Wednesday 26 March 2008

ببلاش

حادثتين حصلوا عندنا في المحلة خلال الأسبوع اللي فات في منطقة واحدة من المناطق الراقية عندنا

الأولى

شاب.. من أسرة متيسرة.. متفوق في دراسته.. السنة النهائية في كلية الطب.. اتلمّ على شوية صحاب.. دخل معاهم في سكة الإدمان.. أهله لما عرفوا.. طبعاً إزاي يحصل في العيلة حاجة زي كده.. يا دي الفضيحة و يا دي العار.. حبسوه في أوضته شهر علشان ما يخرجش و يرجع لصحابه.. في يوم دخلوا عليه لقوه شانق نفسه بملاية السرير...... مات

الثانية

شاب.. من أسرة متيسرة.. عنده 23 سنة.. متجوز.. في يوم عيد الأم اشترى لأمه هدية و ماجابش لحماته.. مراته نكّدت عليه و فضلت تزنّ على دماغه.. انت ماجبتش لماما هدية ليه؟.. انت أصلاً مابتحبّهاش.. هي مامتك أحسن من مامتي؟.. زهق منها و قالها يعني أرميلك نفسي من البلكونة علشان تسكتي و تستريّحي؟.. قالتله ارمي.. رمى نفسه من الدور الخامس...... مات

هي الحياة رخيصة للدرجة دي و ببلاش علشان الواحد يتخلّص منها بكل سهولة في لحظة يأس أو زهق؟

هي النار مريحة للدرجة دي علشان الواحد يجري عليها بالسرعة دي ؟

هو فيه إيه؟

الشابين دول ماكنش عندهم مشكلة فقر ولا عيال مش عارفين يربّوهم ولا دنيا دايسة عليهم

الناس اللي بتموّت نفسها دي بتبقى حاسّة بإيه؟

فاكرين إنهم لما يموّتوا نفسهم إنهم بكده بيرتاحوا من المشاكل و الهموم ؟

بيبقوا عارفين ربنا ؟

الأولاني ده أهله اتعاملوا معاه بطريقة غلط و بدل ما يحاولوا يعالجوه سجنوه.. بس ده مش مبرر للانتحار

و التاني.. التاني ده بقى انا بصراحة اتغظت منه.. إيه يا أخي؟.. مشكلة بينك و بين مراتك تخلّيك تموّت نفسك؟

أستغفر الله العظيم

مش عارف أدعيلهم بالرحمة ولا أعمل إيه؟

ماتوا كافرين.. انتم متخيّلين؟!!.. كافرين!!

اللهم ارحمنا فإنك بنا راحم.. ولا تعذبنا فأنت علينا قادر.. واهدنا و يسّر الهدى إلينا

مش عارف العقول راحت فين؟

صلاح جاهين بيقول:

الدنيا أوضة كـــــــــــبيرة للانتظار

فيها ابن آدم زيه زي الحـــــــمار

الهم واحد.. و الملل مشــــــترك

و مفيش حمار بيحاول الانتـــــحار

و عجبي

50 comments:

بطوط حبوب said...

ولا الى بحكوا عنه انه وقف فى طابور العيش
حس بالذل
جاب مكرونه وحط فيها سم
وكالها هو وعياله - من غير ما يعرفوا
يااااااارب رضينا يااااااارب

آخر العنقود said...

اييييييييييييه ده يانيجرو
ربنا يهدينا ويهديهم يااااااارب
ويثبتنا

المرة دى مش عارفة اقول ايه بجد
بس ده اكيد سببه ضعف الايمان فى قلوبهم
ربنا يسترها علينا ويرحمنا

على فكرة بيعجبنى اوى تاثرك بصلاح جاهين
بتختار صح من كلماته

وبقى ياراجل عشان قولتلك البوست حسيته تقوم تحذفه
ماااااااااااااااااشى
:)
بس بجد كلامك فى اسلوب مختلف
ربنا يوفقك
وبعدين تعالى هنا
لقط اسمى منيييييييييين
مع انى عارفة انى مفضوحة عندى بس زى بعضه
:))))
تحياتى ليك يامحمد
محمد صح :)

Empress appy said...

ربنا يرحمهم يا رب الاتنين
هو تصرفهم غلط الاول اهله بصراحه والجهل وعدم الوعى فى التعامل السبب
التانى منها لله مراته بس تلاقى فيه اسباب فى النهايه لو كل واحد استسلم لمشاكله يبقى مصر كلها هتنتحر

رئيس جمهوريه نفسى said...

