Friday 25 April 2008

راجع بتاج

السلام عليكم

بعد حوالي أسبوعين من التوقف الإجباري الاختياري

أسبوعين من الشغل المتواصل ليل نهار

خمس امتحانات أعمال سنة بالإضافة إلى الزغلول الكبير ( مشروع التخرج )

قلت يا واد يا نجرو خدلك يوم أجازة كده من نفسك

ولا انت مالكش نفس يعني؟

قوم إييييييييه

كنت بأزور مدونة الأخت العزيزة جداً

أماني أبو زيد

آخر العنقود

لقيتها بعتالي تاج ..... بس بصراحة تاج رائع

مطلوب إني أتكلم عن 10 صفات فيا

نستعين على الشقا بالله و ندخل في الإجابات

ما خلاص بقى .... الواحد بقى متعوووووود دايييييييماً

*************************

انسان عاااادي جداً .. بسيط جداً .. حساس جداً (بس مش جداً جداً قوي يعني)

قليل الكلام لدرجة الخرس .. كثير الكلام لدرجة الرغي

اتنين في واحد

أكره الكذب و الكذابين لدرجة العداء

أوقات بكون منطوي لدرجة إنك ممكن تقول عليا مصاب بالتوحّد

أوقات بكون اجتماعي لدرجة إنك ممكن تقول عليا إني مرشح نفسي في انتخابات

بآخد على الناس بسرعة البرق

بأزعل من الناس بسرعة السلاحف

صريح لدرجة ان كل اللي حواليا بلا استثناء بيقولولي إني بالطريقة دي مش هاعرف أسلك في حياتي المستقبلية

مابعملش غير اللي أنا مرتاحله حتى و لو اللي حواليا قالوا عليه غلط

مع العلم إن الصح و الغلط أحيانا بيبقوا وجهة نظر شخصية

بحب الضحك زي عنيا و بحب الكآبة زي ايديا

بحب جداً الخير لكل الناس و بالتحديد اللي بحبهم

إنما بقى اللي مش بحبهم .. يا نهار مش فايت ببقى عايزهم يولعوا

طيب غالباً شرير أحياناً

أجيد فن التلاعب باحاسيس الناس اللي بيخنقوا عليا

بس في الآخر بعترفلهم بكده علشان أبقى خنقت عليهم بالمثل

صاحب صاحبي..عدو عدوّي

أعشق الفكر و التفكير و الأفكار و المفكرين و أكره بشده و أحتقر من يدّعي الغباء

لأن في اعتقادي أن الله-عز و جل- لم يخلق أحداً غبياً بل نحن من ندّعي الغباء

طبعاً أنا رغيت كتير عن نفسي بس اعذروني بقى بقالي سبوعين ساكت.. يا خبر

الناس اللي هبعت لهم التاج ده أظن كده ما جاوبوش عليه لسه

وزة صاحبة مدونة أنين الحزن ..اللي بقالها شهر غايبة و بدعي ربنا إن النت يرجع عندها بقى

محمود صاحب مدونة بطوط حبوب

محمود رئيس جمهورية نفسه

سوووو العجوز أبو 30 سنة

Appy

41 comments:

آخر العنقود said...

أولا أنا مبسوطة جدا لانى أول تعليق
اااه مش أنا اللى بعتالك التاج
:))

بجد بجد عجبنى جدا ردك يانيجرو وحلو أوى المتناقضات دى

أكيد كل واحد فينا جوا شئ من اللى قلته
يعنى نقول كده واحدة واحدة

فكرة الانطواء والاجتماعية دى اكيد كتير ممكن يكون كده
وممكن كمان ترجع للحالة المزاجية :)

الصراااااااااااحة...وزى مابيقولوا دايما يامحمد ان الصراحة راحة
وانا بقى زيك اوى فى دى
اموت فى الصراحة ولو على نفسى وبجد ممكن اعيش فى قلق لو لقيت حاجة غلطت ومش صلحتها مع انه كان فى امكانى
واووووووووووووعى تسمع كلام اللى بيقولك بلاش الصراحة دى
بس اهم حاجة اننا نختار الاسلوب والوقت المناسب لعرض الرأى وبدون جرح

