Saturday 15 March 2008

افهم بقى يا غبي

الأربعاء

مكنتش قادر أروح الكلية.. كنت مريض بجد.. مقدرش أقول كان عندي دور برد.. لأني- و الحمد لله -لا كان زوري مُحتقن ولا كنت سخن.. جسمي كان همدان جدا و كنت حاسس زي ما يكون في عصاية محطوطة في صدري بالعرض.. مكنتش قادر أتنفس.. مكنتش عارف أنام.. قلت خلاص.. ده خروج الروح.. و مسكت أطرافي ايدي و رجلي اشوف حاسس بيهم ولا لأ.. أصل الروح أول ما بتخرج من الجسد بتخرج من الأطراف

الخميس.. الساعة 2 بعد الظهر

كنت هِديت شوية..راجع من الكلية.. بالصدفة سمعت و أنا في الأتوبيس ان جد واحد صاحبنا مات و هيصلّوا عليه صلاة الجنازة بعد صلاة العصر.. رحت مع اصحابي وصليت العصر و الجنازة.. و أنا في الطريق كنت بقول أصلّي الجنازة وأمشي ولا أروح معاهم المقابر؟.. افتكرت حديث سيدنا محمد صلى الله عليه وسلم اللي فيما معناه أن هناك خمس تجب للمسلم على المسلم و منها اتباع الجنائز.. استحضرت النية ورحت معاهم المقابر و كانت أول مرة أحضر دفن في المقابر رغم ان جدتي أم ماما و خالي و جدتي أم بابا ماتوا و أنا حضرتهم ..بس في أول مرتين كنت صغير و مارُحتش المقابر و في المرة التالتة بابا طلب مني أني آخد الحاجة اللي كانوا لفّين بيها تيته و أروّحها على البيت.. يعني ماحضرتش الدفن

الجمعة.. الساعة 1:30 بعد صلاة الجمعة

في الجامع كانت فيه جنازة.. صليت الجنازة ولقيت محمد صديقي بيقولي تعالى معايا المقابر نحضر الدفن لأن اللي مات أبو واحد يعرفه.. رُحت معاه.. نفس المقابر.. و كنت واقف في نفس المكان اللي كنت واقف فيه امبارح.. و تاني مرة أحضر دفن في المقابر وفي يومين على التوالي واتنين ماعرفهمش.. و أنا جوه المقابر قعدت أقرا اللي مكتوب على الرخام.. تُوفّي- إلى رحمة الله- فقيد الشباب.. فقيدة الشباب.. فقيد الشباب.. فقيدة الشباب.. و أنا طالع حصلتي شهقة تخيّلت معاها شهقة الموت واللي كان بيحصل معايا أول امبارح .. محمد صديقي قعد يكلمني عن شباب ولاد وبنات في سن صغير ماتوا اليومين اللي فاتوا و إن دي من علامات الساعة.. الموت فجأة و موت الشباب

السبت.. الساعة 3 صباحاً

بعد ما خلّصت شوية شغل في المشروع ( مشروع تخرّجي).. قمت علشان أنام.. مش جايلي نوم.. و زهقت من المشروع.. قمت فتحت الكمبيوتر و دخلت على مدونة نوران (بت خيخة و أي كلام).. وقعدت أدوّر في المواضيع القديمة.. بالصدفة وقعت عيني علي بوست عنوانه أنا لسه مش جاهزة.. دخلت قريته.

فيه حاجة بتحصل.. فيه اشارات.. و جاية متسارعة ورا بعض.. فيه علامات بتقولّي اصحى.. فوق.. هتفضل كده لحد امتى؟.. هتفضل عايش زي الحيوانات كده لحد امتى؟.. افهم بقى يا غبي.. من لم يكن الموت له واعظ؛ فما له من واعظ

كفاكَ عبثٌ إن القلبَ يحتضرُ --- و دعِ الذنوبَ فإن الذنبَ مُغتفرُ

صار الظلامُ طريقاً أنت تسلكهُ --- و ذلك نورُ اللهِ في الأرضِ مُنتشرُ

و كم مددتُ يدي إليك كي أُخلّصك --- فوجدت أنك في دنياك مُندثرُ

و تقول: ذرني؛ إن لي ملذةٌ--- في الدنيا؛ إني في شهواتي منغمرُ

أو لم تؤامن أن الدنيا زائلةٌ ؟--- أو لم تؤامن أن الدينَ مُفتخرُ ؟

ضيقٌ بصدركِ ؟ أم بالصدرِ إخفاقُ--- في كسبِ نورٍ له القلب يفتقرُ ؟!

