Sunday 23 March 2008

انت مش عارف انت بتكلم مين

المكان: أتوبيس

الزمان: مش مهم

الأشخاص: ركاب الأتوبيس و راجل عجوز و أنا

الحدوتة: حاجة مستفزة فعلاً لما تكون قاعد جوه الحاجات الكبيرة المتخربأة دي اللي بتمشي و بيضحكوا علينا

و يقولوا عليها أتوبيسات

قاعد مع نفسك كده و سارح في عالم تاني بعيد خالص عن المهرسة اللي انت فيها

و فجأة تلاقي حاجة اترمت عليك

لا و اللي يغيظ ان الحاجة تطلع بني آدم

راجل ضخم وعجوز كمان بس ما شاء الله كان فيه صحة 3 شبان في بعض من بتوع الأيام دي

الراجل بدون أي مراعاة للي قاعد جنبه رمى نفسه على الكرسي و قعد يظبّط نفسه و يسنّترها على الكرسي و شويتين كان هيربّع رجليه كمان

قوم أنا بقلة أدبي أقولّه يحاسب شوية و يراعي أن فيه ناس قاعدة جنبه و انه بالطريقة دي هيفرمهم

شوفت البجاحة اللي أنا فيها

بجح بجح يعني

الراجل سمع مني الكلمتين من هنا و قام استحضر أيام شبابه و قعد يشخط و ينطر

إيه يا كابتن اللي انت بتقوله ده؟.. انت مش عارف انت بتكلم مييييين؟.. أفرم مين؟.. ياخي هرسك بلدوزر؟

الغريبة ان اللي كان بيتكلم ده لا شكله و لا منظره يدلّوا على انه حد مهم ولا حاجة.. وكمان من لهجته بسهولة تقدر تعرف انه ريفي...مع احترامي للريفين اللي بعتبر نفسي منهم

أُمّال فيه ايه؟

أنا فقدت القدرة على الرد لعدة أسباب

أولهم و أهمهم ان الراجل ده قد جدي يعني ماينفعش عيل قد أحفاده يرد عليه بكلمة مش ولابد يعني

و تاني حاجة ماتقلّش أهمية عن السبب الأول و هي اللي استفزتني بصراحة

الراجل بيقوللي انت مش عارف انت بتكلم مين؟

وأصلاً أنا في البداية بكل احترام كنت بقولّه انه يراعي اللي جنبه يقوم يهبّ فيا بالشكل ده و يكلمني بالأسلوب ده

أد كده تهميش الآخر و عدم احترامه بقوا حق مشروع و مجرد المطالبة بحق الإحترام بقى جريمة وقلة أدب تستحق التوبيخ

أد كده مفيش حد طايق حد ولا فيه حد حاسس بالتاني.. و العنجهية و التقليل من قيمة الآخر بقوا طبيعة في الأشخاص

ايه يا جماعة دا احنا كلنا من واحد.. مفيش حد فوق التاني و لا حد أحسن من التاني.. اذا كنا احنا بنعمل كده مع بعض يبقى من حق الحكومة الحكيمة بتاعتنا تعمل فينا اللي ما يتعملش على أساس ان احنا نماردة و ما نستهالش نعيش غير لما ناخد فوق دماغنا

اذا كان الموقف اللي حصلّي ممكن يبان انه حاجة بسيطة ومش مستاهله كل ده.. وحاجة تقريباً بتحصل يومياً

فده علشان احنا عوّدنا نفسنا على كده.. و اتعودنا على كده.. و يمكن كمان اتربّينا على كده

عدم احترام الآخر و الإستبداد بالرأي و الفعل من غير مراعاة لشعور اللي قدامنا

دي أبسط أصول التعايش هي مراعاة الغير و احترام الآخر

مش عارف امتى هنتغير!!

-------------------------------------------------

تحديث صغنن كده

آسف يا جماعة إني حذفت البوست اللي فات

أصل أنا قلت إن دي حالة أنا عايشها دلوقت و مينفعش يعني إني أخليها مجرد بوست و عدى

فعلشان كده حطّيتها هنا في الجنب على إيديكم الشمال

( قال يعني فيه جنب غيره )

اللي عنوانها أنا كده دلوقت

و بس

16 comments:

الـسـيـدة نـون said...