باقى الحاجات بقى بجد يامحمد جميلة ووصفك ليها بسيط ورائع فعلا

بس مش عارفة مش مرتاحة انا للجزء بتاع أجيد فن التلاعب باحاسيس الناس اللى بيخنقوا عليا
شكلك شرير يانيجرو ولا ايييييييييييه؟
:D
:)

واعذرينى بقى انت كمان عشان رغيت كتير بس بقالى اكتر من اسبوعين مش بعلق عندك
ههههههههههههههههههه

بس بجد اسلوبك جميل ومميز فى الاجابة على التاج ده
ربنا يكرمك يارب ويوفقك فى امتحاناتك

Ahmed Mubarak said...

قليل الكلام لدرجة الخرس .. كثير الكلام لدرجة الرغي

بحب الاسلوب ده في الوصف

رئـــــيسـة حزب الأحلام said...

بحب الضحك زي عنيا و بحب الكآبة زي ايديا

سيدى ياسيدى على التناقضات وتحياتى

بطوط حبوب said...

نجرو عود احمد
مقدرتش معلقش
بس هقدر ااخر التاج
ههههههههههههههه
ادعيلى

رندا said...

مبروك عليك التاج يانجروا

وقريتة كلة
والتاج فعلا بيعرف الاشخاص على بعضها
حلوة الفكرة دى قوى
انا زيك ادبست فية
وانتظر منى رد
على تعريف لشخصيتى ههه
شيرين دبستنى فية اصلى مش بعرف اتكلم عن نفسى كتير
بس ححاول

تمنياتى لك باحسن حاجة فى الدنيا

رندا

كاميليا بهاء الدين said...

هههههه

التاج ده مش ممكن
اكتر تاج انتشر في المدونات
انا شخصيا محكوم عليا بيه مرتين
بس بينى وبينك ... هربانة من الحكم

اجابتك جميلة
واضحة كده وصريحة
كتبتها كأنك بتكلم ناس قاعدين معاك
من غير تجميل للكلام
علشان كده دخلت القلب والعقل بسرعة

اشكرك على اجمل تعليق قرأته فى مدونتى
واتمنى دايما اشوف تعليق
ولو حتى تقول سلام

تحياتى

خمسة فضفضة said...

السلام عليكم ورحمة الله وبركاته

ايه الاجابات اللي زي الفل دي يا نجرو
بس كده انت قلت يجي عشرين حاجه مش عشره بس
:-)

Empress appy said...

طيب يا ابنى دا انت حالتك خطيرة مشلتته بمناسبة شم النسيم
طيب مدد على المصطبه جنبى كده وبحلق فى السماء شايف النجمه اللى هناك دى ايوووون دى
ايه بتبص فى الارض ليه خخخخخخخخخخخ

لا بجد حلو انك ظاهر شخصيتك وانت لولوك قوى انا عارفه بس بنحب جدا
وميرسى على التدبيسه اللى ادبستها من قبل ههههههههههخخخخخخخخ

حركات said...

لسلام عليكم
:::دعوة :::
يدعوكم فريق مدونة حركات
الى زيارة المدونة الاولى فى خدمات المدونين
:: حركات ::
والتى تختص بالتصميمات
الخاصة بالمدونات
وكذلك التعليم
،،:::،،

نسعد بتشريفكم لنا وانضمامكم معنا

فريق المدونة
www.harakat-86.blogspot.com

رئيس جمهوريه نفسى said...

حمدلله على السلامه يا برنش وشكرا على التدبيسه دى وان شاء الله حجاوب عليه البوست الجاى
وكلنا هذا الرجل فى تناقضتنا اخبار العملى ايه صحيح بالتوفيق يارب

shirry said...

نيجرو مطحون في مشروع التخرج تعاطفك لوحده مش كفاية اتبرع ولو بمسطرة T
المهم
بجد وصفك جميل جدا
ودا يدل علي انك شخصية كويسة جدا
بس من موضوع الصراحة دا انت ممكن تقول اللي انت عايزه لكن بشكل شيك شوية
بلاش تحدف زلط
بس طبعا من غير كدب يعني علشان مستقبلك وكدة

وبكدة انت تبقي محلاوي اصيل
يلا ربنا معاك

غني يابهيه said...

