Sunday 3 February 2008

مجنون ولا مش؟!!

طول عُمري بسمع من و أنا صغير و لحد دلوقتي إن اللي بيكلّم نفسه دا بيبقى مجنون , و كنت بشوف في المنطقة عندنا الناس- اللي سكان منطقتنا بيقولوا عليهم مجانين- بيكلّموا نفسهم و همّا ماشيين في الشارع , و برغم من كده أنا عمري ما بطّلت إني أتكلم مع نفسي. أفتكر زمان و أنا لسه صغير لمّا بابا أو ماما كانوا بيزعّقولي و بعدين مثلاً يبعتوني مشوار كنت و أنا ماشي في الشارع أقعد أتكلم مع نفسي بصوت و أقول الكلام اللي ما كانش ينفع أرد بيه عليهم -على أساس إن أنا مؤدب وكده- و كنت بلاحظ نظرات الناس اللي ماشيين في الشارع ليّا و كأنها بتقول"يا حول الله يا رب. الواد الصغير ماشي بيكلم نفسه" , لحد ما شوية شوية بدأت أبطّل العادة دي ألا و هي الكلام مع نفسي في الشارع ؛ بس عُمري ما بطّلت و لا هبطّل أتكلّم مع نفسي. أوقات بحس إن أنا عندي انفصام في الشخصية و اللي بيأكّدلي كده إني كتير لمّا بتكلّم مع نفسي بحسّ إن أنا اتنين-خليك معايا و اصبر عليّا- بتكلّم بإحساس معين و في نفس ذات الوقت أرد بإحساس تاني خالص- و كأنّي بتكلم مع حد غيري- و أرجع أتكلم و أرد و هكذا. بحسّ إن نَفسي بالها طويل عليّا و مش بتزهق مني بسرعة و كتير بتدّيني الرأي الصح, و بكون معاها على حريّتي و بتكلم معاها بمنتهى الصراحة. مش عارف إذا كان دا صح ولا غلط و إيه سببه. بس مش لازم كل حاجة نطلّع لها سبب و كمان أنا شبه مبسوط كده. وبس

5 comments:

أخـت فـى الله said...

لا مش مجنون ولا حاجة
يا عزيزى كلنا مجانين
انا عن نفسى ساعات بدى واخد مع نفسى لما يكون فى قرار مهم لازم اخده وبسرعة
فبتخيل نفسى شخصين وبيحاوروا بعض الاتنين بيعرضوا ارائهم من باب فد واستفد يعنى

nigro said...

أهلا بيكي يا شيمي عندي في المدونة..و بما إنك أول حد يزورني في المدونة أحب أقولك إن كسبت معانا جايز أول زائر وهيااا..إمممممممم..آه.. أني أطلب منك أنك ماتقطعيش الزيارة..هههههه
طمنتيني إن أنا مش لوحدي و إن الإنفصام عند حد تاني كمان وياريت أشوفك تاني عندي يا بنت اسكندرية.. هو صحيح انت ليه مانعة البروفيل بتاعك من العرض

Gihad N. Sohsah said...

لكل هذه الاسباب انا مجنونة..ماعلينا
المهم كنت عايزة اقوللك ان الكلام مع النفس طاهرة صحية...نفسك هي الوحيدة اللي تقدر تفيدك هي الوحيدة اللي تقدر تثق فيها

أخـت فـى الله said...

لا مش حقطع الزيارة ان شاء الله
لكن بالمثل برضة انت كمان ماتقطعش

فتوح أبو المفاتيح said...

صديق الغالي
تصدق إني بكتشفك من خلال مدونتك
يعني من خلال تعاملي مع مستر نجرو تحسوا انه شخص طبيعي
مبيعملش الحاجات بتاعة الناس اللي مش عاقلين

بس حلو أوي انك تلاقي أخ ليك في الانسانية بيشاركك في نفس التصرف
تكلم نفسك تسألها تستشيرها

بس أنا مزود عنك حاجة تانية
بما إني أنا ونفسي صرحا مع بعض
بس سعات بعمل حاجات من وراها من غير هي ما تعرف
يعني بعمل العملة و اخبيها عن نفسي لأنها لو عرفت ممكن تقلب الطربيزة عليا و تحولها ضلمة
نفسي و انا عارفها
بس خيييييير أوي
أحييك على البداية الثانية القوية
جدا