Thursday 28 February 2008

بيني و بيني

أنا : إيه مالك؟

أنا برده : نعم؟!!

أنا : إيه يا عم أنا بسألك مالك

أنا برده : مالي يعني؟!! , مانا زي الفل أهوه

أنا : يا رااجل!! عليّا أنا الكلام ده؟! ؛ شكلك متضايق

أنا برده : إنت هتضايقني غصب عني ولا إيه؟

أنا : حاسس إنك غلطان و عاوز تقول : أنا آسف, صح؟

أنا برده : لأ

أنا : اتكلم مفيش حد غريب.. ده أنا مرايتك

أنا برده : ملايتك إزاي يعني؟

أنا : ماااشي.. اتّريق براحتك.. بس إنت برده متضايق

أنا برده : أيوه متضايق.. خلاص استريحت؟

أنا : طيب ليه كده؟.. تشيل في نفسك ليه؟.. غلطان. قول أنا غلطان و اتأسّف

أنا برده : آآآه.. علشان اللي حواليّا يقولوا عليّا شخصيتي ضعيفة و مش راجل؟.. انت عبيط يا بني ولا إيه؟!!

أنا : و انت فاكر لما تبقى غلطان و تآوح و تكابر.. بكده هيقولوا عليك راجل و شخصيتك قوية؟

أنا برده : آه طبعاً

أنا : مُغفّل

أنا برده : انت هتلبّخ ولا إيه؟

أنا : و جبان كمان

أنا برده : شكلي كده هامدّ ايدي عليك

أنا : مُغفّل لإنك بتشغل بالك بكلام الناس.. و الناس كده كده بتتكلم و مش هيبطلوا أبداً كلام.. و جبان لإنك بتخاف تواجه أخطائك و تعترف بيها.. يا بني الاعتراف بالخطأ و الاعتذار دول قمة القوة

أنا برده : انت قريلك كلمتين و جاي تتفلسف بيهم عليّا ولا إيه؟

أنا : طيب تفسّرلي بإيه انك متضايق؟

أنا برده : و انت مالك

أنا : مش بقولّك جبان

أنا برده : يوووووه.. لأ مش جبان.. بس أنا مش بحب أبان ضعيف.. أيوه أنا عارف إن اللي أنا بعمله دا غلط.. و ببقى متضايق كمان من نفسي.. بس أعمل إيه؟.. أنا بحب أعرف الناس و الناس يعرفوني.. مش بحب أبقى لوحدي.. والناس بيحبوا اللي شخصيته قوية و جريء.. الضعيف ملهوش بينهم مكان ولا حتى بيفتكروه.. فلازم أبان إن أنا قوي و جريء و مش بيهمني حد علشان أبقى معروف و مميز و الناس تحب تتعرف عليا.. فهمت؟!!

أنا : يا عبيط أنا عاوز مصلحتك و مش عاوزك تزعل مني.. بس تفكيرك ده غلط.. لو عشت على طبيعتك و بقيت حقيقي مع نفسك و مع الناس هتبقى فعلاً مميز.. الناس آه ممكن يعجبهم الجريء و اللي صوته عالي و مش بيخاف بس في الحق مش في الغلط.. صدقني الناس هتحترمك أكتر لو شافتك قادر تواجه أخطائك.. إوعاك تفكّر إن كلمة " آسف.. أنا غلطان " تعتبر ضعف.. لأ.. دي قمة القوة و احترام النفس و الغير.. الناس هتحبّك و تحب تعرفك لو كنت محترم ومؤدب مش بجح و صوتك عالي ع الفاضية والمليانة

أنا برده : تفتكر؟

أنا : جرّب

23 comments:

رئيس جمهوريه نفسى said...

الحق اول كومنت

رئيس جمهوريه نفسى said...

بص يا باشا هو تقريبا التدوين ده موضه وموضه الاسبوع ده حسب ما جادت قريحه بيوت افكارالمدونيني الاحاديث مع النفس بص كون نفسك وبس والى عاجبه طبيعتك اهلا بيه والى مش عجباه اعرف انه منافق وابعد عنه بس اهم حاجه متتلونش كل شويه حسب رغبت الى حواليك خليك ماشى بلونك وراسم نفسك بس

بطوط حبوب said...

بص اسمع كلام انا برده وسيبك من كلام انا
انا برده شكله بيفهم
حتى لو كانوا الاتنين انت
بس انا حاسس ان غباءك بيتكلم من ذكائك فاسمع كلام ذكائك

ميّويه said...