كلا التصرفين غلط واحد الادمان اهدر ادميته وتفكيره والتانى تعصبه اهدر عقله فا ساء التصرف

رئيس جمهوريه نفسى said...

على فكر يا نيجرو البوستين الى قلت عليهم ليهم علاقه ببعض بس البوست بتاع الرحيل لاسباب خارجة عن موضوع البوستين

الـسـيـدة نـون said...

يعنى الحمار طلع احسن مننا
الحمار طلع مؤمن اكتر مننا
ده ايه الهم ده
اللى اقدر اقوله ربنا يغفر لهم ويغفرلنا

بس بجد هو الناس جارالها ايه
ليه اليأس ده
وليه الهروب من المشكلة بقى اسهل من حل المشكلة نفسها
وليه الموت بقى اختيار سهل اوى كدة

لو كل واحد فكر بطريقة الناس دى
البلد كلها هتنتحر
ما الناس كلها عندها مشاكل متلتلة

واد يا نيجرو
انا بقول انك تعزل من المحلة اليومين دول
علشان الدور اللى ماشى عندكم
تعالى عندنا فى اكتوبر
اهه تبقى قدام عنيا واعرف اشئر عليك
ربنا يستر علينا
تحياتى ليك
اختك خيخة

د/اجدع بنوته said...

الاولانى دى .. المدمن

ده كان مغيب العقل اصلا

شهر م غير مخدرات لمدمن .. كويس انه موت نفسه .. م غير ميتقل امه وابوه معاه

يعنى معلهوش ذنب اصلا

لان الاعراض الانسحابيه للادمان ولا ابشع منها وزى ماقلتلك مكنش فيه عقل يفكر بيعمل ايه اصلا ..


اما التانى فيمكن تكون دى القشه اللى قسمت ضهره

مش ملاحق م فين ولا م فين ولا م فين

فجت معاه كده

ربنا يرحمهم ويرحمنا برحمته

Desert cat said...

هو ايه اللى بيحصل ده
الناس جرى لها ايه
الواحد لما صباعه بينجرح بيقعد يعيط عليه
يبقى ده ازاى حياتهم تهون عليهم كدا
مهما كانت الاسباب
مش دافع للانتحار
لا حول ولا قوة الا بالله

انين الحزن said...

يانيجرو

عامل ايه واحشني والله مش انا النت عندي عاملي مشكله

ربنا يغفرلهم ويرحمنا معاهم

بس انا متغاظه بجد من مراته النكديه دي


سلامووووووووووز ياقمر

مدحت محمد said...

لا اله الا الله محمد رسول الله
للاسف ماتو كفار
وده كله لان مفيش ايمان بالله
لو فى ذرة ايمان
مكانش ده كله حصل
اللهم يامقلب لبقلوب والابصار
ثبت قلوبنا على دينك
اللهم امين
تحياتى

مدحت محمد said...

بالنسبة لموضوع الادمان معلش
الاسر ياريت تعامل المدمن انه مريض ولازم يتعالج
مش انه منبوذ اجتماعيا
بس برضه قلة الوازع الدينى هى اللى ادت ده وانا بااكد وبصر على ده
تحياتى

WhatEver?!!! said...

السلام عليكم

على فكرة انا كمان محلاوية وسمعت عن الحادثتين دول
بصرااحة معرفش تفاصيل حكاية طالب الطب دة
بس بالنسبة للاتخانق مع مراتة دة فانا سمعت رواية تانية ان كان فى شد وجذب كتير بين مراتة ومامتة

فى كل الحالات مش كانت مستهلة انه يموت كافر

احنا بجد بعدنا عن ربنا اوى
يا رب ارحمنا يارب

تحياتى اليك

WhatEver?!!! said...

على فكرة يا نيجرو اللى رمى نفسة بسبب خناقة دة عنده طفل حوالى سنة

مش عارفة بجد ازاى هان علية!!!!!!!!!!!!

ftafeet said...

ربنا يهديهم

بس على فكره ممكن التانى اللى رمى نفسه ده اوك يبقى غلطان ومات كافر زى مابتقول وربنا يرحمه

لكن المدمن ده ليه ده كان تحت تأثير حاجه ومش حاسس بنفسه هو بيعمل ايه والله هو اعلم انا اعرف ان اللى بيبقى مش حاسسس بافعاله زى المرضى النفسيين والمدمنين وكده ربنا مش بيحاسبهم على انتحارهم لانهم مش مدركين
وطبعا فى الاول وفى الاخر دى حاجه بينهم وبين ربنا منقدرش نحكم فيها ومنقدرش نقول عليهم غير ربنا يرحمهم


ويهدينا ويهدى كل البشر


نونااا

أخـت فـى الله said...

