Monday, 4 February 2008

بجد بجد بجد.. بحبك يا مصر

و الله يا جماعة أنا مش عارف أقول إيه

مفيش كلام يتقال

لمّا الواحد بيكون فرحان من قلبه بجد

الفرحة بتبقى أكبر من أي كلام ممكن يعبّر عنها

الواحد كان قاعد بيتفرج على ماتش المنتخب مع أنجولا و جوّاه شوية أحاسيس حلوة كتيييييييييرة قوى

مستني الحكم يصفّر و يخلّص و يعلن فوز مصر

أد إيه الفرحة حلوة

و أد إيه الواحد بيحب البلد دي

و مش عارف كده الواحد مزاجه كارف على أغاني وطنية من بتوع المناسبات اللي زي دي

و ما عكّرش صفو الفرحة دي غير أول كلمة قالها شوبير:

" ألف مليون مبروك لمصر و طبعاً أول رسالة تهنئة بعتها سيادة الريس محمد حسني مبارك لبعثتنا في غانا"

و اللي زاد و غطى كمان

و أنا بتفرج على الماتش سمعت واحد بيتراهن إنه هيدفع 40 جنيه لإبنه لو مصر خسرت

يا خي جاتك خيبة

حسيت جوايا كده إني عايز أقوم أكله.. بس برده ماسكتّش.. وقعدت أناكف فيه لحد ما كبسته و سكتّه

يظهر إنهم كانوا عاملين مؤامرة عليّا.. بس برده.. أنا مبسوووووووووط

مع إن الواحد طول النهار و الليل عمّال بيشتم في البلد و اللي بيحصل فيها.. إنما وقت الجد

لا حاسب .. إنت بتتكلم عن بلدي برده

ورجالة و طول عمر ولادك يا بلدنا رجالة و غلاوتك يا بلدنا والله مش محتاجة قوالة

بجد بجد بجد.. بحبك يا مصر

4 comments:

wanna b a bride said...

منور البلوجر يا فندم

و ألف مبروك للشعب المصري و العربي و الشمال أفريقي و الشرق اوسطي الصغير الكبير

و لكل شعوب الأرض المحبة للسلام

و ألف تحية لسيادة الريس اللي دايما مهتم و مقدر و مدلع المتخب

و في ذكرى غرق العبارة أحب أسمع سلام

لو ماكنتش انت تدلعني..مين هيدلعنيييي


و النعمة مافيهم غير أبو تريكة

مش كده؟

Nigro said...

زرغطي يامّا(مابتعرفش تزرغط)..صوتي يامّا(مابتعرفش تصوّت)..خلاص نامي يامّا..برايد عندي في المدونة يا ولاااااد..(print screen) بقى ولا(save) للصفحة ولا (download) ولا كلهم في بعض.. مش قادر أوصف فرحتي..بجد بجد بجد نوّرتيني يا دودو..
و يا رب ما تقطعيش الزيارات

~ شيمى ~ said...

للاسف انا فى اليوم دة خرجت لزيارة عائلية لكن لحقت اخر نص ساعة تقريبا
وكنت مستنية والله الماتش دة
لكن الحمد لله
ربنا لطف بينا وفزنا
وعقبال كوديفوار

فتوح أبو المفاتيح said...

هوا مش انجولا دي اللي احنا لاعبنها يوم تالجمعة النهاردة ؟؟؟
طب إن مكانش كدا
أمال إحنا لاعبنا مين ؟؟؟
خيييييير
أوي
مش مشكلة
بجد احنا لينا ريس تافه
وربنا يسامحه
يعني بتوع الكورة من أول ما المطش بيخلص بيبيعت البرقية
ولما كان بتوع الضرايب العقارية مرميين في الشمس و البرد
معبهمش غير في ىخر الإضراب
بجد
كتها نيلة اللي عاوزة خفلف
وعلى رأي برايد
حبيبة الملايين
سمعني اغنية
بطو لوده واسمعوده
ياما شفنا كتير ويااااماااا