اولا روح جاوب على الطاقية يا نيجرو وبلاش فيلم الهروب الكبير ده
هتجاوب يعنى هتجاوب
ثانيا
انا لو منك كنت سألت الراجل
هو حضرتك مين؟
واحنا فعلا نستاهل اللى يجرالنا
لاننا لو كنا عندنا ذرة من الكرامة
ماكنش ده يجرالنا والحكومة الحكيمة بتاعتنا
تلعب بينا الكورة كدة

تحياتى ليك يا نيجرو
اختك خيخة

shirry said...

مش عارفة اقولك ايه بجد
بس انت كنت في اتوبيس ودا وضع طبيعي جدا

وبعدين انا لو منك كنت سألت الراجل دا هو يطلع مين
بس اللي انت عملته دا كان يدل علي انك انسان محترم ودا طبعا عملة نادرة

انما الحقوق اللي انت بتطالب بيها دي
برضو عملة نادرة
وخلاص بقي مش تزعل موقف وعدي

وابقي تعالي

Desert cat said...

ايه يا نيجرو انت بتهزر وكمان جاى تكتب موضوع طويل عريض على الاتوبوس والراجل هو انت مش عارف انت بتكتب عن مين
الغريب انى ممكن الاقى اتنين واقفين يتخانوق وكل واحد يقول للتانى انت مش عارف انت بتكلم مين وفى النهاية الاتنين يطلعوا حاجه لا تذكر فى المجتمع على الارجح بيكونوا عواطلية
ربنا يرحمنا من النفخة دى هو اللى بيجرى لنا ده من شوية
تحياتى

آخر العنقود said...

ازيك يانيجرو
طبعا احب اعلق بس الاول على البوست اللى فاتنى
كلام بسيط بس رائع ومش عارفة ليه حسيته جدااااااا

البوست ده بقى
الاتوبيس ده بعتبره اختراع فاشل
خصوصا لما بشوفه مكربس نااااااااااااااس
وياريتهم بيراعوا حد بس دى طبعا اتوبيساتنا احنا بس مش التانية

انا كمان نفسى اعرف احنا هنتغير امتى
كل اللى انت قولته ده عبارة عن شوية مبادئ غلط فى غلط سيطرت علينا وللاسف بقينا بنطبقها كمان

بس اهم واحسن حاجة انك مسكت نفسك وما اتهورتش عليه:)

عشان هوه ده بداية التغيير باذن الله

تحياتى ليكى يانيجرو

Unknown said...

مش عارف امتى هنتغير!!
..............
أنا اقولك امتى
لما نتغيير
!!!!!!!!

زى الهوا said...

بص هاقول لحضرتك على حاجة , انا برده مش باطيق اللى ادامى يسند اصلا عليا ولا حتى تلمس طرف طرحتها لبسى , لذلك ديما لما باركب مينى بص باقعد جوة من الموقف ولو مافيش مكان باستنى اللى بعده , بس عموما عايزة اقول لحضرتك إننا المفروض نراعى لأن اكيد الشخص اللى واقف تعبان اوووووووى اكتر من اللى قاعد , ومافيهاش حاجة لما نراعى بعض , وخصوصا لأن حضرتك قولت انه عجوز , يعنى الجو حر مووووووووووت , الراجل عجوز يعنى تعبان اوى اكتر من الشباب , وغير كدة كمان جايز يكون بيشتغل وطافح الكوتة , يعنى فر عرض انه يسمع كلمة علشان ينفجر بقى ويخرج كل اللى جواه .

ثم إن حضرتك مضيقاك اوى كلمة انت عارف انا مين , على فكرة دى دليل كبير على ضعف موقفه وعدم قدرته على الرد , وبعدين الصوت العالى دليل على ضعف الادلة والبراهين اللى عنده , حاول بجد تستحمل الناس ( الكاظمين الغيظ) , ودا فى ميزان حسناتك , او بقى تبقى تقعد جوه زيى لو مش بتستحمل فعلا زى حالاتى .

كنت عايزة اقولك انى من كام يوم كنت رايحة لتاتا بالمينى باص وكان بالليل يعنى مش حار اوى , بس عوقبال لما اتنقلنا التسع محطات دول مثلا كانت شبت اربع خناقات , الضغط جامد اوى على الناس استحملهم دلوقتى علشان تلاقى اللى يستحملك بعدين لما تحتاج لكدة .

رغاية بغباء انا عارفة بس فعلا الكلمتين دول كانوا محشورين فى زورى من ساعة الاربع خناقات , كنت عايزة اقولها لكل واحد من اللى اتخانقوا بس ما نفعش فقولت ابخهم لحضرتك , استحملنى انا كمان بقى ههههههه , ام سو سوووورى

انين الحزن said...

