Monday 18 February 2008

يعني إيه تدوين؟

السؤال ده خارم دماغي من ساعة ما سمعت عن الإختراع اللي اسمه مدونة

و يرجع فضل معرفتي بعالم التدوين - بعد ربنا عز وجل- لصديقي الصدوق جرنال الدستور

و قتها كنت فاكر إن التدوين عبارة عن إن واحد عنده قضية أو رأي معين و بدل ما ينشره في جرنال يقوم ينشره في المدونة دي.. يعني حاجة كده عاملة زي الجريدة الإلكترونية

يعني فيه قضية و هدف؛ و المدونة هي الوسيلة

و من الجرنال عرفت مدونات كتير منها اللي بتناقش مواضيع اجتماعية زي "عايزة أتجوز" لغادة عبد العال؛ و السياسية الإجتماعية زي "جبهة التهييس الشعبية" لنوارة نجم و الدينية اللي بيغلب عليها طابع سياسي زي بعض مدونات الإخوان

كنت مبهور قوي بالفكرة دي.. لدرجة إن صفحة "مدونون و مدونات" كانت من الصفحات الرئيسية عندي في الجرنال اللي كنت بستنّاها من الإسبوع للإسبوع

أما بقى فكرة إني أدون.. دي كانت آخر حاجة ممكن تخطر على بالي.. لسببين

أولهم و أهمهم: إني كنت وقتها معنديش نت, و السايبر ده لحد دلوقت من الأماكن المحظورة دولياً عليّا.. و الحظر ده أنا اللي فرضه على نفسي

السبب التاني: إن التدوين كان بالنسبة ليّا عبارة عن قضية أو مشكلة صاحبها بيعبر عنها

و أنا الحمد لله لحد دلوقت معنديش مشاكل

لحد ما أخدت القرار التاريخي الحاسم اللي عملت عليه استفتاء شعبي و انتخابات نزيهة كانت نتيجته موافقة بنسبة 99.9% ... و دخّلت وصلة النت

و بدأت أتعرف فعلياً على العالم ده

دخلت أول ما دخلت على المدونات اللي كان فيه بيني و ما بينها سابق تعارف قبل كده عن طريق الجرنال.. لقيت آه جميل .. الصورة مش مختلفة كتير

بعدين دخلت مدونات لقيت أصحابها كاتبين فيها عن يومياتهم.. و مدونات أصحابها كاتبين فيها أشعارهم و خواطرهم.. و مدونات تانية أصحابها كاتبين فيها عن مواقف غريبة و طريفة حصلت لهم... لأ و فيه كمان تعليقات بتجيلهم.. و اتضحلي بعد كده إن التعليقات دي هي سبب نجاح المدونة أو فشلها , إن صاحبها يكمّل ولا يقف و يلغي مدونته, و إنها بتيقى أهم حاجة من و جهة نظر المدون

يعني المسألة مش مسألة قضية على قد ما هي مسألة تواصل و تفريغ شحنات مدفونة

عز الطلب.. طيب ما اتكّل على الله و أعمل أنا كمان مدونة

آه.. بس ليه؟ و علشان إيه؟ و هتكلم في إيه؟

ليه؟ لإني عايز أتكلم بحرية و أقول و أعبر عن اللي جوايا

علشان إيه؟ علشان عايز حد يسمعني و يقولّي رأيه بكل حيادية.. مع أو ضد.. صح أو غلط

هتكلم في إيه؟ آآه.. هنا بقى كانت المشكلة.. لقيت نفسي عايز أتكلم في حاجات كتير.. عن نفسي , و عن اللي حواليا , و عن البلد و اللي بيحصل فيها و دي بقى كل لما أحاول أكتب فيها حاجة ألاقي الحاجة و الحاج يقولولي: " محمد.. و النبي يا بني ملكش دعوة بالحاجات دي.. إحنا غلابة و عايزين نعيش و نربّيكوا يا بني"

طيب كده فيه مطب تاني.. اسم المدونة.. دا هو دا العنوان اللي بتتعرف بيه مَيّة المدونة.. طيب أنا عايز أكتب في كل حاجة.. طيب اسم المدونة إيه؟

قعدت أفكر في أسامي.. سألت نفسي : هو أنا عايز إيه؟ عايز أتكلم في كل حاجة بحرية

كأني بتكلم مع نفسي.. خلاص أسميها "بهذا حدّثتني نفسي" و لقيت نفسي مستريح للعنوان دا قوي.. و نادراً ما تلاقيني راضي عن أي حاجة بعملها

المهم.. أنا كان إيه غرضي من التدوين؟

إني أتكلم و اتسمع و أسمع

يا ترى هو ده التدوين؟

ولا إنتم ليكم رأي تاني؟

19 comments:

فتوح أبو المفاتيح said...