بجد انا مش لاقيه كلام اقوله
ازاى حياتهم تهون عليهم كدة
صدقت يا رسول الله عنما قلت
عش كانك غريب او عابر سبيل
او كما قال عليه الصلاة والسلام
الدنيا ماتساويش جناح باعوضة
طظ فيكى يا دنيا لو حتكفرينا
و طظ كبيرة كمان
ثبتنا يا رب

همس الاحباب said...

اول مرور
لا حول ولا قوة الا بالله
ربنا يرحمهم ويتوب عليهم وعلينا
ده عيب الاسرة وقلة ايمان
تحياتى وتقبلى مرورى

The Queen said...

لا حول ولا قوة اللا بالله

الناس وصلت لدرجة من الخنقة بجد يا جماعة لا تطاق ممكن نكون شايفين ان سبب الانتحار هو الحبس في غرفة او خناقة بسيطة مع المدام ولكن الاصل ان النفس متخمة بالهموم والسبب اللي شايفينه انه هو سبب الانتحار مش اكتر من القشه التي قسمت ظهر البعير .. ولكن
كلامي ليس مبررا للانتحار بالطبع بس انا حبيت اوضح رؤيتي للانعكاسات التي تسببها الظروف المحيطة بنا

شكرا لك نيجرو ولندع للجميع بالهداية والرحمة

simple girl.. ..simple dream said...

لا مش ببلاش ولا حاجة
بس ساعات الواحد شيطانه بيعميه وبيهون الحياة فى عينه
ساعتها لازم يستعين بالله وبصحبة صالحة عشان تطلعه من الحالة دى

Ahmed Al-Sabbagh said...

تصدق وتؤمن بالله

انت زى ما تكون مراقبنى وبتقرا افكارى

انا اتعرضت خلال شهرين ستين يوم لحادثتين انتحار من اصحابى وللاسف واحدة منهم نجحت والبنت ماتت والتانية فشلت بأمر من الله

وانا فى حالة ذهول تام

بس الحمد لله واضح ان مش انا المذهول

لقيت حد يشاركنى الذهول

تسلم ايدك بجد

وتحياتى لك

احمد الصباغ

سهر الليالى said...

والله هو أنا ممكن أتعاطف مع الأولانى لأنو مريض وممكن ميكونش دريان بيعمل ايه

لكن التانى دة بقى هقولك العند وحش
بس أنت معاك حق هى الناس دى مبتفكرش حتى للحظة هل الأنتحار دة حل يخلصنى من مشاكلى فعلا؟؟؟
هل لما هينتحر هيستريح فعلا؟؟؟

وزى ما أنت قلت وضحكتنى أوى
هي النار مريحة للدرجة دي علشان الواحد يجري عليها بالسرعة دي ؟

بحييك بجد على البوست وربنا يحفظنا جميعا

تحياتى

maYHam said...

الأولاني دا مدمن مجنون وربنا بقى هوا اللي يحاسبه وهو أعلم بالنفوس وربنا يكون في عون كل مدمن يخرج من محنته
لكن التاني دا مالوش غير ألفاظ لا يصح قولها

لا حول ولا قوة إلا بالله

أم أحمد المصرية said...

كده يا نجرو غبت عن المدونات اكتر من شهر و لما رجعت كل ما فتح مدونة الاقي حاجة تزعل مرة فرنسا هانم و مرة انت ده ضعف ايمان اللي انت بتحكيه ده فيه ناس تانية عايشة في الهم و بتكافح و مستحملة في مصر و فلسطين و العراق و غيرهم كتير و بيقلوا لنفسهم لو ما ارتحناش في الدنيا نرتاح في الجنة قول امين

Unknown said...

مافيش هدف
مافيش جهاد نفس
مافيش دين

nigro said...

بطوط حبوب
=========
هي الناس دي بتفكر ازاي؟
وقف في طابور عيش
حس بالذل
قتل أسرته (مجرم)
موّت نفسه (كَفَر)
يا الله
ربنا يرحمنا

nigro said...

