلب و أي سفالة موجودين في الشخص ده علشان يجرح قلب أم كل ذنبها إنها فرحانة بإبنها و بتحب تتكلم عنه و بل و توصل سفالته إنه يهينها هي شخصياً

لله الأمر من قبل و من بعد

زوّد الضغط النفسي أكتر مدونة كنت بأزورها على استحياء قبل كده .. دخلتها بالصدفة النهاردة لقيت صاحبتها بتقول إنها كانت هتحذفها بس رجعت في كلامها و قررت إنها تكتفي بإنها تقفلها لأنها مقدرتش تحذفها

رغم احترامي الشديد للحرية الشخصية و مبدأ أنت حر ما لم تضر

إلا إن اللي هزّني بجد هو الكلام اللي قالته في بوست الوداع كلام أقل ما يقال عليه إنه كلام قاتل .. كلام صعب

ياريت اللي فيكم يعرفها يحاول يكلمها أو يتصل بيها و يقف جنبها لأني بجد أشفقت عليها من كلامها

المدونة اسمها بقت سلطة لصاحبتها مروة الزارع

بعد شوية الأحداث اللي حصلت دي و اللي أثّرت فيا بجد .. المرة دي بجد هستأذنكم في الإنقطاع التام عن التدوين و التعليق حتى إشعار آخر

بس كل بجد لما هتوحشوني هطل عليكم بس من بعيد لبعيد بدون كلام

قبل ما أمشي عايز أقول لنوران إن أي إهانة ممكن تكون اتوجهتلي من تعليق اتكتب عندها هي بجد شرف ليا لأنها كانت نتيجة انفعال مني على شخص أهان انسان عزيز عليا .. كل اللي بيربطني بيه هو الحب في الله.. و الأخوة الإنسانية

ما حدش فيكم يمشي يا جماعة مش عايز عيلتي الجديدة الجميلة تصغر

عايز أرجع ألاقيها أكبر و أكبر

سلام مؤقت

محمد النجار

المسلم

عن عبد الله بن عمرو بن العاص قال: إن رجلاً سأل رسول الله صلى الله عليه و سلم: أي المسلمين خير؟؛ قال:

من سلم المسلمون من لسانه ويده

رواه مسلم

آخر كلام

مكتب الخدمة العامة اللي اتحول لفحم

مدخل بنك القاهرة و شبابيكه اللي اتكسروا

أحد المحلات اللي اتدمرت تماما

السور اللي كسره المتظاهرين و دخان الحرايق لسه مستمر من أول امبارح

بعض المرافق العامة اللي اصابها تلفيات

طبعا كان فيه مشاهد كتير تستحق التصوير بس الوجود الأمني المكثف منعنا من التصوير

اشتباكات امبارح كان سببها إن قوات الأمن حاولت تفريق مظاهرات الأهالي المقبوض على ولادهم بأسلوب مستفز و مطاردة المتظاهرين .. مع العلم إن الأمن كان بيقبض على أي حد يمسكه سواء كان من المتظاهرين أو من اللي كان قدرهم إنهم يكونوا في الشارع في الوقت ده .. و غالبية المقبوض عليهم من المصابين .. و أخبار عن قيام الشرطة بتعذيب ناس من اللي مقبوض عليهم حتى من الأطفال

الأخبار المؤكدة إن اللي بيقوم بأعمال التخريب والحرق و التكسير دول بلطجية .. و عمال شركة الغزل بعيدين تماما عن كل اللي حصل من بداية الأحداث حتى انهم ماقاموش بالإعتصام و لا قاموا بأي مظاهرات .. والكلام ده من مصدر من داخل الشركة

امبارح تم تكسير أحد مكاتب البريد و حرق أحد مكاتب الخدمة العامة للمواطنين حرق تام

النهارده الصبح .. أكتر من 20 عربية أمن مركزي اضافية و صلت المحلة و على طول الطريق من طنطا كل حوالي 100 متر فيه عسكري أمن .. لحد مدخل المحلة بيوصلوا لعسكري أمن كل 10 متر

المحلة متقفلة بالكامل .. ومليانه مخبرين و مباحث أمن دولة في كل مكان .. والكماين بدأت تظهر على الطريق .. طول اليومين اللي فاتوا دول ماكنش فيه كماين

حوالي الساعة 2 كده عدى من جنبي موكب من حوالي 4 عربيات سودة ..رئيس الوزراء و وزيرةالقوى العاملة عائشة عبد الهادي .. و امبارح كان عندنا النائب العام

عند قسم شرطة أول .. الأمن مقفل المنطقة تقفيل تام علشان اشتباكات امبارح ما تحصلش تاني .. حتى المحامين اللي كانوا جايين للمقبوض عليهم منعوهم من الدخول