ربنا يوفقك


ومبروك التاج على اللى اختارتيهم

Soooo said...

انت ياد والله فيك كتير قوي مني
انت شكلك اخويا وانا مش واخد بالي

وسعيد جدا انك اعتبرتني من اصحابك ومررتلي التاج
وان شاء الله لما افوق كده شويه هابقى اجاوبه هو وطاقية خيخه

وربنا يسترها بقى وعلى الله الناس ماتكرهنيش





سلاموووووووووووووز

د/اجدع بنوته said...

حمدالله ع السلامه

ويارب تكون عملت ف الامتحانات كويس

ويكون المشروع تشمام تشمام

واجابات لذيذه وتلقائيه

تحياتى

Mafrousa said...

negro
-------
مبروك عليك تاج الجزيره السلطانيه ههههه اييييه كل الصفات الحلوه ديه
وايه الصراحه ديه ...انا حبيت قوى الجمله اللى بتقول فيها انك صاحب صحبك و عدو عدوك
التاج ده متهيألى مر على بلوجرية البلد ...ههههه و ياعينى بطوط اديت التاج ده مره قبل كده هههههههههه زمانه مفروووووووس

الـسـيـدة نـون said...

اولا وحشتنى بطريقة وحشة يا واد يا نيجرو
ثانيا منور مدونتك وكل المدونات اللى بتعلق عندها
ثالثا وحشتى جدا والله
رابعا اجاباتك تجنن
اصل فيها من ريحة اجاباتى شوية
وهى حتتة التناقض اللى بيكون موجود فينا كبشر
خامسا ليك وحشة جامدة

سادسا مقلتلناش عملت ايه فى الامتحانات وفى الزغلول الكبير
يعنى خلصت خلاص ولا لسة شوية؟
ربنا يوفقك يارب

سابعا انت عارف بقى انا هاقول ايه
علشان متقولش عليا بكرر كلامى

ثامنا
كل سنة وانت طيب بمناسبة شم الفسيخ

تحياتى ليك
اختك خيخة

فاتيما said...

يا سلاااام
ببقى مبسوطة قوى لما اعلق طوالى بعد خيخة حبيبتى
و كما قالت هقول
انت كمان وحشتنا يا نيجرو
و ربنا يكرمك فى الإمتحانات و يحنن قلب الدكاترة يا رب
و إيه يا بنى إنت كنت مكتوم ياعينى كتمة وحشة و نفسك تفضفض
المفروض التاج دا يسموه تاج الفضفضة عشان بيخلينا نتكلم عن اللى جوانا بصراحة و صدق و تهور منقطع النظير و بنقول عيوبنا كدا بكل سلاسة و معترفين بيها ....
أحلى حاجة فى ردودك أنك شخصية لطيفة قوى الحاجة و عكسها يعنى مليان تناقض زى خيخة ما بتقول و دا موجود فينا كلنا
يظهر إن المدونات جمعتنا لهذا السبب
اننا نطلع الحاجات اللى جوانا و الدنيا العادية مسمحتش لينا نكونها
فبقينا شخصيتين و الاتنين حد واحد ...
أنا هتفلسف و لا إيه ؟؟
المهم ربنا يوفقك و ترجعلنا سريعا
تحياتى يا صديقى الصغير
و انضم ليك فى سؤالى عن وزة الغالية

nigro said...

آآآآآآآخر العنقود
----------------
ده أنا اللي مبسووووووووووووط إنك أول تعليق يا أماني
هو أنا في ديك الساعة لما كل شوية أفتح كده ألاقيكي في الأول
إيه ديك الساعة دي؟!... بلدي أوي.... ياي ... سورااج