جميل وجامد جدا البوست دا
وعندك حق في معظم
وليس كل اللي قليه
بس انا لاحظت لو فضلت ألف في النت و أعلق
ما نيش هخلص
كل شوية عمال ألف
وأدور
وافكر
دماغي تعبت
بس مو زهقت
نجرو بيه رفعنا العم

ممكن تقول لولا إني أعرفك مو كنت دخلت على مدونتك
ولكني
داخل النهاردة
من تعليق ليك في مدونة تانية
ربنا يكتر من تعليقاتك
سلااااااااااااام

الـسـيـدة نـون said...

ايوة يا محمد هو ده التدوين
بس انا مش معاك فى نقطة
ان التعليقات هى اللى بتكون سبب نجاح او فشل المدونة
المدونة دى عاملة زى الاجندا الخاصة بيك
بتكتب فيها اى حاجة انت عايزاها
ان شالله حتى تشخبط شخابيط وتمشى
محدش هيقولك حاجة
كون انك انت تفضلت علينا وفاتح التعليقات للى حابب يعلق ده كدة حاجة كويسة من عندك
لان فيه مدونين تانيين مش فارق معاهم مين يعلق او مايعلقش وهتلاقيهم قافلين التعليقات
واساسا الاجانب المدونات بتاعتهم كانت من غير تعليقات جينا احنا العرب عموما عملنا الاوبشن ده وخلينا يكون فيه تعليقات
ايه الرغى ده
المهم يعنى عايزة اقولك
ان فعلا المدونة والتدوين زى ما انت وضحتهم بالظبط
وانا شايفة ياريت فعلاكل مواطن يبقى عنده مدونة يكتب فيها احلامه وطموحاته والمواقف البايخة اللى بتحصل معاه
مش لازم نعلق
بس الفكرة اننا اكيد هنستفيد من خبرات بعض
ودى حاجة انا شايفاها اهم حاجة فى التدوين
ان الناس تستفيد من خبرات بعض
بس خلاص
اختك خيخة

Desert cat said...

طبعا يا محمد هو ده التدوين
كنا زمان قبل النت بنكتب مشاكلنا وافراحنا واحزانا فى اجندات ونحتفظ بيها فى مكان بعيد دلوقتى بنكتب يومياتنا وحياتنا باللى فيها على النت يعنى متاح للعالم كله يشوفه
بس الطبع الغالب بيكونب الفعل حسب ميول صاحب المدونة
سواء سياسية او دينية او اجتماعية
ربنا يوفقك ومنور عالم التدوين
تحياتى

أخـت فـى الله said...

انا من زمان وانا بحب اكتب حتى من قبل ما اعرف حكاية المدونات دى
كنت بكتب فى اجندة خضرا كدة ولغاية دلوقتى لسة عندى
وبعدبن بدات اكتب وابعتهم لموقع حماعة اونلاين بتاع جامعة اسكندرية
وبعدبن بدات اكتب فى المنتديات ودى يمكن كانت الشرارة الاولى وهى اللى صقلت رغبتى الى حد ما
لغاية ما ربنا فتح علينا وبقى عندى مدونة
وحقيقى والله انا نفسى يكون كل الناس عندها مدونة وبتخنق اوى لما حد يقولى يعنى ايه مدونة بتغاظ منه جدا
بس ادينى بحاول انتهز اى فرصة واتكلم عن العالم العجيب دة
تحياتى

أخـت فـى الله said...

مش عيب عليك يا عم النيجرو انك تكون بالموهبة وعنوان المدونة بتاعتك نصها طاير؟!!
روح المدونة بتاعتى حتلاقى مفاجاة

انين الحزن said...

محمد

ازيك اخباك ايه

حلو البوست اوي انا بردك كنت عامله زيك كدا بالظبط اول ما عرفت عن التدوين ولحد دلوقتي بيبقي جوايا حاجات كتير ومش عارفه هاقولها ازاي

سادسا بقه
اوعي تكون لسه زعلان مني من الموقف الاخير ياريت تكون شوفت الرد التاني علي تعليقك

سلاموووووووووز ....... وزة
وزة

ابن حـجـر الـعـسـقـلانـى said...

بص يا عم الحاج .. أنا ماعرفش هو دة التدوين ولا لأ .. كل الل أنا اعرفه إن فى أول زيارة لى فى مدونتك .. عجبتنى مدونتك جدا

جو أون يا مان

ياسر شمس الدين said...

تمام يا باشا بس حاسب لان التدوين ده ادمان واسمع نصيحتى ادمان لذيذ

رئيس جمهوريه نفسى said...

