Wednesday, 6 February 2008

التربية العسكرية (1-3)

إنا لله و إنا إليه راجعون

محدّش مات ولا حاجة يا جماعة

بس دي أنسب بداية أبدأ بيها موضوع ز ي دا

في شوية حاجات بتحصل في البلد دي عايزة الحرق

حاجة صغيرة قوي منهم اسمها دورة التربية العسكرية لطلبة الجامعات

الدورة دي بتنظمها ادارة موجودة في كل جامعة

اسمها ادارة التربية العسكرية

حاجة بجد تحرق الدم.. و ملهاش أيييييي لازمة

تضييع وقت مش أكتر.. و تضييع كرامة كمان

لأن اللي بيحصل فيها بجد تهريج

و إليكم الوصف التفصيلي لأحداث المبارة

يبدأ اليوم الساعة 7:30 صباحاً بطابور الصباح ( يا سلام )

و هو في حد ذاته مُكون من طابورين (إيه اللخبطة دي بقى؟!! )

طابور التمام.. يعني يتمّموا علينا و يشوفوا اللي غايب من اللي حاضر

عن طريق انهم يستلموا مننا حاجة كده و زّعوها علينا أول يوم اسمها بطاقات التسجيل

و دي عاملة زي أرقام الجلوس بتاعت ابتدائي و اعدادي

بيبقى عليها صورة الطالب و مكتوب عليها اسمه و رقم مسلسله

و الرقم دا بيبقى هو اسم الطالب طول الدورة

مفيش حاجة اسمها محمد و أحمد و ابراهيم.. لأ

الطالب 17 ..و الطالب 102 ..و الطالب 235.. وكده

و بعد كده طابور حاجة تانية اسمها التعاليم الأولية

يعني صفا و انتباه و حاجات من دي

الطابور يبدأ الساعة 7:30 و يخلص الساعة 10

يعني ساعتين ونص تذنيب

و دول في حد ذاتهم كافيين إنهم يهدّوا حيل أي عنتيل

بعد كده ربع ساعة راحة ( مش عارف جايين على نفسهم قوي كده ليه )

و بعد كده بقى يبدأ اليوم الدراسي ( أصلهم بيعتبروها مادة دراسية )

محاضرة كل ساعة إلا ربع..لحد وقت الظهر يدّونا ربع ساعة راحة للصلاة

و بعد كده نكمّل اليوم تاااني.. لحد ما تيجي الساعة 3 العصر

يبدأوا يوّزعوا علينا بطاقات التسجيل تاااني علشان تاني يوم يستلموها مننا

و طول اسبوعين (اللي همّا مدة الدورة ) على كده

كلنا لازم نلتزم بــــزي معين طول الأسبوعين

بنطلون كحلي و قميص لبني أو كحلي و جزمة سمرا أو كحلي

يا خي اتكحّلت في و شهم قادر يا كريم

و أهم حاجة الشعر و الدقن ( و ركّزلي شوية على الدقن دي )

أول يوم.. سيادة المقدم مهيب الركن( دا مش اسمه على فكرة) مشرف الدورة قعد يقولّنا شوية التعليمات دي

و قال اللي عايز يسيب دقنه.. يسجل اسمه عندنا علشان نبعته لأمن الدولة

نشوف إذا كان له قضية هناك ولا حاجة

يعني و إن ماكنش له يتعمل له واحدة قريب إن شاء الله

و اللي يخالف أي حاجة من التعليمات دي

تتلغي له الدورة علطول و يطبق عليه قانون الأحكام العسكرية ( على حسب كلام سيادة المقدم )

و لحد هنا دي كانت مجرد تقديمة بس للموضوع

أما بقى التفاصيل.. دي يلزم لها موضوع لوحده

الحلقة الجاية إن شاء الله

4 comments:

~ شيمى ~ said...

واضح انها حتبقى حلقات مش حلقة
لكن بجد عاظتنى حكاية الدقن دى
طب لو حبيت اعمل سكسوكة تنفع؟ ولا دى تبع الشنب؟
مستنية الباقى

Nigro said...

عندك بُعد مظر و الله يا شيمي.. الواحد شاف شوية حاجات في الأسبوعين دول عايزة كتاب.. و بالنسبة لحكاية السكسوكة.. سكسوكة إيه يا بنتي.. دا عايزها صلعااااء بيضااااء

مهندس الرومانسيه said...

صحيح يابوسويلم ده الواحد جبها ارضا وبقى اقرع بس تعرف اللى كان بيزعلنى اكتر اننا بنشيل الكلبوش هههههههه

فتوح أبو المفاتيح said...

يااااراااجل حرام عليك
اتقي الله
دا الطابور مكانش بيتجاوز الساعة
دا كمان انت كنت بتيجي متأخر
و الراحة بتاعة الصلاة كانت من التناشر لواحدة
سيادة الكونستبل
العقيد مهيب الركن
بيقول
اللي مش هيرجعلي هنا واحدة يبقا يشوف ايه اللي هيحصله
هناك في العسكرة أعلى درجة من عدم الالتزام بالمحاضرات و المواعيد
بس خييييير