محمد

عامل ايه الحمد لله الكهربا رجعت

بقولك صحيح

هو الراجل قعد بعشم اوي
انت ليه ماقلتلوش انت مين
انا نفسي اعرف انت مين
انت بتركب الاتوبيس الا بيروح سبرباي
لو كنت بتركبه يبقي ليك حق تتدايق من الراجل

بس لو حد كلمك تاني رن عليا بس وانا اجي اقومك واقعده هو
سلامووووووووووز يامانجا
وزة

أخـت فـى الله said...

الصراحة يا نجرو انا عندى حساسية من الاوتوبيسات
بركب المميز
ورحم امرء عرف قدر نفسه

د/اجدع بنوته said...

انت اصلا ازاى

نفسك تطاوعك تعمل كده

انا مش مستوعبه

لا بجد مش ممكن

كويس انه مقالكش

انت تقعد زى الكرسى اللى انت قاعد عليه

او طردك م الاتوبيس اصلا

ههههههههههههه

علشان تعرف الراجل قد ايه خلووق واكتفى باللى قلهولك

هههههههههههههههههههههه

لاا حول ولا قوة الا بالله صحيح

Empress appy said...

عارف انا برد اقول ايه لما حد يقولى انتى مش عارفه بتكلمى مين
اقوله ولا عاوزة اعرف لانك من الاخر حد فاضى مخوخ من جوالك بس علشان ده راجل كبير ففعلا مقدرش ارد معلش ابقى خد الناس الكبيرة دى براحه وهو مش حق مكتسب ولا حاجه

semsem said...

والله كنت هساله يا نيجرو...
هو مين حضرتك يعنى؟(بكل براءة وسذاجه الاطفال فى عنيا)بجد كنت هعمل كده
هههههههههههههههه
انا بكره الاتوبيسات مقولكش اد ايه
عموما معلش بقى متزعلش
وكويس انها جت على قد ...انت مش عارف انت بتكلم مين ...

الـسـيـدة نـون said...

اخويا الصغنن نيجرو
بجد عينى دمعت يا نيجرو
انا طبعا مش بقول على البوست ده
انت عارف انا بقول على ايه
وانا اللى افتكرتك هربت
اتاريك موجود من بدرى
ومجاوب اجابات تودى حبيبتك ليمان طرة
ربنا يخليك ليا يارب
تحياتى ليك
اختك خيخة

الـسـيـدة نـون said...

اه صحيح فين الهدية بتاعتى

أخـت فـى الله said...

تصدق انا لسه شايفة ان تعليق فى غلط
انا قصدى
رحم الله امرء عرف قدر نفسه

Soooo said...

بص يابرنس
كل واحد مننا شايف من جواه انه احسن واحد في الدنيا
لكن المشكله مش في كده
المشكله اننا ابتدينا بجد نحس اننا مالناش لازمه في الحياه
واكتر واحد تعرف انه مالوش لازمه في الحياه وعنده مجموعة مركبات نقص كتير .. هو اللي تلاقيه يقولك .. انت ماتعرفش انا مين؟؟

انا عن نفسي ماشي بحكمتي العظيمه والتي بقول فيها
ليس الفتى من قال هذا انا .. ولكن الفتى من قال هذا شندوشتي


نورتني وبجد سعيد بزيارتك وبكلامك الجميل قوي
وسعيد اكتر بوضعك لينكايه لمدونتي المتواضعه جنب عظام المدونين




سلاموووووووووووز

nigro said...