و الله يا أماني أنا مش عارف إذا كانت كمية التناقضات دي حلوة ولا وحشة
أحياناً بتصيبني بالتذبذب و أبقى مش عارف أنا مين أصلاً
عارفة أنا نسيت أكتب كمان إني في 90% من أوقاتي بأبقى غير راضي عن نفسي
و أنا لا شرير ولا حاجة ده أنا أغلب من الغلب نفسه
بكلمة... ممكن الواحد يحطّني خاتم في صباعه
بس لما ببقى متنرفز.... يا نهااااااااار
ببقى فزيييييييييع مريييييييييييييع شنيييييييييييع أبو سرييييييييييييييع

اللهم ارزقنا الهداية و الإستقامة

دايماً كده مغرقة المدونة نور
و أنا أفضل أمسح من وراكي... اتعبونا بقى
(:

nigro said...

ahmed Mubarak
------------
أي خدمة يا أبو حميد علشان ما تقولش حارمك من حاجة أهوه
عايز كمان ولا كفاية كده؟
أنا بقول كفاية كده
شرفت المطرح يا ماكي

رحــــيـل said...

حمد الله على السلامه

اسلوبك فى التشبيهات حلو قوى

غالبا انت شخصيه متناقضه جدا
والنوعيه دى من الناس بيكونوا مميزين جدا

تحياتى لك

nigro said...

بطبوط حبحوب
------------
محمووووووووووووووووود
عارف يا واد يا دكتور محمود أنا بعتبرك زي أخويا التوأم تماااااااام
بس أنا أكبر منك يا واد
ربنا يعينك و يعينّي يا حبيبي على ما أصابنا من مذاكرة و انطحانات
و إذا كان على التاج أخّر براحتك يا حبيبي
و لو تأمر أجاوبهولك و أبعتهولك بلوج ديليفري
منورني يا واد

nigro said...

رئيسة حزب الأحلام
-----------
سيدي يا سيدي على الكروتة التمام و تحياتي

nigro said...

رندا
----
الوافدة الجديدة على مدونتي المتواضعة
دي بجد يا رندا فكرة جنااااااااااااااان
من أجمد التاجاجات اللي شوفتها

ربنا يستر و أعرف ألحقك في البوست بتاعك لحسن أنا فاضلّي يومين و أفصل النت عندي
علشان المعسكر الأخير قبل الإمتحانات
عاوز اشوفك هنا تاني... ماشي؟

nigro said...

كاميليااااااااا
-----------
بجد يا كامي مش عارف أوصفلك فرحتي بيكي النهاردة أد إيه؟
كاميليا عندنا يا ولاد
زغرطي يامّا..... آه نسيت ما بتعرفش تزرغط
كاميليا
أنا فرحان بزيارتك دي قوي قوي قوي قوي قوي قوي قوي
و عايز أشوف العصفورة دي هنا تاني
إن شالله بس الإسم و الصورة... من غير كلام
نورتينيييييييييييييييييييييييييي يا كامي

nigro said...

خمسة فضفضة
---------
و عليكم السلام و رحمة الله و بركاته
الله يكرمك يا دكترة ده بس من ذوقك
و إذا كان على الرغي الكتير ده فأنا كان بقالي سبوعين ما نطقتش كلمة
ففتحت في الكلام
مش بقولك... كثير الكلام لدرجة الرغي
شرفتيني

nigro said...

appy
-----
آآآآآآه ماااااااشي
يا سلام على البعتة التمام
هنعديها المرة دي علشان بس هنشوفك في التلافازيون و نستفشخر بيك كده قدام العيلة
غير كده كنت
هعديها برده.... هو الواحد كان يحلم إنه يتبعت من السكرة دي
منوراني يا بونبوناية

nigro said...

حركات
----
الحمد لله عندي بطاطين كفاية

nigro said...