آخر العنقود
===========
ده مفيش إيمان خالص يا أماني
ربنا يسترها علينا
بالنسبة لجاهين.. الرتجل ده عبقري مفيش احساس يجيني غير لما ألاقي عنده كلام يعبر عنه
أنا حذفت البوست اللي فات علشان كان حالة كنت عايشها و عدت
كنت حاسس انه ما ينفعش يبقى مجرد بوست وعدّى
و التحديث اللي نزّلته زي ما قلتلك كان علشانك.. علشان لما كتبتي في تعليقك ان البوست اللي فات انت حسّيتيه.. بعد ما حذفته.. البوست اللي فات بقى بوست حمااارن
أنا عرفت اسمك من تعليق عندك في المدونة
بس هو كده يعني حلو ولا وحش؟

nigro said...

appy
====
مفيش ايمان مفيش ارادة مفيش وعي
ربنا يرحمهم و يرحمنا

nigro said...

رئيس جمهورية نفسي
===============
أولاً كده يا محمود ربنا يعينك على اللي بتعرفهم دول
ثانياً دماغك بتعجبني
بتعرف تحلل المواقف صح
تحياتي يا متر

nigro said...

بت خيخة و أي كلام
===============
وليه الهروب من المشكلة بقى اسهل من حل المشكلة نفسها

الجزئية دي كنت لسه بتكلم فيها مع واحد صاحبي يا نونا
مش مشاكل الحياة و بس ..لأ أي مشكلة
مبقاش عندنا ثقافة المواجهة
الهروب بقى أسهل طريق
بس الهروب من الحياة ككل ده جنون
ربنا يهدينا

nigro said...

د/أجدع بنوتة
=========
بالنسبة للأولاني أنا ممكن أتعاطف معاه بس علشان هو كان يعتبر مريض
انما ده ما يغفرلوش انه اجرم في حق نفسه
انما التاني ولا أي تعاطف معاه
يعني ايه مشكلة هايفة زي دي تخليه يعمل كده
ولا أي مشكلة تقابلنا تخلّي الواحد يعمل كده
لكن في النهاية
الله هو الخالق المتصرف
ربنا يرحمهم

nigro said...

desert cat
========
أهو انا كان احساسي و كلامي زيك كده بالظبط اول ما سمعت الخبرين دول
لا حول و لا قوة الا بالله

nigro said...

أنين الحزن
======
وزة
ازيك اخبارك ايه؟
و الله يا وزة فيها ستات النكد ده عندهم كيف و مزاج ما يقدروش يستغنوا عنه
بس برده ولو
لو كل واحد مراته نكدت عليه انتحر
مش هيفضل في البلد غير الستات و بس
على العموم.. في الأول و في الآخر.. ندعيلهم بالرحمة
ربنا يرحمهم

nigro said...

مدحت محمد
=======
أصله كان من أسرة محترمة و مرموقة
فكونه يعمل كده دي بالنسبة لهم العار والفضيحة ولازم يتستروا عليها
هما حاولوا يعالجوه بس بطريقة غلط.. بطريقة انهم يبعدوه عن صحابه
بس ده ماكنش عنده انفلونزا
ده كان ادمان
بس في الأول الآخر مكنش فيه ايمان
ربنا يثبّتنا

nigro said...

whatever
=======
يا الله
و كمان كان عنده طفل
هقول ايه؟!!!
إنّا لله و إنّا إليه راجعون
احنا فعلاً بعدنا هن ربنا قوي
ربنا يهدينا

nigro said...

ftafeet
======
انا متفق معاكي في كلامك
بس الشخص الأول ده هم اللي عمل في نفسه كده
هو اللي هان نفسه و اجرم في حقها
و مش هقول أكتر من اللي انت قلتيه

وطبعا فى الاول وفى الاخر دى حاجه بينهم وبين ربنا منقدرش نحكم فيها ومنقدرش نقول عليهم غير ربنا يرحمهم


ويهدينا ويهدى كل البشر

nigro said...

شيمي
===
أنا فاهم احساسك ده يا شيمي لأني كنت زيك كده اول ما سمعت الخبرين
بجد
ربنا يثبتنا

nigro said...