و كم تقول: إني سوف ألتزمُ--- و العوج خُلفكَ؛ فاعدل أيها البشرُ !

بئساً لأمرك!.. ليس ينفعكَ--- عجباً لأمري!.. كُلُّه خيرُ

فإن قلبي بالإيمانِ قد صَلُحَ--- و إن غمّي لم يعد له أثرُ

و لقد نوديت بصوتٍ يا عذوبته!--- يقول أني في الجنة فيمن صبروا

سنا بالوجه من إيمان..خيرٌ ؟--- أم كدرةٌ من لهوٍ فيه تنتشرُ ؟

أما بالرأسِ من لُبٍّ لكي يدركَ--- سُبلَ الصلاحِ؟.. أم أنك حجرُ

بالله صِف لي كيف تكون هيئتكَ--- في القبرِ حين يضمُّكَ القبرُ

ستراه نوراً و الجنانَ قريبةُ ؟--- أم ظلمةً عاكفةً والجحيم تستعرُ ؟

عُد إلى رشدك فإن العمر غنيمةٌ--- و ارجع لعقلكِ.. إن القلب ينتظرُ

عودة الروح إليه مضيئةَ--- قد ضمّها الهدى وهجرها الفُجرُ

للأسف الكلام ده حُجَّة عليا مش ليا.. أنا كتبته من 6 سنين.. و للأسف لسه.. أنا زي ما أنا

اللهم إن عندك عباداً كثيرين غيري تعذبهم؛ وليس لي ربٌ سواك يرحمني؛ فيا رب لا تعذبني بمعصيتك فإنها أشد عذاب.. و ارحمني رحمةً تُغنيني بها عن رحمة من سواك

اللهم اهدني و يسّر الهدى إليّ

21 comments:

آخر العنقود said...

شوفت ادينا موجود اهوه زى ما انا ع الكرسى

بحجز اول تعليق وبعدين هبقى اعلق بعدين بقى
:)

عشان احرجك بكلام تانى
:)
:)

سلامات

آخر العنقود said...

أولا :الف الف سلامة عليك يافندم

ثانيا : دى نعمةكبيرة اوى عايزة لها شكر كبير منك يابيجرو

نعمة ان قلبك وعقلك صاحى وقدرت تفهم الرسايل اللى انت بتتعرض لها

فى كتير ممكن تمر عليه المواقف دى ولا فى باله اى حاجة
وما يتعظش الا بحاجة تكون جامدة اووووووى
بجد فى نوع من الناس كده

وفؤجئت ان انت اللى كاتب الكلمات
ماشاء الله عليك
وهى فعلا خلاص بقت حجة لينا كلنا مش ليك لوحدك
وبوستك ده رسالة لكل اللى هيقرأه
وانا اولهم اهوه
وصدقنى انك تعرف وتحس بكل ده فاكيد ربنا عايز منك حاجةكبية اوى يوفقك ليها
وطبببببببعا وانا كمان وكل اللى هيدخل هنا ويقرا

تحياتى ليك جدددددددااااا
بجد فكرة جمييييييلة اوى

فزلوكة said...

هو أنا أول مرة أدخل المدونة بالصدفة البحتة والله

وسبحان الله كانت تدوينتك دى إشارة ليا جت مع نشيد أسمعه حاليا من مدونة فقاقيع وأول مرة أدخلها برضوه بالصدفة

فسبحان الله اجتمعت هذه الكلمات مع النشيد مع حالة عايشاها حاليا
لأصل إلى تلك النتيجة التى وصلت إليها
تأمل بأنك يوم تتوب
وتشكو الذنوب وأنت الذنوب
وفى كل يوم تبوء بذنب وعيب يضاف إلى العيوب
دى بعض كلمات النشيد إللى باسمعه حاليا

بجد بجد
جزاكم الله خيرا

Empress appy said...

فيه اشارات كتير فى حياتنا
المفروض نستفيد منها ربنا يكملك بعقل ويصحى عقول وقلوب الناس التانيه

الـسـيـدة نـون said...

