Saturday 23 February 2008

خير اللهم اجعله خير

أُوصي أنا المدعو / ...... الشهير بـ (نجرو) و أنا في كامل قواي العقلية والبدنية أن تذهب جميع ممتلكاتي و المكونة من وديعة نقدية ( قيمتها مائتان و خمسون جنيهاً ) و بعض الأوراق و ثلاث إيميلات و مدونة إلكترونية و تليفون محمول إلى والدتي السيدة/......

و ألا يتم البحث عن سبب قتلي (أقصد وفاتي) تجنباً لأي بهدلة لأهلي و أحبائي

و على إخواني المدونيين في حالة غيابي عن التدوين و التعليق لمدة أسبوع أن يضعوا لينكاً عندهم في مدوناتهم تحت عنوان ( هنا يرقد شهيد الأحلام )

قبل ما أحكي أي حاجة أنا عايز أقولكم إني بعتبر نفسي بليد.. بليد إيه؟.. بعتبر نفسي ساقط في مادة السياسة و أنا كمان مليش أي انتماء حزبي أو سياسي

إيه الحكاية بقى؟

الحكاية ببساطة أني حلمت.. و مش حلم عادي.. لأ.. حلم سياسي .. آه و الله.. هو ده اللي حصل

بس و الله و الله و الله أنا ماكنش قصدي إني أحلم..ده حصل غصبن عني

و علشان ما أرغيش كتير.. إليكم الوصف التفصيلي لأحداث الحلم

خير اللهم اجعله خير ( مع إنه مش باين له خير خالص) حلمت إني راكب في اتوبيس و كان سواق الأتوبيس هو.. هو.. هو السيد الرئيس محمد حسني مبارك

و كان معانا في الأتوبيس ابنه مستر جيمي (آه هو.. جمال مبارك)

المهم ركاب الأتوبيس ما تفهمش كده فجأة عملوا هيصة و قعدوا يزعّقوا و يقولوا عايزين نغيّر السوّاق عايزين نغيّر السواق.. و السواق ولا في دماغه

لحد ما دوشة الركاب و جعتله دماغه

قام علشان يسكّتهم قالهم: ماشي احنا نعمل استفتاء .. هنوزع عليكم ورقة مكتوب فيها: هل توافق على السيد جمال مبارك سائقاً للأتوبيس؟

و عندكم في الورقة خانتين.. خانة مكتوب قصادها "نعم" و خانة مكتوب قصادها "لا"

و انتم تختاروا.. يا كده يا مفيش تغيير سواق و اخبطوا دماغكم في الشبابيك

طبعاً احنا الركاب وافقنا من باب أي حاجة .. أهو تغيير و خلاص

الإستفتاء بدأ و الأوراق اتوزعت.. و الناس علّمت على اللي علّمت عليه

و بعد كده الورق اتلم و بدأ الفرز

لجنة الفرز دي كانت آخر مكان في الأتوبيس.. الخمس كراسي اللي جنب بعض ورا دول

بدأ الفرز.. الورق اللي مكتوب فيه "نعم" على اليمين و المكتوب فيه "لا" على الشمال

في الأول الورق اللي كان مكتوب فيه "نعم" كان مكتسح

بس بعد كده ( و على طريقة الأفلام الأمريكية )

الورق اللي مكتوب فيه "لا" بدأ يزيد لحد ما في النهاية بقى أكتر من ضعف المكتوب فيه "نعم"

و خلص الفرز

و قلنا للسواق : خلاص.. إحنا بقى اللي نختار من اللي يسوق

لقينا السواق وشّه احمر.. وقام قايم من على الكرسي و ساب الأتوبيس ماشي لوحده و رجع ورا عند الورق وقام شاطه برجليه و قالنا: تختاروا إيه يا ولاد الكلب .. أنا هنا اللي أقول مين يسوق و مين ما يسوقش

و قام واخد ابنه و قعّده مكانه على الكرسي.. كل ده والأتوبيس هسسسسسسس.. مفيش حِس.. خايفين و مرعوبين

و إلى هنا انتهى الحلم ( ولا باين عليه كابوس باين!! ) و صحيت من النوم و أنا بنهج و خايف

أمانة عليكم خدوا بالكم من الوصية اللي في الأول

18 comments:

shirry said...

انا اول تعليق
هيه هيه هيه
عاملو زي اللي لحق اول كرسي في الاتوبيس
ما انت من المحلة برضو وعارف شكل الاتوبيسات ايه
بس ايه الجرأة دي ازاي تحلم حلم زي دا
وجالك قلب تفضل نايم لحد ما الحلم يخلص
لاء وتصحي تحكي الحلم كمان

لاء لاء انت لازم تتعالج
والله لك حق تسيب وصيتك
يلا ربنا معاك وابقي اتغطي كويس المرة الجاية
جميل اوي البوست علي فكرة ومعبر عن الحال اللي احنا فيه
ويمكن دا مش حلم دا واقع
بالتوفيق

انين الحزن said...

