Sunday 10 February 2008

جرّة قلم

هو اللسان الأقوى ولا القلم؟!

أوقات كتير بتاخدني نوبة ألم

ناحية حاجات يعجز قصادها اللسان

و تساعها و تحس بيها جرّة قلم

**********

أوقات كتير يقابلني ناس طيبين

الحب في عيونهم.. بجد مش كدّابين

أحلم معاهم.. و بيهم أرسم خيالي

و في لحظة تتبخر خيالات السنين

***********

أصل الحياة من طبعها الخيانات

ما بتحترمش براءة الخيالات

قراراتها صعبة و صلبة زي الصخر

و انت يا قلبي ضعيف كما الفراشات

**********

مكتوب في شرع الدنيا: اللي تعوزه يدوم

من بس غمضة عين... بيتحوّل غيوم

و يضيع في سوق الدنيا و المتاهات

هنقابله؟.. يمكن!!.. بس مش وقت اللزوم

***********

لسه في قلبي كلام.. اكتب كمان يا قلم

من كتر همّي و حزني و من فرط الألم

رفض القلم يكتب, و قالّي: كفاية

حزنك كبير و أنا ليا طاقة.. يا عم

3 comments:

أخـت فـى الله said...

طب دى حاجة انا كتبتها قبل كدة
هى مش قد المقام يعنى
بس اهو الواحد بيجرب يمكن ينفع فى حاجة

سهر القلم يبكى
اخدته فى حضنى وسالته
مالك ياقلم
قالى
شيلتونى همومكم
وشعوركم بالالم
قلتله ومن غيرك يحس بينا
وغيرنا جاله صمم
وعجبى!

بنوته مصرية said...

سلمت تلك لانامل الذهبيه
رائع رائع
احساس رائع
وحضور اروع
تحياتي لك ولقلمك

رودي

nigro said...

شيمي
إيه يا ختي القلم دا؟!!.... جمل!!
دا لو كان جبل كان اتهد
و لو نطق هيروّقنا كلنا
كلماتك جميلة و فيها توافق أفكار كبير
و مقام إيه بس... ما تقوليش كده
و اهو الواحد طول ما هو عايش بيجرّب علشان يوصل
------------------------------
رودي البنوتة المصرية
أخجلتم تواضعنا يا أفندم
التحية هي لأشعارك و أفكارك و كلماتك و احساسك البريء الجميل
شرّفتني زيارتك لمدونتي البسيطة
و أدام الله التواصل