بت خيخة و أي كلام
===============
على فكرة يا نونا أنا سألته فعلاً
يعني بكلم مين حضرتك؟
قاللي : هه.. مش عارف بتكلم مين؟
قلت اسكت أحسن
أنا اتخضيت من كلامه
قلت هو بيعمل كده ليه؟
ربنا يهدينا
-----------------------------------
shirry
========
الله يخليكي يا رب على كلامك
بس لا مش طبيعي ان الواحد ما يراعيش اللي قدامه
ممكن يبان من كلامي ان أنا ماراعتش اللي قدامي
بس بجد الموقف كان فوق الإحتمال
و أنا كلامي معاه برده كان فيه تقدير لسنّه
نورتيني
-----------------------------------
desert cat
=========
بجد يا قطة أنا كنت فاكر ان اللي بيقول الكلمة دي بتبقى في أوقات هزار
لدرجة إني لأول وهلة افتكرت ان الراجل بيهزر.. بس تعابير وشه كانت بتقول إنه بيتكلم جد
صحيح ربنا يرحمنا
-----------------------------------
آآآآآآآآخر العنقود
=================
ازيك يا اماني
على فكرة يا أماني التحديث اللي أنا عملته.. كان مخصوص علشانك
اصلك كنت بتقولي في تعليقك انك حسّيتي الكلام اللي في البوست اللي فات.. فلما حذفته.. البوست اللي فات بقااااااا.. انت عارفة بقى (:
طبعاً شكراً جدا على كلامك.. بتحسسيني بجد اني بأعرف أعمل حاجة.. وانا كنت مفكّره هبل كده ملوش لازمة
و الله يا أماني أنا نفسي الناس تحس ببعضها.. و يفهموا انهم لازم يراعوا الناس علشان الناس تراعيهم
بجد بجد منورااااااني يا آآآآخر العنقود
-----------------------------------
أنا انسان
========
آه
-----------------------------------
زي الهوا
======
يا ميس سماح يو آر ويلكم بغباء
مبدئيا كده الراجل كان قاعد مش واقف
و انا كنت قاعد جنب الشباك.. يعني جوه
و الأتوبيس اللي كنت فيه كان أتوبيس خاص مش نقل عام
و الراجل كان طالع و عمال يتكلم و يضحك مع صحابه مش شكله قرفان ولا حاجة
و أنا كنت يتكلم معاه بصوت واطي جدن و بأدب
أنا اتخضيت لما لقيته هبّ فيا كده.. أنا كنت مفكّره بيهزر يعني
أتاريه كان بيتكلم بجد
و الحمد لله رب العالمين.. أنا بعرف كويس أمسك نفسي في المواقف اللي زي دي.. بس الموقف كان فوق الإحتمال بصراحة
الراجل كان هينام فوقي
ابقى تعالي أجين
-----------------------------------
أنين الحزن
=======
طبعاً انتِ كان بقالك 3 أيام مش بتباني
انا كنت هاتصل بيكي اشوف فيه إيه؟.. بس ماكنش معايا رصيد
ده قعد مش بعشم .. ده قعد لامؤاخذة بغشم
و انا قلتله حضرتك مين يعني.. رد عليا بنفس الكلمة تاني.. فقولت أسكت أحسن
أنا بركب أتوبيس خاص يا وزة من عندنا على الكلية عدل
و أوعدك ان لو حد ضايقني تاني هتصل بيكي علطوووووول
سلاموووووووووووزات يا عسووو..
إيه مانجا دي؟
ما علينا
سلامووووووووزات يا عسولة
-----------------------------------
شيمي
====
الأتوبيس كان خاص يا شيمي
طلبة و موظفين في كلية الهندسة
و فعلاً يا بنتي
رحم الله امرءاً عرف قدر نفسه
أنا فهمتك من غير ما تصلحي كلامك على فكرة
ده انت كمان اللي خلتيني آخد بالي لأني مكنتش واخد بالي
-----------------------------------
د/أجدع بنوتة
============
مش بقولك
بجح بجح يعني
يا سلام
بعد اللي قلتيه ده عرفت قد إيه أنا كنت في نعمة
يا ساتر
ده أنا طلعت وحش قوي
-----------------------------------
appy
===
أهو انا يا آبي لو كنت قلت الكلمتين دول للراجل ده كان عمل فيا زي اللي أجدع بنوتة قالته بالظبط
و انت لو كنتِ حاضرة الموقف كنت شفتي أنا قد إيه كنت واخده بالراحة خالص وهو اللي كان منفعل
-----------------------------------
semsem
======
لأ.. مانا سألته.. بس هو اللي ماردش عليا
و خلاص يا ستي كفاية زيارتك.. انا مش زعلان
-----------------------------------
بت خيخة و أي كلام
==============
و الله يا نونا أنا كنت متردد جدا اني أكتب
بس انت قلت بصراحة.. و انا كتبت بكللللللل صراحة
بس قلت نخفف الموقف شوية.. خلّيتني مجهول
إني أحبك في الله
-----------------------------------
soooo
======
كلامك مظبوط جدن و موزون جدن
وتقييييييل.. واخدلي بالك انت؟
(:
طبعاً حكمتك العظيمة دي أنا قريتها في مذكراتك
يا سلام و نعم الحكم
و لما مدونتك تكون متواضعة أنا أروح أموت بقى؟
يا أحمد بيه.. انت راجل زي العسل
آه صحيح هو انت من قبيلة مووووووووووز في أفريقيا
اللي منها وزة أنين الحزن
خلاص هرد عليك زي ما برد عليها
سلامووووووووووزات يا برنس