يخرب عقلك

انت ازي تحلم حلم زي ده وبتقول غصبن عنك ودي فيها غصب دي دا حلم وبكامل قواك العقليه
الدنيا برد اليومين دول
اتغطي كويس احنا عيزينك يابني

يعني عليك يانجرو هيرووووووقك

طب انا هقول لمين سادسا دلوقتي


سلامووووووووز ياقمر

وزة

أخـت فـى الله said...

الله عليك ياعم النجرو
ايه يا بنى دة
لا بجد
عبقرى
واللى يمسكك
قوه دة حلم
وخير اللهم اجعله خير
طب بالمناسبة بقى
دة اتوبيس كام؟

Ahmed Mubarak said...

السيد الرئيس محمد حسني مبارك

امضي واقر وانا في كامل قواي العقليه اني مليش دعوة بالاخ محمد النجار في البوست دة واخلي المسئوليه كاملة
لأني مكنتش في الحلم ومكنتش معشيه ومليش دعوة بيه .. واخلي نفسي نهائيا من هذا الموضوع

الموقع
احمد مبارك

الـسـيـدة نـون said...

ايه يا نيجرو يا حبيبى انت تقلت فى العشا ولا ايه
بص نصيحة منى
ابقى اتغطى كويس
وبالنسبة للوصية ماتقلقش انا هاخد بالى من المتين وخمسن جنيه وهاخلى للست الوالدة الايميلات والمدونة
اهه انا مش طماعة
بس انت ماقلتليش هو اتوبيس كام بيروح فين
سلام
اختك خيخة

قبلة الحياة said...

نجرو .. احمد ربنا يا خويا انها جات لغايه كدا وان الريس حبيبنا الطيب الديمكراتي ما حدفكشي من شباك الأتوبيس ..

والدكاترة يا خويا بينصحوا في الحالات اللي زي كدا بعشا خفيف والابتعاد تماما عن المدعو الفول المسلح

وما تخافشي هلحق بالعيش والكوفته هو احنا لينا كام نجرو وكام رئيس طيب

يا منجي من المهالك يا رب

ربنا يجعل كلامنا وكلامك خفيف عليهم

قول آمين ..

بجد حلم .. تيرااااتيراااااااا مرعب

تقبل الكفته ومروري

ميّويه said...

خير اللهم اجعله خير
دة كابوس.. بعيد عنكم جميعاً.. إستحالة يكون حلم ابداً
انت اكلت إيه قبل ماتنام بالظبط ؟؟

الباحث عن الحقيقة said...

كويس انه طلع حلم
اخزى الشيطان واتغطى كويس
انت مش قد احلام الشتا
دى احلام تودى ورا الشمس
يعنى برد برضه

Empress appy said...

ده ملكش فى السياسه والله خير يا راجل بجد بس تصدق حلوة الوصيه عجبتنى جدا واقعيه طيب ممكن تسيب الباص وورد بتاعتك فى المدونه علشان نيجى نفتحها

khobayb said...

استعيذ بالله من الشيطان

ومتحكيش لحد ع الكابوس ده

ونام تاني !!

--

بس غالبا :

الأتوبيس هيلبس في أقرب شجرة !

فرنسا هانم said...

خير اللهم اجعله خير
معلشى محصلشى حاجه
ده حلم ورااااااااااااح
تحياتى لك
والوصيه واجبه التنفيذ
وبعدين الاتوبيس
كاوتشاته عماله تفرقع كاوتش وراء كاوتش

محمود الدوح said...

الله ياباشا انا اول مرة ادخل عندة ومعرفوش

اية يا عم دا انت عايز تودينا فى داهية

غير الحلم وخلينا نختار السواق من جديد واحنا هنختار انة يمشى لوحدة احسن

ولا اية

مدونتك جميلة جدا

رئيس جمهوريه نفسى said...

قشطات يا برنس اولا اليومين دول كانو برد شديد فا حاول تتغطى كويس ومتقلقش حيسوق حيسوق

ساعد نسرين الايمن said...

عشان ده مش يحصل يعني تاني
لازم تتغطي كويس
لازم تنامي بدري
لازم تركب مترو عشان مش تشوق اللي بيسوق اساسا
تبطل تتفرج علي اي برنامج بيطلع فيه سواق الهانم ده
تكتب لي حاجة في الوصية


رائع
تقبلي مروري الاول

simple girl.. ..simple dream said...