رئيس جمهورية نفسي
----------------
محمود باشا عمي و عم عيالي
الله يسلمك يا جميل... بس شكلي كده مش هطوّل يا محمود و هاحتجب تاني
إيه "كلنا هذا الرجل" دي يا محمود؟!!... إنت بتاكل رجالة من ورايا؟؟؟
بالنسبة للعملي يا حوده.... فأنا هندسة قسم مدني انشاءات ... ماعندناش عملي يعني
حتى مشروع التخرج اللي أنا واخده ... عبارة عن تصميم منشآت خرسانية .. مفيش فيه عملي هو كمان

المدونة زهزهت بتشريفك يا ريس

nigro said...

shirry
------
ماعدش فيه مساطر T
دلوقت بقى ماوس و كيبورد و برنامج رسم و حسابات
هم دول أدوات المهندس المدني الحرّيت
ربنا يخليك يا شيري على كلامك الجميل ده بس من ذوقك
بالنسبة للزلط
أنا مهندس مدني يا شيري يعني طوب و رمل و زلط و حديد تسليح
أسيب الحاجات دي لمين بقااااااااا...هه؟
غير إن المحلاوي دلوقت بقى ماركة مسجلة
طوب و رصاص مطاطي و قنابل مسيلة للدموع
nice to see u here

nigro said...

غنّي يا بهية
---------
الله يخليك
الله يبارك فيك

nigro said...

soooo
-----
وسعيد جدا انك اعتبرتني من اصحابك ومررتلي التاج

يا نهار مش فايت
أحمد يا سوووو ... انت عايز تزعلّني منك ولا إيه؟
يا أحمد انت مش صاحب انت أخ
انت من الناس اللي أنا بجد أعتز بمعرفتهم
يا ريت يكون واصلك احساسي

و تعالى هنا
مين ده اللي يقدر يكرهك ؟
الناس السكر اللي زيك... حبهم بيتحدف في القلب حدف
و انت تقول يكرهك
يا خبر

زَحمت المطرح يا أحمد
خِس شوية يا أخي

nigro said...

د/أجدع بنوتة
-----------
الله يسلمك يا ياسمين
بالنسبة للأمتحانات.. يعني من ده على ده
و المشروع طمام الطماطم
و شكراً على كلامك
بنّجتي المطرح يا دكترة

nigro said...

واحدة مفروسة
------------
يا مرحبا يا مرحبا
مبدئياً كده اسمها
nigro
مش
negro
نيجرو التانية دي يعني زنجي
و أنا بسم الله ما شاء الله
واد كده أبيض و زي القمر و عيني حولة.. قصدي خضرا ..و شعري أقرع.. قصدي أخضر برده
نرجع مرجوعنا.. كنا بنقول إيه؟
آه.. ربنا يخليكي يا رب على كلامك.. دي اقل حاجة عندي
:)
و الواد الدكتور محمود لا زمانه مفروس ولا حاجة
زمانه مطحون
ربنا يعينه يارب
بس هو إيه تاج الجزيرة السلطانية؟
سيم يعني ولا إيه؟
شرّفتيني و يارب ما تقطعيش الزيارات

nigro said...

بت خيخة و أي كلام
--------------
نونا
حبيبي إزيك
و الله انت اللي واحشااااااااني جدا
بالنسبة للإجابات
ماحنا اخوات بقى يا بت
و المثل المعروف بيقول:
مين عاشر نونا ربع ساعة حبها موووووووووووووووت
بالنسبة لخامساً
ألا صحيح هو انت كنت جاية تلقي عليا بيان وزاري ولا إيه؟

خامسا ليك وحشة جامدة

طيب لو سمحتي عايز الوحشة الجامدة دي علشان أخوكي الصغير معزور اليومين دول 3 شويات

بالنسبة للأمتحانات... يعني فيه اللي قفّلته و فيه اللي اخترعت فيه... من ده على ده
و أنا لسه فاضلي شهرين و نص بالتمام و أخلص خاااااااااااالص
إن شاء الله

و كل فسوة و انت طيبة وكل حبايبك طيبين
و بلاش فسيخ
ألف سيخ في أنف من صنع الفسيخ

nigro said...