اللي شوفته بعنيه عند قسم الشرطة واحد من البلطجية مرافق لظابط المباحث و ماشي معاه زي ضلّه .. سمعته عمال يكلمه كلام من نوعية

( شوف يا باشا اللي بيصور هناك .. واحد واقف بعيد أهوه بيتكلم مع الناس )

اللي بيقوموا باعمال الشغب دي بيبدأوها وقت خروج عمال الشركة علشان يلبسوها فيهم .. و أخبار عن تلبية بعض مطالب عمال الشركة من ناحية زيادة بدل التغذية للضعف قبل يوم الإعتصام .. ورا عدم قيامهم بالاعتصام في يومه

( في رأيي: صح كده.. ناس كانت عايزة تعمل إضراب علشان مطالب.. لما نفذوا لهم منها حاجة.. وقفوا الإضراب )

بالنسبة للضحايا.. في جانب الأمن: اللي متأكد منه هو مقتل أحد عساكر الأمن نتيجة اصابته بزجاج في رقبته مزّق الأوردة و مالحقوش يسعفوه.. وجود أحد ضباط الأمن في المستشفى في حالة سيئة.. المتظاهرين اتجمعوا عليه و ضربوه ضرب موت علشان ضرب سيدة من اللي كانوا في بداية المظاهرة وقت لما كانت سلمية.. بالنسبة للأهالي : واحد من جيراننا في المستشفي بين الحياة والموت نتيجة اصابته بعيار مطاطي في الجمجمة

بالنسبة للخساير اللي حصلت في صفوف الناس .. المشكلة اللي هتستمر بجد هما الشباب المقبوض عليهم .. بالمئات .. و المصابين .. هي دي بجد كل خسايرنا

فيه مشكلة لسه ما ظهرتش على الأحداث .. المدرستين اللي اتحرقوا دول كانوا فيهم ورق الطلبة

( من شهادات ميلاد و شهادة ابتدائية )

يا ترى دول كان مصيرهم إيه بعد حرق المدرستين ؟!!

إنما المحلات اللي اتكسرت فأصحابها رجال أعمال أغنياء ..مشكلة تصليح اللي اتكسر مش هتبقى معضلة عليهم .. و المنشآت الحكومية اللي حصل فيها تلفيات فبعض رجال الأعمال اتكفلوا بيها زي المدرستين اللي اتحرقوا مثلا

المشكلة بجد هم المصابين و المقبوض عليهم

بالنسبة لإنتخابات المحليات عندنا .. الأخبار اللي طلعت انها اتلغت .. بس اللي حصل ان فيه لجان صورية اتعملت .. ونجحوا مرشحين الحزب الوطني كلهم بالتزكية

دي كانت آخر الأخبار المؤكدة اللي عرفتها وشوفتها النهاردة .. وربنا يستر

------------------------------

تحديث : الساعة 10 مساءاً

الهدوء يخيّم على البلد

تجمهر أمام قسم شرطة أول من أهالي المقبوض عليهم.. و الإفراج عن بعض من المقبوض عليهم و الإبقاء على البعض الآخر رهن التحقيقات

أبريل المحلة..الغضب الغاشم...مجرد راي

الصور دي متصورة النهاردة الصبح و ظاهر فيها المدرستين اللي اتحرقوا و عربيات الأمن المركزي اللي مالية البلد و صورة العربية اللي اتحرقت اللي ظهرت في فيديوهات كتير على مواقع كتير و للعلم دي عربية مفتشين التموين على المخابز

بلطجة وغباء من قوات الأمن .. همجية و عدم وعي من الناس .. استبداد من الحكومة

اللي حصل في المحلة امبارح مهزلة بكل المقاييس

فلاش باك

عمال المحلة هيقوموا باعتصام و إضراب عن العمل يوم 6 أبريل علشان غلاء الأسعار و نقص المرتبات .. و دي مش أول مرة ولا حتى المرة العاشرة اللي عمال المحلة يعملوا فيها كده .. عمال المحلة على وعي كامل بثقافة الإعتصامات و الإضرابات .. أحزاب المعارضة و الإخوان نشروا فكرة إن اعتصام عمال المحلة لازم مايكونش عمل فردي .. البلد في خراب و فساد.. إحنا كمان محتاجين نعمل حاجة .. يبقى نخليه اعتصام جماعي على مستوى مصر كلها .. يعني نعمل إيه؟ .. محدش يروح شغله .. محدش ينزل يشتري حاجة .. محدش يبيع حاجة .. طلبة الكليات و المدارس مايروحوش جامعاتهم ولا مدارسهم .. يعني اصابة البلد بالشلل التام .. نوع من انواع الإعتراض على الأوضاع

