Wednesday, 6 February 2008

التربية العسكرية(2-3)

نكمّـــــل..

أول يوم.. الناس كانت رايحة و مش واخدة خوانة.. يومين وهيعدّوا

و لكم أن تتخيلوا واحد لسه يدوبك مخلّص امتحانات يوم الخميس

و مش أي امتحانات دي كلية هندسة يابا

هوب العسكرية تبدا يوم السبت

يعني الناس اللي رايحة تاخد الدورة العسكرية دي لازم يتعملّها تماثيل

لا أجازة و لا يحزنون.. العرض متواصل

الخميس اللي هيخلّصوا فيه.. السبت اللي بعده علطول تبدأ الدراسة

المهم خدنا حبوب " رجلك فوق رقبتك " ورُوحنا

قعدوا يستّفوا فينا.. لأن المكان اللي كنا بناخد فيه كان معانا كمان فيه 4 كليات

و كل فرقة في كل كلية.. تقف لوحدها

العدد الكلي كان تقريباً كده 4000 بني آدم

الموضوع دا خد منهم ساعتين

معلش يا جدعان أول يوم بس بيبقى له شمخة

بعد كده قعدوا يكتبوا اسماء كل طالب حسب فرقته و كليته

ساعتين كمان

بعد كده وزّعونا كل كلية في مدرج لوحدها

و سيادة مشرف الدورة لازم يدخل بنفسه كل مدرج يتمم على اللي فيه

إزاي

يدخل كل مدرج و ينادي على كل طالب.. اسم اسم

و كل طالب له على الأقل دقيقتين ملاحظات

شعرك طويل.. دقنك طويلة.. سوالفك طويلة.. اقلع الكاب.. اقلع الكوفيّة

و الناس بقى اللي أسمائها غريبة..ليه يا بني كده؟؟!!.. اسمك دا معناه إيه؟؟!!

((يا ولاد الــ.....))

و في وسط ما هو عمّال ينادي في الأسماء.. واحد موبايله رن..آآه

-فين اللي موبايله رن.. هات الموبايل و تعالى

دلوقت يا جماعة.. احنا هنطبّق اختبار الكسر

و اللي ما يعرفوش.. احنا هنرفع الموبايل في الهوا و نسيبه يقع على الأرض

لو اتكسر.. تبقى الماركة دي و حشة و ماتجيبش منها تاني

لو ما اتكسرش.. تبقى ماركة كويسة و نجيب منها كلنا

طبعاً كله بلَم.. و الواد يا عيني قلبه و قع في الأرض و شويتين كان هيعيّط

-أنا هسيبك المرة دي بس علشان دا أول يوم و ماتكررهاش تاني

الواد مسك الموبايل بتاعه و قعد يبصلّه كأنه أول مرة يشوفه

مش مصدق إنه رجعله تاني

سيادة المقدم قعد ينادي في الأسماء ساعتين تانيين

بعد كده وزّعوا علينا كارتين

واحد أخضر.. و واحد أحمر

و قالولنا هينادوا علينا تاااني.. و كل و احد هيبقى له رقم يسمعه و يكتبه على الكروت

قعدوا ينادوا تااااني.. بس المرة دي اللي كان بينادي كان سريع شوية

ساعة و نص بس

و اليوم خلص على كده

و طبعاً عايز أقولكم إن تقريباً كده ربع الناس اللي جَت ما كمّلوش بعد كده بعد اللي شافوه

هو انتوا لسه شوفتوا حاجة

بس الناس دي بتاعت اعدادي و أولى و تانية و تالتة بس.. علشان ليهم فرصة تانية

انما رابعة بقى يا حلو-و أنا منهم- ..دي آخر فرصة

مش آخر فرصة خالص يعني.. لأ..آخر فرصة سهلة

الدورة دي لازم تتاخد يعني لازم تتاخد

مفيش مفر.. ليه بقى؟!!.. لإن ببساطة مش هناخد شهادة البكالوريوس

غير لما ناخد المخروبة دي.. و ننجح فيها كمان.. لإن ممكن ناس تسقط

و دا بقى أكيد أهله مش راضيين عنه

تاخدها بقى في الدراسة.. بعد الدراسة.. عندك 30 سنة.. مش مهم

و دا بس كان أول يوم

و اللي جاي ألذ ألذ ألذ

و يظهر كده زي ما قالت شيمي إنه هيبقى فيه حلقات

الحلقة الجاية بقى وعليكوا بخير

5 comments:

Ahmed Mubarak said...

ربنا يكون معاك يا ابني

~ شيمى ~ said...

متابعاك يا دفعة
الا صحيح انت رقمك كان ايه؟

Nigro said...

ahmed mubarak
آآآآآآميييين
إلا قولّي صحيح.. انت أخدت الدورة دي و لا ما عندكوش؟
--------------------------
شيمي
الله يخلّيكي.. شوفتي بقى اللي بيحصل فينا.. فلتّي انت عشان بنت.. و حلوة دفعة دي.. أنا كنت -و ركزي على كنت دي- رقم 17

Ahmed Mubarak said...

لا طبعا خدتها يل حبي

فتوح أبو المفاتيح said...

نيجرو حبيب قلبي
انت المرادي عندك حق في الذل اللي ذلو انفاسنا بيه
بس خييير
بس شكلك كنت قاعد ورا و مشفتش اللي حصل من صاحب الموبايل
الواد كان بيصور الكومندة و الفلاش طرقع في وشه
يعني بياخدلوا صور من غير اذنه
يااااعيب الشوووووم
بس خير
الحمد لله
اختابر الكسر لم ينفذ
الواد كان هعيط
دا كان لسه في أولى و شكل موبايله جايبه قسط