فاتيما
-------
طمطم
ده أنا اللي مبسوط إنكم ورا بعض
و خبطتين في الدماغ تفرح... مش كده ولا إيه؟
يا رب يا ختي يارب يحنن قلب الدكاترة عليا بدل ما هما تاعبين قلبي معاهم
شوفتي يا طمطم ده أنا كنت مكتوم كتمة الكحك
بس يلا أديني فضفضت شوية.... هما مش شوية بصراحة هما كتير حبة
و يا جميل انت تتفلسف براحتك محدش ليه عندك حاجة
يالنسبة لوزة
انا كنت كلمتها من حوالي اسبوع المشكلة في النت.... قاطع بقاله فترة
و يا رب ترجع بسرعة بقى لحسن دي وحشتني جداااااااا
طبعاً انت صاحبة بيت مش محتاجة ترحيب

nigro said...

ra7eel
-------
هو أنا أمي داعيالي باين?
ده أنا هابروز الموضوع ده علشان خلاني أشوف ناس زي السكر كده عندي
هو من حيث متناقضة
فأنا متناقضة متناقضة يعني
أما بقى من حيث التميز.. كنت بحاول على أد ما أقدر إني أخبي التميز ده بس تعملي إيه بقى واد متميز من يومي و بيبن عليا علطول
أقل حاجة عندي ده غير إني متواضع جدن و ده شئ واضح طبعاً

أخجلتم تواضعنا يا أفندم بكلامك ده
و يارب نتشرف بزيارتك دي علطول

الباحث عن الحقيقة said...

انت مين يااض
افهم ايه انا من كده
عايز تقول انك حساس اوى ..ورخم
عايز تقول انك بتحب الضحك ..ودمك تقيل احيانا
عايز تقول ...الله ايه ده
ده انا
ههههههههههه
تتصور
صحيح هنروح بعيد ليه
كلام في سرك
انا ده
بس انا ازيد عليك في حاجات كتير
يعنى مثلا انا ازيد عليك بست سنين مثلا
شفت ازاى
سعداء بهذا التاج اللى سمحلنا نتعرف عليك
ونشكر اللى بعتهولك علشان نشوف المستخبي والمستنيل على عينه
هههههههههه
ربنا يكرمك

nigro said...

الباحث عن الحقيقة
--------------
ما غلطتش أنا لما قلت البوست ده لازم يتبروز علشان خلاني أشوف الناس اللي زي السكر دي عندي
ده أنا اللي سعداء بهذا التاج اللي سمحلنا أشوفك عندي و تشرف المدونة المتواضعة ده
عارف دي تالت زيارة ليك هنا
انا مش بنسي الناس اللي بحبهم و بحترمهم
و انت منهم

كاميليا بهاء الدين said...

انا جيت يمكن تكون كتبت حاجة جديدة

لاقيت التاج

قرأته تانى

وبعدين قولت ،، ايه ده؟

نيجرو اجاباته زى ما يكون برج الجوزاء

دخلت البروفايل

ههههههههههههه

لاقيتك جوزااااااااااء

انت كدة جوزاء بالثُلثُ
مرحبا بك فى برجنا العامر
D:

تحياتى لابن العم

رندا said...

ربنا معاك فى المعسكر الى هتعملة
بس طيب هتعسكر قد اية
على فكرة تدبيسة التاج دى اجمل تدبيسة بنعرف بعض من قريب قوى
وكاننا قاعدين نتكلم مع بعض
وانا ادبست والى كان كان
وكتبت يامعلم ربنا يستر بقى

تحياتى بالنجاج والتوفيق

رندا

nigro said...

و الله ما كذبتش لما قلت إني لازم أبروز الموضوع ده
كاميليا و رندا لتاني مرة
لأ و الله ده كتير قوي بجد
---------------------
كامي
---
أنا برده أول حاجة لاحظتها في أول مرات دخولي عندك من خلال البروفايل هو برج الجوزاء
بس الصراحة الصراحة يا كامي أنا ما أعرفش البرج ده أخباره إيه يعني
بس طالما انت قلتي كده لما قريتي البوست تاني
يبقى أكيد اشهر حاجة فيه هي ازدواجية الشخصية
صح كده ولا حاجة تانية؟

نورتيني للمرة التانية يا كاميليا

===================================
رندا
---
من حيث إن تدبيسة التاج دي أجمل تدبيسة فأكيد و بدون تفكير هي أجمل تدبيسة
لأنها عرفتني على حضرتك
و ده أكيد من حسن حظي بجد و أسعدني بجد
بالنسبة للمعسكر فمدته شهر تبدأ من بكره إن شاء الله

نورتيني للمرة التانية يا رندا