يعني مفيش مظاهرات .. مفيش تخريب .. مفيش عنف

التعليقات

الناس أصلا جبانة .. و مش هيعملوا حاجة .. هو انت يعني يا طالب هتضر البلد لو ما نزلتش كليتك ولا مدرستك؟ .. يعني اقتصاد البلد هيقف في يوم .. اللي هتخسره الحكومة في يوم هتعوضه اليوم اللي بعده .. يا عم مفيش أمل

الرد

ماقولناش الناس تنزل مظاهرات .. كل اللي هيعملوه انهم يقعدوا في بيوتهم .. لو أنا قلت أنا لو ما روحتش كليتي او مدرستي ده مش هيضر ولا هينفع و كل واحد في شغله قال كده يبقى مش هنعمل حاجة .. و مين قال ان الهدف من الاعتصام هو ضرب اقتصاد البلد .. ده نوع من الأعتراض بس بالفعل مش بالكلام و بس

----------------------------------

6 أبريل

المحلة : صباحاً

حضور مكثف جدا و غير طبيعي لقوات الأمن المركزي

الأمور ماشية طبيعية جدا .. الموظفين كلهم نزلوا راحوا أشغالهم .. بل بالعكس الإقبال كان تاريخي يا أفندم

أمي و أبويا : يا عم بلا اعتصام بلا بتاع .. نزلت تعليمات عندنا إن اللي هيغيب في اليوم ده يعتبر مشارك في الإعتصام و هاياخد خمس أيام جزا و هيتحول شئون قانونية .. يعني هيبقى موت و خراب ديار؟

المحلة : الساعة 2 بعد الظهر

خروج مظاهرات تنادي بسقوط النظام و نازلة شتيمة في حسني مبارك شتايم من النوعيات المتنقيّة

قوات الأمن كالعادة حاولت تفريق المظاهرة بخراطيم الميه .. ولا أثّر مع الناس

بدات المعمعة .. قوات الأمن حاولت تفريق الناس بالقنابل المسيلة للدموع .. الناس هاجت وبدأت تكسير و تخريب في أي حاجة تقابلهم .. أي حاجة .. كانوا بيكسروا في أي محل فاتح يقابلهم و ولّعوا في مدرستين و سرقوا أجهزة الكمبيوتر اللي فيها و كسروا جذوع الشجر و كسروا كباين التليفونات اللي في الشوارع و ولّعوا في اليُفط القماش و كسروا اليُفط الحديد و في فرد الكاوتش و ولّعوا في عربية مفتشين التموين و خلعوا فلنكات السكة الحديد وكسروا زجاج سنترال المحلة و كسروا سور حوالين أرض(!!) و قعدوا يحدفوا قوات الأمن بالطوب بتاعه .. قوات الأمن ردت بالرصاص المطاطي في المليان (!!!!!!)

كانوا بيضربوا في المليان .. بالإضافة للذخيرة الحية بس دي بقى كانوا بيضربوها في الهوا

آخر الأخبار ان فيه اتنين ماتوا النهارده الصبح ( طفل عنده 9 سنين و شاب عنده 20 سنة )

اصابات و اعتقالات بالمئات حتى الناس اللي ماكانتش مشتركة .. الناس اللي كانت طالعة تتفرج بمبدأ يلا نروح المولد

قوات الأمن كانت بتهاجم أي عيادة فاتحة و تقبض على المصابين اللي فيها و حتى في المستشفيات

كل اللي اتقبض عليهم هايتعرضوا على النيابة العامة للتحقيق

------------------------------------

عمال المحلة ماكانوش مشتركين في عمليات التخريب دي

إيه اللي حصل حوّل الإعتصام إلى حرب ؟

المظاهرات طلعت ليه أصلاً ؟

الإتفاق ماكنش على مظاهرات

الإعتصام في المحلة فشل

بس اتحول لحرب بمعنى الكلمة

أنا ضد الظلم ضد الفساد ضد كبت الحريات ضد الإفتراء على الناس ضد الإستبداد

أنا برده ضد الغباء ضد الهمجية ضد المجهود الموجهة في غير الطريق الصح

الأراء كلها دلوقت منقسمة ما بين مؤيدين و معارضين

المؤدين للي حصل .. وجهة نظرهم إن دي قرصة ودن للحكومة للي ممكن يحصل بعد كده

طيب وبعدين .. بس كده

المعارضين للي حصل ( و أنا منهم ) .. و جهة نظرهم إن اللي حصل ده ما كنش ينفع .. التكسير و التخريب والحرق .. الناس كانت بتخرب في حاجة بعضها .. جوانا غضب آه .. بس يوم ما نعترض يبقى نصب غضبنا ده على اللي يستحقه .. ما يبقاش تخريب مننا فينا