بصراحه كلنا هذا الرجل تقريبا نفس اسباب دخولى عالم التدوين هى نفس اسبابك وتقريبا عن طريق صفحه الدستور كان القرار

رئيس جمهوريه نفسى said...

اضم صوتى لصوت خيخه ممكن بوست ما يعجبش الناس على قوته فتكون الكومنتات قليله والعكس صحيح فمتبصش لموضوع التعليقات دى

nigro said...

سيجا أبو المفاتيح
================
الله يخليك يا بيه
بس انت برده ما قولتليش التدوين هو ايه من وجهة نظرك
و بالنسبة لآخر سطرين انت كاتبهم.. أنا و الحمد لله مش فاهم منهم حاجة
بس كويس إن أنا شوفتك عندي وخلاص ده هو المهم
---------------------------------
بت خيخة وأي كلام
===============
تصدقي يا ام شريف أنا بقيت كل موضوع أنزّله.. ما أستريّحش غير لما أشوف تعليقك عليه
ربنا ما يقطعها عادة يا رب
بالنسبة للمدونيين.. بحس أن كتير قوي منهم- و أنا منهم على فكرة- فاتحين مدوناتهم علشان التواصل
يعني التعليقات بالنسبة ليهم حاجة مهمة جداً
لدرجة اني شفت مدونة صاحبها كل موضوع ينزّله لازم يختمه بكلمة..أنتظر تعليقاتكم
و بالنسبة لموضوع تبادل الخبرات ده .. أنا متفق معاكي جدا جدا جدا
لأني بجد استفدت من مدونات دخلتها من غير حتى ما أعلّق عند صحابها أو هما يعلّقوا عندي
و عجبتني كلمة.. كل مواطن.. دي.. ميول الرياسة بدأت بشايرها تبان أهه
---------------------------------
desert cat
==========
دا أنا اللي اتنورت بعالم التدوين
عارفة.. أنا كان نفسي من زمان تبقى عندي أجندة يوميات و "قصاقيص ذكريات" بس كل لما أحاول أعمل حاجة زي دي أقول إيه الهبل ده و أقوم راميها للأسف
بس يللا.. ملحوقة.. احنا فيها
سلامي ليكي
----------------------------------
شيمي
=====
على فكرة يا شيمي اللي عنده القدرة على الكتابة دي بيبقى موهوب فعلاً
و موهبة مش أي كلام.. دي من اصعب الحاجات
و بالنسبة لعنوان المدونة أنا مش عارف يعني إيه نصها طاير
أنا بأفتحها عندي و بتبقى شكلها عادي مفيش حاجة طايرة ولا حاجة
و بالنسبة للبنر.. شكله جامد بس يا ريت تحطي عليه الرتوش الأخيرة
علشان خلاص أنا عايز أحطّه بقى
---------------------------------
أنين الحزن
========
وزة.. انت بنوتة طيبة جداً و عسولة جداً و ما يتزعلش منها
و الرد الأول بتاعك ما زعّلنيش ولا حاجة
بس أنا استغربت انك فهمتي ان انا باتريق
و الدعوات دي مافيش فيها تريقة
و قريت التعليق التاني و فهمت
و شكلك كده هتمسكيلي سادسا دي زلة
بس يللا حلوة منك و علامة مميزة كمان
سلاموووووووووووزات يا عسولة
---------------------------------
ابن حجر العسقلاني
================
شرفتني زيارتك جدا جدا
و عجبني تعليقك جدا
أحب أنا الناس اللي تلخّص كده و تجيب م الآخر
و المدونة وشها احمر م الكسوف من اللي قولته عليها
أوك مان
--------------------------------
حدوتة مصرية-ياسر شمس الدين
=========================
من أولها كده داخل تقول حاسب
ماشي يا عم الحساب المرة دي عليا
انما المرة الجاية
عليا برده مايهمش
أنا برده قولت كده
----------------------------------
رئيس جمهورية نفسي
================
سيادة الرئيس حضرات السادة المستشارين
احم احم..إيه ده؟ إيه ده؟
لا مؤاخذة يا "متر" جو المحاماة خدني شوية
انت برده ليك هيبة يا جدع
بصراحة أنا كنت كاتب الموضوع ده علشان أستفيد من خبرات المدونيين اللي هيدخلوا يعلّقوا عليه.. تقدر تقول كده باخد مشورتهم يعني
عايز أقولك ان الكلمتين اللي انت قولتهم في الآخر دول هيفرقوا معايا جامد في الآيام اللي جاية ان شاء الله
شكراً على مشاركتك

لحظه من فضلك said...

ارجو الاهتمام بذلك الموضوع الموجود بالمدونه وارجو التضامن معى وشكرا

أخـت فـى الله said...