نيجرو
الف سلامة عليك يا اخويا الصغنن
وبعدين هى حبكت يعنى تدعبس فى بوستاتى القديمة
ويوم ما تدعبس اللى يجى فى ايدك انا لسة مش جاهزة
طب كنت قريت خيخة اتفجعت يا رجالة
كان يبقى اهون شوية
مش عارفة اقولك ايه يا نيجرو
بس اعتبر كل الاشارات دى
مجرد رسايل علشان الواحد يعيد ترتيب اوراق حياته
ويزود من عمل الخير ويبعد بقدر الامكان عن عمل المعصية

طمنا عليك يا نيجرو
وقولنا ياترى الوجع اللى بيجيلك مشى خلاص ولا لسة تعبان
واخبار مشروع التخرج ايه
عايزة افرح بيك
ربنا يخليك ليا يارب
ومتحرمش منك ابدا

سلام
اختك خيخة

الـسـيـدة نـون said...

بقولك يا نيجرو هو انت بتدرس ايه؟
وبعدين عايزة اقولك بسم الله ماشاء الله عليك
اشعارك حلوة اوى
وواضح انك شاطر فى اللغة العربية
وبجد يعنى الشعر اللى انت كتبه فى البوست ده وبتقول انك كاتبه من ست سنين
ده بيدل على انك موهوب من صغرك يا نيجرو


على فكرة بقى
انت عملتلى حالة لغبطة من جوايا بالبوست ده

انا قلقانة عليك

طمنا عليك يا نيجرو
اختك خيخة

nigro said...

آسف يا جماعة هرد على نوران على السريع كده
=======
ازيك يا نونا
ألف مليون سلامة عليكي من اللغبطة
إيه اللي لغبطك بس؟
على العموم أنا الحمد لله بقيت دلوقت أحسن كتير
متقلقيش عليا
و بالنسبة لدراستي
أنا في كلية الهندسة .. قسم هندسة انشائية

انين الحزن said...

محمد
الف سلامه بس عيب عليك مش احنا اتكلمنا مقولتش ليه انك تعبان
الف مليون سلامه

علي فكره انا كمان بفكر زيك كدا
انا لسه شايفه بوست بردك عند سيكو فيه موضوع صعب يقطع القلب وجيت عندك لقيت تقطيع بردك
سلامووووووووووووووز يامحمد ياعسل

أخـت فـى الله said...

انا مش سهل انى ابكى على فكرة
لكن شعرك دة مس شغاف قلبى جدا
يعنى الحتة اللى جوه اوى اوى دى
تصدق
انا طول عمرى عندى احساس انى مش حعيش لغاية اما اتجوز او حاجة
دايما حاسة انى حموت صغيرة
مش عارفة ليه
لكن مفيش صغير وكبير على ربنا
كلة له ميعاد وحيروحه
لكن المشكلة اننا مصدقين ان الموت بعيد عننا ومش حيطولنا الا فى الاخر
على العموم
طهور ان شاء الله
-----------
اللهم احسن خواتيمنا يا رب العالمين

بطوط حبوب said...

انا مش عارف اكتب ولا كلمه حاسس انى محرج اوى من نفسى

Ahmed Mubarak said...

الف الف الف سلامة عليك يا ابو حميد

ربنا يكتبلنا حسن الخاتمة

انا بحترم جدا النوع دة من البوستات

تحياتي

رئيس جمهوريه نفسى said...

انت مش غبى انت لسه عايش ورافض الغلط ومش عايز تكون حيوان يجرى وراء الملذات ودى نعمه كبيره

الـسـيـدة نـون said...

لا يا نيجرو
ماتلعبش معايا الدنيئة
مش عوايدك تتأخر علينا كدة
بقولك ايه انت متعرفنيش لما بيركبنى القلق على حد منكم
خليك كويس واظهر وبان وبلاش التأخير ده
طمنا عليك يا نيجرو
سلام
اختك خيخة

انين الحزن said...

نيجرو

يامحمد
انت يابني
انت بتعمل ايه ومحدش بيشوفك ليه

انت تعبان لسه ولا ايه
طمني عليك انشاالله حتي بااوف لين
واحشني يامحمد
سلاموووووووووووز وزة

آخر العنقود said...

ايه يانيجرو

ايه اللى حصل

امشى يعنى واخد الكرسى فى ايديا
:)
اللى فهمته انك مش متعود تتاخر كده

ان شاء الله تكون بخير وكويس

الـسـيـدة نـون said...