همس الأحباب
=======
هو فعلا عيب اسرة و ضعف ايمان
و سوء تربية في الأصل
ربنا يرحمهم

nigro said...

the queen
========
أنا فاهم كلامك
بس المفروض ان الظروف الحالية اللي تخلي الواحد يعمل كده هي ظروف مادية
الأتنين دول ما كانوش متعسرين مادياً
يعني يعني مجرد هموم نفسية
و الهموم النفسية دي علاجها الوحيد هو قوة الإيمان
بس ده ماكنش موجود

nigro said...

simple.. ..simple dream
=====================
كلامك مظبوط جدا
بس في الحالتين دول ماكانوش موجودين

nigro said...

ahmed al-sabbagh
==============
الغريبة ان الشباب الصغير هو اللي بيعمل كده
هما لسه شافوا حاجة
أما عجيبة والله
ربنا يحفظنا

nigro said...

سهر الليالي
========
أنا كمان متفق معاكي
بس العند؟
العند يخلي واحد يموّت نفسه وهو عنده طفل
واحد عنده 23 سنة!!!
بجد ربنا يحفظنا

nigro said...

أنا محتاج
=======
هنقول ايه؟
إنّا لله و إنّا إليه راجعون

nigro said...

أم أحمد المصرية
===========
ألف حمدلله على السلامة
و الف سلامة على أحمد
آميييييييين

nigro said...

أنا انسان
=======
صح

Soooo said...

عارف يا ريس .. بعد وفاة والدتي الله يرحمها كنت خلاص على وشك الانتحار
لكن جيت وقعدت مع نفسي قلت ايه الهطل ده
مانا لو انتحرت هموت كافر ومش هدخل الجنه برحمة ربنا ولا هشوف امي تاني ان شاء الله
----
مشكلة اللي بيقبل على الانتحار انه بيبقى مش حاطط عواقب اللي هيعمله ده قدامه
بتبقى سارقاه السكينه
سكينه حاميه وتلمه في نفس الوقت


بقولك ايه .. الله يكرمك .. في افراح وحاجات حلوة
اتكلم عن الحاجات دي وبطل نكد
لاحلف برحمة سيدي الطشطبوني ما اعتبلك مدونه




سلامووووووووووووووز

آخر العنقود said...

معلش يانيجرو
انا مش فهمت
هوه ايه اللى يعنى كده حلو ولا وحش ؟

لو على الاسم يبقى
لاااااااااااااااوالف لاااااكمان

انا بهزر طبعا
:)
ولو على حاجة تانية ياريت افهم

تحياتى ليك

Abo 7anf said...

ربنا يرخمهم هما الاتنين
وعلى فكره الشاب الاول كان فى يوم من اذكى الناس اللى انا عرفتهم واكثرهم ثقافه بس يلا منوا لله اللى كان السبب
ومعلش هى اول زياره ليا بس مش عارف اعلق
لانوا فعلا كان صديق غالى

انين الحزن said...

نيجروووو

جامده مووووووووت الرابط الا بعته

بجد عجبني اوي تسلم ياجميل

سلامووووووووووز


وزة

رئيس جمهوريه نفسى said...

فينك يا برنس محدش شيفك ليه يارب تكون بخير

nigro said...

soooo
====
الحمد لله انك ما طاوعتش نفسك و إلا ماكنش هيبقى فيه مذكرات طفل طخين ولا كانت هتطلع الحكمة الخالدة بتاعتك
كنا خسرنا جامد يعني
(:
و بالنسبة للأفراح اللي انت بتقول عليها
هي فين دي؟
أصل نظري ضعيف و مش شايفها
تحياتي ليك يا أحمد باشا

nigro said...

آخر العنقود
=========
أيوه يا أماني أنا كان قصدي على الاسم
حلو اني عرفته ولا وحش
بس طالما انت كنتِ بتهزري
يبقى أكيد بقى حلو
طبعا حلو
**********************************
abo 7anf
=======
مبدئياً كده ربنا يرحمه
بس تفتكر هل البني آدم الذكي ممكن يغلط في حق نفسه بالطريقة دي؟
ما أفتكرش
ربنا يرحمه
*********************************
أنين الحزن
======
وزة
ده أنا اللي مبسوط ان الرابط عجبك
يا ريت بقى تبعتيه لكل اللي عندك
علشان يستمرالثواب
سلامووووووووزات يا جميل
********************************
رئيس جمهورية نفسي
==============
يا خبر يا جدعان
الريس بنفسه جاي يسأل عليا
مشروع التخرج بقى يا متر واكل كل وقتي
ربنا ما يحرمنيش من سؤالك يا محمود
انت بجد من الأشخاص اللي أنا أتشرف بمعرفتهم
ربنا يخليك يا زعيم