Thursday 14 February 2008

حكاية (قصة حقيقية)

عقله خفّ!!....دار ولفّ!!

م اللي سِمعه واللي شافه

واللي هَيجنـّه اكتشافـــــه

إن أخوه.....

اللي حُبُّه كان حلــول لمشكلاته

اللي عاش ويَّاه سنينه وذكرياته

اللي كان شاهد على أغلب حياته

600مليون حكاية

عاشها ويَّّاه م البداية للنهاية

ورغم كل اللي ما بينهم

من حاجــات مجمّعينهم

من أ ُخُوَّة من أ ُبُوَّة من بُنُوَّة

اكتشف...........

إن أخوه بعقله استخف

بعد موت أمه وأبوه

بانت القسوة ف أخوه

حُبه كان حُب الديابة للفريسة

داس عليه فضَّل اللقمة الرخيصة

زوَّر العقودات وقال له: هي دي كل الحقيقة

قال له: أبونا قبل موته كان ف ضيقة

قام كاتبلي الدار بإسمي

وبين إيديك عقد رسمي

وخد بداله فلوس وسدد بيها دينه

والحكاية دي كـــانت بيني وبينه

هان عليه يخون أخوه ؟!

وينســـب التهمة لأبوه!!

لو أهله عايشين كانوا ماتوا م اللي منه هيشفوه

أمّا أخوه......

عقله شَتّ .... بَصّ حواليه والتفت..

بَصّ شاف إن حكايته وسط حكايات الغلابة

زَيّ حرف ف الكتابة

أصل الديابة خَلـّوا دُنيتنا دي غابة

والحكاية مش حكاية عائلية

الحكاية ماليه كل الدنيا دِيّه

ف الصحاب و ف القرايب.. ف الجيران و ف الحبايب

بس المصايب عُمرها ما بتيجي إلا م القرايب

أصل" القرايب كالعقارب"

بس برده مش جميعا.....في حالات استثنائية

وكل يوم هنشوف ضحية

دي الخيانة دنيوية

هيّه هيّه...

الدنيا زَيّ ما هيّه دنيا

برّانيّة...

وعمرها ما هتبقى أبدا حاجة تانية

14 comments:

انين الحزن said...

انا هابدء بسادساً علي طول

جميل اوي البوست

حقيقي فعلا بيقووووووووووووول

المدونه كلها جميله

دي اول زياره واخد بالك انت

سلاموووووووووووز

نور جديد said...

السلام عليكم
حقيقي اتشرفت جدا بزيارة مدونة حضرتك
جميل اوي البوست ده
و جميل التعبير عن كل اللي الناس بتعبر عنه بأسلوب مختلف
موفق ان شاء الله يا فندم

أم أحمد المصرية said...

هي ليه الدنيا دنيا
من دناوة اهلها
بس يوم من زمان قال لي اخويا الكبير ان ربنا خلق الدنيا كده حتي نشتاق للجنة و نحس الفرق تصدق منيومها كل ماحاج تزعلني افتكر الكلمة دي حتي نشتاق للجنة احس ان اللي زعلني ده حاجة بسيطة جدا مجرد خطوة في مشوار طويل علي فكرة دي مش ميول اكتائبية و تفكير في الموت بالعكس ده قمة التفاؤل و الثقة في الله و في وعد رسوله (ص) ال>ي قال : اعمل لدنياك كأنك تعيش ابدا و اعمل لأخرتك كأنك تموت غدا
ياخي مش عارفة احاديثك لنفسك دي بتفتح نفسي للكلام :)

أخـت فـى الله said...

هو دة من تاليفك؟
لو من تاليفك
يبقى انت عبقرى
بجد شعر جميل
انا بحب الشعر العامى بحس انه من كلام الشعب

nigro said...

desert cat
عندك حق مش كل الأهل ..في حالات استثناثية
بس إيه؟.. إيه؟.. حالات استثناثية
يعني الغالب بيبقوا كده
يظهر إن الناس ماكانتش فاضية تربّي ولا إيه
الحالات اللي أنا شفتها دي.. بجد بجد .. بتحسسني إن أغلب البشر فقدوا آدميتهم خلاص
ربنا يهدينا جميعاً
-------------------------------
انين الحزن
أيون كده .. سادساً علطول
مش الملل اللي أنا أكيد جبتهولك
شكراً يا وزة
واخد بالي طبعاً
مش عايزها تبقى الأخيرة.. واخدة بالك إنت بقى
نزّل شاي بلبن هنا يا عم دسوقي
سلامووووووووووووزات
------------------------------
nour-gedeed
الشرف ليّا يا أفندم
شكراً على الكلام الجميل ده
------------------------------
أم أحمد المصرية
الدنيا دنية
و ليها أهلها اللي زيّها
المبدأ اللي حاضرتك ماشية بيه دا رائع
ربنا يباركلك في أخوكي يارب
افتحي افتحي في الكلام محدش واخد منها حاجة
------------------------------
شيمي
من تأليفي (وش باصص في الأرض)
أشكرك شكاير
ما تبقيش تغيبي علينا أوي كدة

الـسـيـدة نـون said...