نيجرو
انا خلاص القلق بياكل فيا
لو عندك امتحانات
ادخل اكتب كدة
لكن متتأخرش كدة

nigro said...

أنا آآآآآآآآآآآسف جدا يا جماعة إني اتأخرت عليكم
ظروف قهرية و الله
النت كان قاطع و أنا مقاطع السيبرز
***********************************
آخر العنقود
==========
الله يسلمك يا جميل
كالعادة طبعاً كلامك اكبر من أي رد ممكن
أنا بدعي ربنا بس انه يرزقني الاستقامة
ما تعرفيش زيارتك و كلامك بيسعدوني قد إيه
-----------------------------------
فزلوكة
======
و جزاكم الله مثله
شرفتني زيارتك الأولى الصدفة
و ربنا يرزقنا و اياكم حلاوة الاستقامة على الطاعة
-----------------------------------
appy
===
و كل لبيبٍ بالاشارة يفهمُ
صح؟
-----------------------------------
بت خيخة و أي كلام
==============
ده أنا اللي بدعي ربنا انه يباركلك في شريف و هاني يا رب
و يخليكي ليا و ما يحرمنيش منك
الحمد لله يا نونا.. الوجع راح خلاص
عارفة يا نونا.. نفس احساسك في بوست أنا لسه مش جاهزة أنا بعيشه حاليا
ربنا يرزقنا عمل الخير دايماً و يبعدنا عن المعصية

-----------------------------------
أنين الحزن
=======
وزة
يعني كان ينفع أول كلام بينا أقولك فيه اني تعبان؟
ده حتى أنا أبقى وحش أوي
و ألف مليون سلامة عليك يا جميل من تقطيع القلب
منورراني يا بنوتة يا عسولة
سلامووووووووووزات يا أطيب قلب في العالم
-----------------------------------
شيمي
===
ربنا يديكي طولة العمر و تشوفي ولاد أحفادك
يعني علشان ما تبقيش عجوزة أوي يعني
و الأهم من كده انه يرزقك عمل الخير و الطاعة خلال العمر ده
اللهم آمين
-----------------------------------
بطوط حبوب
========
احساسك واصل جدا يا محمود
أنا فاهمك كويس أويييييييييي
-----------------------------------
ahmed Mubarak
============
الله يسلمك يا حمود
ربنا يرزقنا حسن الخاتمة يا رب
نورتني يا أحمد
-----------------------------------
رئيس جمهورية نفسي
===============
بص يا ريس
علشان انت الريس فمفيش كلام يتقال بعد كلامك
أعز تحية لأجمل رئيس جمهورية في مجرة درب التبانة و المجرات المجاورة

nigro said...

بت خيخة و أي كلام
==============
أنين الحزن
=======
آخر العنقود
===========
نوران.. عزة.. آخر العنقود
ربنا يخليكوا ليا يا رب و مايحرمنيش من سؤالكم عليا

الـسـيـدة نـون said...

ربنا يطمنك ويريح قلبك زى ماريحت قلبى وطمنتنى عليك
متتأخرش تانى يا نيجرو ولو النت عملها وقطع معلش ابقى تعالى على نفسك وروح اى سايبر اكتب كلمتين تطمنا بيهم عليك وامشى
ربنا يحرسك يارب
اختك خيخة

أميرة said...

اقولك

انا في حجات بتحصللي غريبة اليومين دول

وبوستك دة كمان ودخولى هنا كمل على الحجات دى

انا بقالى كتير جدا مابخلش مدونات

جزاك الله عنا خيرا

والف سلامة عليك ان شالله تكون بخير

nigro said...

بت خيخة و أي كلام
==============
طبعاً يا نونا أنا مش هقدر أوصفلك فرحتي بيكي قد إيه
ربنا يريح قلبك كمان و كمان
من عينيه اي ام شريف
هاعصر على نفسي لمونة المرة اللي جاية
و أبقى أروح أي سيبر
بس ربنا ما يجعل فيها مرة تانية يا رب
-------------------------------------
أميرة ويلز
شرفتني زيارتك يا سمو الأميرة
ربنا يهدينا و يرزقنا و اياك الإستقامة على الطاعة
الحمد لله أنا بخير
شكراً جدا على سؤالك