هاه عجبك الهيدر؟ ولا تحب اغير فى حاجة كمان؟

أم أحمد المصرية said...

شوف يا صديقي انا زيك بالضبط يعني عرفت التدوين من الدستور و فكرت كده زيك و بعدين قلت حاكتب حتي لو محدش قرا لي و اتفقت مع ابني احمد نبدا سوا ايام ما كنت صغيرة كنت بكتب في اجندة و محدش يقرها غير صاحبتي الانتيم دلوقت بكتب اللي عايزاه و عندي الشجاعة ان الكل يقراهو لا انكر ان التعليقات بتسعد المدون لأنها ترمومتر اللي كتبه لكن ساعات اقرأ موضوع جميل و الاقي التعليقات صفر يبقي مش التعليقات بس هي دليل النجاح مش كده و لا ايهههه

nigro said...

شيمي
====
ألف الف ألف شكر
معلش تعبتك معايا بطلباتي الكتير
مش عارف أقولك إيه؟
ربنا يوفقك و تبقي مصممة كبيرة قد الدنيا
------------------------------------
أم أحمد المصرية
=============
بجد بجد بتسعدني مشاركتك
هو حضرتك عندك حق في ان التعليقات مش هي كل حاجة
بس حضرتك قولتي برده انها بتبقى عاملة زي الترمومتر
و ده بجد هو أدق تعبير عنها
شكراً على مرورك
و آسف على تأخري عن متابعة تدويناتك

ميّويه said...

أنا عرفت التدوين علي ما اذكر من أختي "شيمي" وأنا الأول برضه كنت بكتب في المنتديات بعد كدة انقطعت عنها لسبب غير واضح
معرفش حاجة من جوايا كدة خليتني اسيب كووول المنتديات اللي انا مشتركة فيها
حسيت إن هي مسئولية
لازم بقي تتابع موضوعك وترد علي دة وتجاوب علي سؤال دة وأنا مش من النوع اللي بيحب الحكاية دي خصوصاً إن أنا ساعات مش بعد علي النت بإنتظام
فلما عرفت المدونة دخلت دماغي و حبيت فكرة إن يكون ليا صفحة خاصة بيا
أفكاري
انتقاداتي
آرائي
أي ي ي ي حاجة
بس عايزة أعلق علي الجزء"إن التعليقات سبب نجاح أو فشل المدونة"
هي صح نوعاً ما ..دة علي حسب شخصية المدوِن
ممكن يكون من النوع اللي بييأس بسرعة لو حد معبرهوش أو ممكن يكون من النوع اللي مايهموش حد وعايز يطلع اللي جواه وخلاص
بس بجد عالم التدوين دة فعلاً مفيش زيه لأنه بيوصل بين الناس ..بين الصغير والكبير ومن غير مايكون في أي فرق في طريقة المخاطبة

من انا؟؟ said...

حلو قوى لبوست ده كنت كتبت كده حاجه زيو بس على ادى يعنى اول لما عملت المدونه بتاعتى
وانا رايى ان المدونه دى بتتيح ليك فرصه اكتر انك تتعرف على ناس وتعرف رايهم ووجهات نظرهم وتفتح عقلك على عقول ناس تانيه
والتعليقات دى حاجه مهمه بس مش لدرجه انىاقفل المدونه بتعتى عشان مفيش تعليقات
ومش ضرورى اسم المدونه يعبر عن اللى جواها
انا بكتب عن كل حاجه واى حاجه تيجى فى بالى وتخلينى مستريحه لو كتبت عنها
وربنا يوفقنا كلنا

مهندس مصري بيحب مصر said...

فعلاً هو ده التدوين بس اسمع كلام ام شريف و ما تركزش في عدد التعليقات
و لكن ركز في مضمونها

رغم ان الواحد بيبقى عنده رغبة في زيادة عدد التعليقات على تدوينته
و زيادة عدد الزوار لمدونته و عدد الصفحات التي تصفحوها في مدونته

بس الأهم المضمون
:)

مدونة كويسة توحي ببداية قوية في عالم التدوين

nigro said...

ميّويه
====
كلامك صح جداً
التدوين بجد من أكتر وسائل التواصل الغير مباشرة احتراماً
شكراً على مرورك الجميل
-----------------------------------
مدونة من أجل الحب
==============
أنا متفق معاكي في رأيك في المدونات
بس المفروض ان المدونة من عنوانها أعرف هي بتتكلم عن ايه
أو على الأقل صحابها عايز يقول فيها إيه
نورتيني في زيارتك الأولى
---------------------------------
مهندس مصري
=========
شكراً ليك يافندم
أنا متفق مع نوران و معاك
شرفتني زيارتك الأولى