مال لونك حزاينى كدة ليه يا شنوانى
ايه يا واد يا نيجرو
ليه كدة
ليه الكلام اللى يخلى الواحد يقشعر ويخاف من اللى حواليه
ليه الكلام اللى يوجع ده ويخلى الواحد يعيط
ليه كدة يا نيجرو حرام عليك
مش معقول ان الحالات الاستثنائية هى اللى تكون كويسة
انا عندى امل ان الخير هو الأعم والشمل وان الإستثناء مازال هو الشر
ارجوك اضحك عليا وقولى ان الناس مش معظمها وحش
ارجوك اضحك عليا وقولى ان الخير هو الاكتر
اضحك عليا يا نجرو ارجوك علشان اعرف اربى ابنى
اعذرنى انا مش ناوية اصدق كلامك ده
انا ناوية اكدب على نفسى واقول ان الدنيا لسة بخير
ومش بس هاكدب على نفسى
عارف هاعمل ايه كمان ناوية اصدق الكدبة
سلام
اختك خيخة

shirry said...

حلو اوي الشعر ومعبر
بس زي مانت قلت فعلا مش كل الناس كدة في اكيد حالات استثنائية

بس الحالات دي صحيح بقت كتيلرة لكن مش بتدوم علشان
اذا كانت دولة الظلم ساعة فدولة الحق الي ان تقوم الساعة

رئيس جمهوريه نفسى said...

انا عجبتنى الابيات بتتقرى بسلاسه متناهيه وعجبتنى الفكره وبما انى محامى وموجوع من الى الحجات الى زى كده فبتفق معاك فى كل كلمه

صوت من مصر said...

حكايات حكايات مفهمتش منها اى حاجه

dr.Roufy said...

الدنيا زَيّ ما هيّه دنيا

برّانيّة...

وعمرها ما هتبقى أبدا حاجة تانية


فعلا..هي دي الخلاصة لكل مآسينا وذهولنا

كلامك منمق وجميل

تحياتي

nigro said...

بت خيخة و أي كلام
إيه ده؟ إيه ده؟ إيه ده؟ إيه ده؟
أنا طلعت وحش قوي كده
أخلّيكي تطلّعي كلام زي ده
لأ.. إنت كده هتخلّيني أزعل من اللي كتبته
من غير ما تكدبي على نفسك
أكيد يا نورا الخير لسه موجود وكتير كمان
و الشر برده موجود بكترة
ما تقلقيش يا خوخة الواد شريف ده هيطلع أحسن واحد
طالما انه عنده أم روعة اسمها نوران الشاملي
و هخطبله بنتي " نحن" كمان.. اللي في علم الغيب
--------------------------------
Shirry
انا معاكي تماماً في اللي بتقوليه
بس المشكلة ان الحالات اللي أنا شوفتها كانت تخلّي الواحد ييأس من وجود الخير من أصله
تحياتي ليكي
--------------------------------
رئيس جمهورية نفسي
الله يخليك يا "متر" بس برده أكيد فيه خير كتير
و الناس دي هتاخد جزائها في الدنيا و هتبقى عبرة.. إن شاء الله
شكراً لمرورك الجميل
--------------------------------
صوت من مصر
حكايات عن الخيانة و قلة الأصل و انعدام الضمير
--------------------------------
dr.roufy
شكراً على كلامك الجميل
و شكراً على مرورك الأجمل

ميّويه said...

أنا بحب الزجل أوي
وساعات ببقي عايزة أالف عشان ابعبر عن اللي جوايا
بس للأسف مش بعرف
لأني مش بنفس موهبتك
ماشاء الله
بجد عجبني أووووي

wanna b a physician said...

جميل الكلام وحلو النغم
وصح ميه ميه الاستثناء بالطبع

nigro said...

ميّويه
=====
أشكرا جدن
عايز أقولك حاولي انك تكتبي
مش مهم الكلام يكون عاجبك
أنا بدأت أكتب كده و أنا أكبر منك بسنة
طبعاً لو جيت أقيّمه دلوقت كان كلام فارغ و وحش قوي
بس و قتها كنت فاكر انه مفيش زيّه
حاولي
---------------------------
wanna b a physician
===================
شكرا ليك
و أهلاً بيك في زيارتك الأولى