السلام عليكم
طب والله نصائح حلوة والبوست عجبنييييي أوي أنا من رأيي إن الواحد لو مضايق يعمل حديث مع نفسه زي دة كدة

ميّويه said...

ابقي اجربها

قبلة الحياة said...

اولا مساء الخير عليكم انتم الاتنين انت .. وانت بردو

انا مع الاخ جمهوريه نفسه ان انت تكون انت .. يعني ما ينفعشي ان الانسان يتلون بألوان مختلفه على حسب الاحداث والمواقف والناس اللي بتمر عليه

بالعكس لازم يكون نفسه هو في كل المواقف ومع كل الناس والناس تحبه كشخص وكوحده كامله بدون تجزيء

أما عن الاعتذار فالاعتذار قوة وليس ضعف كما ان العفو عند المقدره ايضاً من قوة الايمان

المهم ان كلمة آسف ما تبفاش دائما سهله على السنتنا لان سامحتك مش هيكون سهل تكرارها

اسعدني مروري على افكارك انت وانت التاني اخوك

لك خالص التحيه والاحترام

dina said...

الله
انا سمعت الحوار دا فيين قبل كدا
الناس كلها بتقول الكلام دا مع نفسها فى لحظات و برافو انك عرفت تبين اللحظة دى

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته

شئ جميل ان الانسان يقعد مع نفسه

وياخد ويدي معاها في الكلام

ما جايز تكون هي شايفة حاجة مشيفها انت

ولا ايه

تحياتي

ويسعدني زيارتكم

The Queen said...

ازيك يا باشا

دي اول زيارة ليك وبصراحة عجبني البوست جدا فكرة حلوة اوي وحديث بالضبط زي اللي بيدور بين كل واحد ونفسه لكن ياريت الصح هو اللي ينتصر دايما زي ما شفت معاك كده ..

كتير بعمل زيك بس المشكله عندي اني بنتظر احساس اللي قدامي بالغلط والاعتذار حتى من غير كلمة آسف لاني بحس انه بيقولها وهي تقيله عليه وبالرغم انه بيكون غلطان فيا بس مش بحب ارهقه بالاعتذار يكفي انه يوصلني شعوره بالاسف .. انت ممكن تعمل كده لو حسيت انك غلطت في حق انسان في يوم من الايام توصله احساسك واعتذارك باي شكل رقيق لو كلمه اسف دي هتكون تقيلة عليك ..

تحياتي

nigro said...

رئيس جمهورية نفسي
===============
على فكرة يا ريس البوست ده انا كاتبه من فترة
بس الظروف ما سمحتش ان انشره
بالنسبة للموضوع انا ما قصدتش اني بتلون حسب رغبات اللي قدامي
اللي قصدته اني احيانا ببقى غلطان و بكابر و ما اعترفش بغلطي
علشان اللي قدامي ما يفتكرش اني ضعيف و سهل
مع اني ببقى نفسي أتأسف على غلطي
و بس
منورني يا متر
-----------------------------------
بطوط حبوب
========
لخّصت انت الحاتين اللي كنت فيهم بكلمتين
غبائي و ذكائي
يا سلام عليك
شرفتني زيارتك
-----------------------------------
ميّوية
====
الحديث مع النفس يا مي بجد حاجة صعبة
محتاج ان الواحد يكون عنده ثقافة التمييز بين الصح و الغلط
و في الآخر يستجيب لصوت الصح
و ده الأصعب
نورتي المدونة يا مي
-----------------------------------
قبلة الحياة
=========
بغض النظر عن الموضوع
انا بستمتع بجد بطريقة استخدامك للألفاظ
بتعجبني قوي
ممكن ترجعي لردي على محمود و انتي تفهمي الحالة اللي كنت فيها
و بالنسبة لفلسفتك في الإعتذار
أنا معاك تماماً
كلمة السماح أنا ما بكررهاش.. هي مرة واحدة
أنا اللي أسعدني مرورك
-----------------------------------
dina
====
أشكرك على كلامك الجميل
و شرفتني زيارتك الأولى
-----------------------------------
الجمعاوي الأصيل
============
و عليكم السلام و رحمة الله و بركاته
بس المهم ان الواحد يكون اصلاً بيعرف يميّز بين الصح و الغلط
دا أنا اللي أسعدتني زيارتك جداً
أدام الله التواصل
-----------------------------------
the queen
========
حطّيتي ايدك على مربط الفرس
يا ريت الصح هو اللي ينتصر دايما
تصدقي بالله لولا ان انا عارف اني شخص واحد مش شخصين
و ان انا كمان ولد مش بنت
كنت فكّرت ان اللي كتب التعليق ده هو أنا
هي دي بالظبط الفلسفة اللي بتّبعها في الحالات اللي زي
أسعدني جدا مرورك
و في انتظارك مرة تانية

Ahmed Al-Sabbagh said...