بجد اللي حصل عندنا ده مهزلة مش هتتنسي

للمرة التانية العمال براءة من اللي حصل .. ده شغل بلطجة

قوات الأمن بتضرب فيك و انت ناوي ماتسكتش .. خلاص الضرب يبقى فيهم و عليهم

مش في أكل عيش أهل بلدك

------------------------------

خسائر الحكومة

بعض الإصابات .. تكسير زجاج سنترال المحلة .. حريق مدرستين .. سرقة أجهزة الكمبيوتر اللي فيها ( على فكرة دول ما يزيدوش عن ستة أو سبعة أجهزة )

و طبعا تكلفة الذخيرة اللي انضربت

( مئات من الطلقات المطاطية و عشرات القنابل المسيلة للدموع و القنابل التي تصيب بالشلل المؤقت للاطراف)

الخسائر اللي فينا

قتيلين .. عشرات الجرحى .. مئات المعتقلين .. تخريب بعض المحلات تخريب كامل

جو المحلة بقى معقم ببقايا القنابل المسيلة للدموع

النهاردة الصبح واقف على محطة مستني ميكرباص كل الناس اللي واقفة معايا بلا استثناء اللي نازل عطس واللي نازل نف و اللي عمال يدعك في عنيه

مفيش أي خسارة تضاهي الأتنين اللي ماتوا

ماتوا ليه علشان مفيش تفكير سليم

المحلة يا جماعة للي ميعرفهاش مدينة صغيرة جدا ممكن تلفّها بعربيتك في اقل من ساعة

و للصراحة برده .. إن رغم إنها صغيرة إلا إن نسبة البلطجة و الإجرام فيها كبيرة شوية

أنا مش بستبعد إن اللي حصل ده يكون عملية بلطجة .. و أهي كانت ميغة بقى .. كسر يا عم محلات و اسرق براحتك

لأن ولا أي عامل ولا أي موظف هيقوم بحاجة زي دي .. الموظف أو العامل هيخاف على أهله و على نفسه .. مش هيعمل كده

عمال شركة غزل المحلة ناس واعية مش أول مرة يعملوا اضرابات ولا اعتصامات .. عارفين ازاي يعملوا إيه علشان إيه

و الموظف ده أكتر واحد خايف على أكل عيشه .. لو اتقطع أو اتخصم منه حاجة هو اللي هيعاني

يبقى اللي عمل كده مين ؟ و إيه مصلحته ؟

البلد رجعت زي ما كانت .. الناس نزلت أشغالها و راحت مصالحها و الطلبة راحوا مدارسهم و جامعاتهم

كل اللي باقي من اللي حصل امبارح .. مظاهر التخريب و دخان الحرايق و جو مليان ببواقي دخان القنابل

و ألآف الأهالي و اقفين قدام قسم الشرطة مستنين يعرفوا مصير ولادهم إيه

و عشرات من عربات الأمن المركزي المصفحة ( أكتر 150 عربية )

دي مش متابعة للي حصل في المحلة

دي مجرد نقل للأحداث و مجرد رأي

السلام عليكم

السلام عليكم

أهلي بعد أهلي الأصليين

ادعولي يا جماعة

مش عارف كده.. حاسس اني فيه تسعتلاف حاجة متكربسة فوق دماغي

أول مرة أحس بالهم

مخنوق جدا.. متضايق جدا.. خايف جدا

أنا عايش دلوقت سكرات التخرج من الكلية

آخر أيامي فيها

مش عارف مالها بقت صعبة كده

أول مرة أحس بصعوبة حاجة في حياتي

يمكن علشان أنا اللي بستهبل

بس خلاص هحاول أبطل استهبال.. و أستهدي بالله كده.. و هتعدّي

يمكن مش هقدر أتابع تدويناتكم الأيام اللي جاية

يمكن مش هقدر أنتظم اليومين اللي جايين دول في التدوين

بس كل لما ألاقي فرصة صغنونة كده.. هحاول أملص من اللي ورايا و لو ساعة

كل ما هتوحشوني هسيب اللي ورايا بجد و آجي أزوركم

مع انكم بجد بجد بجد دايما و احشنّي

قبل ما أستأذنكم في التوقف ( المؤقت.. بإذن الله)

عايز أقولكم أني بجد محتاج دعواتكم

مش هطوّل عليكم

السلام عليكم