Thursday, 2 June 2011

عايشين ببعض

الناس مفاتيح كهربا للكشافات اللي بتنوّر دماغنا
في الفترة اللي عشتها في الغربة و اللي كان أغلبها لوحدي اكشتفت اننا عايشين ببعض
البشر - كلهم - كل حد فيهم قوي بحد تاني .. حتى لو هو مش مدرك كده
كل حد فيهم بيفهم بفضل حد تاني .. حتى لو هو مش مستوعب كده
كل ركن في دماغنا بيفكر و بيشوف الدنيا .. اللي نوّرهولنا كان حد تاني
مش شرط يكون الحد التاني ده قريب أو صديق أو حبيب أو حتى حد تعرفه أصلا .. مش شرط حتى يكون طيب أو شرير
الفكرة ان وجود الناس حوالينا .. كلامهم .. طريقة كلامهم .. تصرفاتهم .. نظرات عينيهم .. شايفين الحياة إزاي .. كل ده و أكتر بيرسم في دماغنا طرق و بينوّر فيها كشافات من خلالها بنشوف الدنيا من زوايا جديدة و بنوصل لأفكار و بنفهم حاجات و بنكتسب خبرات كانت أبعد ما تكون عن اهتمامنا إننا نوصلها
و القصد بوجودهم حوالينا مش قاصر على وجودهم في الحيز المكاني اللي احنا موجودين فيهم
ممكن جدا كلام قرأته في مقالة لكاتب أرجنتيني عمره ما خرج بره بلده ينوّر في دماغي أماكن كانت تايهة عن ادراكي بوجودها
رغبتنا في الوحدة أحيانا و استمتاعنا بيها في الفترات القليلة اللي بنعيشها ؛ مفعولها زي المهدّىء المؤقت اللي بناخده عشان نريّح أعصابنا لكام ساعة جايين ؛ إنما لو فضلنا نستخدمه لفترة طويلة بشكل منتظم هنوصل لدرجة الادمان هنوصل لدرجة البلادة هنوصل للدرجة اللي هنقف عندها و مش هنحس باللي بيحصل حوالينا .. هنرجع .. هنتأخر .. هنخسر كتير

7 comments:

حفيدة عرابى said...

طب ممكن أقول لحضرتك ان البوست ده وخصوصا الفقرة الأخيرةتورت فى دماغى فكرة كنت بعمل نفسى مش واخدة بالى منها
شكرا يافندم

أحمد عيسي said...

الغربة بتشرخ حاجات كتير جوا الواحد وبتخلي عنده ادمان لاي صحبة ادميه
بوست مركز جدا وفي الصميم

MR.PRESIDENT said...

بوست فلسفي
عايز دماغ عاليه يا كبير
انت نورت دماغي بجد

أحسن تـستاهـل said...

اول زيارة.. وحلو الجو :)

مها ميهوووو

Enjy Ebrahim said...

إممممممممممممم

على فكرة..انت بتنور دماغي

آه والنعمة..بس كدة

ღ أحاسيس آيـــوشـه ღ said...

عجبتنى اوى جملة عايشيين ببعض
بوست حلو جدا :)

nigro said...

حفيدة عرابي
طب ممكن اقول لحضرتك إن حضرتك و أفندم دول أزعجوني جدا
فيه إشاعة كده بتقول إنك بتعتبريني أخوكي الصغير :)
فيه أخت برضه تقول لأخوها الصغير حضرتك :)
و ما تقوليليش مانت بتقولي رشا هانم
أنا باقول أهو :) :)
___________________________________

أحمد عيسى
هي بتشرخ بعقل يا أبو حميد
دي بتدشدش
و أكتر حاجة بتدشدشها هي التابوهات اللي بنعيشها و كأنها هي دي الحقيقة المطلقة
الغربة بتعرّي قدامنا حقايق كتير يا أحمد
نوّرتني :)
___________________________________

MR.PRESIDENT
لما بييجي بالتجربة بيوصل لوحده و الله يا ريس :)
نوّرت يا كبير
___________________________________

أحسن تستاهل
أول رد على أول زيارة :)
الجو حلو بالموجودين يا مها
نوّرتي :)
___________________________________

Enjy Ebrahim
إنجي
على فكرة .. وجودك بيسعدني
آه و الله :)
___________________________________

أحاسيس آيـوشـه
لأن احنا فعلا كده يا أيوشه
عايشين ببعض
نوِّرتيني يا آيوشه :)