صديقى العزيز

بصراحة البوست ده جميل اوى

اولا الفكرة حلوة وكمان المضمون حلو

فكرة حوار مع النفس دى انا بحبها اوى وبتشدنى

افتكر نوران - بت خيخة كتبت عنها قبل كدة بس طبعا باسلوب مختلف

بجد البوست عجبنى

تسلم ايدك

وتقبل تحياتى

أحمد الصباغ

الـسـيـدة نـون said...

اولا ارجوك اقرا بوست لما كنت عايزة بلكونة هتلاقيه عندى فى ارشيف شهر نوفمبر اللى فات
حاجة قريبة فكرتها من فكرة البوست بتاعك
كان حوار برضه مع نفسى


المهم بقى
ايوة يا محمد
الاعتذار عن الخطا قمة الاحترام والقوة
صدقنى
مش عيب ان تغلط
لكن العيب انك ماتعتذرش على الغلط
لان ده هيعمل حواجز كتير اوى بينك وبين الناس

تحياتى على البوست الدماغ ده
سلام
اختك خيخة

فرنسا هانم said...

اوعى تتهور وتمد ايدك على نفسك لحسن تشتكيك فى القسم وتعملك محضر
وبعدين انا شايفه ان كلامها صح

Empress appy said...

هى كل الناس بقت بتكلم نفسهااليومين دول الا انا الحمد لله ........يوا امشى يا نفسى سيبينى اكتب بس ههههههه
المهم بص لو انتعارف ايه غلطك او عيوبك صلحها

simple girl.. ..simple dream said...

ياريت كل الناس تحس باهمية انها تعتذر لما تغلط
دة مش هيقلل من قيمته بالعكس
دة دليل انه محترم وواثق من نفسه
شكرا انك بينت الجزء دة

بنوته مصرية said...

بوست جميل جدااا
كل واحد عارف ايه عيوبة والمشكله اننا بنكابر ومنحبش حد يقولنا انتم غلط
بس احنا من جوانا عارفين اننا غلط

ياريت نفسك تغير غلطك وتصلحه

انا مع نفسي بفضل اعاتبه وبحس اني غلط في غلط وبحاول اصلح الاخطاء علي قدر ما بقدر
بصراحه عجبني البوست اووي
لك خالص تحياتي

Unknown said...

اخى الفاضل
هذه زيارتى الاولى لك وكم كانت سعادتى بما اطلعت عليه من موضوعات جعلها الله فى ميزان حسناتك وبوست جديد والله عجبنى
ونحن جميعا محتاجين نفضفض مع نفسنا شوية يمكن نستريح مما نحن فيه
-----------------------
اخى الفاضل
انا من مؤسسى اتحاد المدونيين المصريين وادعوك للتواصل معنا من اجل اتحاد قوى يضم جميع مدونى مصر للعمل على تقنين حقوقنا وحماية المدونيين والرقى بعملية التدوين
فى انتظار تواصلك معنا على مدونة الاتحادhttp://egyptadwin.maktoobblog.com
------------------------
للعلم انا عملت هذه المدونة للتواصل مع مدونى موقع البلوج سبوت
فاتمنى مساعدتى للرقى بها
شكرا لكم مقدما

Zika said...

طريقتك في العرض ظريفه جدا
ورغم كده حسيت بالمعني اللي انت عاوز توصله
خصوصا اني كنت مشغل موسيقي فيلم اوقات فراغ
تحياتي عالمدونه
وعالبوست

أخـت فـى الله said...

على فكرة انت تنفع سيناريست كبيييير
اه والله
يمكن يوم من الايام اشوفك على افيشات الافلام
ايييييييه حظووووووظ

انين الحزن said...