بعد كدة نام خفيف واتغطى كويس
احنا مش ناقصين لبش ومشاكل مع اللهم احفظنا البعدا
ربنا يجعل كلامنا خفيف عليهم

أخـت فـى الله said...

16 تعليق
ولسه نجرو مدخلش يرد عليهم
باين الحلم اتحقق ولا ايه
استر يا رب
انتااااااا فيييييين ياااااا نجرووووو

nigro said...

shirry
======
لا جرأة ولا حاجة دا حصل غصبن عني
أنا نايم لا بيّا وعليّا ألاقي الحلم ده نطّلي
و أنا بفكّر دلوقت في موضوع العلاج ده
تحياتي لك
-----------------------------------
أنين الحزن
========
وزة العسولة
و الله يا وزة غصب عني أعمل إيه في الأحلام و سنينها
ربنا يستر
سلاموووووووووووزات يا عسولة
-----------------------------------
شيمي
====
لا عبقرية ولا حاجة يا شيمي
تقدري تقولي ان أنا اتورّطت في الحلم ده
مش فاكر كان اتوبيس كام
-----------------------------------
ahmed Mubarak
============
يا سلام يا أبو حميد
إيه الشهامة دي يا جدع
بس خد بالك مع أول قلم هاعترف على زعيم التنظيم
و قابل بقى يا معلم
-----------------------------------
بت خيخة و أي كلام
===============
على فكرة يا نورا أنا تقريباً نمت يومها من غير عشا باين
بس انت جاية على نفسك قوى كده ليه؟
انت نسيتي الموبايل و لا إيه؟
يا رب دايماً كده منوّراني يا أم شريف
-----------------------------------
desert cat
=========
إيه يا قطقوطة انت داخله تسخّنيها ولا إيه؟
اخزي الشيطان امال
بس إيه المبادىء الإشتراكية دي؟
انت من الشيوعيين؟
طاااااخ
ردّي ع الباشا عِدل
-----------------------------------
قبلة الحياة
=========
الحمد لله رب العالمين
و أعوذ بالله من الشيطان الرجيم و أعوانه
ما تقلقيش أنا مش هاكل خالص بعد كده
غير بس الكفتة اللي انت تجيبيها
مش انت هتجيبيها برده ولا إيه؟
شكراً على مرورك الأول الجميل
-----------------------------------
ميّوية
====
أنا قلت برده إنه كابوس
يلا .. الحمد لله
تقريبا أنا يومها نمت خفيف
-----------------------------------
الباحث عن الحقيقة
===============
دا كان كابوس
اللهم عافنا مما ورا الشمس
شرّفتني زيارتك للمدونة
-----------------------------------
appy
====
آه و الله ما ليش في السياسة ولا أعرف بيجيبوها منين
ألا صحيح ..مش السياسة دي اسم طبيخ باين؟
:)
شكراً على مرورك الجميل و عايزين نشوفك تاني
-----------------------------------
خبيب
====
مبدئياً كده أنا اتضحلي ان أنا قريت اسمك غلط
طيب مش كنت كتبته بالتشكيل هنا كمان
على فكرة .. شالوا كل الشجر اللي على الطريق
و لسه بيشيلوا فيه
ربنا يستر و نعرف نتنفّس بعد كده
:)
تحياتي ليك
-----------------------------------
فرنسا هانم
========
بالنسبة للكاوتش.. الإستبن موجود
انما المشكلة ان كراسي الأتوبيس كلها مكسّرة و مش عارفين نقعد
ربنا يستر
-----------------------------------
محمود الدوح
=========
مفيش تغيير
يا كده يا بلاش
على فكرة هو برده ماشي لوحده
ولا انت حاسس ان فيه حد سايق
غير الهبل ع الشيطنة طبعاً
شكراً على مرورك الجميل
-----------------------------------
رئيس جمهورية نفسي
===============
انت شايف كده؟
على العموم انت أدرى مننا
انت قاعد في كابينة السواق و عارف
تحياتي
-----------------------------------
ساعد نسرين الأيمن
=============
أنا هبطّل أنزل الشارع خالص
بس أنا زعلان منك
ليه ماجبتش ساعد نسرين الأيسر معاك
انتم متخاصمين؟
شرفتني زيارتك الأولى
-----------------------------------
simple girl.. ..simple dream
===========================
قصدك نقابة السواقين؟
ولا شرطة المرور؟
حدّدي
شكراً على زيارتك الأولى

الـسـيـدة نـون said...

اه تخيل نسيت الموبايل
الا موبايلك ماركته ايه يا نيجرو
ويجيب كام لو اتباع