نيجرو

انا اتاخرت عليكم انتو الاتنين

انت والتاني دا

عامل مشاكل ديما يانجرو حتي مع نفسك

بس عارف بجد جامد الحوار الا بينك وبينك دا
كان نفسي توصل لخناقه
....
وصلني سلامك ياباشا ربنا يخليك ليا وتفضل تسئل عليا علي طول

سادسا :ـ سلامووووووز ....... وزة

nigro said...

أحمد الصباغ
=========
تسلم يا حبيب قلبي
و الله زيارتك دي فرّحتني جدا
يا رب دايما كده مفرّحني(:
-----------------------------------
بت خيخة و أي كلام
===============
بصي نوران هي نوران
لازم تبقى ليها بصمة على أي حاجة تكتبها
إيه ده .. انت كان المفروض انك رفعتي قضية على نفسك
دي مرمطتك خالص
أنا معاكي تماماً بس عارفة كوني ولد أحياناً موضوع الإعنذار ده بيحزّ في نفسيتي
بس علشان أن قلبي طشيب و رهيف بعتذر
يلا بقى ما أنا غلطاتي برده بتبقى جامدة
منوراني يا نونا
-----------------------------------
فرنسا هانم
=========
و الله أنا بقول كده برده
بس تعملي إيه؟
الولاد دول دماغهم دزمة
نورتي المطرح يا هانم
-----------------------------------
appy
====
يااااااه ده أنا تقريباً كده بكلّم نفسي من ساعة ماتولدت
على فكرة يا آبي تصليح العيوب ده مش حاجة سهلة
و قرار يتاخد في قعدة
ده عايز قوة شخصية و صبر
و يجعله عامر
-----------------------------------
simple girl.. ..simple dream
============================
و الله أنا صقفتلك على الكلمتين اللي قولتيهم دول
بس تعملي إيه؟
ثقافة الإعنذار و ثقافة تقبّل الإعتذار مش موجودين في مجتمعنا
ربنا يهدي
أسعدني جدا مرورك
-----------------------------------
desert cat
==========
الله يخليكي
انت اللي أكوس و الله
عارفة يا قطة المشكلة مش في الإعتذار
المشكلة اللي قدامك هيتقبّل الإعتذار ده إزاي
-----------------------------------
بنوتة مصرية
==========
نفس المشكلة
احنا بنكابر علشان عارفين ان اللي حوالينا مش هيفهموا اعتذرنا ده صح
مش بنكابر خلفة فينا يعني
أشكرك شكاير على كلامك الجميل ده
-----------------------------------
حسن توفيق
========
أسعدني مرورك الكريم
و اعجابك بموضوعاتي البسيطة
وفققك الله في عملك هذا و جعله في ميزان حسناتك
ان شاء الله أستطيع تلبية طلبك
-----------------------------------
zika
====
يا دماغك العالية يا معلم
الله يخليك يا باشا على كلامك ده
و ان شاء الله أشوفك تاني
-----------------------------------
شيمي
====
حمدلله ع السلامة
الله يخلّيكي يا رب
انت دايماً كده رافعة معنوياتي جااااامد
بس إن شاء الله يكون الأفيش ده من تصميم شركتك
-----------------------------------
أنين الحزن
========
وزة
إيه يا بنتي كل ده؟
انت تدخّليwireless بقى و تريحي دماغك
أعمل إيه في نفسي دي؟ يا وزوزة
دايماً محيراني
يلا أديني صابر عليها
يا باشا انت غالي علينا ولازم نسأل عليك
سادساً : سلاموووووووووووزات يا عسولة

الباحث عن الحقيقة said...

وده زعل ولا حساسية
ولا انت نسيت تغسل وشك الصبح فبالليل بقيت كده؟؟؟
هههههههههه
الاعتذار مش ضعف
بالعكس الضعيف هو اللى يقدر يواجه نفسه اولا ويعلمها ان الاعتذار والاعتراف بالخطأ ده شئ يزيد نفسك شرف وعزة وكرامة ويخليك انسان بجد قدام نفسك وقدم الاخرين
وانا اسف لو كان هزارى زعلك
بس بجد بجد ده زعل ؟ لالال شكلها حساسية
بلاش تحك فى صدرك كتير
تقبل تحياتى

nigro said...

الباحث عن الحقيقة
==============
يا أفندم انت تهزر براحتك ولا يهمك
بالنسبة لكلامك
آه عندك حق
مش في اللي قولته
لا.. في ان ده كان زعل
ههههههه
طبعا كلامك سليم و أنا متفق معاك
بس اللي يفهم